Yerusalem e prenki den falsi Kresten kerki?

Na ini a ten di pasa den buku fu wi ben taki dati Yerusalem e prenki den falsi Kresten kerki. A no de fu taki dati den sani di ben pasa na ini Yerusalem e memre wi na den sani di den falsi Kresten kerki e du. Den e anbegi falsi gado tu èn den e du kruka sani. Ma na ini den lasti buku di wi skrifi èn na ini a buku disi wi e taki dati wan Bijbel tori e prenki wan moro bigi sani, soso te Bijbel srefi e sori krin taki dati de so. Bijbel e sori taki Yerusalem e prenki den falsi Kresten kerki? Nôno.

Prakseri a sani disi: Fosi, Yerusalem ben de a presi pe sma ben go fu anbegi a tru Gado. Bakaten den sma na ini Yerusalem drai baka gi Yehovah èn den go dini falsi gado. Ma te wi e luku den falsi Kresten kerki, dan wi e si taki noiti den dini a tru Gado. Sensi di den kerki disi kon de baka a yari 300, den e leri sma sani di no tru.

Wan tra sani na taki baka di den Babilonsma pori Yerusalem, Yehovah gi den sma fu Yerusalem pardon èn a meki sani bun baka nanga den. A foto tron a presi baka pe sma ben e dini a tru Gado. Ma noiti Yehovah ben feni den falsi Kresten kerki bun èn baka te a o pori den na a ten fu a bigi banawtu, dan noiti moro yu o abi falsi Kresten kerki.

Te wi prakseri ala den sani disi, dan san dati e leri wi? Te wi e si fa den profeititori di ben taki fu Yerusalem kon tru, dan kande wi kan taki: ’Na den srefi sani den falsi Kresten kerki e du na ini a ten disi.’ Ma wi si taki Bijbel no e sori taki Yerusalem e prenki den falsi Kresten kerki.