LES 14

Tyari den moro prenspari sani kon na krin

Hebrewsma 8:1

SAN YU MUSU DU: Meki en makelek gi den arkiman fu frustan a lezing fu yu. Te yu e taki fu ibri edepenti, dan meki a kon na krin san yu wani doro nanga a lezing èn sori fa den edepenti e horibaka gi a nen fu a lezing.

FA YU KAN DU DISI:

Sabi san yu wani doro nanga a lezing. Luku efu a lezing fu yu na fu meki sma kon sabi wan sani, fu overtoigi den fu wan tori noso fu gi den deki-ati fu du wan sani. Dan hori a lezing na so wan fasi taki yu kan doro a marki dati. Sorgu taki ala den edepenti e yepi yu fu du dati.

Aksi yusrefi: ’Sortu aksi den arkiman ben kan abi fu a tori disi noso sortu sani kan muilek gi den fu frustan?’ Te yu piki wan aksi kaba, dan prakseri sortu tra aksi den ben kan abi fu a tori. Baka dati, seti yu lezing na so wan fasi taki a e piki den aksi di den arkiman ben kan abi èn meki en makelek gi den fu frustan san yu wani leri den.
Meki a kon na krin fu san a lezing e taki. Na ini a heri lezing fu yu a musu de krin gi den arkiman fu sortu tori yu e taki. Fu kan du dati, dan ibri tron baka yu musu kari prenspari wortu di abi fu du nanga a nen fu a lezing.
Sorgu taki den edepenti kon na krin èn taki den makelek fu frustan. Taki soso fu prenspari penti di abi fu du nanga a lezing èn di yu kan fruklari bun na ini a ten di yu kisi. A lezing fu yu no musu abi tumusi furu edepenti. Taki krin san na den edepenti, wakti pikinso fosi yu bigin taki fu wan tra edepenti èn no aka-aka te yu e du dati.

Yu kan taki fu den edepenti na a bigin fu a lezing so taki a kan makelek gi den arkiman fu frustan a lezing. Noso yu kan kari den edepenti na a kaba fu yu lezing so taki den arkiman kan memre den.