YU BEN SABI A SANI DISI?
San ben de a wroko fu wan legre-edeman fu Rome?
Wan stonpopki fu a legre-edeman Marcus Favonius Facilis
Den Kresten Griki buku fu Bijbel e taki wan tu leisi fu legre-edeman fu Rome. A srudati di ben kisi a frantwortu fu strafu Yesus ben de wan legre-edeman, èn Kornelius a fosi trakondre sma di tron wan Kresten ben de wan legre-edeman tu. A srudati di ben musu sorgu taki sma wipi Paulus, èn sosrefi Yulius di ben abi a frantwortu fu tyari Paulus go na Rome ben de legre-edeman.—Markus 15:39; Tori fu den apostel 10:1; 22:25; 27:1.
Wan legre-edeman ben de edeman fu sowan 50 te go miti 100 srudati. A ben abi a wroko fu leri den fa fu feti, èn fu sorgu taki den du den wroko bun. A ben musu luku tu taki den krosi nanga den fetisani fu den ben bun èn a ben musu taigi den san den ben musu du te den ben go feti.
A moro hei posisi di wan srudati ben kan kisi, na fu tron legre-edeman. Den srudati di ben e tron edeman ben musu man teki fesi bun. Den legre-edeman ben musu sorgu taki sani waka bun na ini a makti legre fu Rome so taki den ben kan wini feti. Wan buku e taki dati „nofo tron den legre-edeman ben sabi feti bun èn den ben sabi ala sani di abi fu du nanga a legre”.
Fa den spikri fu owruten e difrenti fu den wan fu a ten disi?
Wan owruten spikri fu Egepte
Na ini a ten disi wi sabi grasi spikri, ma na ini Bijbel ten sma ben e meki spikri fu kopro, solfru, noso gowtu. Den ben e brenki den sani disi, so taki yu ben kan si yusrefi. A fosi leisi di spikri kari na ini Bijbel, na di den ben e meki a tabernakel, pe Israel ben e anbegi Gado. Den umasma ben gi spikri fu meki a santa kopro beki nanga den futu fu en (Eksodes 38:8). A musu de so taki den ben e smèlter den spikri fu man meki a beki disi.
Furu fu den spikri di sabiman feni di den diki na ini a kontren fu Israel, ben abi gowtu nanga tra moimoi sani di umasma lobi gebroiki. Den spikri disi ben lontu, èn na anu fu den ben meki fu udu, kopro, gowtu, noso ivoor. Na anu fu den spikri disi ben meki leki wan umasma. Nofo tron a sei fu a spikri di no ben e brenki, no ben abi moimoi sani.
Den spikri dati no ben e brenki so, leki den grasiwan fu a ten disi. Now wi kan frustan san na apostel Paulus ben wani taki nanga den wortu disi: „Nownow wi e luku na ini wan spikri pe wi no man si sani krin.”—1 Korentesma 13:12.