A kotiwroko ben bigi!

YESUS ben taki na fesi taki den bakaman fu en ben o du wan bigi kotiwroko na ini a ten fu a kaba (Mat. 9:37; 24:14). Luku fa den wortu fu en kon tru na wan moi fasi na ini a kontren fu Transcarpathia, na ini Ukraini. Na ini a kontren disi yu abi dri foto di de krosibei fu makandra. Na ini den foto disi yu abi 50 gemeente èn moro leki 5400 preikiman.a Fu taki en leti, 1 fu ibri 4 sma na ini den dri foto disi na wan Yehovah Kotoigi.

Fa a de fu preiki na ini a kontren disi? Vasile, wan brada di e libi drape, e taki: „Den sma na ini a kontren disi abi furu lespeki gi Bijbel, den lobi du san reti, den lobi yepi makandra èn den famiri lobi de nanga makandra.” A e taki tu: „A no ala ten den e agri nanga den sani di wi e bribi. Ma te wi e sori den wan sani na ini Bijbel, den e arki bun san wi e taki.”

Ma a no ala ten a makriki gi wi brada nanga sisa fu preiki na ini wan kontren pe so furu Kotoigi de. Fu eksempre, wan fu den gemeente abi 134 preikiman, ma 50 oso nomo de na ini a kontren. Fa den preikiman e preiki drape?

Furu brada nanga sisa e du muiti fu go preiki na kontren pe moro preikiman de fanowdu. Ionash, wan brada fu 90 yari e taki: „Na ini a kontren fu wi ibri preikiman abi soso tu oso fu preiki. Mi ben e preiki na ini a dorpu pe mi ben e libi, ma mi ben go preiki tu na wan kontren pe gemeente no ben de. A kontren disi ben de sowan 160 kilometer moro fara èn mi ben preiki na ini Hongariatongo. Mi no man du dati moro fu di mi gosontu no de so bun now.” Preikiman musu meki furu muiti fu kan preiki na tra kontren. Ionash e taki: „Mi ben wiki 4 yuru mamanten fu go teki a loko, èn mi ben preiki teleki 6 yuru bakadina te a loko ben gowe baka. Mi ben du disi tu noso dri leisi wan wiki.” Fa a ben feni en fu du a sani disi? A e taki: „A preikiwroko ben gi mi furu prisiri. Mi ben man yepi wan famiri di ben libi na wan kontren pe gemeente no ben de, fu tron Kotoigi.”

A no ala sma na ini den gemeente na ini a kontren disi kan go preiki na farawe kontren. Toku ala den preikiman e meki muiti fu preiki gi ala sma na ini a kontren fu den. A bakapisi na taki na ini 2017, afu fu ala den sma di ben libi na ini den dri foto disi kon na a Memrefesa. A de krin taki, awinsi pe wi e dini, ’furu de fu du ete na ini a wroko fu Masra’.​—1 Kor. 15:58.