Joe kan wiki a belangstelling baka?
1 „Kolokoe foe den wan di e froestan den jeje nowtoe” (Mat. 5:3). Den wortoe dati foe Jesus ini a Bergipreiki wani taki foeroe sani. A no foeroe sma foe libisma famiri e si taki den abi jeje sani fanowdoe so taki den kan abi wan kolokoe libi èn wan marki ini libi. Son wan de, di ben abi a sabi dati, foe den jeje fanowdoe ma ben lasi dati. Wan sani ben meki taki den ben kon kowroe ini jeje afersi. Den ben drai komoto foe dati san troetroe ben boen gi den. Na aksi de: Wi kan wiki a belangstelling foe den wan dati baka? Kolokoe a kan gi son wan foe den.
2 Kande joe sabi wan sma di ben studeri bijbel nanga Jehovah Kotoigi jari langa, kande di a ben de wan pikin-nengre, ma a no ben go doro foe moksi ensrefi nanga Gado pipel. Ma, son bijbel leri nanga regtfardiki gronprakseri kande ben tan ini a prakseri foe a sma, dati èn a e memre den ete. O moro den grontapoe afersi e kon takroe èn situwâsi ini libi e kenki, a sma kan go denki baka foe den sani di a ben leri fosi èn a kan drai kon na Gado èn kan sori taki a wani teki moro bijbel sabi. Foe go baka na den sortoe sma dati, nanga a marki foe bigin studeri nanga den baka, kan sori taki a e pai srefisrefi.
3 A no de foe taki, dati ten na ten wi moesoe doe moeiti foe go baka na den wan di ben fisiti a Memrefesa. Meki den sabi taki na wan opregtifasi joe e broko joe ede foe a go boen nanga den na jejefasi, èn pristeri foe studeri bijbel nanga den. Spesroetoe moeiti moesoe doe foe jepi den wan di ben fisiti a „Tjariman foe leti” distriktkongres so srefi. Ini son kefal a kan boen srefisrefi efoe wan tra preikiman ben go na wan sma di ben tapoe nanga a studie foe di a no ben go na fesi.
4 A no de foe taki, taki wi e froewakti foe sma nanga san wi e studeri taki den teki na anbegi foe Jehovah serjoesoe èn e sori taki den de fajafaja ini den bijbelstudie. Ma foe wi sei, wi wani de seiker taki wi ben meki nofo moeiti foe jepi den èn taki wi kan firi gi trawan neleki na apostel Paulus ben taki: „Mi krin foe a broedoe foe ala sma.” — Tori. 20:26.