NUMERI

1 Ngelilanga lekucala lenyanga yesibili, emnyakeni wesibili baphumile eveni laseGibhithe,+ Jehova wakhuluma naMosi ethendeni lekuhlangana,+ ehlane laseSinayi.+ Watsi kuye: 2 “Kuso sonkhe sive saka-Israyeli* bala+ bonkhe* labadvuna, ubabale ngemindeni yabo, nangelusendvo lwabo, futsi ubabhalise ngemabito abo. 3 Esiveni saka-Israyeli, wena na-Aroni kufanele nibhalise bonkhe labaneminyaka lesukela kulengu-20 kuya etulu+ labangaya emphini, futsi kufanele nibabhalise ngemacembu abo.

4 “Kuleso naleso sive nibotsatsa lomdvuna abe munye. Loyo muntfu utawuba yinhloko yendlu yakubo.+ 5 Nankha emabito alamadvodza latawunisita: KaRubeni kutawuba ngu-Elisuri+ indvodzana yaShedewuri; 6 kaSimeyoni kutawuba nguShelumiyeli+ indvodzana yaSurishadayi; 7 kaJuda kutawuba nguNasoni+ indvodzana ya-Aminadabi; 8 ka-Isakhari kutawuba nguNethaneli+ indvodzana yaSuwari; 9 kaZebuloni kutawuba ngu-Eliyabe+ indvodzana yaHeloni; 10 emadvodzaneni aJosefa kutawuba ngunaba: ka-Efrayimu+ kutawuba ngu-Elishama indvodzana ya-Amihudi; kaManase kutawuba nguGamaliyeli indvodzana yaPhedasuri; 11 kaBhenjamini kutawuba ngu-Abidani+ indvodzana yaGidiyoni; 12 kaDani kutawuba ngu-Ahiyezeri+ indvodzana ya-Amishadayi; 13 ka-Asheri kutawuba nguPhagiyeli+ indvodzana ya-Okrani; 14 kaGadi kutawuba ngu-Eliyasafa+ indvodzana yaDehuweli; 15 kaNaftali kube ngu-Ahira+ indvodzana ya-Enani. 16 Laba ngibo labakhetfwe esiveni saka-Israyeli, futsi babaholi+ betive tabobabe wabo kanye nebaholi betinkhulungwane tema-Israyeli.”+

17 Ngako-ke boMosi na-Aroni bawatsatsa lamadvodza labekhetfwe nguNkulunkulu. 18 Ngelilanga lekucala enyangeni yesibili, bahlanganisa onkhe ema-Israyeli kuze kubhaliswe ngamunye ngamunye kuwo, ngemabito abo, ngemindeni yabo kanye nangetindlu tabo, kusukela kulabo labaneminyaka lengu-20 kuya etulu,+ 19 njengobe nje Jehova abetjele Mosi. Ngako-ke wababhalisa ehlane laseSinayi.+

20 Emadvodzana aRubeni, lokubantfwana belitibulo la-Israyeli+ abhaliswa ngemabito awo, ngemindeni kanye nangetindlu tawo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 21 Sebabonkhe lababhaliswa esiveni sakaRubeni baba ngu-46 500.

22 Bantfwana baSimeyoni+ nabo babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 23 Sebabonkhe lababhaliswa esiveni sakaSimeyoni baba ngu-59 300.

24 Bantfwana baGadi+ nabo babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 25 Sebabonkhe lababhaliswa esiveni sakaGadi baba ngu-45 650.

26 Nebantfwana baJuda+ babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 27 Sebabonkhe lababhaliswa esiveni sakaJuda baba ngu-74 600.

28 Nebantfwana ba-Isakhari+ babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 29 Sebabonkhe lababhaliswa esiveni saka-Isakhari baba ngu-54 400.

30 Bantfwana baZebuloni+ nabo babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 31 Sebabonkhe lababhaliswa esiveni sakaZebuloni baba ngu-57 400.

32 Bantfwana baJosefa labavela ku-Efrayimu+ nabo babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 33 Sebabonkhe lababhaliswa esiveni saka-Efrayimu baba ngu-40 500.

34 Nebantfwana baManase+ babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 35 Sebabonkhe lababhaliswa esiveni sakaManase baba ngu-32 200.

36 Nebantfwana baBhenjamini+ babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 37 Sebabonkhe lababhaliswa esiveni sakaBhenjamini baba ngu-35 400.

38 Bantfwana baDani+ nabo babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 39 Sebabonkhe lababhaliswa esiveni sakaDani baba ngu-62 700.

40 Bantfwana ba-Asheri+ nabo babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 41 Sebabonkhe lababhaliswa esiveni saka-Asheri baba ngu-41 500.

42 Nebantfwana baNaftali+ babhaliswa ngemabito abo, ngemindeni kanye nangetindlu tabo. Kwabalwa umuntfu ngamunye lomdvuna loneminyaka lesukela kulengu-20 kuya etulu futsi longaya emphini. 43 Sebabonkhe lababhaliswa esiveni sakaNaftali baba ngu-53 400.

44 Bonkhe laba babhaliswa nguMosi akanye na-Aroni nebaholi labangu-12 baka-Israyeli labamelela tindlu takubo. 45 Onkhe ema-Israyeli laneminyaka lesukela kulengu-20 kuya etulu futsi langaya emphini abhaliswa ngetindlu tawo. 46 Sebabonkhe lababhaliswa baba ngu-603 550.+

47 Kodvwa emaLevi+ ngekwemindeni yabobabe bawo akazange abhaliswe kanye naleletinye tive.+ 48 Ngako naku Jehova lakutjela Mosi: 49 “Sive sakaLevi ngiso kuphela lokufanele ungasibhalisi, futsi linani laso ungalihlanganisi kanye naleletinye tive tema-Israyeli.+ 50 Kufanele ubeke emaLevi kutsi engamele lithende lekukhontela lelinelibhokisi leBufakazi,+ abuke tonkhe tintfo letisetjentiswa kulelithende, kanye nato tonkhe tintfo talo.+ Atawetfwala lelithende lekukhontela naletintfo letisetjentiswa kulo+ aphindze ente nemisebenti kulo.+ Wona atawuhlala edvute nalelithende lekukhontela alitungelete.+ 51 Ngaso sonkhe sikhatsi nakudzingeka kutsi lithende lekukhontela lisuswe, emaLevi ngiwo lokufanele alisuse;+ futsi nakudzingeka liphindze limiswe, ngiwo lokufanele alimise. Nobe ngumuphi umuntfu longakavumeleki* lotawusondzela kulo kufanele abulawe.+

52 “Wonkhe umuntfu longum-Israyeli kufanele amise lithende lakhe endzaweni lanikwe yona, nguloyo naloyo abe secenjini letive letintsatfu*+ lafakwe kulo, ngekwendlu yakhe.* 53 EmaLevi wona kufanele amise emathende awo edvute nalelithende lekukhontela lelinelibhokisi leBufakazi alitungelete, kuze kutsi ngingasitfukutseleli sive sema-Israyeli.+ Ngiwo lanemtfwalo wekunakekela* lelithende lekukhontela lelinelibhokisi leBufakazi.”+

54 Bantfu baka-Israyeli bakwenta konkhe loko Jehova labekutjele Mosi. Bakwenta konkhe njengobe abebayalile.

2 Jehova watjela Mosi na-Aroni, watsi: 2 “Ema-Israyeli kufanele amise emathende awo etindzaweni laniketwe tona, nguloyo naloyo abe secenjini letive letintsatfu+ lafakwe kulo, edvute neluphawu lwendlu yakubo. Lamathende babowamisa abuke lithende lekuhlangana, alitungelete.

3 “Licembu letive letintsatfu leliholwa sive sakaJuda litawumisa emathende alo ngasemphumalanga, ngekwetindlu talo.* Umholi wesive sakaJuda nguNasoni+ indvodzana ya-Aminadabi. 4 Bantfu lababhaliswa esiveni sakaJuda bebangu-74 600.+ 5 Labatawumisa emathende abo eceleni kwalesive sakaJuda kutawuba sive saka-Isakhari. Umholi waso nguNethaneli+ indvodzana yaSuwari. 6 Bantfu lababhaliswa esiveni saka-Isakhari bebangu-54 400.+ 7 Lesinye sive kutawuba sive sakaZebuloni. Umholi waso ngu-Eliyabe+ indvodzana yaHeloni. 8 Bantfu lababhaliswa esiveni sakaZebuloni bebangu-57 400.+

9 “Sebabonkhe bantfu lababhaliswa kulelicembu leliholwa sive sakaJuda bebangu-186 400. Lelicembu kufanele lisuke kucala nasekuhanjwa.+

10 “Licembu letive letintsatfu leliholwa sive sakaRubeni+ litawumisa emathende alo ngaseningizimu, ngekwetindlu talo.* Umholi wesive sakaRubeni ngu-Elisuri+ indvodzana yaShedewuri. 11 Bantfu lababhaliswa esiveni sakaRubeni bebangu-46 500.+ 12 Labatawumisa emathende abo eceleni kwalesive sakaRubeni, kutawuba sive sakaSimeyoni. Umholi waso nguShelumiyeli+ indvodzana yaSurishadayi. 13 Bantfu lababhaliswa esiveni sakaSimeyoni bebangu-59 300.+ 14 Lesinye sive kutawuba sive sakaGadi. Umholi waso ngu-Eliyasafa+ indvodzana yaRehuweli. 15 Bantfu lababhaliswa esiveni sakaGadi bebangu-45 650.+

16 “Sebabonkhe bantfu lababhaliswa kulelicembu leliholwa sive sakaRubeni bebangu-151 450. Lelicembu kufanele libe lesibili nasekuhanjwa.+

17 “Nakuhanjwa nelithende lekuhlangana,+ emaLevi kufanele abe semkhatsini walalamanye emacembu.

“Bonkhe bantfu kufanele bahambe ngekulandzelana kwabo kuye ngendlela labahlala ngayo,+ ngamunye abe sendzaweni yakhe, ngekwemacembu etive letintsatfu labafakwe kuwo.

18 “Licembu letive letintsatfu leliholwa sive saka-Efrayimu litawumisa emathende alo ngasenshonalanga, ngekwetindlu talo.* Umholi wesive saka-Efrayimu ngu-Elishama+ indvodzana ya-Amihudi. 19 Bantfu lababhaliswa esiveni saka-Efrayimu bebangu-40 500.+ 20 Labatawumisa emathende abo eceleni kwalesive saka-Efrayimu kutawuba sive sakaManase.+ Umholi waso nguGamaliyeli+ indvodzana yaPhedasuri. 21 Bantfu lababhaliswa esiveni sakaManase bebangu-32 200.+ 22 Lesinye sive kutawuba sive sakaBhenjamini. Umholi waso ngu-Abidani+ indvodzana yaGidiyoni. 23 Bantfu lababhaliswa esiveni sakaBhenjamini bebangu-35 400.+

24 “Sebabonkhe bantfu lababhaliswa kulelicembu leliholwa sive saka-Efrayimu bebangu-108 100. Lelicembu kufanele libe lesitsatfu nasekuhanjwa.+

25 “Licembu letive letintsatfu leliholwa sive sakaDani litawumisa emathende alo ngasenyakatfo, ngekwetindlu talo.* Umholi wesive sakaDani ngu-Ahiyezeri+ indvodzana ya-Amishadayi. 26 Bantfu lababhaliswa esiveni sakaDani bebangu-62 700.+ 27 Labatawumisa emathende abo eceleni kwalesive sakaDani kutawuba sive saka-Asheri. Umholi waso nguPhagiyeli+ indvodzana ya-Okrani. 28 Bantfu lababhaliswa esiveni saka-Asheri bebangu-41 500.+ 29 Lesinye sive kutawuba sive sakaNaftali. Umholi waso ngu-Ahira+ indvodzana ya-Enani. 30 Bantfu lababhaliswa esiveni sakaNaftali bebangu-53 400.+

31 “Sebabonkhe bantfu lababhaliswa kulelicembu leliholwa sive sakaDani bebangu-157 600. Nasekuhanjwa, lelicembu kufanele libe lekugcina+ kulamacembu etive letintsatfu.”

32 Lawa-ke bekungema-Israyeli labhaliswa ngekwetindlu tawo. Sebabonkhe bantfu lababhaliswa futsi lebebangaya emphini bebangu-603 550.+ 33 EmaLevi wona akazange abhaliswe+ ngesikhatsi kubhaliswa lalamanye ema-Israyeli,+ njengobe nje Jehova abetjele Mosi. 34 Ema-Israyeli akwenta konkhe loko Jehova labekutjele Mosi. Ngako-ke emathende awo awamisa ngekwemacembu awo etive letintsatfu,+ nangekwemindeni netindlu tawo, futsi nalapho sekahamba enta ngaleyo ndlela.+

3 Leti bekutitukulwane ta-Aroni naMosi ngelilanga Jehova lakhuluma ngalo naMosi eNtsabeni iSinayi.+ 2 Nankha emabito emadvodzana a-Aroni: Nadabi, lebekangumntfwana wakhe wekucala, Abihu,+ Eliyezeri+ na-Ithamari.+ 3 Ngulawo-ke emabito emadvodzana a-Aroni, labegcotjwe* kutsi abe baphristi.+ 4 BoNadabi na-Abihu bafa embikwaJehova ehlane laseSinayi, ngesikhatsi baletsa umlilo longakavumeleki kuJehova,+ futsi bebete bantfwana. Kepha bo-Eliyezeri+ na-Ithamari+ bona bachubeka babaphristi kanye nababe wabo Aroni.

5 Jehova wase utsi kuMosi: 6 “Uboletsa emaLevi,+ uwamise embikwa-Aroni umphristi futsi kufanele amsite.+ 7 Kufanele afeze imisebenti yawo layentela Aroni naso sonkhe sive sema-Israyeli embikwelithende lekuhlangana, ngekutsi awente wonkhe umsebenti wawo wasethendeni lekukhontela. 8 Atawunakekela tonkhe tintfo+ letisetjentiswa ethendeni lekuhlangana, afeze nemisebenti layentela ema-Israyeli ngekutsi asebente ethendeni lekukhontela.+ 9 Utawutsatsa emaLevi uwanikete Aroni nemadvodzana akhe. Atawutsatfwa kuma-Israyeli, aniketwe Aroni kuze amsite.+ 10 Ubobeka Aroni nemadvodzana akhe, futsi kufanele bente imisebenti yabo yebuphristi.+ Nobe ngumuphi umuntfu longakavumeleki* lotawusondzela endzaweni lengcwele kufanele abulawe.”+

11 Jehova wachubeka watsi kuMosi: 12 “Mine ngitawutsatsa emaLevi esiveni sema-Israyeli esikhundleni sawo onkhe ematibulo* ema-Israyeli,+ futsi atawuba ngewami. 13 Onkhe ematibulo ngewami.+ Ngalelilanga lengabulala ngalo onkhe ematibulo aseGibhithe,+ ngatingcwelisela onkhe ematibulo aka-Israyeli, kusukela ematibulweni ebantfu kuya ematibulweni etilwane.+ Ngako-ke ematibulo atawuba ngewami. NginguJehova.”

14 Jehova waphindze wakhuluma naMosi ehlane laseSinayi,+ watsi: 15 “Ubobhalisa emadvodzana aLevi ngetindlu tawo nangemindeni yawo. Kufanele ubhalise bonkhe labadvuna kusukela kulabanenyanga yinye budzala kuya etulu.”+ 16 Ngako Mosi wawabhalisa njengobe nje Jehova abemtjelile. 17 Emabito emadvodzana aLevi bekunguGeshoni, Khohati, naMerari.+

18 Emabito emadvodzana aGeshoni ngekwemindeni yawo bekunguLibni naShimeyi.+

19 Emadvodzana aKhohati ngekwemindeni yawo bekungu-Amramu, Jisihari, Hebroni, na-Uziyeli.+

20 Emadvodzana aMerari ngekwemindeni yawo bekunguMahali+ naMushi.+

Lena-ke bekuyimindeni yemaLevi ngekwetindlu tawo.

21 KuGeshoni kwavela umndeni wemaLibni+ nemndeni wemaShimeyi. Lena-ke bekuyimindeni yemaGeshoni. 22 Bonkhe labadvuna lababhaliswa kulemindeni, kusukela kulabanenyanga yinye budzala kuya etulu bebangu-7 500.+ 23 Imindeni yemaGeshoni yamisa emathende ayo ngemuva kwelithende lekukhontela,+ ngasenshonalanga. 24 Umholi wendlu yemaGeshoni bekungu-Eliyasafa indvodzana yaLayeli. 25 Imisebenti emadvodzana aGeshoni+ labenayo ethendeni lekuhlangana beyikunakekela lithende lekukhontela+ netindvwangu talo tekumbonya letehlukahlukene,+ kanye nendvwangu* yemnyango+ welithende lekuhlangana, 26 tindvwangu letilenga ebaleni,+ indvwangu*+ yeligede lelibala* lelitungeleta lithende lekukhontela neli-al’thare, tintsambo telithende kanye nawo wonkhe umsebenti lohlobene naloku.

27 KuKhohati kwavela umndeni wema-Amramu, wemaJisihari, wemaHebroni kanye newema-Uziyeli. Lena-ke bekuyimindeni yemaKhohati.+ 28 Bonkhe labadvuna lababhaliswa labasukela enyangeni yinye kuya etulu budzala bebangu-8 600. Umsebenti wabo bekukunakekela indzawo lengcwele.+ 29 Imindeni yemadvodzana aKhohati yamisa emathende ayo eningizimu yelithende lekukhontela.+ 30 Umholi wendlu yemaKhohati bekungu-Elisafani indvodzana ya-Uziyeli.+ 31 Umsebenti wawo bekukunakekela Libhokisi,+ litafula,+ lutsi lwesibane,+ ema-al’thare,+ tintfo letisetjentiswa endzaweni lengcwele,+ indvwangu yekwehlukanisa*+ kanye nayo yonkhe imisebenti lehlobene naloku.+

32 Umholi lomkhulu wemaLevi bekungu-Eliyezeri+ indvodzana ya-Aroni umphristi, futsi nguye lebekangamele labo labenta imisebenti yasendzaweni lengcwele.

33 KuMerari kwavela umndeni wemaMahali nemndeni wemaMushi. Lena-ke bekuyimindeni yemaMerari.+ 34 Bonkhe labadvuna lababhaliswa labasukela enyangeni yinye budzala kuya etulu bebangu-6 200.+ 35 Umholi wendlu yemaMerari bekunguSuriyeli indvodzana ya-Abihayili. EmaMerari abemise emathende awo enyakatfo yelithende lekukhontela.+ 36 Emadvodzana aMerari abenemsebenti wekunakekela emabhaluko*+ elithende lekukhontela, imigcala yalo,+ tinsika talo,+ emaseko alo, nato tonkhe tintfo letisetjentiswa kulo,+ kanye nawo wonkhe umsebenti lohlobene naloku.+ 37 Abephindze anakekele tinsika lebetitungelete libala, nemaseko ato,+ tikhonkwane tato, kanye netintsambo tato.

38 BoMosi na-Aroni kanye nemadvodzana akhe bamisa emathende abo embikwelithende lekukhontela, ngasemphumalanga, embikwelithende lekuhlangana. Umsebenti lebebawufezela ema-Israyeli bekukunakekela indzawo lengcwele. Nobe ngumuphi umuntfu longakavumeleki* lobekatawusondzela kuyo abetawubulawa.+

39 Bonkhe labadvuna labangemaLevi labasukela enyangeni yinye budzala kuya etulu futsi lababhaliswa nguMosi na-Aroni ngekwemindeni yabo, njengobe Jehova abeshito, bebangu-22 000.

40 Ngemuva kwaloko Jehova watsi kuMosi: “Ubobhalisa onkhe ematibulo lamadvuna ema-Israyeli lasukela enyangeni yinye budzala kuya etulu,+ uwabale futsi uwabhalise ngemabito awo. 41 Ubongitsatsela emaLevi esikhundleni sawo onkhe ematibulo ema-Israyeli,+ utsatse netilwane letifuywako temaLevi esikhundleni sawo onkhe ematibulo etilwane letifuywako tema-Israyeli.+ NginguJehova.” 42 Ngako Mosi wawabhalisa onkhe ematibulo ema-Israyeli, njengobe nje Jehova abemtjelile. 43 Onkhe ematibulo lamadvuna lasukela enyangeni yinye budzala kuya etulu futsi labhaliswa ngemabito awo, abengu-22 273.

44 Jehova wachubeka wakhuluma naMosi, watsi: 45 “Ubotsatsa emaLevi esikhundleni sawo onkhe ematibulo ema-Israyeli, utsatse netilwane letifuywako temaLevi esikhundleni setilwane letifuywako tema-Israyeli. EmaLevi kufanele abe ngewami, nginguJehova. 46 Linani lematibulo+ ema-Israyeli belingetulu kwelinani lematibulo emaLevi ngalangu-273. Kuze uhlenge lamatibulo langu-273,+ 47 ubotsatsela ngalinye lawo emagremu langu-57* elisiliva+ lakalwe ngesisindvo lesisemtsetfweni sasendzaweni lengcwele. Lishekeli lingemagera* langu-20.+ 48 Lemali kufanele uyinikete Aroni nemadvodzana akhe, ibe yekuhlenga lamatibulo ema-Israyeli labengetulu ngawo kumaLevi.” 49 Ngako Mosi wayitsatsa lemali yekuhlenga lamatibulo ema-Israyeli labengetulu ngawo kumaLevi. 50 Lemali wayitsatsa ematibulweni ema-Israyeli futsi beyingemakhilogremu langaba ngu-16* elisiliva, ngesisindvo lesisemtsetfweni sasendzaweni lengcwele. 51 Njengobe livi* laJehova belishito, Mosi watsatsa lemali wayinika Aroni nemadvodzana akhe, njengobe nje Jehova abemtjelile.

4 Jehova wabese ukhuluma naMosi na-Aroni, watsi: 2 “KumaLevi kufanele nibale emaKhohati+ ngekwemindeni yawo nangekwetindlu tawo, 3 nibale bonkhe labaneminyaka lesukela kulengu-30+ kuya kulengu-50 budzala+ futsi labasecenjini lelabelwe kutsi lisebente ethendeni lekuhlangana.+

4 “Ngulona umsebenti lotakwentiwa ngemaKhohati ethendeni lekuhlangana,+ futsi ungcwele ngelizinga leliphakeme: 5 Nasekuhanjwa, bo-Aroni nemadvodzana akhe batawuta behlise indvwangu yekwehlukanisa,+ bambonye ngayo libhokisi+ leBufakazi. 6 Ngetulu kwayo batawubeka sikhumba lesishukiwe sesilwane* baphindze beleke indvwangu leluhlata njengesibhakabhaka, bese bafaka tindvuku talo tekuletfwala.+

7 “Batawutsatsa indvwangu leluhlata njengesibhakabhaka bayendlale etikwelitafula letinkhwa+ letinikelwe kuNkulunkulu, bese babeka titja, tindzebe, tindziwo kanye netindishi lokutfululwa ngato umnikelo walokunatfwako.+ Sinkhwa lesinikelwa njalo+ kuNkulunkulu kufanele sihlale sisetikwalelitafula. 8 Letintfo batawutimbonya ngendvwangu lebovu, ngetulu beleke sikhumba lesishukiwe sesilwane, bese bafaka tindvuku talo tekuletfwala.+ 9 Ngemuva kwaloko batawutsatsa indvwangu leluhlata njengesibhakabhaka bambonye ngayo lutsi lwesibane+ lokukhanyiswa ngalo, kanye netibane talo,+ tindlawu talo, titja tekufaka emalahle+ nato tonkhe titja temafutsa lasetjentiswa kuletibane. 10 Lolutsi lwesibane kanye nato tonkhe tintfo letisetjentiswa kulo batakugocotela ngesikhumba lesishukiwe sesilwane bese bakubeka etikwelugodvo lokutawutfwalwa ngalo. 11 Batawutsatsa indvwangu leluhlata njengesibhakabhaka bambonye ngayo li-al’thare lelentiwe ngeligolide,+ ngetulu beleke sikhumba lesishukiwe sesilwane, bese bafaka tindvuku talo tekuletfwala.+ 12 Ngemuva kwaloko, batawutsatsa tonkhe leletinye tintfo+ labatisebentisa nabenta umsebenti endzaweni lengcwele batifake endvwangwini leluhlata njengesibhakabhaka, futsi batimbonye ngesikhumba lesishukiwe sesilwane, bese batibeka etikwelugodvo lokutawutfwalwa ngalo.

13 “Kufanele basuse umlotsa* e-al’thare+ bese balimbonya ngendvwangu leyentiwe ngensontfo lebukhwebeletane.* 14 Batawubese babeka tonkhe letintfo letisetjentiswa kulo: lokutitja tekufaka emalahle, timfologo, emafosholo, tindishi, nato tonkhe tintfo talo.+ Ngemuva kwaloko, batawutsatsa sikhumba lesishukiwe sesilwane balimbonye ngaso bese bafaka tindvuku talo tekuletfwala.+

15 “Nasekuhanjwa, bo-Aroni nemadvodzana akhe kufanele bacedze kumbonya tintfo tasendzaweni lengcwele+ kanye nako konkhe lokusetjentiswa kuyo. EmaKhohati atawubese ayeta atetfwale,+ kodvwa akukafaneli atitsintse letintfo, ngobe nakatitsintsa atakufa.+ Lona ngumsebenti* lomayelana nelithende lekuhlangana lokufanele wentiwe ngemaKhohati.

16 “Eliyezeri+ indvodzana ya-Aroni umphristi nguye lotawengamela emafutsa ekukhanyisa,+ imphepho leneliphunga lelimnandzi,+ umnikelo walokutinhlavu lonikelwa njalo kanye nemafutsa ekugcoba.+ Nguye lotawengamela lonkhe lithende lekukhontela nato tonkhe tintfo letikulo, lokufaka ekhatsi indzawo lengcwele netintfo letisetjentiswa kuyo.”

17 Jehova wachubeka akhuluma naMosi na-Aroni, watsi: 18 “Ningavumeli kutsi sive semaKhohati+ sibhujiswe emkhatsini wemaLevi. 19 Tonkhe letintfo kufanele nitente kuze lesive sichubeke siphila, singabulawa kutsi sisondzele etintfweni letingcwele ngelizinga leliphakeme.+ Bo-Aroni nemadvodzana akhe batawungena ethendeni lekuhlangana futsi banike umuntfu ngamunye umsebenti wakhe, bamtjele naloko lokufanele akwetfwale. 20 EmaKhohati akukafaneli atsi nakangena abone tintfo letingcwele, ngisho kwesikhashana nje, ngobe nakangatibona atawufa.”+

21 Ngemuva kwaloko Jehova wakhuluma naMosi watsi: 22 “Kufanele kubalwe emaGeshoni+ ngekwetindlu tawo nangekwemindeni yawo. 23 Ubobhalisa bonkhe labaneminyaka lesukela kulengu-30 kuya kulengu-50 budzala futsi labasecenjini lelabelwe kutsi lisebente ethendeni lekuhlangana. 24 Nati tintfo imindeni yemaGeshoni leyabelwe kutsi itinakekele iphindze itetfwale:+ 25 tindvwangu telithende lekukhontela,+ indvwangu yelithende lekuhlangana, indvwangu yalo yekumbonya kanye nesikhumba lesishukiwe sesilwane lebeselekwe ngetulu kwayo,+ indvwangu* yemnyango welithende lekuhlangana,+ 26 tindvwangu letilengiswe ebaleni,*+ indvwangu* yeligede lelibala lelitungelete lithende lekukhontela+ neli-al’thare, tintsambo talelithende kanye nato tonkhe tintfo letisetjentiswa kulo, nako konkhe lokuhlobene nalomsebenti. Ngulona-ke umsebenti wemaGeshoni. 27 Yonkhe lemisebenti kanye nemitfwalo yemaGeshoni+ kufanele ibukwe ngu-Aroni nemadvodzana akhe. Tonkhe letintfo titawuba ngumsebenti wemaGeshoni. 28 Ngulona umsebenti lotakwentiwa yimindeni yemaGeshoni ethendeni lekuhlangana,+ futsi atawusebenta ngephansi kwa-Ithamari+ indvodzana ya-Aroni umphristi.

29 “Emadvodzana aMerari+ nawo utawabhalisa ngekwemindeni yawo kanye nangekwetindlu tawo. 30 Utawubhalisa bonkhe labaneminyaka lesukela kulengu-30 kuya kulabaneminyaka lengu-50 budzala, bonkhe labo labasecenjini lelabelwe kutsi lisebente ethendeni lekuhlangana. 31 Nguleti tintfo labatawutetfwala+ letihlobene nemsebenti wabo wasethendeni lekuhlangana: emabhaluko*+ elithende lekukhontela, imigcala yalo,+ tinsika talo,+ emaseko alo;+ 32 tinsika+ telibala, emaseko ato,+ tikhonkwane tato,+ tintsambo tato, nato tonkhe tintfo letisetjentiswa kuto, kanye nako konkhe lokuhlobene nalomsebenti. Letintfo letitawetfwalwa utawutabela ngamunye wabo ngekwemabito abo. 33 Ngulena-ke indlela imindeni yemadvodzana aMerari+ letawusebenta ngayo ethendeni lekuhlangana, icondziswa ngu-Ithamari indvodzana ya-Aroni umphristi.”+

34 Ngako-ke boMosi na-Aroni kanye nebaholi+ bema-Israyeli bawabhalisa emaKhohati+ ngekwemindeni yawo kanye nangekwetindlu tawo, 35 babhalisa bonkhe labaneminyaka lesukela kulengu-30 kuya kulengu-50 budzala, futsi lebebasecenjini lalabo lababelwe kutsi basebente ethendeni lekuhlangana.+ 36 Sebabonkhe lababhaliswa ngekwemindeni yabo bebangu-2 750.+ 37 Ngulabo-ke lababhaliswa emindenini yemaKhohati, futsi laba ngibo bonkhe lebebasebenta ethendeni lekuhlangana. BoMosi na-Aroni bababhalisa njengobe Jehova abetjele Mosi.+

38 Emadvodzana aGeshoni+ nawo abhaliswa ngekwemindeni yawo kanye nangekwetindlu tawo. 39 Kwabhaliswa bonkhe lebebaneminyaka lesukela kulengu-30 kuya kulengu-50 budzala futsi lebebasecenjini lelabelwe kutsi lisebente ethendeni lekuhlangana. 40 Sebabonkhe lababhaliswa ngekwemindeni yabo kanye nangekwetindlu tabo bebangu-2 630.+ 41 Ngulabo-ke lababhaliswa emindenini yemadvodzana aGeshoni, futsi laba ngibo bonkhe lebebasebenta ethendeni lekuhlangana. BoMosi na-Aroni bababhalisa njengobe Jehova abeshito.+

42 Emadvodzana aMerari abhaliswa ngemindeni yawo nangetindlu tawo. 43 Kwabhaliswa bonkhe labaneminyaka lesukela kulengu-30 kuya kulengu-50 budzala futsi labasecenjini lelabelwe kutsi lisebente ethendeni lekuhlangana.+ 44 Sebabonkhe lababhaliswa ngemindeni yabo bebangu-3 200.+ 45 Ngulabo-ke lababhaliswa emindenini yemadvodzana aMerari, futsi babhaliswa nguMosi na-Aroni njengobe Jehova abetjele Mosi.+

46 BoMosi na-Aroni kanye nebaholi baka-Israyeli bawabhalisa onkhe lamaLevi ngekwemindeni yawo nangekwetindlu tawo. 47 Kwabhaliswa labo labaneminyaka lesukela kulengu-30 kuya kulengu-50 budzala, futsi bonkhe bebabelwe kutsi basebente ethendeni lekuhlangana baphindze betfwale tintfo talo.+ 48 Sebabonkhe lababhaliswa bebangu-8 580.+ 49 Babhaliswa njengobe Jehova abeshito kuMosi, kwaba nguloyo naloyo ngekwemsebenti lanikwe wona nangekwetintfo lokufanele atitfwale. Ngako-ke babhaliswa njengobe nje Jehova abetjele Mosi.

5 Jehova wachubeka wakhuluma naMosi watsi: 2 “Tjela ema-Israyeli kutsi wonkhe umuntfu lonebulephelo+ nobe lonalokutsite lokuphuma esitfweni sangasense+ nanobe ngumuphi umuntfu lotingcolise ngemuntfu lofile* kufanele amkhiphele ngephandle kwendzawo lokuhlalwa kuyo.+ 3 Ngisho nobe loyo kungumuntfu lomdvuna nobe lomsikati, kufanele nimkhiphele ngephandle. Nibobakhiphela ngephandle kwendzawo lokuhlalwa kuyo, kuze bangayingcolisi+ lendzawo yalabo lengihlala emkhatsini wabo.”*+ 4 Ngako-ke ema-Israyeli akwenta loko, atsatsa labo bantfu abakhiphela ngephandle kwalendzawo lokuhlalwa kuyo. Enta njengobe nje Jehova abetjele Mosi.

5 Jehova wachubeka watsi kuMosi: 6 “Tjela ema-Israyeli utsi: ‘Nangabe umuntfu lomdvuna nobe lomsikati enta nobe ngusiphi sono futsi angetsembeki kuJehova, loyo muntfu unelicala.+ 7 Kufanele asivume+ lesono lasentile,* akhiphe nenhlawulo lephelele, aphindze engete incenye yayo leyodvwa kuletisihlanu.+ Loku utakunika lomuntfu lamonile. 8 Kodvwa nangabe lomuntfu lowoniwe ete sihlobo sengati lesitawutsatsa lenhlawulo, kufanele ibuyiselwe kuJehova futsi itawuba yemphristi, kanye nalemvu umphristi lenta ngayo kutsi lomuntfu lowonile abuyisane naNkulunkulu.+

9 “‘Yonkhe iminikelo lengcwele+ ema-Israyeli layiletsa kumphristi, kufanele ibe ngeyakhe.+ 10 Nobe nguyiphi intfo lengcwele umuntfu lanayo itawuchubeka iyaloyo muntfu. Nobe yini umuntfu layinikela kumphristi, yona itawuba yemphristi.’”

11 Jehova wachubeka wakhuluma naMosi, watsi: 12 “Khuluma nema-Israyeli utsi: ‘Naku lokufanele kwentiwe nangabe umfati wendvodza aphambuka, angetsembeki kuyo 13 futsi lenye indvodza iye naye ecansini+ kodvwa lendvodza yakhe ingati ngaloku, nalesento sakhe sihlale sifihlakele futsi naye atingcolisile kodvwa angakabanjwa, kube kute nafakazi: 14 Nangabe lendvodza iba nesikhwele ngalomfati wayo futsi imsola kutsi akaketsembeki, ngisho nobe atingcolisile nobe cha, 15 lendvodza kufanele iletse lomfati embikwemphristi, imletsele nemnikelo, longufulaha logcwele esikoteleni lesingemalitha lamabili* lowentiwe ngebhali. Kufanele ingatseli emafutsa futsi ingawafaki emakha esihlahla semphepho kulofulaha, ngobe ungumnikelo walokutinhlavu lowentiwa ngenca yesikhwele, lokungumnikelo walokutinhlavu losikhumbuto sesono.

16 “‘Umphristi utawuletsa lomfati, ammise embikwaJehova.+ 17 Lomphristi utawutsatsa emanti langcwele ngesitja selubumba, acuphe nemhlabatsi phansi ethendeni lekukhontela awutsele kulamanti. 18 Utawutsatsa lomfati ammise embikwaJehova, amchache tinwele, futsi abeke etandleni takhe lomnikelo walokutinhlavu losikhumbuto, lokungumnikelo walokutinhlavu lonikelwa ngenca yesikhwele.+ Lomphristi utawube aphetse lamanti lababako laletsa sicalekiso.+

19 “Umphristi utawubese uyamfungisa lomfati, atsi: “Nangabe kute indvodza leye nawe ecansini njengobe usesengephansi kwendvodza yakho,+ futsi awukaphambuki watingcolisa, shengatsi lamanti lababako laletsa sicalekiso angete akulimata. 20 Kodvwa nangabe uphambukile, watingcolisa kantsi usesengephansi kwendvodza yakho, futsi waya ecansini nalenye indvodza—”+ 21 Umphristi utawentisa lomfati sifungo lesihambisana nesicalekiso, atsi kuye: “Shengatsi Jehova angenta kutsi bantfu basebentise libito lakho nabacalekisa nanabafunga, futsi shengatsi Jehova angenta kutsi ungabi nebantfwana,* nesisu sakho sikhukhumuke. 22 Lamanti laletsa sicalekiso atawungena ematfunjini akho abangele kutsi sisu sakho sikhukhumuke futsi ungabi nebantfwana.”* Nakeva lamavi, lomfati kufanele atsi: “Akube njalo! Akube njalo!”*

23 “‘Lomphristi kufanele abhale leticalekiso encwadzini bese utiwashela kulamanti lababako. 24 Ngemuva kwaloko kufanele anatsise lomfati lamanti lababako laletsa sicalekiso futsi atawungena kuye ambangele imiphumela lebabako. 25 Umphristi kufanele atsatse lomnikelo walokutinhlavu lowentiwa ngenca yesikhwele+ losesandleni salomfati awujikitise embikwaJehova, bese uwuletsa edvute neli-al’thare. 26 Lomphristi utawutsatsa lomnikelo walokutinhlavu longagcwala sandla, umelele wonkhe lomnikelo futsi awushise kuze intfutfu yawo ishunce isuka e-al’thare.+ Ngemuva kwaloko-ke utawunatsisa lomfati lamanti. 27 Nangabe lomfati atingcolisile futsi angaketsembeki endvodzeni yakhe, umphristi nakamnatsisa lamanti laletsa sicalekiso atawungena kulomfati ambangele umphumela lobabako, futsi sisu sakhe sikhukhumuke, angabi nabo nebantfwana,* nebantfu basebentise libito lakhe nabacalekisa. 28 Kodvwa-ke nangabe angakatingcolisi futsi ahlantekile, ngeke asitfole sijeziso lesinjalo. Lomfati utawukhona kukhulelwa, abe nebantfwana.

29 “‘Lona-ke ngumtsetfo lomayelana nesikhwele,+ lapho khona umfati kungenteka aphambuke futsi atingcolise kantsi usesengephansi kwendvodza yakhe, 30 nobe nangabe indvodza iba nesikhwele futsi isole kutsi umfati wayo akaketsembeki. Lendvodza kufanele imise lomfati embikwaJehova bese umphristi wenta kuye konkhe lokushiwo kulomtsetfo. 31 Lendvodza angeke ibe nelicala, kodvwa lomfati wayo utawutiphendvulela.’”

6 Jehova wachubeka akhuluma naMosi watsi: 2 “Khuluma nema-Israyeli utsi: ‘Nangabe umuntfu lomdvuna nobe lomsikati enta sifungo lesikhetsekile sekutsi utawuba ngumNaziri*+ embikwaJehova, 3 akukafaneli anatse liwayini naletinye tinatfo letidzakanako. Angabolinatsa liwayini lelimunyu nanobe yini lemunyu ledzakanako.+ Akukafaneli anatse nobe yini leyentiwe ngemagilebisi, nobe adle emagilebisi, ngisho nobe asemasha nobe omisiwe. 4 Kuso sonkhe sikhatsi latawube angumNaziri ngaso, akukafaneli adle nobe yini leyentiwe ngemagilebisi, nobe adle emagilebisi langakavutfwa, ngisho netikhumba tawo.

5 “‘Kuwo onkhe emalanga latawube ente ngawo sifungo sekuba ngumNaziri, akukafaneli ahhule enhloko.+ Abohlala angcwele ngekutsi ayekele tinwele takhe tikhule kuze kuphele lamalanga esifungo lasente kuJehova. 6 Kuwo onkhe lamalanga lente ngawo lesifungo kuJehova, angabosondzela kumuntfu* lofile. 7 Ngisho nobe kungafa babe wakhe, make wakhe, umnakabo nobe dzadzewabo, akukafaneli atingcolise,+ ngobe tinwele takhe tiluphawu lwakhe lwekuba ngumNaziri embikwaNkulunkulu wakhe.

8 “‘Loyo muntfu ungcwele kuJehova kuwo onkhe emalanga latawube angumNaziri ngawo. 9 Kodvwa nakungenteka kuvele kufe umuntfu eceleni kwakhe,+ futsi ngaleyo ndlela tinwele takhe letiluphawu lwekutinikela kuNkulunkulu tingcole,* lomNaziri kufanele atihhule letinwele takhe+ ngelilanga lahlanjululwa ngalo. Loku kufanele akwente ngelilanga lesi-7. 10 Ngelilanga lesi-8, kufanele aletse ematuba lamabili nobe emazini lamabili emavukutfu, awanike umphristi emnyango welithende lekuhlangana. 11 Lomphristi utawunikela linye lawo libe ngumnikelo wesono, lelinye libe ngumnikelo wekushiswa futsi ente kutsi lomNaziri abuyisane naNkulunkulu+ ngenca yalokungcoliswa ngulomuntfu lofile.* Ngalelolanga lomNaziri kufanele angcwelise tinwele takhe. 12 Utawuphindze afunge kabusha kuJehova kutsi utawuba ngumNaziri, aletse nemvu lendvuna lenemnyaka munye letawuba ngumnikelo welicala. Kodvwa emalanga ekucala lawacitsa angumNaziri ngeke asabalwa ngobe wabungcolisa lobuNaziri bakhe.

13 “‘Nangu umtsetfo lomayelana nemNaziri: Nasekaphelile emalanga akhe ekuba ngumNaziri,+ utawuletfwa emnyango welithende lekuhlangana. 14 Nakefika lapho, kufanele aletse umnikelo kuJehova. Utawuletsa imvu lendvuna lenemnyaka munye futsi lephile kahle ibe ngumnikelo wekushiswa,+ nemvu lensikati lenemnyaka munye futsi lephile kahle ibe ngumnikelo wesono,+ kanye nemvu lendvuna lephile kahle letawuba ngumhlatjelo wekuthula.+ 15 Utawuletsa nabhasikidi lonetinkhwa letite imvubelo futsi letiyindingilizi, letentiwe ngafulaha locolisakele lohlanganiswe nemafutsa, kanye nemacebelengwane lete imvubelo lagcotjiswe ngemafutsa. Loku kutawuhambisana nemnikelo walokutinhlavu+ nemnikelo walokunatfwako.+ 16 Umphristi utawuletsa letintfo embikwaJehova, ente umnikelo wesono nemnikelo wekushiswa. 17 Utawunikela lemvu lendvuna ibe ngumhlatjelo wekuthula kuJehova kanye naletinkhwa letite imvubelo letikulobhasikidi. Loku kutawuhambisana nemnikelo walokutinhlamvu+ kanye nemnikelo walokunatfwako.

18 “‘Ngemuva kwaloko, lomNaziri kufanele ahhule tinwele* takhe+ emnyango welithende lekuhlangana, bese utsatsa letinwele labekasolo anato ngesikhatsi angumNaziri atifake kulomlilo lokutawube kushiswa ngawo umhlatjelo wekuthula. 19 Umphristi utawubese utsatsa siphanga salemvu lesibilisiwe,+ futsi kulobhasikidi atsatse sinkhwa lesite imvubelo lesiyindingilizi, nelicebelengwane lelite imvubelo. Letintfo utawutibeka etandleni talomNaziri ngemuva kwekutsi asahhule tinwele takhe letiluphawu lwebuNaziri. 20 Lomphristi kufanele ajikitise letintfo, tibe ngumnikelo lojikitiswako embikwaJehova.+ Tona kanye nemganga wemnikelo lojikitiswako, nalomlente lokunikelwe ngawo,+ titintfo temphristi letingcwele. Ngemuva kwaloko lomNaziri sekangalinatsa liwayini.

21 “‘Nangu umtsetfo lomayelana nemNaziri+ lowenta sifungo: Nangabe enta sifungo futsi akhona nekuletsa umnikelo kuJehova longetulu kwaloko lokulindzeleke kuye njengobe angumNaziri, kufanele asifeze sifungo sakhe ngekuvumelana nemtsetfo webuNaziri.’”

22 Ngemuva kwaloko Jehova watsi kuMosi: 23 “Tjela Aroni nemadvodzana akhe utsi: ‘Nayi indlela lokufanele nibusise+ ngayo ema-Israyeli. Nibotsi:

24 “Shengatsi Jehova anganibusisa+ futsi anivikele.

25 Shengatsi Jehova angenta buso bakhe bukhanye kini,+ futsi anemukele.

26 Shengatsi Jehova anganentela umusa, aphindze anente nibe nekuthula.”’+

27 Kufanele basebentise libito lami nababusisa ema-Israyeli,+ kuze nami ngiwabusise.”+

7 Ngelilanga Mosi lacedza ngalo kwakha lithende lekukhontela,+ waligcoba+ futsi walingcwelisa, kanye nato tonkhe tintfo letikulo, neli-al’thare nato tonkhe tintfo letisetjentiswa kulo.+ Nasacedzile kwenta loku,+ 2 baholi bema-Israyeli,+ labatinhloko tetindlu tawo baletsa iminikelo. Labaholi baletive tema-Israyeli lebebahola nakubhaliswa 3 baletsa iminikelo yabo kuJehova. Banikela ngetinkalishi letivalekile letisitfupha kanye netinkhabi letingu-12. Baholi lababili bebaletsa inkalishi yinye, bese kutsi nguloyo naloyo aletse inkhabi yinye. Tonkhe letintfo batiletsa embikwelithende lekukhontela. 4 Jehova watsi kuMosi: 5 “Titsatse letintfo labatiletsako ngobe titawusetjentiselwa umsebenti wasethendeni lekuhlangana. Kufanele utinikete emaLevi, unikete ngamunye wawo leto latawutidzinga emsebentini wakhe.”

6 Ngako Mosi watitsatsa letinkalishi naletinkhabi watinika emaLevi. 7 Emadvodzana aGeshoni wawaniketa tinkalishi letimbili netinkhabi letine, kwaya ngaloko latakudzinga nakenta umsebenti wawo;+ 8 emadvodzana aMerari wona wawaniketa tinkalishi letine netinkhabi letingu-8, kwaya ngaloko latakudzinga nakenta umsebenti wawo, acondziswa ngu-Ithamari indvodzana ya-Aroni umphristi.+ 9 Kodvwa emadvodzana aKhohati akazange awanike lutfo, ngobe umsebenti wawo bekukutfwala tintfo tasendzaweni lengcwele,+ futsi letintfo abetetjatsa emahlombe awo.+

10 Baholi bema-Israyeli baletsa iminikelo yabo ngelilanga lokwanikelwa+ ngalo li-al’thare futsi lagcotjwa ngalo. Ngesikhatsi labaholi baletsa iminikelo yabo embikweli-al’thare, 11 Jehova watsi kuMosi: “Lilanga ngalinye kufanele kube nemholi munye loletsa umnikelo wakhe lotawusetjentiswa nakunikelwa li-al’thare, futsi loku kufanele kwentiwe ngemalanga lalandzelanako.”

12 Umholi lowaletsa umnikelo wakhe ngelilanga lekucala kwaba nguNasoni,+ indvodzana ya-Aminadabi wesive sakaJuda. 13 Wanikela ngesitja selisiliva lesinesisindvo lesingaba likhilogremu,* nendishi yelisiliva lenesisindvo lesingemagremu langu-798,* futsi bekukalwe ngesisindvo lesisemtsetfweni sasendzaweni lengcwele.*+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 14 Waletsa nendzebe* yeligolide lenesisindvo lesingemagremu langu-114,* futsi beyigcwele imphepho. 15 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lobekutakwentiwa ngako umnikelo wekushiswa;+ 16 waletsa nembuti leseyincane lebekutakwentiwa ngayo umnikelo wesono;+ 17 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye netimvu letindvuna letisihlanu letinemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa nguNasoni indvodzana ya-Aminadabi.+

18 Ngelilanga lesibili, Nethaneli+ indvodzana yaSuwari futsi labengumholi wesive saka-Isakhari naye waletsa umnikelo wakhe. 19 Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 20 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 21 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 22 waletsa nembuti leseyincane lebekutakwentiwa ngayo umnikelo wesono;+ 23 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemazinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa nguNethaneli indvodzana yaSuwari.

24 Ngelilanga lesitsatfu, Eliyabe+ indvodzana yaHeloni futsi labengumholi wesive sakaZebuloni 25 waletsa umnikelo wakhe. Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 26 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 27 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 28 waletsa nembuti leseyincane lebekutakwentiwa ngayo umnikelo wesono;+ 29 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemazinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa ngu-Eliyabe+ indvodzana yaHeloni.

30 Ngelilanga lesine, Elisuri+ indvodzana yaShedewuri futsi labengumholi wesive sakaRubeni, 31 naye waletsa umnikelo wakhe. Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 32 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 33 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 34 waletsa nembuti leseyincane lebekutakwentiwa ngayo umnikelo wesono;+ 35 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemazinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa ngu-Elisuri+ indvodzana yaShedewuri.

36 Ngelilanga lesihlanu, Shelumiyeli+ indvodzana yaSurishadayi futsi labengumholi wesive sakaSimeyoni 37 naye waletsa umnikelo wakhe. Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 38 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 39 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 40 waletsa nembuti leseyincane lebekutakwentiwa ngayo umnikelo wesono;+ 41 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemazinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa nguShelumiyeli+ indvodzana yaSurishadayi.

42 Ngelilanga lesitfupha, Eliyasafa+ indvodzana yaDehuweli futsi labengumholi wakaGadi 43 naye waletsa umnikelo wakhe. Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 44 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 45 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 46 waletsa nembuti leseyincane lebekutakwentiwa ngayo umnikelo wesono;+ 47 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemazinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa ngu-Eliyasafa+ indvodzana yaDehuweli.

48 Ngelilanga lesi-7, Elishama+ indvodzana ya-Amihudi futsi labengumholi wesive saka-Efrayimu 49 naye waletsa umnikelo wakhe. Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 50 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 51 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 52 waletsa nembuti leseyincane lebekutakwentiwa ngayo umnikelo wesono;+ 53 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemazinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa ngu-Elishama+ indvodzana ya-Amihudi.

54 Ngelilanga lesi-8, Gamaliyeli+ indvodzana yaPhedasuri futsi labengumholi wesive sakaManase 55 naye waletsa umnikelo wakhe. Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 56 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 57 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 58 waletsa nembuti leseyincane lebekutakwentiwa ngayo umnikelo wesono;+ 59 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemazinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa nguGamaliyeli+ indvodzana yaPhedasuri.

60 Ngelilanga lesi-9, umholi+ wesive sakaBhenjamini lokungu-Abidani+ indvodzana yaGidiyoni 61 naye waletsa umnikelo wakhe. Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 62 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 63 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 64 waletsa nembuti leseyincane lebekutakwentiwa ngayo umnikelo wesono;+ 65 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemanzinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa ngu-Abidani+ indvodzana yaGidiyoni.

66 Ngelilanga lesi-10, Ahiyezeri+ indvodzana ya-Amishadayi futsi labengumholi wesive sakaDani 67 naye waletsa umnikelo wakhe. Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 68 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 69 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 70 waletsa nembuti leseyincane lebekutakwentiwa ngayo umnikelo wesono;+ 71 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemazinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa ngu-Ahiyezeri+ indvodzana ya-Amishadayi.

72 Ngelilanga lesi-11, Phagiyeli+ indvodzana ya-Okrani futsi labengumholi wesive saka-Asheri 73 naye waletsa umnikelo wakhe. Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 74 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 75 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 76 waletsa nembuti leseyincane lebekutakwentiwa ngayo umnikelo wesono;+ 77 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemazinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa nguPhagiyeli+ indvodzana ya-Okrani.

78 Ngelilanga lesi-12, Ahira+ indvodzana ya-Enani futsi labengumholi wesive sakaNaftali 79 naye waletsa umnikelo wakhe. Wanikela ngesitja selisiliva lesinesisindvo lesingaba likhilogremu, nendishi yelisiliva lenesisindvo lesingemagremu langu-798, futsi bekukalwe ngesisindvo lesisemtsetfweni sasendzaweni lengcwele.+ Kokubili bekugcwele fulaha locolisakele lobhicwe nemafutsa lebewutawuba ngumnikelo walokutinhlavu.+ 80 Waletsa nendzebe yeligolide lenesisindvo lesingemagremu langu-114, futsi beyigcwele imphepho. 81 Waletsa nenkunzana, nemvu lendvuna, kanye nelizinyane lemvu lelidvuna lelinemnyaka munye, lebekutakwentiwa ngako umnikelo wekushiswa;+ 82 waletsa nembuti leseyincane lebekutakwentiwa ngayo umnikelo wesono;+ 83 waphindze waletsa netinkhomo letimbili, timvu letindvuna letisihlanu, timbuti letindvuna letisihlanu kanye nemazinyane etimvu lamadvuna lasihlanu lanemnyaka munye, futsi loku bekutawuba ngumhlatjelo wekuthula.+ Lona ngumnikelo lowaletfwa ngu-Ahira+ indvodzana ya-Enani.

84 Lona-ke ngulomnikelo lowaletfwa baholi baka-Israyeli ngesikhatsi kugcotjwa li-al’thare futsi lobewutawusetjentiswa nalinikelwa:+ Titja telisiliva letingu-12, tindishi telisiliva letingu-12, netindzebe teligolide letingu-12.+ 85 Sitja ngasinye selisiliva besinesisindvo lesingaba likhilogremu, nendishi ngayinye yelisiliva beyinesisindvo lesingemagremu langu-798. Selilonkhe lelisiliva belingemakhilogremu langaba ngu-27* ngekwesisindvo lesisemtsetfweni sasendzaweni lengcwele.+ 86 Ngayinye indzebe kuletindzebe teligolide letingu-12 lebetigcwele imphepho beyinesisindvo lesingemagremu langu-114, nakukalwa ngesisindvo lesisemtsetfweni sasendzaweni lengcwele. Selilonkhe ligolide laletindzebe belingaba likhilogremu.* 87 Tinkhabi lebetitawuba ngumnikelo wekushiswa betingu-12, kube netimvu letindvuna letingu-12, nemazinyane etimvu lamadvuna langu-12 futsi lanemnyaka munye kanye nemnikelo walokutinhlavu lohambisana nato. Bekuphindze kube netimbuti letisetincane letingu-12 lebekutakwentiwa ngato umnikelo wesono. 88 Tinkhabi lebekutakwentiwa ngato umhlatjelo wekuthula betingu-24, futsi bekunetimvu letindvuna letingu-60, netimbuti letindvuna letingu-60, kanye nemazinyane etimvu lamadvuna lanemnyaka munye langu-60. Lona bekungumnikelo lebewutawusetjentiswa nakunikelwa+ li-al’thare ngemuva kwekugcotjwa kwalo.+

89 Ngaso sonkhe sikhatsi nakangena ethendeni lekuhlangana kuze akhulume naNkulunkulu,*+ Mosi abeva livi laNkulunkulu likhuluma naye livela etikwesimbonyo+ selibhokisi leBufakazi, emkhatsini wemakherubhi lamabili,+ futsi Nkulunkulu abekhuluma naye.

8 Jehova wakhuluma naMosi watsi: 2 “Tjela Aroni utsi: ‘Nawukhanyisa letibane letingu-7, kufanele tikhanyise endzaweni lesembikwelutsi lwesibane.’”+ 3 Naku-ke Aroni lakwenta: Wakhanyisa letibane futsi takhanyisa indzawo lesembikwelutsi lwesibane,+ njengobe nje Jehova abetjele Mosi. 4 Nayi indlela lolutsi lobelwentiwe ngayo: Belwakhiwe* ngeligolide, kusukela esicwini salo kuyewufika emacembeni futsi lwentiwe ngesandvo.+ Lolutsi belwakhiwe ngendlela Jehova lakhombisa ngayo Mosi embonweni.+

5 Jehova waphindze wakhuluma naMosi watsi: 6 “Kuma-Israyeli, ubotsatsa emaLevi futsi uwahlante.+ 7 Nayi indlela lokufanele uwahlante ngayo: Ubowafafata ngemanti lasusa sono, futsi kufanele ahhule wonkhe umtimba wawo, awashe tingubo tawo, nawo atihlante.+ 8 Ngemuva kwaloko atawutsatsa inkunzana+ kanye nafulaha locolisakele lohlanganiswe nemafutsa, lotawuba ngumnikelo walokutinhlavu+ lohambisana nalenkunzana. Wena utawutsatsa lenye inkunzana letawuba ngumnikelo wesono.+ 9 Uboletsa emaLevi embikwelithende lekuhlangana, uphindze uhlanganise ndzawonye onkhe ema-Israyeli.+ 10 Nawuletsa emaLevi embikwaJehova, ema-Israyeli kufanele abeke tandla tawo kulamaLevi.+ 11 Aroni abonikela* emaLevi embikwaJehova abe ngumnikelo lojikitiswako+ losuka kuma-Israyeli, futsi emaLevi atawukwenta umsebenti waJehova.+

12 “Ngemuva kwaloko emaLevi atawubeka tandla tawo etinhloko taletinkunzi,+ bese atsatsa yinye yato ayente umnikelo wesono, lelenye ayente umnikelo wekushiswa kuJehova, kuze wona abuyisane naNkulunkulu.+ 13 Utawaletsa futsi eme embikwa-Aroni nemadvodzana akhe, unikele* ngawo abe ngumnikelo lojikitiswako kuJehova. 14 EmaLevi ubowehlukanisa kuma-Israyeli, futsi wona atawuba ngewami.+ 15 Ngemuva kwaloko atawungena ethendeni lekuhlangana kuze ente imisebenti yakhona. Nguleyo-ke indlela lotawahlanta ngayo emaLevi, nalotawanikela* ngayo kuze abe ngumnikelo lojikitiswako. 16 Wona anikelwe kimi aba tipho letitsetfwe kuma-Israyeli. Ngitawutitsatsela wona esikhundleni sawo onkhe ematibulo* ema-Israyeli.+ 17 Onkhe ematibulo ema-Israyeli ngewami, kusukela ematibulweni ebantfu kuya ematibulweni etilwane.+ Ngatingcwelisela wona ngelilanga lengabulala ngalo onkhe ematibulo aseveni laseGibhithe.+ 18 Ngitawutsatsa emaLevi esikhundleni sawo onkhe ematibulo ema-Israyeli. 19 EmaLevi ngitawanika Aroni nemadvodzana akhe abe tipho letitsetfwe kuma-Israyeli, kuze entele sive sema-Israyeli imisebenti ethendeni lekuhlangana,+ aphindze ente kutsi sibuyisane nami kuze singehlelwa yinhlekelele+ ngenca yekutsi sisondzele endzaweni lengcwele.”

20 BoMosi na-Aroni nawo onkhe ema-Israyeli bakwenta loku kumaLevi. Ema-Israyeli akwenta konkhe loko Jehova labetjele Mosi kutsi kwentiwe kumaLevi. 21 Ngako emaLevi atihlanta aphindze awasha tingubo tawo,+ ngemuva kwaloko Aroni wanikela* ngawo aba ngumnikelo lojikitiswako embikwaJehova.+ Aroni wabese wenta kutsi lamaLevi abuyisane naNkulunkulu kuze ahlanteke.+ 22 Ngemuva kwaloko angena ethendeni lekuhlangana kuze ente imisebenti yawo embikwa-Aroni nemadvodzana akhe. Nguloko-ke lokwentiwa kumaLevi, njengobe nje Jehova abetjele Mosi.

23 Jehova wabese ukhuluma naMosi watsi: 24 “Nayi indlela letawusetjentiswa kumaLevi: Kusukela nakaneminyaka lengu-25 budzala, umLevi angacala kusebenta ethendeni lekuhlangana. 25 Kodvwa nasekendlulile eminyakeni lengu-50, utawuyekela kusebenta ethendeni lekuhlangana. 26 Angabasita bomnakabo labenta imisebenti yabo kulelithende lekuhlangana, kodvwa yena akukafaneli ayente leyo misebenti. Nguloko-ke lokufanele ukwente lokumayelana nemaLevi nemisebenti yawo.”+

9 Ngenyanga yekucala,+ emnyakeni wesibili baphumile eveni laseGibhithe, Jehova wakhuluma naMosi ehlane laseSinayi, watsi: 2 “Ema-Israyeli kufanele alungise umhlatjelo weliPhasika+ ngesikhatsi lesibekiwe.+ 3 Nibowulungisa ngesikhatsi lesibekiwe, ngelilanga lesi-14 lalenyanga, futsi kusengakahlwi.* Naniwulungisa, nibolandzela yonkhe imitsetfo nato tonkhe ticondziso leninikwe tona.”+

4 Ngako Mosi watjela ema-Israyeli kutsi alungise umhlatjelo weliPhasika. 5 Ngesikhatsi kusengakahlwi,* ngelilanga lesi-14 lenyanga yekucala, ema-Israyeli awulungisa lomhlatjelo ehlane laseSinayi. Akwenta konkhe loko Jehova labekutjele Mosi.

6 Bekunemadvodza lebekangcolile ngenca yekutsi atsintse umuntfu lofile,+ ngako akazange akhone kulungisa umhlatjelo weliPhasika ngalelolanga. Lamadvodza aya kuMosi na-Aroni ngalelolanga,+ 7 afike atsi kuye: “Ngisho nobe singcolile ngenca yekutsi sitsintse umuntfu lofile, kungani singavunyelwa kutsi sente umnikelo kuJehova ngesikhatsi sawo lesibekiwe, sikanye nema-Israyeli?”+ 8 Mosi watsi: “Manini khona lapha. Mine ngisayawukuva kutsi Jehova utsini ngalendzaba yenu.”+

9 Ngako Jehova watsi kuMosi: 10 “Tjela ema-Israyeli utsi: ‘Nangabe lotsite emkhatsini wenu nobe etitukulwaneni tenu letiseta angcolile ngenca yekutsi utsintse umuntfu lofile+ nobe nangabe atsetse luhambo loludze, loyo muntfu kufanele awulungise umhlatjelo weliPhasika laJehova. 11 Kufanele awulungise kusengakahlwi,* ngelilanga lesi-14 enyangeni yesibili.+ Abowudla nesinkhwa lesite imvubelo kanye nemibhidvo lebabako.+ 12 Lomhlatjelo ungabosala kuze kube sekuseni,+ futsi ematsambo alesilwane lokwentiwe ngaso lomhlatjelo angabowephulwa.+ Kufanele ulungiswe ngekuvumelana nayo yonkhe imitsetfo yeliPhasika. 13 Nangabe umuntfu abehlantekile futsi angakatsatsi luhambo, kodvwa wangawulungisi lomhlatjelo weliPhasika, loyo muntfu kufanele abulawe,+ ngobe akakawenti umnikelo waJehova ngesikhatsi sawo lesibekiwe. Ngako utawuphendvula ngenca yesono sakhe.

14 “‘Nakukhona umuntfu losihambi lohlala kanye nani, naye kufanele awulungise lomhlatjelo weliPhasika laJehova.+ Abowenta ngekuvumelana nemtsetfo weliPhasika neticondziso leninikwe tona.+ Munye umtsetfo lotawusebenta kumuntfu losihambi nakumuntfu longum-Israyeli.’”+

15 Ngelilanga lokwamiswa ngalo lithende lekukhontela,+ lifu belimbonya lelithende lekukhontela, lokulithende lebelinelibhokisi leBufakazi. Kodvwa entsambama, lokutsite lokunjengemlilo kwaba ngetulu kwalelithende lekukhontela kwaze kwaba sekuseni.+ 16 Nguloko-ke lokwachubeka kwenteka. Lifu belimbonya lelithende lekukhontela emini, bese kutsi ebusuku kubonakale lokutsite lokunjengemlilo.+ 17 Ngaso sonkhe sikhatsi lelifu nalisuka kulelithende, ema-Israyeli abevele esuke ngekushesha,+ futsi lapho lelifu belima khona, nawo abebese amisa emathende awo kuleyo ndzawo.+ 18 Ema-Israyeli abesuka endzaweni nasekushito Jehova, nemathende awo abewamisa nangabe Jehova sekashito kutsi ente njalo.+ Bekutsi nangabe lelifu solo limbonye lelithende lekukhontela, nawo angawasusi emathende awo. 19 Nangabe kwendlula emalanga lamanyenti solo lelifu limbonye lelithende lekukhontela, ema-Israyeli abelalela Jehova, angesuki kuleyo ndzawo.+ 20 Ngaletinye tikhatsi, lelifu belimbonya lelithende lekukhontela emalanga lambalwa. Ngako-ke ema-Israyeli bekangawasusi emathende awo nangabe Jehova angakasho, futsi nasekushito Jehova, bekabese ayesuka kuleyo ndzawo. 21 Ngaletinye tikhatsi lelifu belimbonya lelithende lekukhontela kusukela entsambama kuze kube sekuseni kuphela. Bekutsi naselisuka ekuseni, nawo esuke kuleyo ndzawo. Ngisho nobe lelifu lisuka emini nobe ebusuku, nawo abevele asuke.+ 22 Ema-Israyeli abengawasusi emathende awo futsi abechubeka ahleti kuleyo ndzawo yingci nje lelifu nalingakasuki kulelithende lekukhontela, ngisho nobe kungaba ngemalanga lamabili, inyanga yinye nobe ngetulu. Kodvwa bekutsi nakusuka lelifu, nawo esuke. 23 Abengawasusi emathende awo nangabe Jehova angakasho, futsi nasekushito Jehova bekabese ayesuka kuleyo ndzawo. Amlalela Jehova, futsi akulalela loko Jehova labewatjela kona asebentisa Mosi.

10 Jehova wabese utsi kuMosi: 2 “Tsatsa lisiliva wente ngalo emacilongo lamabili+ usebentisa sandvo. Lamacilongo atawusetjentiswa nakubitelwa ndzawonye sive sema-Israyeli nalapho sekufanele kuhanjwe. 3 Nakashaywa omabili, sonkhe lesive sema-Israyeli kufanele sihlangane ndzawonye emnyango welithende lekuhlangana.+ 4 Kodvwa nakushaywa linye, labo lababaholi futsi labatinhloko tetinkhulungwane tema-Israyeli ngibo kuphela lokufanele bete kuwe.+

5 “Nakuvakala umsindvo welicilongo loshintjashintjako, labo labamise emathende ngasemphumalanga+ kufanele basuke bahambe. 6 Nawuvakala kwesibili lomsindvo welicilongo loshintjashintjako, labo labamise emathende ngaseningizimu+ kufanele basuke bahambe. Ngaso sonkhe sikhatsi nakufanele kusuke licembu lelitsite, lelicilongo liboshaywa ngalendlela.

7 “Nawubitela ndzawonye sonkhe sive, uboshaya lamacilongo+ kodvwa umsindvo wawo ungashintjashintji. 8 Emadvodzana a-Aroni labaphristi ngiwo lokufanele ashaye lamacilongo.+ Kuto tonkhe titukulwane tenu, ngulena indlela letawusetjentiswa nakushaywa emacilongo.

9 “Nakufanele niye emphini kuze nilwe nalabo labanihluphako, nibohlaba umkhosi wemphi ngalamacilongo+ futsi Jehova Nkulunkulu wenu utawunikhumbula, anisindzise etitseni tenu.

10 “Nangetikhatsi tekujabula,+ lapho kunemikhosi+ nalapho kucala inyanga, kufanele nishaye lamacilongo etikweminikelo yekushiswa+ nasetikwemihlatjelo yenu yekuthula.+ Lamacilongo atawuba sikhumbuto kini embikwaNkulunkulu wenu. NginguJehova Nkulunkulu wenu.”+

11 Kwatsi ngelilanga lesi-20 lenyanga yesibili, emnyakeni wesibili,+ lelifu lesuka etikwelithende lekukhontela+ lebelinelibhokisi leBufakazi. 12 Ngako ema-Israyeli esuka ehlane laseSinayi, ahamba ngekulandzelana kwemacembu awo, njengobe abetjeliwe.+ Lelifu lafike lema ehlane lasePharani.+ 13 Bekukwekucala kutsi ema-Israyeli esuke kuleyo ndzawo, alandzela lesicondziso Jehova labesinike Mosi.+

14 Licembu letive letintsatfu lebeliholwa sive sakaJuda lesuka kucala ngekwetindlu* talo. Nasoni+ indvodzana ya-Aminadabi nguye labelihola. 15 Sive saka-Isakhari besiholwa nguNethaneli+ indvodzana yaSuwari. 16 Sive sakaZebuloni sona besiholwa ngu-Eliyabe+ indvodzana yaHeloni.

17 Ngesikhatsi lithende lekukhontela lisuswa,+ emadvodzana aGeshoni+ kanye nemadvodzana aMerari,+ labetfwala lelithende lekukhontela esuka.

18 Ngemuva kwaloko, licembu letive letintsatfu lebeliholwa sive sakaRubeni nalo lesuka ngekwetindlu* talo. Elisuri+ indvodzana yaShedewuri nguye labelihola. 19 Sive sakaSimeyoni besiholwa nguShelumiyeli+ indvodzana yaSurishadayi. 20 Sive sakaGadi sona besiholwa ngu-Eliyasafa+ indvodzana yaDehuweli.

21 Kwabese kusuka emaKhohati, wona labetfwele tintfo tasendzaweni lengcwele.+ Bekufanele atsi nakefika atfole lithende lekukhontela selivele limisiwe.

22 Kwalandzela licembu letive letintsatfu lebeliholwa sive saka-Efrayimu. Nalo lahamba ngekwetindlu* talo futsi beliholwa ngu-Elishama+ indvodzana ya-Amihudi. 23 Sive sakaManase besiholwa nguGamaliyeli+ indvodzana yaPhedasuri. 24 Sive sakaBhenjamini sona besiholwa ngu-Abidani+ indvodzana yaGidiyoni.

25 Ekugcineni kwesuka licembu letive letintsatfu lebeliholwa sive sakaDani. Lahamba ngekwetindlu* talo futsi laba ngemuva kuze libe sivikelo kulalamanye emacembu. Ahiyezeri+ indvodzana ya-Amishadayi nguye labengumholi walo. 26 Sive saka-Asheri besiholwa nguPhagiyeli+ indvodzana ya-Okrani. 27 Sive sakaNaftali sona besiholwa ngu-Ahira+ indvodzana ya-Enani. 28 Nguleyo-ke indlela ema-Israyeli nemacembu* awo labelandzelana ngayo nakesuka.+

29 Mosi wabese utsi kuHobabi indvodzana yaRehuweli*+ umMidiyani, labengubabetala waMosi: “Nyalo siyahamba siya endzaweni Jehova letsembise kusinika yona.+ Ngako-ke ngicela uhambe natsi,+ futsi tsine sitakuphatsa kahle ngobe Jehova wetsembise kwentela ema-Israyeli tintfo letinhle.”+ 30 Kodvwa yena wamphendvula watsi: “Angeke ngihambe nani, kepha ngitawubuyela eveni lakitsi nasetihlotjeni tami.” 31 Mosi watsi: “Ngicela ungasishiyi, ngobe wena uyati kutsi singawamisa kuphi emathende ehlane, futsi nguwe longasicondzisa.* 32 Nobe ngutiphi tibusiso Jehova lasinika tona, nawe utawutitfola, nangabe nje utawuhamba natsi.”+

33 Ngako-ke babese bayesuka entsabeni yaJehova,+ bacala luhambo lolwatsatsa emalanga lamatsatfu. Libhokisi+ laJehova lesivumelwane belihamba embikwabo kulamalanga lamatsatfu kuze kutfolakale indzawo labangahlala kuyo.+ 34 Nabesuka kulendzawo lebebahlala kuyo, lifu+ laJehova laba ngetulu kwabo emini.

35 Ngaso sonkhe sikhatsi nakususwa leLibhokisi, Mosi abetsi: “Awu Jehova, sicela uhambe embikwetfu+ futsi uhlakate titsa takho, wente nekutsi labo labakuzondako babaleke embikwakho.” 36 Bekutsi naselibekwa leLibhokisi, Mosi atsi: “Awu Jehova, buya uhlale emkhatsini wetinkhulungwane tema-Israyeli letingeke tibalwe.”*+

11 Bantfu babese bakhonona kamatima embikwaJehova. Ngesikhatsi Jehova abeva watfukutsela kakhulu, ngako umlilo lovela kuJehova washisa labanye babo futsi wababulala emacentselweni alendzawo lebekuhlalwa kuyo. 2 Labantfu batsi nabakhala kuMosi, yena wase uyabancengela kuJehova+ futsi lomlilo waphela. 3 Leyo ndzawo yabitwa ngekutsi yiThabera,* ngobe kulapho umlilo lovela kuJehova wabashisa khona.+

4 Ngemuva kwaloko bantfu bekuhamba*+ lebebasemkhatsini wema-Israyeli bacala kuba bukhali,+ nema-Israyeli aphindze akhala atsi: “Ngubani nje longasipha inyama?+ 5 Maye siyatikhumbula tinhlanti lebesitidla mahhala eGibhithe, nemakhukhamba, emahwabha, boshaladi, bo-anyanisi, nabogalikhi!+ 6 Kodvwa nyalo sesite ngisho nemandla, futsi kute lokunye lesikutfolako ngaphandle kwanayi imana.”+

7 Lemana+ beyifana nenhlanyelo lencane lemhlophe,+ futsi ibukeka njengenhlaka.* 8 Labantfu bebaphuma, bayibutse bese bayigaya etjeni nobe bayigandze ekhovini. Ngemuva kwaloko bebayitsatsa bayibilise ebhodweni nobe bente ngayo tinkhwa letiyindingilizi.+ Nawuyidla beyifana nesinkhwa lesimnandzi lesinemafutsa. 9 Ebusuku nakwehla ematolo kulendzawo lebekuhlalwa kuyo, nalemana nayo beyehla.+

10 Mosi wabeva labantfu nabakhala, futsi bekukhala yonkhe imindeni, nguloyo naloyo emnyango welithende lakhe. Jehova watfukutsela kakhulu,+ kantsi naMosi kwamphatsa kabi kakhulu loko. 11 Ngako Mosi watsi kuJehova: “Uyiviseleni buhlungu inceku yakho? Kungani ngingakatfoli umusa emehlweni akho, uze unginike bonkhe labantfu labangumtfwalo kimi?+ 12 Ngingumake walabantfu yini? Ngimi yini lowabatala, kutsi ungaze utsi kimi angibagone njengemnakekeli* logona umntfwana lomunyako, ngibayise eveni lowafunga kulinika bokhokho babo?+ 13 Ngitayitsatsaphi nje inyama lengitayinika bonkhe labantfu? Ngobe solo bayangikhalela batsi: ‘Siphe inyama sitekudla!’ 14 Angisakhoni kwetfwala bonkhe labantfu ngingedvwana. Sekungetulu kwemandla ami.+ 15 Nangabe kungulena indlela lotangiphatsa ngayo, ngicela uvele ungibulale nyalo.+ Nangitfole umusa emehlweni akho, ungangenti ngibone lenye inhlekelele.”

16 Jehova waphendvula Mosi watsi: “Emadvodzeni lamadzala aka-Israyeli ubotsatsa langu-70, kube ngemadvodza lamadzala lowatiko nalabaholi,+ uwayise ethendeni lekuhlangana futsi eme lapho kanye nawe. 17 Mine ngitakwehla+ ngitewukhuluma nawe ethendeni lekuhlangana,+ bese ngitsatsa incenye yemoya longcwele+ lengikunike wona ngiyinikete lamadvodza. Atakutfwalisa lomtfwalo walabantfu kuze ungawutfwali wedvwa.+ 18 Ubotjela labantfu utsi: ‘Tingcweliseleni lilanga lakusasa,+ ngobe nitawudla inyama. Jehova ukuvile kukhala kwenu,+ nanitsi: “Ngubani nje longasipha inyama? Bekuncono eGibhithe.”+ Nakanjani Jehova utawuninika inyama futsi nitawuyidla.+ 19 Angeke niyidle nje emalanga lamabili kuphela nobe lasihlanu nobe langu-10 nobe langu-20, 20 kodvwa nitawuyidla inyanga yonkhe nize niyikhiphe ngemakhala futsi ningasayitsandzi,+ ngobe nimshiyile Jehova losemkhatsini wenu, nakhala embikwakhe natsi: “Vele siphumeleni eGibhithe?”’”+

21 Mosi wabese utsi: “Labantfu balibutfo lelingu-600 000,+ nanome kunjalo wena utsi: ‘Ngitawubanika inyama labatawuyidla inyanga yonkhe’! 22 Kube beyingahlatjwa yonkhe imihlambi yetimvu neyetimbuti kanye neyetinkhomo, beyingabenela yini labantfu? Natingabanjwa tonkhe tinhlanti letiselwandle, betingabenela yini?”

23 Jehova wabese utsi kuMosi: “Sandla saJehova sifishane yini?+ Nyalo-ke utawubona kutsi lelengikushoko kutakwenteka yini nobe cha.”

24 Ngako Mosi wahamba wayotjela bantfu loko Jehova lakushito. Wahlanganisa emadvodza langu-70 lawatsetse emadvodzeni lamadzala ema-Israyeli, wawamisa ethendeni lekuhlangana, alitungeleta.+ 25 Jehova wehla asefini,+ wakhuluma naMosi.+ Watsatsa incenye yemoya longcwele+ labewunike Mosi, wanika lamadvodza lamadzala langu-70. Ngekushesha nje umoya longcwele nawehlela kulamadvodza, acala kwenta tintfo letentiwa baphrofethi,*+ kodvwa lamadvodza akaphindzanga akwenta loko.

26 Lamabili alamadvodza bekasele endzaweni lokuhlalwa kuyo. Emabito awo bekungu-Eldadi naMedadi. Umoya longcwele wehlela kuwo njengobe emabito awo nawo abebhaliwe, kodvwa abengakayi ethendeni lekuhlangana. Ngako nawo lamadvodza acala kwenta tintfo letentiwa baphrofethi. 27 Lelinye lijaha lagijima layawubikela Mosi, latsi: “Bo-Eldadi naMedadi benta tintfo letentiwa baphrofethi lena endzaweni lokuhlalwa kuyo!” 28 Joshuwa+ indvodzana yaNuni, labengumsiti waMosi kusukela ebusheni bakhe, waphendvula watsi: “Nkhosi yami Mosi, bavimbe!”+ 29 Kodvwa Mosi watsi kuye: “Unemona yini ngami? Ecinisweni mine ngifisa shengatsi bonkhe bantfu baJehova bebangaba baphrofethi futsi Jehova abanikete umoya wakhe longcwele!” 30 Ngemuva kwesikhatsi, Mosi wabuyela endzaweni lokuhlalwa kuyo akanye nalamadvodza lamadzala aka-Israyeli.

31 Kwabese kuhhusha umoya lovela kuJehova, wakhipha tinyoni* elwandle tayowela kulendzawo lebekuhlalwa kuyo. Tagcwala kuto tonkhe tinhlangotsi talendzawo,+ tatsatsa indzawo lelingana nelibanga longalihamba ngelilanga linye eluhlangotsini ngalunye, futsi betingaba ngemasentimitha langu-89* kuphakama kusuka emhlabatsini. 32 Ngako kulo lonkhe lelolanga nebusuku bakhona kanye nakulo lonkhe lilanga lelilandzelako, labantfu abazange balale, kodvwa bebasolo babutsa letinyoni. Kute umuntfu lowabutsa ngephansi kwemahomeri* lalishumi, futsi bebasolo beneka letigwaca kuyo yonkhe lendzawo lokuhlalwa kuyo. 33 Kwatsi lapho nje lenyama isesemlonyeni, basengakayihlafuni ngisho nekuyihlafuna, Jehova wabatfukutselela kakhulu, ngaleso sizatfu Jehova wabulala incumbi yabo.+

34 Ngako leyo ndzawo bayibita ngekutsi yiKhibrothi-hathava,*+ ngobe kuyo bangcwaba labantfu lebebabukhali.+ 35 Besuka eKhibrothi-hathava baya eHaserothi,+ bafike bahlala khona.

12 BoMiriyamu na-Aroni bacala kukhuluma kabi ngaMosi ngenca yemfati longumKushe labemtsetse.+ 2 Bebatsi: “Kantsi Jehova ukhuluma asebentisa Mosi kuphela yini? Akasisebentisi yini natsi?”+ Jehova abebalalele.+ 3 Mosi abelunge kwendlula bonkhe bantfu*+ lebebasemhlabeni.

4 Ngekushesha Jehova wakhuluma naMosi na-Aroni kanye naMiriyamu, watsi: “Phumani nobatsatfu niye ethendeni lekuhlangana.” Ngako baphuma bobatsatfu. 5 Jehova wehla ngensika yelifu+ wafike wema emnyango welithende lekuhlangana, wabita bo-Aroni naMiriyamu, futsi bobabili basondzela. 6 Watsi kubo: “Ngicela nilalele. Kube bekunemphrofethi waJehova emkhatsini wenu, bengitawutiveta kuye embonweni+ ngiphindze ngikhulume naye ngeliphupho.+ 7 Kodvwa akusinjalo ngaMosi inceku yami! Yena ngimphatsise kutsi abuke bonkhe bantfu bami.*+ 8 Ngikhuluma naye buso nebuso,*+ naloko lengikushoko ngikubeka ebaleni futsi ngikusho ngemavi lacacile, naJehova uyabonakala kuye. Kungani-ke nibe nesibindzi sekukhuluma kabi ngaMosi inceku yami?”

9 Ngako Jehova wabatfukutselela kakhulu, futsi wabashiya. 10 Lelifu lesuka etikwalelithende lekuhlangana, futsi Miriyamu abesashaywe ngebulephelo lobumhlophe njengelichwa.+ Ngemuva kwaloko Aroni wagucuka wabuka Miriyamu, wamkhandza ashaywe ngesifo sebulephelo.+ 11 Ngekushesha Aroni watsi kuMosi: “Ngiyakuncenga nkhosi yami, sicela ungasijezisi ngalesono lesisentile! Loku lesikwentile sikwente ngebulima. 12 Ngicela ungavumi kutsi achubeke anjengeluswane lolutelwe lufile, lolunemtimba lesewubola!” 13 Ngako Mosi wakhala kuJehova watsi: “Awu Nkulunkulu, ngiyakucela, mane umphilise!”+

14 Jehova watsi kuMosi: “Kube babe wakhe abemkhafulele ebusweni, angitsi bekutawuphela emalanga langu-7 ahlazekile? Ngako-ke akakhishwe endzaweni lokuhlalwa kuyo, ahlaliswe yedvwa emalanga langu-7,+ ngemuva kwaloko sekangaphindze abuye.” 15 Miriyamu wakhishwa endzaweni lokuhlalwa kuyo, wahlaliswa yedvwa emalanga langu-7.+ Bantfu abazange basuke kuleyo ndzawo, kwaze kwaba ngulapho kubuya Miriyamu. 16 Ngemuva kwaloko besuka eHaserothi,+ bafike bamisa emathende ehlane lasePharani.+

13 Jehova wabese ukhuluma naMosi, watsi: 2 “Tfumela emadvodza kutsi ayewuhlola live laseKhenani, live lengitalinika ema-Israyeli. Esiveni ngasinye sabokhokho benu ubotfumela indvodza yinye, futsi kufanele kube yindvodza lengumholi+ waleso sive.”+

3 Ngako Mosi wawatfuma lamadvodza, asuka ehlane lasePharani+ njengobe Jehova abeshito. Onkhe abebaholi bema-Israyeli. 4 Nankha emabito awo: Esiveni sakaRubeni bekunguShamuwa indvodzana yaZakhuri; 5 esiveni sakaSimeyoni kunguShafati indvodzana yaHori; 6 esiveni sakaJuda kunguKhalebi+ indvodzana yaJefune; 7 esiveni saka-Isakhari kungu-Igali indvodzana yaJosefa; 8 esiveni saka-Efrayimu kunguHosheya+ indvodzana yaNuni; 9 esiveni sakaBhenjamini kunguPhaliti indvodzana yaRafu; 10 esiveni sakaZebuloni kunguGadiyeli indvodzana yaSodi; 11 esiveni sakaManase,+ wesive sakaJosefa,+ kunguGadi indvodzana yaSusi; 12 esiveni sakaDani kungu-Amiyeli indvodzana yaGemali; 13 esiveni saka-Asheri kunguSethuri indvodzana yaMikhayeli; 14 esiveni sakaNaftali kunguNahibi indvodzana yaVofisi; 15 kantsi esiveni sakaGadi bekunguGewuweli indvodzana yaMakhi. 16 Lawa-ke ngemabito alamadvodza Mosi lawatfuma kutsi ayewuhlola lelive. Waphindze wanika Hosheya indvodzana yaNuni libito lelitsi Joshuwa.*+

17 Ngesikhatsi Mosi awatfuma kutsi ayewuhlola live laseKhenani, watsi kuwo: “Khuphukelani eNegebhu, bese niya esifundzeni lesinetintsaba.+ 18 Kufanele nibuke kutsi lelive linjani+ nekutsi bantfu labahlala kulo banemandla yini nobe cha, nekutsi banyenti yini nobe bambalwa. 19 Nibophindze nibuke kutsi lelive lihle yini nobe libi, nekutsi emadolobha alo abiyelwe yini nobe akakabiyelwa. 20 Nibohlola nekutsi lelive linotsile* yini nobe cha,*+ nekutsi tikhona yini tihlahla kulo nobe kute. Kufanele nibe nesibindzi,+ nitsatse letinye tetitselo talelive.” Lesi bekusikhatsi sekuvutfwa kwemagilebisi ekucala.+

21 Ngako-ke lamadvodza ahamba futsi alihlola lelive kusukela ehlane laseZini+ kuya eRehobu+ kuze kuyewufika ngaseLebo-hamathi.*+ 22 Ngesikhatsi akhuphukela eNegebhu, efika eHebroni+ lapho bekuhlala khona bo-Ahimani, Sheshayi naThalmayi,+ labangema-Anaki.+ IHebroni beyakhiwe eminyakeni lengu-7 ngaphambi kweSowani yaseGibhithe. 23 Atsi nakefika eSihosheni sase-Eshkoli,+ ajuba ligala lebelinesikhehle semagilebisi, futsi kwadzingeka kutsi emadvodza lamabili aletfwale ngelugodvo, etfwale nemahananandza* kanye nemakhiwa.+ 24 Leyo ndzawo ayibita ngekutsi Sihosha sase-Eshkoli*+ ngobe kulapho abejube khona lesikhehle semagilebisi.

25 Ngemuva kwemalanga langu-40,+ lamadvodza abuya kuyewuhlola lelive. 26 Abuyela kuboMosi na-Aroni nakuso sonkhe sive sema-Israyeli eKhadeshi,+ ehlane lasePharani. Aletsa umbiko kuso sonkhe lesive aphindze asikhombisa titselo talelo live. 27 Naku lakusho kuMosi: “Singenile kulelive lebewusitfume kulo, futsi vele lilive leligeleta lubisi neluju,+ nati netitselo talo.+ 28 Kodvwa-ke bantfu labahlala khona banemandla kantsi nemadolobha abo labiyelwe makhulu kakhulu. Siphindze sabona nema-Anaki kulelive.+ 29 Ema-Amaleki+ ahlala endzaweni yaseNegebhu,+ esifundzeni lesinetintsaba khona kuhlala emaHethi, nemaJebhusi+ kanye nema-Amori,+ bese kutsi emaKhenani+ ahlala ngaselwandle+ naseceleni kweJordane.”

30 Khalebi wetama kwehlisa labantfu umoya njengobe bebeme embikwaMosi, watsi: “Asikhuphukeni ngekushesha futsi lelive sitalitsatsa libe ngeletfu, ngobe nakanjani sitawulincoba.”+ 31 Kodvwa lamadvodza labehambe naye atsi: “Angeke sikhone kukhuphuka siyekulwa nalabantfu, ngobe banemandla kunatsi.”+ 32 Lamadvodza achubeka aniketa ema-Israyeli umbiko lomubi+ ngalelive labeye kuyolihlola, atsi: “Lelive lebesiyolihlola lilive lelidla bantfu balo libacedze, nabo bonkhe bantfu lesibabonile bangemadvodza latidlakela.+ 33 Siphindze sabona nemaNefili, lokungemadvodzana a-Anaki+ lavela* kumaNefili, futsi kuwo sifana netintsetse, kantsi natsi vele sitibona kanjalo.”

14 Sonkhe sive sadzindza sililo. Bantfu bachubeka bakhala futsi balila busuku bonkhe.+ 2 Onkhe ema-Israyeli acala kukhonona ngaMosi nanga-Aroni,+ aphindze akhuluma kabi ngabo, atsi: “Kube mane safela eveni laseGibhithe nobe kulelihlane! 3 Jehova usiletseleni lapha kuze sitewubulawa ngenkemba?+ Bafati nebantfwana betfu batawutfunjwa.+ Akusincono yini kutsi sibuyele eGibhithe?”+ 4 Labantfu bebaze bakhulume bodvwa batsi: “Asikhetseni umuntfu lotawuba ngumholi wetfu bese sibuyela eGibhithe!”+

5 Nabeva loku, boMosi na-Aroni baguca phansi embikwaso sonkhe lesive sema-Israyeli lebesihlangene kuleyo ndzawo. 6 Joshuwa+ indvodzana yaNuni kanye naKhalebi+ indvodzana yaJefune, lebebangulabanye lebebatfunywe kuyohlola live, badzabula tingubo tabo, 7 batsi kuso sonkhe lesive sema-Israyeli: “Lelive lebesiyolihlola lihle kakhulu.+ 8 Nangabe Jehova ajabula ngatsi, nakanjani utawusingenisa kulelive leligeleta lubisi neluju futsi asinike lona.+ 9 Kodvwa kufanele ningamvukeli Jehova, nalabantfu bakulela live ningabesabi+ ngobe sitawubabulala sibacedze.* Bona abakavikeleki, futsi Jehova unatsi.+ Ngako ningabesabi.”

10 Kodvwa-ke sonkhe lesive besitsi boJoshuwa naKhalebi abagcotjwe ngematje.+ Onkhe ema-Israyeli abese abona inkhatimulo yaJehova ethendeni lekuhlangana.+

11 Jehova wabese utsi kuMosi: “Kuyoze kube ngunini solo labantfu bangangihloniphi+ futsi bete kukholwa kimi, nangetulu kwato tonkhe letibonakaliso lengitente emkhatsini wabo?+ 12 Kuncono ngivele ngibashaye ngesifo lesibulalako ngiphindze ngibacoshe, bese wena ngikwenta uba sive lesikhulu nalesinemandla kunabo.”+

13 Kodvwa Mosi watsi kuJehova: “Nakunjalo-ke, bantfu baseGibhithe lowakhipha ema-Israyeli kubo usebentisa emandla, batakuva ngaloku,+ 14 futsi batawutjela bantfu labahlala kulelive ngako. Nabo labantfu bevile kutsi wena Jehova usemkhatsini wema-Israyeli+ nekutsi utivete kuwo buso nebuso.+ Wena unguJehova, nelifu lakho lingetulu kwawo, futsi emini uhamba embikwawo ngensika yelifu bese kutsi ebusuku uhambe embikwawo ngensika yemlilo.+ 15 Nawungavele ubabulale bonkhe kanye kanye,* letive letivile ngeludvumo lwakho titawutsi: 16 ‘Jehova bekangasakhoni kubangenisa kulelive lafunga kutsi utawubanika lona, kungako nje abese uyababulala ehlane.’+ 17 Ngiyacela Jehova, khombisa kutsi unemandla lamakhulu, njengobe nje wetsembisa nawutsi: 18 ‘NginguJehova, lowephuta kutfukutsela nalogcwele lutsandvo lolucotfo,+ atsetselele emaphutsa netiphambeko, kodvwa angamyekeli loyo lonelicala. Uletsa sijeziso sesono lesentiwa bobabe, asiletsele emadvodzana abo, asiletsele nesitukulwane sesitsatfu nesitukulwane sesine.’+ 19 Ngiyacela, mane ubacolele lesono sabo ngekuvumelana nelutsandvo lwakho lolucotfo, njengobe nje bewusolo ubacolela kusukela eGibhithe kuze kube ngunyalo.”+

20 Jehova wabese utsi: “Kulungile, ngiyabacolela njengobe nje ucela.+ 21 Nobe kunjalo, ngifunga ngekuphila kwami kutsi umhlaba wonkhe utawugcwala inkhatimulo yaJehova.+ 22 Nobe ngumuphi umuntfu lobone inkhatimulo netibonakaliso+ lengitente eGibhithe nasehlane, kodvwa wachubeka angilinga kuto+ tonkhe letikhatsi* futsi wangalilaleli livi lami+ 23 ngeke alibone lelive lengafunga ngalo kubokhokho benu. Kute ngisho namunye kulabo labangakangihloniphi lotawulibona.+ 24 Kodvwa ngesizatfu sekutsi Khalebi+ inceku yami bekehlukile* kulalabanye, futsi wachubeka angilandzela ngenhlitiyo yonkhe, nakanjani ngitamngenisa kulelive lebekayolihlola, nebantfwana bakhe batalitsatsa libe labo.+ 25 Njengobe ema-Amaleki nemaKhenani+ ahlala esigodzini, kusasa kufanele nijike nilibangise ehlane futsi nihambe ngendlela yaseLwandle Lolubovu.”+

26 Ngemuva kwaloko, Jehova watsi kuMosi na-Aroni: 27 “Kutawuze kube ngunini lesive lesibi solo sikhonona ngami?+ Ngikuvile kukhonona kwema-Israyeli ngami.+ 28 Watjele utsi: ‘Jehova utsi: “Ngifunga ngekuphila kwami, ngitawukwenta kini loko lenginive nikusho!+ 29 Tidvumbu tenu titawugcwala kulelihlane,+ nonkhe nine lenibhalisiwe, kusukela kuloneminyaka lengu-20 budzala kuya etulu, nonkhe nine lebenikhonona ngami.+ 30 Kute ngisho namunye kini lotawungena kulelive lengafunga* kutsi nitawuhlala kulo,+ ngaphandle kwaKhalebi indvodzana yaJefune kanye naJoshuwa indvodzana yaNuni.+

31 “‘“Bantfwana benu lenitsite batawutfunjwa+ ngitabangenisa kulelive futsi batawulati lelive nine lenilalile.+ 32 Kodvwa tidvumbu tenu titawugcwala kulelihlane. 33 Emadvodzana enu atawuba belusi ehlane iminyaka lengu-40,+ futsi atawuphendvula ngenca yetento tenu tekungetsembeki,* kuze kube ngulapho kufa wekugcina wenu kulelihlane.+ 34 Nitawuphendvula ngetono tenu iminyaka lengu-40,+ njengobe nje niye kuyewuhlola lelive emalanga langu-40,+ futsi lilanga linye litawuba ngumnyaka. Ngako-ke nitawuyati imiphumela yekumelana nami.*

35 “‘“Mine Jehova sengikhulumile. Nguloku-ke lengitakwenta kuso sonkhe lesive lesibi, lesihlangene kuze simelane nami: Sitawuphelela kulelihlane, futsi sitawufela khona.+ 36 Lamadvodza Mosi lawatfuma kutsi ayohlola live nalabangela sonkhe sive kutsi sikhonone ngaye ngesikhatsi wona abuya nembiko lomubi ngalelive bekayewulihlola,+ 37 onkhe lawo madvodza laletsa umbiko lomubi atawushaywa afe embikwaJehova.+ 38 Kodvwa Joshuwa indvodzana yaNuni kanye naKhalebi indvodzana yaJefune, nabo lebebaye kuyewuhlola lelive, nakanjani bona batawuchubeka baphila.”’”+

39 Ngesikhatsi Mosi atjela onkhe ema-Israyeli lamavi, alila kakhulu. 40 Avuka lokwa ekuseni etama kukhuphukela etulu entsabeni, atsi: “Sonile, kodvwa nyalo sesikulungele kuya kulendzawo Jehova lakhulume ngayo.”+ 41 Kepha Mosi watsi: “Niwecelani umyalo waJehova? Angeke niphumelele. 42 Ningakhuphuki ngobe Jehova akekho kanye nani, ngako-ke titsa tenu titawunincoba.+ 43 Ngobe kuleya ndzawo nitawuhlaselwa ngema-Amaleki nemaKhenani+ futsi atawunibulala ngenkemba. Ngenca yekutsi niyekele kulandzela Jehova, Jehova angeke abe nani.”+

44 Nanobe kunjalo, labantfu bachubeka bakhuphukela etulu entsabeni,+ kepha libhokisi lesivumelwane saJehova alizange lisuke endzaweni lebekuhlalwa kuyo, naMosi naye akazange ahambe.+ 45 Ema-Amaleki nemaKhenani labehlala kuleyo ntsaba ehla abahlasela, abahlakata baze bayewufika eHoma.+

15 Jehova wachubeka akhuluma naMosi, watsi: 2 “Tjela ema-Israyeli utsi: ‘Naseningenile kulelive lengitaninika lona kutsi nihlale kulo,+ 3 bese nenta umnikelo lowentiwa ngemlilo kuJehova, ngesilwane lenisitsetse emhlambini wetinkhomo, nobe wetimvu nobe wetimbuti, kungaba kutsi ngumnikelo wekushiswa+ nobe ngumhlatjelo wekwenta sifungo lesikhetsekile nobe ngumnikelo wekutitsandzela+ nobe loyo leniwenta emikhosini yenu+ futsi lowentelwa kutsi ube liphunga lelimnandzi* kuJehova,+ 4 loyo loletsa lomnikelo kufanele aphindze aletse kuJehova umnikelo walokutinhlavu wafulaha locolisakele+ logcwele esikoteleni lesingemalitha lamabili,* lobhicwe nelitha* yemafutsa. 5 Kufanele ninikele nangelitha yeliwayini libe ngumnikelo walokunatfwako, lihambisane nemnikelo wekushiswa+ nobe umhlatjelo welizinyane lemvu lelidvuna. 6 Naninikela ngemvu lendvuna, nibokwenta nemnikelo walokutinhlavu ngafulaha locolisakele logcwele esikoteleni lesingemalitha langaba sihlanu,* lobhicwe nemafutsa langetudlwana kwelitha. 7 Nibonikela nangeliwayini lelingetudlwana kwelitha, kuze libe ngumnikelo walokunatfwako lotawuba liphunga lelimnandzi* kuJehova.

8 “‘Kodvwa naninikela ngenkhomo lendvuna kutsi ibe ngumnikelo wekushiswa,+ nobe umhlatjelo wekwenta sifungo lesikhetsekile+ nobe umhlatjelo wekuthula loya kuJehova,+ 9 kufanele ihambisane nemhlatjelo walokutinhlavu+ wafulaha locolisakele logcwele esikoteleni lesingemalitha langaba ngu-7,* lobhicwe nemafutsa langaba ngemalitha lamabili. 10 Nibonikela nangeliwayini lelingaba ngemalitha lamabili kuze libe ngumnikelo walokunatfwako,+ futsi libe ngumnikelo lowentiwa ngemlilo loliphunga lelimnandzi* kuJehova. 11 Nguloku lokufanele nikwente naninikela ngenkunzi, ngemvu lendvuna, nobe ngemvu lendvuna leseyincane nobe ngembuti. 12 Ngisho nobe titingakhi tilwane leninikela ngato, nguleyo indlela lokufanele nitinikele ngayo, kuye ngekutsi tingakhi. 13 Nguleyo indlela onkhe ema-Israyeli ekutalwa lokufanele ente ngayo iminikelo leyentiwa ngemlilo, leliphunga lelimnandzi* kuJehova.

14 “‘Nangabe umuntfu wekuhamba lohlala nani nobe loyo lesekwendlule titukulwane letinyenti solo ahleti nani, naye enta umnikelo lowentiwa ngemlilo, loliphunga lelimnandzi* kuJehova, abowenta ngalendlela leniwenta ngayo.+ 15 Munye umtsetfo lotawusebenta kum-Israyeli nakumuntfu wekuhamba lohlala kanye nani, futsi lona kutawuba ngumtsetfo lohlala njalo kuto tonkhe titukulwane tenu. Umuntfu wekuhamba kufanele afane nem-Israyeli embikwaJehova.+ 16 Kutawusebenta umtsetfo munye kanye nemyalo munye kumuntfu longum-Israyeli nakumuntfu wekuhamba lohlala emkhatsini wenu.’”

17 Jehova waphindze watsi kuMosi: 18 “Khuluma nema-Israyeli utsi: ‘Naningena kulelive lengitaninika lona, 19 futsi nidla sinkhwa* sakhona,+ kufanele nente umnikelo kuJehova. 20 Kufanele nente umnikelo wetitselo tenu tekucala+ talokutinhlavu lokuhhatekile, kube tinkhwa letiyindingilizi. Nibowunikela njengemnikelo waloko lenikutsetse ebaleni lekubhulela. 21 Letinye taletitselo tenu tekucala talokutinhlavu lokuhhatekile nitawunikela ngato kuJehova kuto tonkhe titukulwane tenu.

22 “‘Nangabe nenta liphutsa, futsi ningayigcini yonkhe lemitsetfo Jehova layitjele Mosi, 23 nayo yonkhe imiyalo Jehova laninike yona asebentisa Mosi kusukela ngelilanga Jehova layisho ngalo kuchubeke kuto tonkhe titukulwane tenu, 24 futsi nangabe loko lenikwentile nikwente ngeliphutsa, nebantfu bangakakuboni, sonkhe lesive kufanele sinikele ngenkunzana, ibe ngumnikelo wekushiswa loliphunga lelimnandzi* kuJehova. Lenkunzana itawuhambisana nemnikelo walokutinhlavu kanye nemnikelo walokunatfwako ngendlela lokuhlale kwentiwa ngayo,+ bese kunikelwa nangembuti leseyincane letawuba ngumnikelo wesono.+ 25 Umphristi utakwenta kutsi sonkhe sive sema-Israyeli sibuyisane naNkulunkulu siphindze sicolelwe+ ngobe besente liphutsa, futsi sawuletsa umnikelo lowentiwa ngemlilo kuJehova nemnikelo wesono kuJehova ngenca yeliphutsa laso. 26 Sonkhe sive sema-Israyeli sitawucolelwa kanye nebantfu bekuhamba labahlala emkhatsini waso, ngobe loku bekuliphutsa labo bonkhe bantfu.

27 “‘Nakwenteka umuntfu ona ngeliphutsa, kufanele aletse imbuti lensikati lenemnyaka munye letawuba ngumnikelo wesono.+ 28 Umphristi utakwenta kutsi lomuntfu lowone ngeliphutsa embikwaJehova abuyisane naNkulunkulu, kuze lesono lasentile sicolelwe futsi naye atsetselelwe.+ 29 Nangabe umuntfu one ngeliphutsa, kufanele kusebente umtsetfo munye kum-Israyeli wekutalwa nakumuntfu wekuhamba lohlala kanye nani.+

30 “‘Kodvwa umuntfu lowona ngemabomu,+ ngisho nobe angum-Israyeli wekutalwa nobe angumuntfu wekuhamba, usuke ahlambalata Jehova futsi kufanele abulawe. 31 Loyo muntfu kufanele abulawe nakanjani ngobe wedzelele livi laJehova, wephula nemtsetfo wakhe.+ Ngako lomuntfu utawutfwala licala lakhe.’”+

32 Ngesikhatsi ema-Israyeli asehlane, akhandza lenye indvodza itfota tinkhuni ngeliSabatha.+ 33 Labo labebakhandze lendvodza itfota bayiletsa kuboMosi na-Aroni, nakuso sonkhe sive sema-Israyeli. 34 Babese bayayivalela+ ngobe bekusengakashiwo kutsi kufanele yentiwe njani.

35 Jehova watsi kuMosi: “Lendvodza kufanele ibulawe nakanjani,+ futsi sonkhe sive kufanele siyigcobe ngematje ngephandle kwendzawo lokuhlalwa kuyo.”+ 36 Ngako-ke sonkhe sive sema-Israyeli sayikhiphela ngephandle kwendzawo lokuhlalwa kuyo, sayigcoba ngematje yaze yafa, njengobe nje Jehova abetjele Mosi.

37 Jehova wachubeka watsi kuMosi: 38 “Khuluma nema-Israyeli, uwatjele kutsi atentele timvakaza emiphetfweni yetingubo tawo, kuto tonkhe titukulwane tawo. Kufanele afake nentsambo leluhlata njengesibhakabhaka ngenhla kwaletimvakaza.+ 39 ‘Nibokwenta letimvakaza, kuze nanitibona nikhumbule yonkhe imitsetfo yaJehova futsi niyigcine.+ Ningabolandzela tinhlitiyo tenu kanye nemehlo enu, lokungiko lokwenta kutsi ningetsembeki kimi.*+ 40 Letimvakaza titanisita nikhumbule, futsi nitayilalela yonkhe imitsetfo yami, nibe ngcwele kuNkulunkulu wenu.+ 41 NginguJehova Nkulunkulu wenu, lowanikhipha eveni laseGibhithe kuze ngikhombise kutsi nginguNkulunkulu wenu.+ NginguJehova Nkulunkulu wenu.’”+

16 Ngemuva kwaloko Khora+ indvodzana yaJisihari+ loyindvodzana yaKhohati,+ indvodzana yaLevi,+ wahlangana ndzawonye nemadvodzana a-Eliyabe,+ boDathani na-Abiramu, kanye na-Oni indvodzana yaPhelethi, labavela emadvodzaneni aRubeni.+ 2 Bavukela Mosi bakanye nemadvodza aka-Israyeli langu-250, labekabaholi besive saka-Israyeli futsi angemadvodza lakhetsiwe nalahlonishwako. 3 Bahlangana ndzawonye bamelana+ naboMosi na-Aroni, batsi kubo: “Sesidziniwe ngini! Onkhe ema-Israyeli angcwele+ futsi Jehova usemkhatsini wawo.+ Nentiwa yini-ke nine kutsi nifune kutiphakamisa nibe ngetulu kwebantfu baJehova?”

4 Ngesikhatsi Mosi eva loku, wavele waguca watsintsa ngebuso phansi. 5 Wabese utsi kuKhora nakubo bonkhe lebebamsekela: “Ekuseni Jehova utawuveta kutsi ngubani longewakhe+ nekutsi ngubani longcwele futsi lokufanele ete embikwakhe.+ Loyo latamkhetsa+ nguye lotawusondzela kuye. 6 Naku lokufanele nikwente: Wena Khora nabo bonkhe labakusekelako+ nibotsatsa titja tekufaka emalahle,+ 7 bese kutsi kusasa nifake kuto umlilo nemphepho embikwaJehova. Loyo muntfu Jehova latamkhetsa+ nguye lotawube angcwele. Nine madvodzana aLevi+ senenta kakhulu-ke nyalo!”

8 Ngemuva kwaloko Mosi watsi kuKhora: “Madvodzana aLevi, ngicela nilalele. 9 Kubonakala kuyintfo lencane yini kini kutsi Nkulunkulu wema-Israyeli anikhetse emkhatsini waso sonkhe lesive,+ aphindze anivumele kutsi nisondzele kuye kuze nente umsebenti ethendeni laJehova lekukhontela, futsi nime embikwalesive kuze nisisite,+ 10 nekutsi nine nabo bonkhe bomnakenu leningemadvodzana aLevi aniletse edvute naye? Nyalo senifuna nekuba baphristi!+ 11 Wena kanye nabo bonkhe labakusekelako nimelene naJehova ngenca yaloku lenikwentile. Ungubani nje Aroni kutsi ningaze nikhonone ngaye?”+

12 Ngemuva kwesikhatsi, Mosi watfumela kutsi kubitwe boDathani na-Abiramu+ labangemadvodzana a-Eliyabe, kodvwa bona batsi: “Ngeke site! 13 Ucabanga kutsi akusho lutfo yini kitsi kutsi wasikhipha eveni lebeligeleta lubisi neluju wasiletsa lapha ehlane kuze sitewufela khona?+ Nyalo sewufuna nekutenta umbusi wetfu!* 14 Sikhuluma nje, kute live leligeleta lubisi neluju losingenise kulo,+ kute nelifa lemasimu nobe lensimu yemagilebisi losinike lona. Labantfu ufuna kubenta timphumphutse yini? Tsine ngeke site!”

15 Ngako Mosi watfukutsela kakhulu futsi watsi kuJehova: “Ungayemukeli iminikelo yabo yalokutinhlavu. Kute ngisho nayinye imbongolo yabo lengiyitsetse, futsi kute ngisho namunye kubo lengimlimete.”+

16 Mosi wabese utsi kuKhora: “Kusasa, wena nabo bonkhe bantfu labakusekelako kufanele nite embikwaJehova, kube nguwe nalabantfu kanye na-Aroni. 17 Nguloyo naloyo abotsatsa sitja sakhe sekufaka emalahle afake imphepho kuso, futsi ngamunye wenu utawuletsa lesitja sakhe embikwaJehova. Kutawuba netitja tekufaka emalahle letingu-250, bese kuba nesakho nesa-Aroni.” 18 Ngako-ke ngamunye wabo watsatsa sitja sakhe sekufaka emalahle wafaka umlilo nemphepho kuso, futsi bema emnyango welithende lekuhlangana kanye naMosi na-Aroni. 19 Ngesikhatsi Khora asahlanganise bonkhe labantfu labamsekelako+ emnyango welithende lekuhlangana kuze bamelane naMosi na-Aroni, sonkhe sive sema-Israyeli sabona inkhatimulo yaJehova.+

20 Jehova wabese ukhuluma naMosi na-Aroni, watsi: 21 “Khweshani kulabantfu kuze ngibacotfule khona nyalo.”+ 22 Nabeva loku, baguca futsi babheka phansi, batsi: “Awu Nkulunkulu, wena lonika bonkhe bantfu kuphila.*+ Sewungaze utfukutselele sonkhe lesive ngenca yesono semuntfu munye?”+

23 Ngako Jehova watsi kuMosi: 24 “Khuluma nema-Israyeli utsi kuwo: ‘Khweshani eceleni kwemathende aboKhora naDathani na-Abiramu!’”+

25 Mosi wabese uya kuboDathani na-Abiramu, nemadvodza lamadzala+ aka-Israyeli ahamba naye. 26 Mosi watsi kuma-Israyeli: “Ngicela nikhweshe emathendeni alamadvodza lakhohlakele futsi ningatsintsi lutfo lwawo kuze ningabulawa ngenca yato tonkhe tono tawo.” 27 Labantfu bakhwesha masinyane kuto tonkhe tinhlangotsi temathende aboKhora naDathani na-Abiramu. BoDathani na-Abiramu baphuma bema eminyango yemathende abo bakanye nebafati babo, emadvodzana abo kanye nebantfwana babo labancane.

28 Ngako Mosi watsi: “Naku lenitawubona ngako kutsi nguJehova longitfume kutsi ngente tonkhe letintfo, nekutsi angitenteli lengikucabangako:* 29 Nangabe labantfu bafa ngendlela levamile njengabo bonkhe labanye bantfu futsi nangabe batfola sijeziso lesifana nesabo bonkhe bantfu, loko kutawusho kutsi angikatfunywa nguJehova.+ 30 Kodvwa-ke nangabe Jehova enta intfo lengakavami ngekutsi kuvuleke* umhlaba ubamite bonkhe kanye nato tonkhe tintfo tabo, ngaleyo ndlela bangene eThuneni* baphila, nitawubese niyati-ke kutsi lamadvodza akakamhloniphi Jehova.”

31 Ngekushesha nje nakacedza kusho lamavi, umhlaba lebebeme kuwo labantfu wehlukana ekhatsi.+ 32 Wavuleka* futsi wabamita bonkhe kanye nemindeni yabo, wamita nabo bonkhe lebebabaKhora+ kanye nato tonkhe tintfo tabo. 33 Ngako-ke bona kanye nabo bonkhe bantfu babo bangena eThuneni* baphila futsi umhlaba wabambonya, baze baphela nya emkhatsini wema-Israyeli.+ 34 Onkhe ema-Israyeli labesedvutane nabo abaleka ngesikhatsi abeva bamemeta. Abetsi: “Sesaba kutsi umhlaba utawuze usimite natsi!” 35 Kwabese kwehla umlilo lovela kuJehova,+ wacotfula lamadvodza langu-250 labenikela imphepho.+

36 Jehova wabese utsi kuMosi: 37 “Tjela Eliyezeri indvodzana ya-Aroni umphristi kutsi akhiphe letitja tekufaka emalahle+ emlilweni, ngobe tona tingcwele. Ubophindze umtjele atsatse lomlilo awusakate khashane. 38 Letitja tekufaka emalahle talamadvodza lente sono lesibangele kutsi alahlekelwe kuphila* kufanele tentiwe bongcwengcwe labatawunamekwa e-al’thare,+ ngobe batiletse embikwaJehova futsi taba ngcwele. Kufanele tibe luphawu kuma-Israyeli.”+ 39 Ngako-ke Eliyezeri umphristi watsatsa letitja tekufaka emalahle letentiwe ngelitfusi lebetiletfwe ngulamadvodza lacotfulwa ngumlilo, waticocodza kuze atinameke e-al’thare, 40 njengobe nje Jehova abemtjelile asebentisa Mosi. Kuma-Israyeli, loku kwaba sikhumbuto sekutsi umuntfu longakavumeleki* nalongasiyo intalelwane ya-Aroni akukafaneli asondzele embikwaJehova kuze ashise imphepho,+ nesekutsi kute umuntfu lokufanele alingise Khora nalabo lebebamsekela.+

41 Kwatsi nje ngelilanga lelilandzelako, onkhe ema-Israyeli acala kukhonona ngaMosi nanga-Aroni,+ atsi: “Nine nobabili nibulele bantfu baJehova.” 42 Ngesikhatsi labantfu sebahlangene kuze bamelane naMosi na-Aroni, babuka ngasethendeni lekuhlangana futsi babona lifu limbonye lelithende, base babona nenkhatimulo yaJehova.+

43 BoMosi na-Aroni baya embikwelithende lekuhlangana,+ 44 futsi Jehova watsi kuMosi: 45 “Madvodza, khweshani kulabantfu kuze ngibacedze khona nyalo.”+ Nabeva loko, boMosi na-Aroni baguca futsi babheka phansi.+ 46 Mosi wabese utsi ku-Aroni: “Tsatsa sitja sekufaka emalahle bese ufaka kuso umlilo lose-al’thare,+ uphindze ufake nemphepho, ngemuva kwaloko uye kulesive ngekushesha, wente kutsi sibuyisane naNkulunkulu+ ngobe Jehova sewusitfukutselele. Lesishayo sesivele sicalile!” 47 Ngekushesha Aroni watsatsa lesitja njengobe Mosi abeshito, wagijima waya kulabantfu futsi lesishayo besesivele sicalile emkhatsini wabo. Ngako Aroni wafaka imphepho kulesitja wase wenta kutsi labantfu babuyisane naNkulunkulu. 48 Wachubeka eme emkhatsini walabo lebesebafile nalabo lebebaphila, nalesishayo sagcine sesiphelile. 49 Bantfu lababulawa ngulesishayo bebangu-14 700, ngaphandle kwalabo labafa ngenca yaKhora. 50 Ekugcineni Aroni nakabuyela kuMosi emnyango welithende lekuhlangana, wakhandza lesishayo sesiphelile.

17 Jehova wabese utsi kuMosi: 2 “Khuluma nema-Israyeli futsi kuleyo naleyondlu utsatse indvuku yinye yemholi wayo.+ Setitonkhe letindvuku kufanele tibe ngu-12. Ubobhala libito lemholi ngamunye endvukwini yakhe. 3 Endvukwini yakaLevi ubobhala libito la-Aroni, ngobe umholi ngamunye kuletindlu unendvuku yinye. 4 Letindvuku ubotibeka ethendeni lekuhlangana, embikwelibhokisi leBufakazi,+ lapho ngihlale ngitiveta khona kuwe.+ 5 Indvuku yaloyo lengimkhetsile+ itawuhluma, futsi ngitakucedza kukhonona ema-Israyeli lanako ngami+ nangani.”+

6 Ngako Mosi wakhuluma nema-Israyeli. Bonkhe baholi bawo bamniketa tindvuku tabo, umholi wendlu ngayinye waletsa indvuku yakhe. Setitonkhe letindvuku taba ngu-12 futsi nendvuku ya-Aroni beyisekhatsi. 7 Mosi wabese ubeka letindvuku embikwaJehova ethendeni lebelinelibhokisi leBufakazi.

8 Ngelilanga lelilandzelako, ngesikhatsi Mosi angena kulelithende lebelinelibhokisi leBufakazi, watfola indvuku ya-Aroni lebeyiyendlu yakaLevi ihlumile, iveta emahlumela, ichakaze timbali iphindze inema-almondi lavutsiwe. 9 Mosi wabese utsatsa tonkhe letindvuku embikwaJehova watikhiphela kubo bonkhe bantfu baka-Israyeli. Batibuka, futsi nguleyo naleyo ndvodza yatsatsa indvuku yayo.

10 Ngemuva kwaloko Jehova watsi kuMosi: “Buyisela indvuku ya-Aroni+ embikwelibhokisi leBufakazi ngobe kufanele ihlale iluphawu+ kubantfu labavukelako,+ kuze bayekele kukhonona ngami futsi bangafi.” 11 Ngekushesha Mosi wenta loko Jehova labemtjele kona. Wakwenta konkhe njengobe abeshito.

12 Ema-Israyeli abese atsi kuMosi: “Nyalo sitawufa futsi nakanjani sitawucotfulwa sonkhe siphele nya! 13 Nobe ngubani lotawusondzela ethendeni laJehova lekukhontela utawufa!+ Sekufanele sife kanjalo yini?”+

18 Jehova wabese utsi ku-Aroni: “Wena nemadvodzana akho nendlu yakini nitawulandzisa ngekwephulwa kwanobe ngumuphi umtsetfo lomayelana nendzawo lengcwele,+ futsi wena nemadvodzana akho nitawulandzisa nangekwephulwa kwanobe ngumuphi umtsetfo lomayelana nemsebenti webuphristi.+ 2 Uboletsa nabomnakenu labavela esiveni sakaLevi, lokusive sabokhokho bakho, kute batewusebenta nawe futsi bakusite,+ wena nemadvodzana akho embikwelithende lelinelibhokisi leBufakazi.+ 3 Batawufeza imisebenti lobanika yona, nayo yonkhe imisebenti lemayelana nelithende lekukhontela.+ Kodvwa-ke, bangabosondzela edvute netintfo letisetjentiswa endzaweni lengcwele, bangasondzeli nase-al’thare, kuze wena kanye nabo ningafi.+ 4 Batawusebenta nawe baphindze bente imisebenti lemayelana nelithende lekuhlangana kanye nayo yonkhe imisebenti leyentiwa kulelithende. Umuntfu longakavumeleki* akukafaneli asondzele kuwe.+ 5 Imisebenti yakho lemayelana nendzawo lengcwele+ kanye neli-al’thare+ kufanele uyente kuze Nkulunkulu angatewuphindze abatfukutselele+ bantfu baka-Israyeli. 6 Kuma-Israyeli, mine ngitsetse emaLevi, lokubomnakenu, ngawapha wena.+ Anikwe Jehova kuze atewukwenta umsebenti wasethendeni lekuhlangana.+ 7 Wena nemadvodzana akho kufanele nente imisebenti yenu yebuphristi lemayelana neli-al’thare kanye nalokungale kwendvwangu yekwehlukanisa.+ Nguloyo umsebenti lokufanele niwente.+ Ngininike lomsebenti webuphristi waba sipho kini, futsi nobe ngumuphi umuntfu longakavumeleki* lotawusondzela abobulawa.”+

8 Jehova wachubeka akhuluma na-Aroni watsi: “Mine ngikubeke kutsi ubuke iminikelo leletfwa kimi.+ Wena nemadvodzana akho ngininike incenye kuto tonkhe tintfo letingcwele ema-Israyeli latinikelako, futsi loku kutawuhlale kusabelo senu.+ 9 Kuyo yonkhe iminikelo leyentiwa ngemlilo futsi lengcwele ngelizinga leliphakeme, naku lokutawuba kwenu: yonkhe iminikelo bantfu labayiletsa kimi, lokufaka ekhatsi iminikelo yabo yalokutinhlavu,+ iminikelo yesono+ kanye neminikelo yelicala.+ Leminikelo ingcwele ngelizinga leliphakeme kuwe nakumadvodzana akho. 10 Kufanele niyidlele endzaweni lengcwele.+ Wonkhe umuntfu lomdvuna angayidla futsi itawuba ngcwele kini.+ 11 Naloku kutawuba ngekwenu: tipho ema-Israyeli latiletsako+ kanye nayo yonkhe iminikelo lejikitiswako.+ Ngikunike wena, emadvodzana akho kanye nemadvodzakati akho futsi kutawuhlale kusabelo senu.+ Wonkhe umuntfu lohlantekile losendlini yakho angakudla.+

12 “Titselo tabo tekucala+ labatinika Jehova, lokungiwo onkhe emafutsa lancono, lonkhe liwayini lelisha lelincono kanye nalokutinhlavu, ngikunika wena.+ 13 Titselo tekucala letivutsiwe tako konkhe lokuseveni labo, leto labatawutiletsa kuJehova, titawuba takho.+ Wonkhe umuntfu lohlantekile losendlini yakho angatidla.

14 “Yonkhe intfo lenikelwe* kuNkulunkulu ka-Israyeli kufanele ibe ngeyakho.+

15 “Onkhe ematibulo ato tonkhe tintfo letiphilako*+ labatawaletsa kuJehova atawuba ngewakho, kungaba ngematibulo ebantfu nobe etilwane. Kodvwa-ke ematibulo ebantfu+ kanye nematibulo etilwane letingakahlanteki kufanele uwahlenge.+ 16 Nangabe lelitibulo linenyanga yinye kuya etulu budzala, ubokhipha imali yekulihlenga, ibe ngemagremu langu-57* elisiliva labekiwe, lakalwe ngesisindvo lesisemtsetfweni sasendzaweni lengcwele.* Lishekeli+ lingemagera* langu-20. 17 Ematibulo etinkhomo lamadvuna, ematibulo lamadvuna etimvu kanye newetimbuti ngiwo kuphela lokufanele ungawahlengi+ ngobe angcwele. Ingati yawo uboyifafata e-al’thare,+ emanoni awo uwashise abe ngumnikelo lowentiwa ngemlilo kuze abe liphunga lelimnandzi* kuJehova.+ 18 Inyama yawo kufanele ibe ngeyakho. Itawuba ngeyakho, njengemganga wemnikelo lojikitiswako kanye nemlente wangesekudla.+ 19 Yonkhe iminikelo lengcwele ema-Israyeli latayiletsa kuJehova+ ngiyinike wena, emadvodzana akho kanye nemadvodzakati akho, futsi itawuhlala isabelo senu.+ Lesi sivumelwane lesitawuhlala njalo* embikwaJehova, kuwe nasentalelwaneni yakho.”

20 Jehova wachubeka watsi ku-Aroni: “Ngeke nibe nelifa eveni lawo, futsi kute umhlaba lenitawunikwa wona.+ Mine ngisabelo kanye nelifa lenu emkhatsini wema-Israyeli.+

21 “Mine nginike emadvodzana aLevi konkhe kwelishumi+ ka-Israyeli kutsi kube lifa lawo ngenca yemsebenti lawentako, lokungumsebenti wasethendeni lekuhlangana. 22 Ema-Israyeli angeke asasondzela ethendeni lekuhlangana ngobe nakenta njalo atawuba nesono futsi afe. 23 LamaLevi kufanele ente imisebenti yasethendeni lekuhlangana futsi ngiwo latawuphendvula ngenca yetono talabantfu.+ Kufanele angabi nelifa emkhatsini wema-Israyeli. Lona ngumtsetfo lotawuhlala njalo kuto tonkhe titukulwane tenu.+ 24 EmaLevi ngiwanikete kwelishumi ema-Israyeli lakunikela kuJehova kutsi kube lifa lawo. Kungako ngitsite: ‘Kufanele angabi nelifa emkhatsini wema-Israyeli.’”+

25 Jehova wabese utsi kuMosi: 26 “Ubotjela emaLevi utsi: ‘Kuma-Israyeli, nitawutsatsa kwelishumi lengininike kona kutsi kube lifa lenu.+ Kuko nibotsatsa kwelishumi kwaloko kwelishumi ninikele ngako kuJehova.+ 27 Loku kutawutsatfwa njengemnikelo wenu, kube njengalokutinhlavu lokutsetfwe ebaleni lekubhulela+ nobe umkhicito wenu weliwayini lelinyenti nobe wemafutsa. 28 Ngaleyo ndlela, nani nitawuletsa umnikelo kuJehova leniwutsetse kuko konkhe kwelishumi lenikutfola kuma-Israyeli, futsi lomnikelo waJehova kufanele niwunike Aroni umphristi. 29 Nitawuletsa kuJehova yonkhe inhlobo yeminikelo leniyitsetse kuto tonkhe tipho letinhle kakhulu leninikwe tona+ futsi letingcwele.’

30 “Kufanele utsi kuwo: ‘Nanitsatsa lokuncono kakhulu kuleminikelo ninikele ngako, kutawuba shengatsi ninikele ngalenikutsetse ebaleni lekubhulela nobe ngemkhicito wenu weliwayini lelinyenti nobe wemafutsa. 31 Wena nendlu yakho ningakudlela kunobe nguyiphi indzawo, ngobe kusabelo leninikwa sona ngenca yekwenta umsebenti ethendeni lekuhlangana.+ 32 Kute sono lenitawuba naso, yingci nje naninikela ngalokuncono kakhulu lenikutsetse kuleminikelo, futsi kufanele ningatingcolisi tintfo letingcwele tema-Israyeli ngobe nanenta njalo nitakufa.’”+

19 Jehova waphindze wakhuluma naMosi na-Aroni, watsi: 2 “Nangu umtsetfo Jehova lawushito: ‘Tjela ema-Israyeli kutsi aboletsa inkhomo lebovu lephile kahle, lete sici+ nalengakaze iboshelwe ejokeni. 3 Lenkhomo niboyinika Eliyezeri umphristi. Yena utayikhiphela ngephandle kwalendzawo lokuhlalwa kuyo futsi ihlatjwe embikwakhe. 4 Ngemuva kwaloko, Eliyezeri umphristi utawucobhota umunwe wakhe kulenye yengati yayo, ayintfontsise tikhatsi letingu-7 ayibhekise ngasembikwelithende lekuhlangana.+ 5 Lenkhomo itawubese ishiswa embikwakhe. Sikhumba sayo, inyama, ingati kanye nebulongo bayo nako kutawushiswa.+ 6 Umphristi utawutsatsa sigodvo semsedari, ihisophu*+ kanye nendvwangu lebovu akujike kulomlilo lokushiselwa kuwo lenkhomo. 7 Utawubese uwasha tingubo takhe futsi ageze ngemanti, ngemuva kwaloko sekangeta endzaweni lokuhlalwa kuyo. Kodvwa utawuba ngulongcolile kuze kuhlwe.

8 “‘Lomuntfu loshise lenkhomo utawuwasha tingubo takhe ngemanti futsi naye ageze ngemanti. Utawuba ngulongcolile kuze kuhlwe.

9 “‘Umuntfu lohlantekile kufanele abutse umlotsa walenkhomo+ ayewucitsa endzaweni lehlantekile, ngephandle kwendzawo lokuhlalwa kuyo. Ema-Israyeli kufanele awugcine lomlotsa kuze awusebentise nakenta emanti ekuhlambulula.+ Lenkhomo ingumnikelo wesono. 10 Lomuntfu lotawubutsa umlotsa walenkhomo utawuwasha tingubo takhe, futsi abe ngulongcolile kuze kuhlwe.

“‘Lona kutawuba ngumtsetfo lohlala njalo lotawulandzelwa ngema-Israyeli nebantfu bekuhamba labahlala emkhatsini wawo.+ 11 Nobe ngubani lotawutsintsa umuntfu lofile* utawuba ngulongcolile emalanga langu-7.+ 12 Ngelilanga lesitsatfu, loyo muntfu kufanele atihlambulule ngalamanti, futsi ngelilanga lesi-7 utawubese uba ngulohlantekile. Kodvwa nakangeke atihlambulule ngelilanga lesitsatfu, angeke abe ngulohlantekile ngelilanga lesi-7. 13 Nobe ngubani lotsintsa sidvumbu sanobe ngumuphi umuntfu lofile* futsi angatihlambululi, usuke angcolise lithende laJehova lekukhontela,+ ngako kufanele abulawe.+ Utawuchubeka angcolile ngobe akakafafatwa ngalamanti ekuhlambulula.+ Kungcola kwakhe kutawube kusesekuye.

14 “‘Nangu umtsetfo losebenta nangabe umuntfu afela ethendeni: Wonkhe umuntfu lotawungena kulelithende, nawo wonkhe umuntfu lobekangekhatsi kulo utawuba ngulongcolile emalanga langu-7. 15 Tonkhe titja letivulekile letite timbonyo letiboshelwe kuto titawuba nguletingcolile.+ 16 Wonkhe umuntfu losesigangeni lotawutsintsa umuntfu lobulewe ngenkemba, nobe sidvumbu nobe ematsambo emuntfu nobe lithuna utawuba ngulongcolile emalanga langu-7.+ 17 Lomuntfu longcolile kufanele atsatselwe umlotsa walenkhomo leshisiwe lebeyingumnikelo wesono, bese kutselwa emanti lakhiwe esiyalwini kulomlotsa losesitjeni. 18 Ngemuva kwaloko umuntfu lohlantekile+ utawutsatsa ihisophu+ ayenye kulamanti bese uwafafata kulelithende, kuto tonkhe titja letikulo, kubo bonkhe bantfu lebebakulelithende, nakuloyo lotsintse ematsambo nobe umuntfu lobulewe nobe sidvumbu nobe lithuna. 19 Ngelilanga lesitsatfu nangelilanga lesi-7, lomuntfu lohlantekile utawufafata lona longakahlanteki ngalamanti. Ngelilanga lesi-7,+ utamhlambulula esonweni. Ngemuva kwaloko lomuntfu longakahlanteki kufanele awashe tingubo takhe, ageze nangemanti, futsi kusihlwa utawuba ngulohlantekile.

20 “‘Kodvwa nangabe umuntfu longakahlanteki angatihlambululi, kufanele abulawe+ ngobe ungcolise indzawo lengcwele yaJehova. Utawuba ngulongcolile ngobe akakafafatwa ngemanti ekuhlambulula.

21 “‘Lona ngumtsetfo lohlala njalo lokufanele bawulandzele: Umuntfu lotawufafata lomunye ngemanti ekuhlambulula+ abowasha tingubo takhe, naloyo lotsintsa lamanti ekuhlambulula utawuba ngulongcolile kuze kuhlwe. 22 Nobe yini letawutsintfwa ngumuntfu longcolile itawuba ngulengcolile, naloyo lotsintsa leyontfo naye utawuba ngulongcolile kuze kuhlwe.’”+

20 Enyangeni yekucala, bonkhe bantfu baka-Israyeli befika ehlane laseZini, bahlala eKhadeshi.+ Miriyamu+ wafela lapho waphindze wangcwatjelwa khona.

2 Kuleyo ndzawo bekute emanti,+ ngako labantfu bahlangana ndzawonye bamelana naMosi na-Aroni. 3 Bebalwa naMosi+ batsi: “Kube mane natsi safa ngesikhatsi bomnaketfu bafa embikwaJehova! 4 Nibaletseleni labantfu baJehova kulelihlane kuze sifele lapha, tsine nemfuyo yetfu?+ 5 Nasikhiphelani eGibhithe nasiletsa kulendzawo lembi?+ Akulimeki lapha, kute nemakhiwa, netihlahla temagilebisi kanye nemahananandza,* futsi kute nanemanti ekunatsa.”+ 6 Ngako boMosi na-Aroni besuka embikwalesive baya emnyango welithende lekuhlangana, bafike baguca futsi babheka phansi. Ngemuva kwaloko babona inkhatimulo yaJehova.+

7 Jehova wabese utsi kuMosi: 8 “Tsatsa indvuku yakho, bese wena na-Aroni umnakenu nibitela ndzawonye lesive. Nibokhuluma nalelidvwala embikwaso kuze likhiphe emanti, ngaleyo ndlela nitawukhiphela lesive emanti kulelidvwala futsi sona kanye nemfuyo yaso sitawutfola emanti ekunatsa.”+

9 Ngako-ke Mosi watsatsa lendvuku embikwaJehova,+ njengobe nje Nkulunkulu abemtjelile. 10 Ngemuva kwaloko boMosi na-Aroni babitela lesive ndzawonye embikwalelidvwala, futsi Mosi watsi kuso: “Lalelani-ke nine tihlubuki! Nifuna sinikhiphele emanti kulelidvwala yini?”+ 11 Mosi wabese uphakamisa sandla sakhe washaya lelidvwala kabili ngendvuku yakhe, futsi kwaphuma emanti lamanyenti. Sonkhe lesive kanye nemfuyo yaso sabese siyanatsa.+

12 Ngekuhamba kwesikhatsi Jehova watsi kuboMosi na-Aroni: “Ngenca yekutsi anikakhombisi kukholwa kimi nangenca yekutsi anikangingcwelisi embikwalabantfu baka-Israyeli, ngeke nisasingenisa lesive eveni lengitawulinika sona.”+ 13 Lawa-ke ngemanti aseMeribha,*+ lapho ema-Israyeli alwa khona naJehova waze watingcwelisa kuwo.

14 Ngemuva kwaloko Mosi watfumela titfunywa kutsi tisuke eKhadeshi tiye enkhosini yaka-Edomu,+ watsi: “Naku lokushiwo ngu-Israyeli umnakenu:+ ‘Wena ubati kahle bonkhe bulukhuni lesibe nabo. 15 Bokhokho betfu baya eGibhithe,+ futsi sahlala khona iminyaka* leminyenti,+ nebantfu bakhona basiphatsa kabi tsine nabokhokho betfu.+ 16 Ekugcineni sakhala kuJehova+ futsi wasiva, wase utfumela ingilosi+ yakhe wasikhipha eGibhithe. Nyalo silapha eKhadeshi, lidolobha lelisemnceleni wendzawo yakho. 17 Sicela usivumele sendlule eveni lakho. Ngeke sidzabule kunobe nguyiphi insimu nobe insimu yemagilebisi, futsi ngeke sinatse emanti kunobe ngumuphi umtfombo. Sitawuhamba ngeMgwaco weNkhosi singajikeli ngesekudla nobe ngesencele, size sendlule eveni lakho.’”+

18 Kodvwa-ke inkhosi yaka-Edomu yatsi: “Ngeke nidzabule eveni letfu, ngobe nanitawukwenta njalo mine ngitawuphuma nenkemba nginihlasele.” 19 Ema-Israyeli ayiphendvula atsi: “Sitawuhamba ngemgwaco lomkhulu, futsi nangabe tsine nemfuyo yetfu sinatsa emanti enu sitawabhadala.+ Kute lokunye lesikucelako ngaphandle kwekwendlula ngetinyawo endzaweni yenu.”+ 20 Nanobe kunjalo, lenkhosi yatsi: “Ngeke nidzabule kulelive.”+ Ngemuva kwaloko, inkhosi yaka-Edomu yaphuma yabahlasela ikanye nebantfu labanyenti nelibutfo* lelinemandla. 21 Ngako-ke lenkhosi yaka-Edomu ayizange iwavumele ema-Israyeli kutsi endlule eveni layo. Ngaleso sizatfu, ema-Israyeli esuka kuyo.+

22 Bonkhe bantfu baka-Israyeli besuka eKhadeshi, bahamba baze bayofika eNtsabeni iHori.+ 23 Jehova wabese ukhuluma naMosi na-Aroni eNtsabeni iHori lebeyingasemnceleni welive laka-Edomu, watsi: 24 “Aroni utawufa futsi angcwatjwe njengabo bonkhe bantfu bakubo.*+ Angeke angene eveni lengitalinika ema-Israyeli ngobe nine nobabili anizange nikulalele loko lebengikushito mayelana nemanti aseMeribha.+ 25 Tsatsa Aroni kanye na-Eliyezeri indvodzana yakhe, ukhuphukele nabo eNtsabeni iHori. 26 Ubokhumula Aroni tingubo takhe+ tebuphristi, utigcokise Eliyezeri+ indvodzana yakhe ngobe Aroni utawufela lapho.”*

27 Ngako Mosi wenta njengobe Jehova abemtjelile futsi bakhuphukela eNtsabeni iHori embikwaso sonkhe sive. 28 Mosi wase ukhumula Aroni letingubo tebuphristi, watigcokisa Eliyezeri indvodzana yakhe. Ngemuva kwaloko Aroni wafela lapho esicongweni sentsaba,+ futsi boMosi na-Eliyezeri behla kuyo. 29 Lesive sonkhe satsi nasibona kutsi Aroni sewufile, samkhalela kwaze kwaphela emalanga langu-30.+

21 Ngesikhatsi inkhosi yase-Aradi+ lengumKhenani futsi lebeyihlala eNegebhu iva kutsi ema-Israyeli eta ngendlela yase-Atharimu, yawahlasela yaphindze yatfumba lamanye awo. 2 Ngako sive saka-Israyeli safunga kuJehova satsi: “Nangabe utawunikela labantfu esandleni setfu, nakanjani sitawabhubhisa emadolobha abo.” 3 Jehova wasilalela sive saka-Israyeli, wanikela emaKhenani esandleni sawo. Ema-Israyeli awabhubhisa lamaKhenani kanye nemadolobha awo. Ngaleso sizatfu, abita leyo ndzawo ngekutsi yiHoma.*+

4 Njengobe bebachubeka neluhambo kusukela eNtsabeni iHori+ ngendlela lehamba ngaseLwandle Lolubovu kuze bagege live laka-Edomu,+ labantfu base bayadzinwa. 5 Bachubeka bakhuluma kabi ngaNkulunkulu nangaMosi+ batsi: “Usikhipheleni eveni laseGibhithe kuze sitewufela lapha ehlane? Kulendzawo kute kudla nemanti+ futsi tsine sesiyasenyanya* lesinkhwa lesibi.”+ 6 Ngako Jehova watfumela tinyoka letinesihlungu* kulabantfu futsi tabaluma, kangangekutsi ema-Israyeli lamanyenti afa.+

7 Labantfu baya kuMosi batsi: “Sonile ngekukhuluma kabi ngaJehova nangawe.+ Sincengele kuJehova kuze asuse letinyoka kitsi.” Ngako Mosi wabancengela kuNkulunkulu.+ 8 Jehova wabese utsi kuMosi: “Yakha umfanekiso wenyoka lenesihlungu* bese uwulengisa esigodvweni. Nangabe umuntfu alunywa yinyoka, kufanele abuke lomfanekiso lowakhile kuze angafi.” 9 Ngekushesha Mosi wakha inyoka ngelitfusi+ futsi wayilengisa elugodvweni.+ Bekutsi nobe nini lapho umuntfu alunywa yinyoka bese ubuka lena yelitfusi, angafi.+

10 Ema-Israyeli abese ayesuka lapho, ayomisa emathende e-Obothi.+ 11 Ngemuva kwaloko, esuka e-Obothi amisa emathende e-Iye-abharimu,+ ehlane lelibukene nakaMowabi ngasemphumalanga. 12 Nakesuka lapho, amisa emathende ngaseSigodzini saseZeredi.+ 13 Aphindze esuka lapho amisa emathende esifundzeni lesisesigodzini sase-Anoni,+ lesisehlane lelisuka emnceleni welive lema-Amori, ngobe sigodzi sase-Anoni singumncele wakaMowabi futsi sisemkhatsini welive lakaMowabi nelema-Amori. 14 Nguloko lokwenta incwadzi yeTimphi taJehova ikhulume “ngeWahebi leseSufa netigodzi tase-Anoni, 15 kanye nemewukelo* waletigodzi lohamba uze uyewufika ngasendzaweni yase-Ari futsi uhlangane nemncele wakaMowabi.”

16 Ngemuva kwaloko ema-Israyeli aya eBheyeri. Lona ngulomtfombo Jehova latsi ngawo kuMosi: “Butsisa labantfu kuze ngibanike emanti.”

17 Ngaleso sikhatsi, ema-Israyeli ahlabela atsi:

“Sikhiphele emanti wena mtfombo!—Wubongeleleni* ngengoma!

Ngemuva kwaloko besuka ehlane baya eMathana, 19 nabesuka eMathana baya eNahaliyeli, nabesuka eNahaliyeli baya eBamothi.+ 20 Besuka eBamothi baya esigodzini lesisendzaweni* yakaMowabi,+ ngetulu kwePhisga+ lengenhla kweJeshimoni.*+

21 Ema-Israyeli abese atfuma titfunywa kuSihoni, inkhosi yema-Amori, atsi:+ 22 “Sicela kwendlula eveni lakho. Ngeke siye emasimini nobe etihlahleni temagilebisi. Angeke siwanatse emanti kunobe ngumuphi umtfombo. Sitawuhamba ngeMgwaco Wenkhosi size sendlule eveni lakho.”+ 23 Kodvwa Sihoni akawavumelanga ema-Israyeli kutsi endlule eveni lakhe. Esikhundleni saloko wabutsa bonkhe bantfu bakhe bahamba kuze bayomelana nema-Israyeli, futsi befika eJahasi balwa nawo.+ 24 Ema-Israyeli ancoba Sihoni ngenkemba,+ atsatsa nelive lakhe+ kusukela esigodzini sase-Anoni+ kuya esigodzini saseJabhoki+ eceleni kwesive sema-Amoni, ngobe iJazeri+ beyisemnceleni wendzawo yesive sema-Amoni.+

25 Ngako ema-Israyeli awatsatsa onkhe lawo madolobha, futsi abese ahlala kuwo onkhe emadolobha esive sema-Amori,+ eHeshboni nakuwo onkhe emadolobha labekaseceleni* kwayo. 26 IHeshboni bekulidolobha laSihoni inkhosi yema-Amori, lobekalwe nenkhosi yakaMowabi futsi watsatsa lonkhe live layo waze wayewufika esigodzini sase-Anoni. 27 Kungako kwaba nesaga lesiphukutako lesitsi:

“Wota eHeshboni.

Lidolobha laSihoni alakhiwe liphindze lisinyiswe.

28 Ngobe kuchamuke umlilo uvela eHeshboni, lilangabi lelivela edolobheni laSihoni.

Ushise indzawo yase-Ari yakaMowabi, washisa nemakhosi etindzawo letiphakeme tase-Anoni.

29 Maye kuwe Mowabi! Nitawubhujiswa nine bantfu baKhemoshi!+

Emadvodzana akhe uwenta abe bakhoseli, nemadvodzakati akhe abe titfunjwa taSihoni, inkhosi yema-Amori.

31 Ngako ema-Israyeli acala kuhlala eveni lema-Amori. 32 Mosi wabese utfuma tinhloli eJazeri,+ futsi ema-Israyeli awancoba onkhe emadolobha laseceleni* kwayo aphindze acosha onkhe ema-Amori labehlala lapho. 33 Nakesuka lapho ajika akhuphuka ngeNdlela yaseBhashani. Ogi+ inkhosi yaseBhashani waphuma nabo bonkhe bantfu bakhe wayokulwa nema-Israyeli e-Edreyi.+ 34 Jehova wase utsi kuMosi: “Ningamesabi,+ ngobe ngitawunikela yena nabo bonkhe bantfu bakhe kanye nelive lakhe esandleni senu,+ futsi nitakwenta kuye loko lenakwenta kuSihoni, inkhosi yema-Amori lobekahlala eHeshboni.”+ 35 Ngako ema-Israyeli ambulala, yena nemadvodzana akhe nabo bonkhe bantfu bakhe, kwangasali ngisho namunye umuntfu,+ futsi atsatsa nelive lakhe.+

22 Ema-Israyeli esuka, afike amisa emathende awo ehlane lakaMowabi ngesheya kweJordane, macondzana neJerikho.+ 2 Bhalaki+ indvodzana yaSiphori wakubona konkhe loko ema-Israyeli labekwente kuma-Amori, 3 futsi emaMowabi awesaba kakhulu ema-Israyeli, ngobe abemanyenti kakhulu. Ngako atfutfumela ngenca yema-Israyeli.+ 4 EmaMowabi atjela emadvodza lamadzala akaMidiyani,+ atsi: “Labantfu batayicedza yonkhe indzawo yetfu, njengenkunzi leshwabadzela tjani emadlelweni.”

Bhalaki indvodzana yaSiphori abeyinkhosi yakaMowabi ngaleso sikhatsi. 5 Watfumela titfunywa kuBhalamu indvodzana yaBheyori lobekasePhethori,+ leseceleni kwemfula iYufrathe,* endzaweni yakubo. Wambita, watsi: “Kunebantfu labaphume eveni laseGibhithe. Sebagcwele kuwo wonkhe umhlaba*+ futsi bahlala lapha endzaweni yetfu. 6 Ngako ngicela ute utongicalekisela bona+ ngobe banemandla kunami. Mhlawumbe nje ngingabancoba ngiphindze ngibacoshe kulelive, ngobe ngati kahle kutsi ubusisiwe umuntfu wena lombusisako nekutsi ucalekisiwe loyo wena lomcalekisako.”

7 Lamadvodza lamadzala akaMowabi kanye newakaMidiyani ahamba aphetse imali yekuphengula aya kuBhalamu,+ afike amtjela loko Bhalaki lakushoko. 8 Nakeva loko, Bhalamu watsi: “Citsani busuku lapha, futsi mine ngitanitjela nobe yini Jehova layishoko kimi.” Ngako letindvuna takaMowabi tahlala naBhalamu.

9 Nkulunkulu wefika kuBhalamu, watsi:+ “Abobani lamadvodza lokanye nawo?” 10 Bhalamu watsi kuNkulunkulu weliciniso: “Bhalaki indvodzana yaSiphori, inkhosi yakaMowabi utfumele umlayeto kimi watsi: 11 ‘Labantfu labaphume eGibhithe sebagcwele wonkhe umhlaba.* Ngicela ute utongicalekisela bona,+ mhlawumbe nje ngingalwa nabo ngiphindze ngibacoshe.’” 12 Kodvwa Nkulunkulu watsi kuBhalamu: “Ungahambi nalamadvodza, nalabantfu ungabacalekisi ngobe babusisiwe.”+

13 Bhalamu wavuka ekuseni, watsi kuletindvuna taBhalaki: “Hambani niye eveni lenu, ngobe Jehova ungalele kutsi ngihambe nani.” 14 Ngako letindvuna takaMowabi tahamba tabuyela kuBhalaki, tafike tatsi: “Bhalamu walile kuta natsi.”

15 Kodvwa-ke Bhalaki waphindze watfumela letinye tindvuna, futsi tona betitinyenti, tihlonipheke kakhulu kunaleti tekucala. 16 Letindvuna tefika kuBhalamu, tatsi: “Naku Bhalaki indvodzana yaSiphori lakushito: ‘Ngicela ungavumeli lutfo lukuvimbe kutsi ute kimi, 17 ngobe ngitakuniketa umvuzo lomkhulu, futsi ngitakwenta nobe yini longitjela yona. Ngako ngicela ute utengicalekisela labantfu.’” 18 Bhalamu watiphendvula letinceku taBhalaki, watsi: “Ngisho nobe Bhalaki anganginika yonkhe indlu yakhe legcwele lisiliva neligolide, ngeke ngente nobe yini lephambene naloko Jehova Nkulunkulu wami langitjele kona, ngisho nobe kuyintfo lencane nobe lenkhulu.+ 19 Kodvwa ngicela nani nicitse busuku lapha, kuze ngitewukuva kutsi yini lenye Jehova latangitjela yona.”+

20 Nkulunkulu wefika kuBhalamu ebusuku, watsi: “Nangabe lamadvodza ete kutekubita, hamba nawo. Kodvwa utawukhuluma kuphela loko lengitakutjela kona.”+ 21 Ngako Bhalamu wavuka ekuseni wagibela imbongolo yakhe,* wahamba naletindvuna takaMowabi.+

22 Kodvwa Nkulunkulu watfukutsela kakhulu ngobe Bhalamu abehamba, futsi ingilosi yaJehova yema ekhatsi emgwacweni kuze imvimbe. Bhalamu abegibele imbongolo yakhe, netinceku takhe letimbili tikanye naye. 23 Lembongolo yatsi nayibona ingilosi yaJehova ime ekhatsi emgwacweni iphetse inkemba esandleni sayo, yetama kuphambuka ingene esigangeni. Bhalamu wayishaya lembongolo kuze ibuyele emgwacweni. 24 Lengilosi yaJehova yabese ima endleleni lencane lebeyisemkhatsini wemasimu lamabili emagilebisi, futsi bekunelubondza ngala nangala. 25 Ngesikhatsi lembongolo ibona lengilosi yaJehova, yagudla lolubondza, yampintjetela lunyawo lwaBhalamu kulo. Bhalamu waphindze wayishaya.

26 Lengilosi yaJehova yaphindze yendlula, yema endzaweni lencane, lapho kwakute khona ngisho nendzawana nje yekujikela ngesekudla nome ngesancele. 27 Lembongolo nayibona lengilosi yaJehova, yalala phansi Bhalamu asesetulu. Ngako Bhalamu watfukutsela kakhulu futsi wachubeka ayishaya ngendvuku yakhe. 28 Ekugcineni Jehova wenta lembongolo kutsi ikhulume,*+ futsi yatsi kuBhalamu: “Ngikwenteni kutsi ungaze ungishaye letikhatsi letintsatfu?”+ 29 Bhalamu wayiphendvula watsi: “Kungobe ungente silima. Kube nje bengiphetse inkemba, bengitakubulala!” 30 Lembongolo yabese itsi kuye: “Mine angisiyo yini imbongolo yakho lebewusolo uyigibela kuko konkhe kuphila kwakho kuze kube ngulamuhla? Ngike ngakuphatsa yini ngalendlela ngaphambili?” Yena waphendvula watsi: “Cha!” 31 Jehova wabese uvula emehlo aBhalamu+ futsi wayibona ingilosi yaJehova ime ekhatsi emgwacweni iphetse inkemba esandleni sayo. Watsi nakayibona wavele waguca futsi wakhotsama, wabheka phansi.

32 Lengilosi yaJehova yatsi kuye: “Kungani uze wayishaya katsatfu lembongolo yakho? Mine ngitele kutokuvimba, ngobe loluhambo lwakho luphambene nentsandvo yami.+ 33 Lembongolo ingibonile futsi kuto tonkhe letikhatsi letintsatfu beyetama kungibalekela.+ Kube ayikangibalekeli, wena ngabe nyalo sengikubulele kodvwa yona ngayiyekela.” 34 Bhalamu watsi kulengilosi yaJehova: “Ngonile, ngobe angikaboni kutsi nguwe lona bewume ekhatsi emgwacweni ute kimi. Nangabe-ke loluhambo lwami lungasiluhle kuwe, ngitawubuyela emuva.” 35 Lengilosi yaJehova yatsi kuye: “Hamba nalamadvodza, kodvwa utawukhuluma kuphela loko lengitakutjela kona.” Ngako Bhalamu wachubeka wahamba naletindvuna taBhalaki.

36 Ngesikhatsi Bhalaki eva kutsi Bhalamu sewufikile, waphuma ngekushesha wayomhlangabeta edolobheni lakaMowabi, leliseceleni kwesigodzi sase-Anoni, emnceleni waleyo ndzawo. 37 Bhalaki watsi kuBhalamu: “Bengingakakubiti yini? Kungani ungetanga kimi? Bewucabanga kutsi angeke yini ngikunikete umvuzo lomkhulu?”+ 38 Bhalamu wamphendvula watsi: “Sengitile. Kodvwa-ke kukhona yini lengivunyelwe kutsi ngikusho? Ngitawukhuluma kuphela loko Nkulunkulu langitjela kona.”+

39 Ngako Bhalamu wahamba naBhalaki futsi befika eKhiriyathi-husothi. 40 Bhalaki wenta imihlatjelo yetinkhomo kanye netimvu, waphindze watfumela letinye taletintfo kuBhalamu nakuletindvuna lebetikanye naye. 41 Ekuseni Bhalaki watsatsa Bhalamu wakhuphukela naye eBhamothi-bhali, futsi kuleyo ndzawo abekhona kuwabona onkhe ema-Israyeli.+

23 Ngemuva kwaloko, Bhalamu watsi kuBhalaki: “Yakha ema-al’thare langu-7 kulendzawo,+ ungilungisele netinkunzi letingu-7 kanye netimvu letindvuna letingu-7.” 2 Ngekushesha Bhalaki wenta njengobe Bhalamu ashito. Bobabili babese banikela ngenkunzi nangemvu lendvuna e-al’thare ngalinye.+ 3 Bhalamu wabese utsi kuBhalaki: “Sala lapha eceleni kwalomnikelo wakho wekushiswa, mine ngisahamba, mhlawumbe Jehova utawuchumana nami. Ngitakutjela nobe ngabe yini latangembulela yona.” Ngako wahamba waya egcumeni lelite lutfo.

4 Nkulunkulu wachumana naBhalamu, futsi Bhalamu+ watsi kuYe: “Ngakhe ema-al’thare langu-7, ngawamisa alandzelana, ngase nginikela ngenkunzi nangemvu lendvuna e-al’thare ngalinye.” 5 Jehova wafaka emavi emlonyeni waBhalamu, watsi:+ “Buyela kuBhalaki, ufike usho loku.” 6 Ngako wabuyela emuva, wakhandza Bhalaki nato tonkhe tindvuna takaMowabi beme ngakulomnikelo wekushiswa. 7 Wabese usho nasi saga:+

‘Wota utengicalekisela Jakobe.

Ute utewulahla Israyeli.’+

 8 Ngingabacalekisa njani labo Nkulunkulu langakabacalekisi?

Futsi ngingabalahla njani labo labangakalahlwa nguJehova?+

11 Bhalaki wabese utsi kuBhalamu: “Yini lena longente yona? Ngikubitele kutsi utewucalekisa titsa tami, kepha esikhundleni saloko wena utibusisile.”+ 12 Bhalamu waphendvula watsi: “Kantsi akukafaneli yini ngikhulume nome yini Jehova layifake emlonyeni wami?”+

13 Bhalaki watsi kuye: “Ngicela sihambe siye kulenye indzawo, lapho utawukhona kuwabona khona. Utawubona incenye yawo, ngeke uwabone onkhe. Ubongicalekisela wona ukuleyo ndzawo.”+ 14 Ngako wahamba naye waya esigangeni saseSofimu, esicongweni sePhisga.+ Wafike wakha ema-al’thare langu-7, wanikela ngenkunzi nangemvu lendvuna e-al’thare ngalinye.+ 15 Bhalamu watsi kuBhalaki: “Sala laceleni kwalomnikelo wakho wekushiswa, mine ngisaya lapha ngiyochumana naNkulunkulu.” 16 Jehova wachumana naBhalamu futsi wafaka emavi emlonyeni wakhe watsi:+ “Buyela kuBhalaki, ufike usho loku.” 17 Ngako waya kuBhalaki, wamkhandza eme eceleni kwemnikelo wakhe wekushiswa akanye netindvuna takaMowabi. Bhalaki wambuta watsi: “Utsiteni Jehova?” 18 Bhalamu washo nasi saga:+

“Bhalaki, vuka ulalele.

Ngilalele wena ndvodzana yaSiphori.

Intfo nakayishito, angeke yini ayente?

Angeke yini akwente loko lakukhulumile?+

22 Nkulunkulu uyabakhipha eGibhithe.+

Kubo ufana netimphondvo tenyatsi.+

Kulesikhatsi, bantfu bangase bakhulume ngaJakobe nanga-Israyeli, batsi:

‘Asenibuke kutsi Nkulunkulu wenteni!’

25 Bhalaki wabese utsi kuBhalamu: “Nangabe wehluleka kubacalekisa, kufanele ungababusisi-ke.” 26 Bhalamu wamphendvula watsi: “Angikakutjeli yini, ngatsi: ‘Ngitawukwenta konkhe Jehova lakushoko’?”+

27 Bhalaki watsi kuBhalamu: “Ngicela siphindze sihambe siye kulenye indzawo. Mhlawumbe nasewulapho Nkulunkulu weliciniso utawuvuma kutsi ungicalekisele lesive.”+ 28 Ngako Bhalaki watsatsa Bhalamu waya naye esicongweni sePheyori, lebuke ngaseJeshimoni.*+ 29 Bhalamu wabese utsi kuBhalaki: “Yakha ema-al’thare langu-7 kulendzawo, ungilungisele netinkunzi letingu-7 kanye netimvu letindvuna letingu-7.”+ 30 Ngako-ke Bhalaki wenta njengobe Bhalamu abeshito, futsi wanikela ngenkunzi nangemvu lendvuna e-al’thare ngalinye.

24 Ngesikhatsi Bhalamu abona kutsi bekumjabulisa* Jehova kubusisa ema-Israyeli, akazange asachubeka nekufuna indlela yekuwaletsela emashwa,+ kodvwa wabese ubuka ngasehlane. 2 Nakaphakamisa emehlo futsi abona ema-Israyeli amise emathende ngekwetive tawo,+ umoya waNkulunkulu wehlela etikwakhe.+ 3 Wabese usho nasi saga:+

10 Bhalaki wamtfukutselela kakhulu Bhalamu, waze washaya tandla ngekuphukuta, watsi kuye: “Bengikubitele kutsi utewucalekisa titsa tami,+ kodvwa kute lokwentile ngaphandle kwekutibusisa kuto tonkhe letikhatsi letintsatfu. 11 Vele uhambe ubuyele ekhaya. Mine bengihlose kukuniketa umvuzo lomkhulu,+ kodvwa Jehova walile kutsi uwutfole.”

12 Bhalamu waphendvula Bhalaki watsi: “Angikatitjeli yini titfunywa takho ngatsi: 13 ‘Ngisho nobe Bhalaki anganginika yonkhe indlu yakhe legcwele lisiliva neligolide, ngeke ngente nobe yini lengiyitsandzako* lephambene naloko Jehova langitjele kona, ngisho nobe kuyintfo lenhle nobe lembi. Ngitawukhuluma kuphela loko Jehova latangitjela kona’?+ 14 Nyalo ngiyahamba ngibuyela kubantfu bakitsi. Wota ngikutjele loko labantfu labatakwenta kubantfu bakho esikhatsini lesitako.”* 15 Bhalamu wabese usho nasi saga:+

20 Ngesikhatsi abona ema-Amaleki, wachubeka nekusho lesaga watsi:

21 Nakabona emaKheni,+ wachubeka nekusho lesaga watsi:

“Indzawo yakho yekuhlala iphephile, futsi yakhiwe edvwaleni.

22 Kodvwa kukhona lotawushisa iKheni.

Singakanani sikhatsi lesisele ngaphambi kwekutsi i-Asiriya ikutfumbe?”

23 Wachubeka nekusho lesaga, watsi:

“Maye! Ngubani lotawusindza lapho Nkulunkulu sekenta loku?

Kodvwa nayo* itawushabalala iphele nya.”

25 Ngemuva kwaloko Bhalamu+ wesuka wahamba, wabuyela endzaweni yakubo. NaBhalaki naye wesuka wahamba.

25 Ngesikhatsi ema-Israyeli ahlala eShithimu,+ acala kutiphatsa kabi ngekwelicansi nemadvodzakati akaMowabi.+ 2 Labafati bakaMowabi bamema lama-Israyeli kutsi ete nakwentiwa imihlatjelo kubonkulunkulu babo,+ futsi adla lemihlatjelo aphindze akhotsamela labonkulunkulu+ bemaMowabi. 3 Ngako ema-Israyeli ahlanganyela ekukhonteni* Bhali wasePheyori,+ ngaleso sizatfu Jehova wawatfukutselela kakhulu. 4 Jehova watsi kuMosi: “Tsatsa bonkhe baholi* balabantfu ubalengise embikwaJehova emini kala hha,* kuze intfukutselo yaJehova isuke kuma-Israyeli.” 5 Mosi wabese utsi kubehluleli baka-Israyeli:+ “Ngamunye wenu akabulale lamadvodza lahlanganyele ekukhonteni* Bhali wasePheyori.”+

6 Kwatsi nje ngaleso sikhatsi, lomunye um-Israyeli weta nendvodzakati yakaMidiyani+ ngakubantfu bakubo, embikwaMosi nasembikwaso sonkhe sive saka-Israyeli, futsi ngaleso sikhatsi bantfu bebalila emnyango welithende lekuhlangana. 7 Ngesikhatsi Finehasi+ indvodzana ya-Eliyezeri, loyindvodzana ya-Aroni umphristi abona loku, wesuka ngekushesha emkhatsini wema-Israyeli watsatsa sikhali. 8 Walandzela lom-Israyeli wayawungena ethendeni futsi wabahlaba bobabili ngalesikhali, lendvodzakati yakaMidiyani yona wayihlaba etitfweni tayo tangasense. Ngaleso sikhatsi lesishayo lebesihlasele ema-Israyeli saphela.+ 9 Bantfu lababulawa ngulesishayo baba ngu-24 000.+

10 Jehova wabese utsi kuMosi: 11 “Finehasi+ indvodzana ya-Eliyezeri, loyindvodzana ya-Aroni umphristi wente kutsi intfukutselo yami isuke kuma-Israyeli ngobe akakuvumelanga kungetsembeki kwawo kimi.+ Ngako-ke angikawacotfuli ema-Israyeli ngisho nobe nginguNkulunkulu lofuna kutsi kukhontwe mine ngedvwa.+ 12 Ngaleso sizatfu ubomtjela kutsi ngenta sivumelwane sekuthula naye. 13 Lesi sivumelwane sekutsi yena nentalelwane yakhe letawuta emvakwakhe batawuhlale babaphristi,+ ngobe akakuvumelanga kungetsembeki kuNkulunkulu wakhe,+ wenta nekutsi ema-Israyeli abuyisane nami.”

14 Libito lalom-Israyeli lowabulawa nalendvodzakati yakaMidiyani, kwakunguZimri indvodzana yaSalu, labengumholi walenye yetindlu takaSimeyoni. 15 Libito lalendvodzakati yakaMidiyani leyabulawa, kwakunguKhozibi indvodzakati yaSuri.+ Suri abengumholi welusendvo lwalenye yetindlu takaMidiyani.+

16 Ngemuva kwesikhatsi Jehova watsi kuMosi: 17 “Hlaselani emaMidiyani futsi niwabulale,+ 18 ngobe nani abesolo anihlasela ngebucili bawo ePheyori+ kanye nakulendzaba yaKhozibi indvodzakati yemholi wakaMidiyani, naye labewaleso sive futsi lowabulawa+ ngelilanga lalesishayo lebesihlasele ema-Israyeli ngenca yaloko lokwenteka ePheyori.”+

26 Ngemuva kwalesishayo,+ Jehova wakhuluma naMosi na-Eliyezeri indvodzana ya-Aroni umphristi, watsi: 2 “Balani sonkhe sive sema-Israyeli, kusukela kulabaneminyaka lengu-20 budzala kuya etulu, futsi nibabale ngekwetindlu tabobabe babo, kube ngibo bonkhe bantfu baka-Israyeli labangaya emphini.”+ 3 Ngako boMosi na-Eliyezeri+ umphristi bakhuluma nalesive ehlane lakaMowabi+ ngaseJordane, macondzana neJerikho,+ batsi: 4 “Balani bonkhe bantfu, kusukela kulabaneminyaka lengu-20 budzala kuya etulu, njengobe nje Jehova atjele Mosi.”+

Ngulawa emadvodzana a-Israyeli laphuma eveni laseGibhithe: 5 Esiveni sakaRubeni,+ umntfwana wekucala wa-Israyeli; nankha emadvodzana akhe:+ kuHanoki kwavela umndeni wemaHanoki; kuPhalu kwavela umndeni wemaPhalu; 6 kuHesroni kwavela umndeni wemaHesroni; kuKhami kwavela umndeni wemaKhami. 7 Ngulena-ke imindeni yesive sakaRubeni, futsi bantfu lababhaliswa kuyo bebangu-43 730.+

8 Indvodzana yaPhalu bekungu-Eliyabe. 9 Emadvodzana a-Eliyabe bekunguNemuweli, Dathani na-Abiramu. BoDathani na-Abiramu bebangemadvodza lakhetsiwe ka-Israyeli futsi ngibo labalwa naMosi+ na-Aroni bakanye nelicembu laKhora,+ ngesikhatsi bamelene naJehova.+

10 Umhlaba wavuleka* wabamita. Khora yena wafa nalabo lebebamsekela ngesikhatsi umlilo ucotfula emadvodza langu-250.+ Loko lokwenteka kubo kwaba secwayiso.+ 11 Kodvwa emadvodzana aKhora wona akazange afe.+

12 Nankha emadvodzana aSimeyoni+ ngekwemindeni yawo: kuNemuweli kwavela umndeni wemaNemuweli; kuJamini kwavela umndeni wemaJamini; kuJakhini kwavela umndeni wemaJakhini; 13 kuZera kwavela umndeni wemaZera; kuShawula kwavela umndeni wemaShawula. 14 Ngulena-ke imindeni yesive sakaSimeyoni, futsi lababhaliswa kuyo bebangu-22 200.+

15 Ngulawa emadvodzana aGadi+ ngekwemindeni yawo: kuSefoni kwavela umndeni wemaSefoni; kuHagi kwavela umndeni wemaHagi; kuShuni kwavela umndeni wemaShuni; 16 ku-Ozni kwavela umndeni wema-Ozni; ku-Eri kwavela umndeni wema-Eri; 17 ku-Arodi kwavela umndeni wema-Arodi; ku-Areli kwavela umndeni wema-Areli. 18 Ngulena-ke imindeni yemadvodzana aGadi, futsi bantfu lababhaliswa kuyo bebangu-40 500.+

19 Emadvodzana aJuda+ bekungu-Eri na-Onani.+ Kodvwa-ke omabili afela eveni laseKhenani.+ 20 Ngulawa emadvodzana aJuda ngekwemindeni yawo: kuShela+ kwavela umndeni wemaShela; kuPheresi+ kwavela umndeni wemaPheresi; kuZera+ kwavela umndeni wemaZera. 21 Nankha emadvodzana aPheresi: kuHesroni+ kwavela umndeni wemaHesroni; kuHamule+ kwavela umndeni wemaHamule. 22 Ngulena-ke imindeni yesive sakaJuda, futsi bantfu lababhaliswa kuyo bebangu-76 500.+

23 Nankha emadvodzana a-Isakhari+ ngekwemindeni yawo: kuThola+ kwavela umndeni wemaThola; kuPhuwa kwavela umndeni wemaPhuwa; 24 kuJashubi kwavela umndeni wemaJashubi; kuShimroni kwavela umndeni wemaShimroni. 25 Ngulena-ke imindeni yesive saka-Isakhari, futsi bantfu lababhaliswa kuyo bebangu-64 300.+

26 Nankha emadvodzana aZebuloni+ ngekwemindeni yawo: kuSeredi kwavela umndeni wemaSeredi; ku-Eloni kwavela umndeni wema-Eloni; kuJaleli kwavela umndeni wemaJaleli. 27 Ngulena-ke imindeni yakaZebuloni, futsi bantfu lababhaliswa kuyo bebangu-60 500.+

28 Emadvodzana aJosefa+ ngekwemindeni yawo bekuboManase na-Efrayimu.+ 29 Nankha emadvodzana aManase:+ kuMakhire kwavela umndeni wemaMakhire,+ futsi Makhire watala Gileyadi.+ KuGileyadi kwavela umndeni wemaGileyadi. 30 Ngulawa emadvodzana aGileyadi: ku-Iyezeri kwavela umndeni wema-Iyezeri; kuHelekhi kwavela umndeni wemaHelekhi; 31 ku-Asriyeli kwavela umndeni wema-Asriyeli; kuShekhemu kwavela umndeni wemaShekhemu; 32 kuShemida kwavela umndeni wemaShemida; kuHeferi kwavela umndeni wemaHeferi. 33 Selofehadi indvodzana yaHeferi abenemadvodzakati kuphela,+ ete emadvodzana. Emabito emadvodzakati aSelofehadi+ bekuboMahala, Nowa, Hogila, Milkha naThisa. 34 Ngulena-ke imindeni yesive sakaManase, futsi bantfu lababhaliswa kuyo bebangu-52 700.+

35 Nankha emadvodzana a-Efrayimu+ ngekwemindeni yawo: kuShuthela+ kwavela umndeni wemaShuthela; kuBekheri kwavela umndeni wemaBekheri; kuThahani kwavela umndeni wemaThahani. 36 Ngulawa emadvodzana aShuthela: ku-Erani kwavela umndeni wema-Erani. 37 Lena-ke yimindeni yemadvodzana a-Efrayimu, futsi bantfu lababhaliswa kuyo bebangu-32 500.+ Lawa bekungemadvodzana aJosefa ngekwemindeni yawo.

38 Nankha emadvodzana aBhenjamini+ ngekwemindeni yawo: kuBhela+ kwavela umndeni wemaBhela; ku-Ashbeli kwavela umndeni wema-Ashbeli; ku-Ahiramu kwavela umndeni wema-Ahiramu; 39 kuShufamu kwavela umndeni wemaShufamu; kuHufamu kwavela umndeni wemaHufamu. 40 Emadvodzana aBhela bekungu-Adi naNamani:+ ku-Adi kwavela umndeni wema-Adi; kuNamani kwavela umndeni wemaNamani. 41 Ngulawa-ke emadvodzana aBhenjamini ngekwemindeni yawo, futsi bantfu lababhaliswa kuyo bebangu-45 600.+

42 Nankha emadvodzana aDani+ ngekwemindeni yawo: kuShuhamu kwavela umndeni wemaShuhamu. Lena-ke bekuyimindeni yakaDani ngekwemindeni yayo. 43 Bantfu lababhaliswa kuyo yonkhe imindeni yemaShuhamu bebangu-64 400.+

44 Nankha emadvodzana a-Asheri+ ngekwemindeni yawo: kuJimna kwavela umndeni wemaJimna; kuJishvi kwavela umndeni wemaJishvi; kuBheriya kwavela umndeni wemaBheriya; 45 emadvodzaneni aBheriya bekungulaba: kuHebere kwavela umndeni wemaHebere; kuMalkhiyeli kwavela umndeni wemaMalkhiyeli. 46 Libito lendvodzakati ya-Asheri bekunguSera. 47 Ngulena-ke imindeni yemadvodzana a-Asheri, futsi bantfu lababhaliswa kuyo bebangu-53 400.+

48 Ngulawa emadvodzana aNaftali+ ngekwemindeni yawo: kuJasiyeli kwavela umndeni wemaJasiyeli; kuGuni kwavela umndeni wemaGuni; 49 kuJeseri kwavela umndeni wemaJeseri; kuShilemi kwavela umndeni wemaShilemi. 50 Ngulena-ke imindeni yakaNaftali ngekwetinsendvo tayo, futsi bantfu lababhaliswa kuyo bebangu-45 400.+

51 Sebabonkhe bantfu lababhaliswa ka-Israyeli bebangu-601 730.+

52 Ngemuva kwaloko Jehova watsi kuMosi: 53 “Kufanele wehlukanisele labantfu lelive, ubanikete lifa kuye ngeluhla lwalamabito.*+ 54 Lifa lemacembu lamakhulu kufanele ulente libe likhulu, lemacembu lamancane lona ulente libe lincane.+ Ngulelo nalelo cembu kufanele linikwe lifa lelilingana nelinani lebantfu lababhalisiwe. 55 Lelive kufanele lehlukaniswe ngenkatho,+ futsi labantfu batawunikwa lifa labo ngekwetive tabobabe babo. 56 Lifa ngalinye litawukhishwa kusetjentiswa inkatho, futsi lehlukaniselwe emacembu lamakhulu nalamancane.”

57 Naba bantfu lababhaliswa esiveni semaLevi+ ngekwemindeni yabo: kuGeshoni kwavela umndeni wemaGeshoni; kuKhohati+ kwavela umndeni wemaKhohati; kuMerari kwavela umndeni wemaMerari. 58 Ngulena imindeni yemaLevi: umndeni wemaLibni,+ umndeni wemaHebroni,+ umndeni wemaMahali,+ umndeni wemaMushi,+ nemndeni wemaKhora.+

Khohati watala Amramu.+ 59 Umfati wa-Amramu bekunguJokhebedi,+ indvodzakati yaLevi, layitalelwa ngumfati wakhe eGibhithe. Jokhebedi watalela Amramu bo-Aroni, Mosi kanye naMiriyamu, longudzadzewabo.+ 60 Aroni watala Nadabi, Abihu, Eliyezeri na-Ithamari.+ 61 Kodvwa boNadabi na-Abihu bafa ngenca yekuletsa umlilo longakavumeleki embikwaJehova.+

62 Sebabonkhe lababhaliswa kulesive bebangu-23 000, futsi bekungibo bonkhe bantfu labadvuna labanenyanga yinye kuya etulu budzala.+ Bona abazange babhaliswe kanye nema-Israyeli,+ ngobe bebangeke banikwe lifa kanye nawo.+

63 Ngulabo-ke bantfu lababhaliswa nguMosi na-Eliyezeri umphristi, ngesikhatsi babhalisa ema-Israyeli ehlane lakaMowabi ngaseJordane, macondzana neJerikho. 64 Kodvwa-ke bebangasekho labantfu lebebabhaliswe nguMosi na-Aroni umphristi ngesikhatsi kubalwa ema-Israyeli ehlane laseSinayi.+ 65 Ngobe Jehova abekhulume ngabo watsi: “Nakanjani batawufela lapha ehlane.”+ Ngako akusalanga muntfu kubo ngaphandle kwaKhalebi indvodzana yaJefune kanye naJoshuwa indvodzana yaNuni.+

27 Ngemuva kwaloko kweta emadvodzakati aSelofehadi,+ loyindvodzana yaHeferi, indvodzana yaGileyadi, indvodzana yaMakhire, indvodzana yaManase, labavela emindenini yaManase loyindvodzana yaJosefa. Emabito alamadvodzakati bekuboMahala, Nowa, Hogila, Milkha kanye naThisa. 2 Lamadvodzakati ema embikwaMosi na-Eliyezeri umphristi, nasembikwebaholi+ kanye naso sonkhe sive emnyango welithende lekuhlangana, atsi: 3 “Babe wetfu wafela ehlane, kodvwa abengekho ecenjini lalabo lebebahlangene ndzawonye kuze bamelane naJehova, lokungulabo lebebasekela Khora.+ Kodvwa yena wafa ngenca yesono sakhe futsi abete emadvodzana. 4 Kungani libito lababe kufanele liphele emndenini wakhe ngobe nje yena ete indvodzana? Sinikeni lifa emkhatsini wabomnakabo.” 5 Ngako Mosi waletsa lendzaba yawo kuJehova.+

6 Jehova wabese utsi kuMosi: 7 “Lamadvodzakati aSelofehadi acinisile. Kufanele uwanikete lifa emkhatsini wabomnakabobabe wawo, lifa lakhe ulinikete wona.+ 8 Naku lotakutjela ema-Israyeli: ‘Nangabe umuntfu afa kodvwa ete indvodzana, lifa lakhe kufanele liniketwe indvodzakati yakhe. 9 Nakete indvodzakati, lelifa lakhe kufanele liniketwe bomnakabo. 10 Nangabe ete bomnakabo, lifa lakhe litawuniketwa bomnakabobabe wakhe. 11 Nangabe babe wakhe ete bomnakabo, lelifa liboniketwa sihlobo sengati lesisedvute kakhulu naye emndenini wakhe, libe ngelaso. Lona kutawuba ngumtsetfo lotawusetjentiswa ngema-Israyeli, njengobe nje Jehova atjele Mosi.’”

12 Ngemuva kwaloko Jehova watsi kuMosi: “Khuphukela kulentsaba yase-Abarimu,+ ubuke lelive lengitalinika ema-Israyeli.+ 13 Nasewulibonile, nawe utakufa futsi ungcwatjwe njengabo bonkhe bantfu bakini,*+ njengobe kwaba njalo nanga-Aroni umnakenu+ 14 ngenca yekutsi ngesikhatsi lesive simelene nami ehlane laseZini, nine anizange ningilalele futsi aningingcwelisanga embikwalabantfu ngesikhatsi ngibaniketa emanti.+ Lawa ngemanti aseMeribha+ eKhadeshi,+ ehlane laseZini.”+

15 Ngako Mosi watsi kuJehova: 16 “Shengatsi Jehova Nkulunkulu loniketa bonkhe bantfu kuphila* angabeka indvodza etikwalesive, 17 letawusihola kuto tonkhe tintfo futsi siyilandzele nasenta tonkhe tintfo, kuze lesive saJehova singafani netimvu letingenamelusi.” 18 Ngaleso sizatfu Jehova watsi kuMosi: “Tsatsa Joshuwa indvodzana yaNuni, loyindvodza lenesimo lesihle, ubeke sandla sakho kuye.+ 19 Kufanele ummise embikwa-Eliyezeri umphristi nasembikwaso sonkhe lesive, futsi umtfume embikwaso.+ 20 Ubomniketa incenye yeligunya* lonalo+ kuze sonkhe lesive sema-Israyeli simlalele.+ 21 Utakuma embikwa-Eliyezeri umphristi, futsi Eliyezeri utambutela kuJehova asebentisa i-Urimu+ kuze ati sincumo saNkulunkulu. Yena nemadvodzana aka-Israyeli kanye naso sonkhe sive batawulandzela sicondziso labasitfolako.”

22 Ngako Mosi wenta njengobe nje Jehova abemtjelile. Watsatsa Joshuwa wammisa embikwa-Eliyezeri umphristi nasembikwaso sonkhe sive, 23 futsi wambeka tandla waphindze wamtfuma,+ njengobe nje Jehova abemtjelile.+

28 Jehova wabese ukhuluma naMosi utsi: 2 “Tjela ema-Israyeli utsi: ‘Nibociniseka kutsi niyawuletsa umnikelo wami, lokusinkhwa sami. Iminikelo leyentiwa ngemlilo leliphunga lelimnandzi* kimi kufanele ningentele yona ngesikhatsi lesibekiwe.’+

3 “Ubotsi kuwo: ‘Nangu umnikelo lowentiwa ngemlilo lenitawuletsa kuJehova: lilanga ngalinye nitawuletsa timvu letindvuna letimbili letinemnyaka munye futsi letiphile kahle, tibe ngumnikelo wekushiswa. Loku nibokwenta njalo.+ 4 Yinye yaletimvu nitawunikela ngayo ekuseni, lenye ninikele ngayo kusengakahlwi,*+ 5 ihambisane nafulaha locolisakele logcwele esikoteleni lesingemalitha lamabili* futsi lobhicwe nelitha* yemafutsa lacengekile, kube ngumnikelo walokutinhlavu.+ 6 Lona ngumnikelo wekushiswa lowentiwa njalo,+ umnikelo lowentiwa ngemlilo kuJehova naloliphunga lelimnandzi* futsi lowacala eNtsabeni iSinayi. 7 Imvu lendvuna ngayinye itawuhambisana nemnikelo wayo walokunatfwako, lokuyilitha.+ Lesinatfo salokudzakanako nibositfululela endzaweni lengcwele, sibe ngumnikelo walokunatfwako kuJehova. 8 Lelenye imvu nitawunikela ngayo lapho kusengakahlwi.* Niboyinikela ibe ngumnikelo lowentiwa ngemlilo naloliphunga lelimnandzi* kuJehova,+ ihambisane nemnikelo walokutinhlavu lofana naloyo lowentiwe ekuseni kanye nemnikelo wayo walokunatfwako.

9 “‘Kodvwa-ke ngelilanga leliSabatha+ kufanele ninikele ngetimvu letindvuna letimbili letinemnyaka munye futsi letiphile kahle, kanye nafulaha locolisakele logcwele esikoteleni lesingemalitha langaba sihlanu* lobhicwe nemafutsa, kube ngumnikelo walokutinhlavu, lohambisana nemnikelo wawo walokunatfwako. 10 Lona-ke ngumnikelo wekushiswa lotawentiwa ngeliSabatha, lohambisana nemnikelo wekushiswa lowentiwa njalo kanye nemnikelo wawo walokunatfwako.+

11 “‘Ekucaleni kwenyanga ngayinye* nitawunikela ngetinkunzana letimbili, imvu lendvuna yinye kanye netimvu letindvuna letingu-7 letinemnyaka munye futsi letiphile kahle, tibe ngumnikelo wekushiswa lowentelwa Jehova.+ 12 Kufanele ninikele nangemalitha langaba sitfupha nencenye afulaha locolisakele lobhicwe nemafutsa, kube ngumnikelo walokutinhlavu+ lohambisana nenkunzana ngayinye, nitawuphindze ninikele nangemalitha langaba mane nencenye yafulaha locolisakele lobhicwe nemafutsa, kube ngumnikelo walokutinhlavu lohambisana nalemvu lendvuna.+ 13 Nibonikela nangelikhilogremu lafulaha locolisakele lobhicwe nemafutsa, kube ngumnikelo walokutinhlavu lohambisana nemvu lendvuna ngayinye kuleti letinemnyaka munye, kube ngumnikelo wekushiswa loliphunga lelimnandzi*+ nalowentiwa ngemlilo kuJehova. 14 Umnikelo walokunatfwako lotawuhambisana nalenkunzi kufanele ube ngemalitha langaba mabili eliwayini,+ lotawuhambisana nalemvu lendvuna wona ube liwayini lelingetudlwana kwelitha,+ bese kutsi lotawuhambisana nemvu lendvuna lenemnyaka munye ube yilitha yeliwayini.+ Lena yiminikelo letawentiwa inyanga ngayinye kuwo wonkhe umnyaka. 15 Kufanele kunikelwe nangembuti leseyincane ibe ngumnikelo wesono lowentiwa kuJehova, kwengetwe kulomnikelo wekushiswa lowentiwa njalo lohambisana nemnikelo wawo walokunatfwako.

16 “‘Ngelilanga lesi-14 lenyanga yekucala, kutawuba liPhasika laJehova.+ 17 Ngelilanga lesi-15 kuleyo nyanga kutawuba nemkhosi. Kutawudliwa sinkhwa lesite imvubelo emalanga langu-7.+ 18 Ngelilanga lekucala kutawuba nembutsano longcwele. Kute umsebenti lomatima lokufanele niwente ngalelolanga. 19 Niboletsa tinkunzana letimbili, imvu lendvuna yinye, netimvu letindvuna letingu-7 letinemnyaka munye, tibe ngumnikelo wekushiswa lowentiwa kuJehova, futsi letilwane kufanele kube nguletiphile kahle.+ 20 Nibotinikela kanye neminikelo yato yalokutinhlavu, lokungufulaha locolisakele lobhicwe nemafutsa.+ Umnikelo walokutinhlavu lohambisana nalenkunzana kufanele ube ngemalitha langaba sitfupha nencenye, bese kutsi walemvu lendvuna wona ube ngemalitha langaba mane nencenye. 21 Umnikelo walokutinhlavu lotawuhambisana nemvu lendvuna ngayinye kuleti letingu-7 kufanele ube ngemalitha langaba mabili, 22 futsi nibonikela nangembuti letawuba ngumnikelo wesono lotawukwentiwa kuze nibuyisane naNkulunkulu. 23 Nguleto-ke tintfo lenitawunikela ngato ngetulu kwemnikelo wekushiswa lowentiwa ekuseni, lokungumnikelo wekushiswa lowentiwa njalo. 24 Loku nitawunikela ngako ngendlela lefanako ngelilanga ngalinye kulamalanga langu-7, kube kudla,* lokungumnikelo lowentiwa ngemlilo naloliphunga lelimnandzi* kuJehova. Kufanele kunikelwe kanye nemnikelo wekushiswa lowentiwa njalo, nemnikelo wawo walokunatfwako. 25 Ngelilanga lesi-7 niboba nembutsano longcwele.+ Kute umsebenti lomatima lokufanele niwente ngalelolanga.+

26 “‘Ngelilanga letitselo tekucala letivutsiwe,+ naniletsa kuJehova umnikelo lomusha walokutinhlavu,+ kufanele nibe nembutsano longcwele ngemkhosi wenu wemaviki.+ Kute umsebenti lomatima lokufanele niwente ngalelolanga.+ 27 Niboletsa tinkunzana letimbili, imvu lendvuna yinye, netimvu letindvuna letingu-7 letinemnyaka munye,+ tibe ngumnikelo wekushiswa loliphunga lelimnandzi* kuJehova, 28 futsi kufanele tihambisane nemnikelo walokutinhlavu, lokungufulaha locolisakele lobhicwe nemafutsa. Umnikelo walokutinhlavu lotawuhambisana nenkunzana ngayinye utawuba ngemalitha langaba sitfupha nencenye, lotawuhambisana nalemvu lendvuna wona ube ngemalitha langaba mane nencenye, 29 bese kutsi lotawuhambisana nemvu lendvuna ngayinye kuleti letingu-7 ube ngemalitha langaba mabili. 30 Nibophindze niletse nembuti leseyincane kuze kwentiwe kutsi nibuyisane naNkulunkulu.+ 31 Letilwane kufanele ninikele ngato ngetulu kwalomnikelo wekushiswa lowentiwa njalo, lohambisana nemnikelo wawo walokutinhlavu. Kufanele tibe nguletiphile kahle,+ futsi tihambisane neminikelo yato yalokunatfwako.

29 “‘Ngelilanga lekucala enyangeni yesi-7, niboba nembutsano longcwele. Kute umsebenti lomatima lokufanele niwente ngalelolanga.+ Leli lilanga lokufanele nishaye ngalo licilongo.+ 2 Nitawuletsa inkunzana yinye, imvu lendvuna yinye, netimvu letindvuna letingu-7 letinemnyaka munye, tonkhe tibe nguletiphile kahle, futsi titawuba ngumnikelo wekushiswa loliphunga lelimnandzi* kuJehova. 3 Titawuhambisana nemnikelo wato walokutinhlavu, lokungufulaha locolisakele lobhicwe nemafutsa. Umnikelo walokutinhlavu lotawuhambisana nalenkunzana utawuba ngufulaha logcwele esikoteleni lesingemalitha langaba ngu-7,* lotawuhambisana nalemvu lendvuna wona ugcwale esikoteleni lesingemalitha langaba sihlanu, 4 bese kutsi lotawuhambisana nemvu lendvuna ngayinye kuleti letingu-7 ugcwale esikoteleni lesingemalitha lamabili. 5 Nibonikela nangembuti lendvuna leseyincane, ibe ngumnikelo wesono kute kwentiwe kutsi nibuyisane naNkulunkulu. 6 Lomnikelo utawukwentiwa ngemlilo kuJehova futsi ube liphunga lelimnandzi,* ngetulu kwemnikelo wekushiswa lowentiwa inyanga ngayinye lohambisana nemnikelo walokutinhlavu+ newalokunatfwako, nangetulu kwemnikelo wekushiswa lowentiwa njalo lohambisana nemnikelo wawo walokutinhlavu+ newalokunatfwako,+ ngendlela lokuhlale kwentiwa ngayo.

7 “‘Ngelilanga lesi-10 lalenyanga yesi-7 niboba nembutsano longcwele,+ futsi nivete kutsi niva buhlungu.* Kufanele ningasebenti sanhlobo ngalelolanga.+ 8 Nitawuletsa inkunzana yinye, imvu lendvuna ibe yinye, kanye netimvu letindvuna letingu-7 letinemnyaka munye, futsi tonkhe kufanele tibe nguletiphile kahle.+ Titawuba ngumnikelo wekushiswa kuJehova naloliphunga lelimnandzi.* 9 Kufanele tihambisane nemnikelo wato walokutinhlavu, lokungufulaha locolisakele lobhicwe nemafutsa. Umnikelo walokutinhlavu lotawuhambisana nalenkunzana, utawuba ngemalitha langaba sitfupha nencenye, lotawuhambisana nalemvu lendvuna wona ube ngemalitha langaba mane nencenye, 10 bese kutsi lotawuhambisana nemvu lendvuna ngayinye kuleti letingu-7 ube ngemalitha langaba mabili. 11 Nibophindze niletse nembuti leseyincane, ibe ngumnikelo wesono, ngetulu kwemnikelo wesono lowentelwa kubuyisana naNkulunkulu,+ lohambisana nemnikelo wawo walokunatfwako, nangetulu kwemnikelo wekushiswa lowentiwa njalo lohambisana nemnikelo wawo walokutinhlavu newalokunatfwako.

12 “‘Ngelilanga lesi-15 enyangeni yesi-7, niboba nembutsano longcwele. Kute umsebenti lomatima lokufanele niwente, futsi nibokwentela Jehova umkhosi emalanga langu-7.+ 13 Nitawuletsa tinkunzana letingu-13, timvu letindvuna letimbili kanye netimvu letindvuna letingu-14 letinemnyaka munye, futsi tonkhe kufanele tibe nguletiphile kahle. Titawuba ngumnikelo wekushiswa,+ lokungumnikelo lowentiwa ngemlilo naloliphunga lelimnandzi* kuJehova.+ 14 Titawuhambisana nemnikelo wato walokutinhlavu, lokungufulaha locolisakele lobhicwe nemafutsa. Umnikelo walokutinhlavu lotawuhambisana nenkunzana ngayinye kuleti letingu-13 utawuba ngemalitha langaba sitfupha nencenye, lotawuhambisana nemvu lendvuna ngayinye kuleti letimbili wona ube ngemalitha langaba mane nencenye, 15 bese kutsi lotawuhambisana nemvu lendvuna ngayinye kuleti letingu-14 ube ngemalitha langaba mabili. 16 Nitawuletsa nembuti leseyincane, ibe ngumnikelo wesono, ngetulu kwemnikelo wekushiswa lowentiwa njalo kanye nemnikelo walokutinhlavu newalokunatfwako lohambisana nawo.+

17 “‘Ngelilanga lesibili, nitawunikela ngetinkunzana letingu-12, timvu letindvuna letimbili, kanye netimvu letindvuna letingu-14 letinemnyaka munye, futsi tonkhe kufanele kube nguletiphile kahle.+ 18 Letinkunzana, naletimvu letindvuna, kanye naletimvu letindvuna letinemnyaka munye titawuhambisana nemnikelo wato walokutinhlavu newalokunatfwako, tonkhe ngelinani lato nangendlela lokuhlale kwentiwa ngayo. 19 Nitawuphindze niletse nembuti leseyincane ibe ngumnikelo wesono, ngetulu kwemnikelo wekushiswa lowentiwa njalo lohambisana nemnikelo wawo walokutinhlavu, kanye neminikelo yayo yalokunatfwako.+

20 “‘Ngelilanga lesitsatfu, nitawunikela ngetinkunzi letingu-11, timvu letindvuna letimbili, kanye netimvu letindvuna letingu-14 letinemnyaka munye, futsi tonkhe kufanele tibe nguletiphile kahle.+ 21 Letinkunzi, naletimvu letindvuna kanye naletimvu letindvuna letinemnyaka munye titawuhambisana nemnikelo wato walokutinhlavu newalokunatfwako, tonkhe ngelinani lato nangendlela lokuhlale kwentiwa ngayo. 22 Nitawuphindze niletse nembuti lengumnikelo wesono, ngetulu kwemnikelo wekushiswa lowentiwa njalo, lohambisana nemnikelo wawo walokutinhlavu newalokunatfwako.+

23 “‘Ngelilanga lesine, nitawunikela ngetinkunzi letingu-10, timvu letindvuna letimbili kanye netimvu letindvuna letingu-14 letinemnyaka munye, futsi tonkhe kufanele tibe nguletiphile kahle.+ 24 Letinkunzi, naletimvu letindvuna kanye naletimvu letindvuna letinemnyaka munye titawuhambisana nemnikelo wato walokutinhlavu newalokunatfwako, tonkhe ngelinani lato nangendlela lokuhlale kwentiwa ngayo. 25 Nitawuletsa nembuti leseyincane, ibe ngumnikelo wesono, ngetulu kwemnikelo wekushiswa lowentiwa njalo, nemnikelo wawo walokutinhlavu newalokunatfwako.+

26 “‘Ngelilanga lesihlanu, nitawunikela ngetinkunzi letingu-9, timvu letindvuna letimbili kanye netimvu letindvuna letingu-14 letinemnyaka munye, futsi tonkhe kufanele tibe nguletiphile kahle.+ 27 Letinkunzi, naletimvu letindvuna kanye naletimvu letindvuna letinemnyaka munye titawuhambisana nemnikelo wato walokutinhlavu newalokunatfwako, tonkhe ngelinani lato nangendlela lokuhlale kwentiwa ngayo. 28 Nitawuletsa nembuti letawuba ngumnikelo wesono, ngetulu kwemnikelo wekushiswa lowentiwa njalo, lohambisana nemnikelo walokutinhlavu newalokunatfwako.+

29 “‘Ngelilanga lesitfupha, nitawunikela ngetinkunzi letingu-8, timvu letindvuna letimbili kanye netimvu letindvuna letingu-14 letinemnyaka munye, futsi tonkhe kufanele tibe nguletiphile kahle.+ 30 Letinkunzi, naletimvu letindvuna kanye naletimvu letindvuna letinemnyaka munye titawuhambisana nemnikelo wato walokutinhlavu newalokunatfwako, tonkhe ngelinani lato nangendlela lokuhlale kwentiwa ngayo. 31 Nitawuletsa nembuti letawuba ngumnikelo wesono, ngetulu kwemnikelo wekushiswa lowentiwa njalo, lohambisana nemnikelo walokutinhlavu newalokunatfwako.+

32 “‘Ngelilanga lesi-7, nitawunikela ngetinkunzi letingu-7, timvu letindvuna letimbili kanye netimvu letindvuna letingu-14 letinemnyaka munye, futsi tonkhe kufanele tibe nguletiphile kahle.+ 33 Letinkunzi, naletimvu letindvuna kanye naletimvu letindvuna letinemnyaka munye titawuhambisana nemnikelo wato walokutinhlavu newalokunatfwako, tonkhe ngelinani lato nangendlela lokuhlale kwentiwa ngayo. 34 Nitawuletsa nembuti letawuba ngumnikelo wesono, ngetulu kwemnikelo wekushiswa lowentiwa njalo, lohambisana nemnikelo walokutinhlavu newalokunatfwako.+

35 “‘Ngelilanga lesi-8, niboba nembutsano lokhetsekile. Kute umsebenti lomatima lokufanele niwente ngalelolanga.+ 36 Nitawuletsa inkunzi yinye, imvu lendvuna yinye, kanye netimvu letindvuna letingu-7 letinemnyaka munye, futsi tonkhe kufanele tibe nguletiphile kahle.+ Titawuba ngumnikelo wekushiswa, lokungumnikelo lowentiwa ngemlilo naloliphunga lelimnandzi* kuJehova. 37 Lenkunzi, nalemvu lendvuna kanye naletimvu letindvuna letinemnyaka munye titawuhambisana nemnikelo wato walokutinhlavu newalokunatfwako, tonkhe ngelinani lato nangendlela lokuhlale kwentiwa ngayo. 38 Nitawuletsa nembuti letawuba ngumnikelo wesono, ngetulu kwemnikelo wekushiswa lowentiwa njalo, lohambisana nemnikelo walokutinhlavu newalokunatfwako.+

39 “‘Letintfo nitawutiletsa kuJehova emikhosini yenu,+ ngetulu kweminikelo yenu yekufunga+ neyekutitsandzela,+ tibe yiminikelo yekushiswa,+ iminikelo yalokutinhlavu,+ iminikelo yalokunatfwako,+ kanye nemihlatjelo yekuthula.’”+ 40 Ngako Mosi watjela ema-Israyeli konkhe loko Jehova labemtjele kona.

30 Ngemuva kwaloko Mosi wakhuluma netinhloko+ tetive tema-Israyeli, watsi: “Naku Jehova lakushito: 2 Nangabe umuntfu enta sifungo+ kuJehova nobe atibopha* ngesifungo+ sekutsi angeke ayente intfo letsite, kufanele aligcine livi lakhe.+ Kufanele akwente konkhe lafunge kutsi utawukwenta.+

3 “Nakwenteka umuntfu lomsikati enta sifungo kuJehova nobe atibopha ngesifungo sekutsi ngeke ayente intfo letsite, abe asesemncane futsi asahlala endlini yababe wakhe, 4 nababe wakhe eve ngalesifungo sakhe nobe ngekutibopha kwakhe ngesifungo sekutsi ngeke ayente intfo letsite, kodvwa angamaleli, tonkhe tifungo takhe kufanele atigcine, futsi utawuchubeka abophekile nakulesifungo sakhe sekutsi angeke ayente intfo letsite. 5 Kepha nangabe babe wakhe amalela nakeva kutsi wente tifungo nobe kutsi utibophe ngetifungo tekungenti intfo letsite, leto tifungo angeke tisasebenta. Jehova utamcolela ngobe babe wakhe umalele.+

6 “Kodvwa nangabe indvodza imtsatsa imenta umfati abe asengephansi kwesifungo sakhe nobe setsembiso latibophe ngaso angakacabangi, 7 futsi lendvodza yakhe ive ngaso kodvwa ingamaleli ngalelolanga leva ngalo, letifungo takhe kufanele atigcine, futsi utawuchubeka abophekile nakulesifungo sakhe sekutsi angeke ayente intfo letsite. 8 Nangabe-ke lendvodza yakhe imalela ngelilanga leyiva ngalo ngaloku, ingasicedza lesifungo nobe lesetsembiso latibophe ngaso angakacabangi,+ futsi Jehova utamcolela.

9 “Nakwenteka umfelokati nobe umfati lodivosiwe enta sifungo, konkhe latibophe ngako kufanele akugcine.

10 “Kodvwa-ke lomfati nakente sifungo nobe atibophe ngesifungo sekutsi ngeke ayente intfo letsite, abe ahlala endlini yendvodza yakhe, 11 futsi lendvodza ive ngaloku, kodvwa ingamvimbeli nobe ingamaleli, tonkhe tifungo takhe kufanele atigcine, futsi utawuchubeka abophekile nakulesifungo sakhe sekutsi ngeke ayente intfo letsite. 12 Kepha nangabe ngalelilanga lendvodza leve ngalo icedza nobe ngusiphi sifungo lasentile nobe lokutibopha kwakhe ngesifungo sekutsi angeke ayente intfo letsite, lomfati ngeke kusadzingeka atigcine leto tifungo.+ Indvodza yakhe iticedzile, futsi Jehova utamcolela. 13 Mayelana nanobe ngusiphi sifungo nobe kutibopha ngesifungo sekutsi ngeke ente intfo letsite kuze atincishe leyontfo, indvodza yakhe ngiyo lokufanele incume kutsi lomfati utasigcina yini nobe cha. 14 Nakwendlula emalanga indvodza yakhe solo ingamaleli, isuke imvumela kutsi atigcine tonkhe tifungo takhe nobe achubeke abophekile etifungweni takhe tekutsi angeke ayente intfo letsite, ngaleyo ndlela kufanele atigcine leto tifungo. Isuke imvumele ngobe ngelilanga leyamuva ngalo nakatenta ayizange imalele. 15 Kodvwa nangabe lendvodza icedza letifungo sekwendlule emalanga ivile ngato, ngiyo letawutfwala imiphumela yelicala lakhe.+

16 “Lena yimitsetfo Jehova layitjela Mosi lemayelana nendvodza nemfati wayo, kanye nababe nendvodzakati yakhe leseyincane futsi lehlala endlini yakhe.”

31 Jehova wabese utsi kuMosi: 2 “Hamba uyophindziselela+ ema-Israyeli kubantfu bakaMidiyani.+ Ngemuva kwaloko utawufa futsi ungcwatjwe njengabo bonkhe bantfu bakini.”*+

3 Ngako Mosi wakhuluma nalesive watsi: “Tsatsani emadvodza niwalungisele kuyewukulwa* nebantfu bakaMidiyani, nekuyawukhipha imphindziselo yaJehova kubo. 4 Kuleso naleso sive ka-Israyeli, nibotsatsa emadvodza langu-1 000 niwafake kulelibutfo.” 5 Ngako etinkhulungwaneni tema-Israyeli+ kwatsatfwa emadvodza langu-1 000 esiveni ngasinye, futsi sekawonkhe labehlomele kuya emphini* aba ngu-12 000.

6 Mosi wawakhipha kutsi aye emphini, futsi esiveni ngasinye bekutsetfwe emadvodza langu-1 000. Wakhipha naFinehasi+ indvodzana ya-Eliyezeri futsi labengumphristi labetawuhamba nalelibutfo. Abephetse tintfo letingcwele kanye nemacilongo ekuhlaba umkhosi wemphi.+ 7 Lama-Israyeli alwa nebantfu bakaMidiyani, njengobe nje Jehova abetjele Mosi, abulala bonkhe bantfu labadvuna bakhona. 8 Aphindze abulala nemakhosi akaMidiyani, bo-Evi, Rekhemu, Suri, Hure, naReba, lebebangemakhosi lasihlanu akaMidiyani. Abulala naBhalamu+ indvodzana yaBheyori ngenkemba. 9 Kodvwa bafati nebantfwana bakaMidiyani abatfumba. Aphindze atsatsa tonkhe tilwane letifuywako takhona, yonkhe imfuyo kanye nato tonkhe tintfo talabantfu bakaMidiyani. 10 Ashisa onkhe emadolobha labantfu lebebahleti kuwo kanye nato tonkhe tinkambu lebebahlala kuto.* 11 Atsatsa nato tonkhe tintfo lebebanato, lokufaka ekhatsi bantfu netilwane. 12 Ema-Israyeli eta nalabantfu labatfumbile nato tonkhe letintfo labetitsetse, atiletsa kuMosi naku-Eliyezeri umphristi kanye nakuso sonkhe sive sema-Israyeli. Letintfo atiletsa endzaweni lobekuhlalwa kuyo, ehlane lakaMowabi+ lelisedvute neJordane, macondzana neJerikho.

13 BoMosi na-Eliyezeri umphristi kanye nabo bonkhe baholi besive baphuma bayohlangabeta lamadvodza ngephandle kwendzawo lokuhlalwa kuyo. 14 Kodvwa Mosi wawatfukutselela lamadvodza labehola lamabutfo emphi, lokubaholi betinkhulungwane kanye nebaholi bemakhulu lebebabuya emphini. 15 Mosi watsi kuwo: “Kani anikababulali yini bonkhe bantfu labasikati? 16 Angitsi ngibo labagcugcutelwa nguBhalamu kuze bayenge ema-Israyeli kutsi angetsembeki+ kuJehova kuloko lokwenteka ePheyori,+ kangangekutsi bantfu baJehova bahlaselwa sishayo.+ 17 Ngako kulabantfwana, bulalani bonkhe bafana, nibulale nabo bonkhe bantfu labasikati lesebake baya ecansini nemuntfu lomdvuna. 18 Kodvwa onkhe emantfombatana lasengakake aye ecansini nemuntfu lomdvuna+ ningawabulali. 19 Nibobese nihlala ngephandle kwendzawo lokuhlalwa kuyo emalanga langu-7. Nobe ngubani kini lobulele umuntfu nanobe ngubani lotsintse umuntfu lobulewe,+ kufanele atihlambulule+ ngelilanga lesitsatfu kanye nangelilanga lesi-7. Loku kufanele kwentiwe ngini kanye nalabantfu lenibatfumbile. 20 Nibohlambulula nato tonkhe tingubo, tonkhe tintfo letentiwe ngesikhumba, tonkhe tintfo letentiwe ngeboya bembuti, kanye nato tonkhe tintfo letentiwe ngesigodvo.”

21 Eliyezeri umphristi wabese ukhuluma nalamadvodza lebekaye emphini, watsi: “Nangu umtsetfo Jehova lawutjele Mosi: 22 ‘Ligolide, lisiliva, litfusi, insimbi, kanye nemthofi, 23 nako konkhe lokungamelana nemlilo, kufanele nikushise emlilweni, ngaleyo ndlela kutawubese kuyahlanteka. Letintfo kufanele niphindze nitihlante ngemanti ekuhlambulula.+ Kodvwa-ke tonkhe tintfo letingeke timelane nemlilo, nibotigeza ngemanti. 24 Nibowasha netingubo tenu ngelilanga lesi-7 kuze nihlanteke, ngemuva kwaloko seningeta-ke kulendzawo lokuhlalwa kuyo.’”+

25 Jehova wabese utsi kuMosi: 26 “Yenta luhla lwaletintfo letitsetfwe emphini, ubale naloko lokutfunjiwe, lokuhlanganisa bantfu netilwane. Loku ubokwenta na-Eliyezeri umphristi kanye netinhloko tetindlu taka-Israyeli. 27 Letintfo letitsetfwe emphini tehlukanise ekhatsi, lenye ihhafu uyinike labo lebebaye emphini, lenye uyinike sonkhe lesive.+ 28 Kuloku lokunikwe lamadvodza labekaye emphini ubotsatsa umuntfu* munye kubantfu labangu-500, emhlambini wetinkhomo letingu-500 utsatse yinye, utsatse nembongolo yinye kuletingu-500, nasemhlambini wetimvu netimbuti letingu-500 utsatse ibe yinye. Konkhe loku ubokunika Jehova kuze nimbonge. 29 Letintfo ubotitsatsa kulehhafu labanikwe yona futsi utinike Eliyezeri umphristi, tibe ngumnikelo loya kuJehova.+ 30 Kulehhafu lenikwe ema-Israyeli, ubotsatsa umuntfu munye kulabangu-50, emhlambini wetinkhomo letingu-50 utsatse yinye, utsatse yinye imbongolo kuletingu-50, nasemhlambini wetimvu netimbuti letingu-50 utsatse ibe yinye, uphindze utsatse silwane sinye kulo lonkhe luhlobo lwetilwane tasekhaya letingu-50. Konkhe loku ubokunika emaLevi,+ wona lenta imisebenti lemayelana nelithende laJehova lekukhontela.”+

31 Ngako-ke boMosi na-Eliyezeri umphristi benta njengobe nje Jehova abetjele Mosi. 32 Nali linani lato tonkhe letintfo labantfu lebebatitsetse emphini: timvu netimbuti letingu-675 000, 33 tinkhomo letingu-72 000, 34 kanye netimbongolo letingu-61 000. 35 Bantfu labasikati lebebasengakaze baye ecansini nemuntfu lomdvuna+ bona bebangu-32 000. 36 Kulehhafu leyaniketwa labo lebebaye emphini bekunetimvu netimbuti letingu-337 500. 37 Timvu netimbuti lokwabongwa ngato Jehova taba ngu-675. 38 Tinkhomo betingu-36 000, futsi kwatsatfwa letingu-72 kwabongwa ngato Jehova. 39 Timbongolo betingu-30 500, futsi kuto kwatsatfwa letingu-61 kwabongwa ngato Jehova. 40 Bantfu bebangu-16 000, futsi kwatsatfwa labangu-32 kwabongwa ngabo Jehova. 41 Mosi wabese utsatsa leminikelo lokubongwa ngayo Jehova wayinika Eliyezeri umphristi+ njengobe nje Jehova abemtjelile.

42 Nali linani letintfo lebetikulehhafu leyaniketwa ema-Israyeli, leyo Mosi labewahlephulele yona kuletintfo letabuya nalamadvodza labekaye emphini: 43 timvu netimbuti letingu-337 500, 44 tinkhomo letingu-36 000, 45 timbongolo letingu-30 500, 46 kanye nebantfu labangu-16 000. 47 Kulehhafu lebeyinikwe ema-Israyeli, Mosi watsatsa umuntfu munye kulabangu-50, nesilwane sinye kuletingu-50. Konkhe loku wakunika emaLevi,+ wona lenta imisebenti lemayelana nelithende laJehova lekukhontela,+ futsi loku wakwenta njengobe nje Jehova abemtjelile.

48 Ngemuva kwaloko emadvodza labebekwe kutsi ahole labantfu lebebaye emphini,+ futsi lebekabaholi betinkhulungwane nebaholi bemakhulu eta kuMosi, 49 afike atsi: “Tinceku takho setiwabalile emadvodza langephansi kwato futsi lebekaye emphini. Kute ngisho nayinye leshodako.+ 50 Ngako ngamunye wetfu akanikele kuJehova ngaloko lakutfolile, lokutintfo letentiwe ngeligolide, imihlobiso yemacakala, emabhengela, tindandatho tesicinisekiso, emacici, kanye naleminye imihlobiso, kuze sibuyisane naNkulunkulu embikwaJehova.”

51 Ngako boMosi na-Eliyezeri balitsatsa leligolide, lokungiyo yonkhe lemihlobiso. 52 Yonkhe iminikelo yeligolide leyentelwa Jehova yaba ngemakhilogremu langaba ngu-191.* Letintfo bebatitsetse kulabaholi betinkhulungwane nakulabaholi bemakhulu. 53 Nguloyo naloyo kulamadvodza lebekaye emphini watfola lokutsite kuletintfo lebebabuye nato. 54 BoMosi na-Eliyezeri umphristi batsatsa leligolide kulabaholi betinkhulungwane nakulabaholi bemakhulu, baliletsa ethendeni lekuhlangana kuze libe sikhumbuto kuma-Israyeli embikwaJehova.

32 Emadvodzana aRubeni+ nemadvodzana aGadi+ abenemfuyo lenyenti kakhulu, futsi abona kutsi iJazeri+ neGileyadi bekusifundza lesihle emfuyweni. 2 Ngako aya kuboMosi na-Eliyezeri umphristi, kanye nakubaholi balesive, afike atsi: 3 “I-Atharothe, iDiboni, iJazeri, iNimra, iHeshboni,+ i-Eleyale, iSebamu, iNebo,+ neBheyoni,+ 4 lokusifundza Jehova lasincoba embikwesive sema-Israyeli,+ sisifundza lesihle emfuyweni, futsi tinceku takho tinemfuyo lenyenti.”+ 5 Achubeka atsi: “Nangabe tinceku takho temukeleka emehlweni akho, tinike lesifundza sibe lifa lato. Sicela kungayeweli iJordane.”

6 Mosi wakhuluma nalamadvodzana aGadi nemadvodzana aRubeni watsi: “Nifuna kutsi bomnakenu baye emphini kodvwa nine nisale lapha? 7 Kungani nifuna kwenta ema-Israyeli aphelelwe ngemandla, angaseweli aye eveni Jehova latawanika lona? 8 Nguloko bobabe benu labakwenta ngesikhatsi ngibatfuma kutsi bayohlola lelive besuka eKhadeshi-bhaneya.+ 9 Ngesikhatsi bakhuphuka baya eSihosheni sase-Eshkoli+ futsi babona lelive, benta ema-Israyeli aphelelwa ngemandla ekuchubeka aye eveni Jehova labetsite utawanika lona.+ 10 Ngalelolanga, Jehova watfukutsela kakhulu, waze wafunga watsi:+ 11 ‘Emadvodza laphume eGibhithe laneminyaka lesukela kulengu-20 budzala kuya etulu, ngeke alibone lelive+ lengafunga ngalo kubo-Abrahama, Isaka naJakobe,+ ngobe akakangilandzeli ngenhlitiyo yonkhe, 12 ngaphandle kwaKhalebi+ indvodzana yaJefune longumKhenizi kanye naJoshuwa+ indvodzana yaNuni, ngobe bona balandzele Jehova ngenhlitiyo yonkhe.’+ 13 Ngaleso sizatfu, Jehova wawatfukutselela kakhulu ema-Israyeli, wenta nekutsi azulazule ehlane iminyaka lengu-40,+ kwaze kwaba ngulapho sesiphele sonkhe lesitukulwane lebesenta lokubi embikwaJehova.+ 14 Nyalo senenta njengobe kwenta bobabe benu, nine situkulwane setoni, futsi nifuna Jehova awatfukutselele kakhulu ema-Israyeli. 15 Nangabe niyekela kumlandzela, utawuphindze asishiye lesive ehlane, ngaleyo ndlela nitawube nibangele kutsi bonkhe labantfu babhujiswe.”

16 Ngekuhamba kwesikhatsi, lamadvodzana abuya kuMosi atsi: “Sicela kwakhela imfuyo yetfu tibaya,* siphindze sakhele nebantfwana betfu emadolobha kulendzawo. 17 Tsine sitawuhlala siyilungele imphi+ futsi sitawuhamba embikwema-Israyeli kuze kube ngulapho efika endzaweni yawo. Bantfwana betfu bona batawuhlala emadolobheni labiyelwe, bavikeleke kubantfu bakulendzawo. 18 Angeke sibuyele etindlini tetfu kuze kube ngulapho um-Israyeli ngamunye asayitfolile indzawo lelifa lakhe.+ 19 Tsine ngeke silitfole lifa kanye nawo ngesheya kweJordane kuchubeke, ngobe sesivele silitfolile lifa letfu ngasemphumalanga yeJordane.”+

20 Mosi wawaphendvula watsi: “Nangabe nitawuhloma embikwaJehova kuze niye emphini,+ 21 nanangabe nguloyo naloyo kini ahloma aphindze ewele iJordane embikwaJehova, njengobe Nkulunkulu atawube acosha titsa takhe embikwakhe,+ 22 lize lincotjwe lelive embikwaJehova,+ nine seningabese niyabuya-ke+ futsi angeke nibe nelicala kuJehova nakuma-Israyeli. Ngemuva kwaloko lendzawo itawuba lifa lenu embikwaJehova.+ 23 Kodvwa naningakwenti loku, nitawube nonile kuJehova. Ngaleyo ndlela nibokwati kutsi sono senu sitawunilandzela. 24 Ngako-ke ningabakhela bantfwana benu emadolobha niphindze nakhele imfuyo yenu tibaya,+ kodvwa kufanele nikwente loku lenikwetsembisile.”

25 Emadvodzana aGadi nemadvodzana aRubeni atsi kuMosi: “Tinceku takho titawukwenta njengobe usho nkhosi. 26 Bantfwana nebafati betfu, imfuyo kanye nato tonkhe tilwane tetfu letifuywako kutawuhlala kulamadolobha aseGileyadi,+ 27 kodvwa tsine sitayewela iJordane. Onkhe emadvodza emkhatsini wetfu atawube ahlomele kuyokulwa embikwaJehova,+ njengobe nje usho nkhosi.”

28 Ngako Mosi wakhuluma na-Eliyezeri umphristi, naJoshuwa indvodzana yaNuni kanye netinhloko tetindlu taka-Israyeli, wabaniketa umtsetfo lomayelana nalamadvodzana aGadi nemadvodzana aRubeni. 29 Mosi watsi kubo: “Nangabe emadvodzana aGadi nemadvodzana aRubeni ewela iJordane kanye nani, futsi onkhe abe ahlomele imphi kuze ayokulwa embikwaJehova, nalelive lincotjwe embikwenu, nibowanika sifundza saseGileyadi sibe lifa lawo.+ 30 Kodvwa nangabe angahlomi ewele nani iJordane, atawuhlala emkhatsini wenu eveni laseKhenani.”

31 Nakeva loku, lamadvodzana aGadi nalamadvodzana aRubeni atsi: “Loko Jehova lakushito etincekwini takho sitawukwenta. 32 Sitawuhloma siphindze sewele iJordane embikwaJehova siye eveni laseKhenani,+ kodvwa lifa letfu litawuba ngala kweJordane.” 33 Ngako live laSihoni,+ inkhosi yema-Amori nelive la-Ogi,+ inkhosi yaseBhashani, Mosi waliniketa emadvodzana aGadi nemadvodzana aRubeni+ kanye nencenye yesive sakaManase+ indvodzana yaJosefa. Lena bekuyindzawo yalawo madolobha, futsi wawanika nemadolobha laseceleni kwayo.

34 Emadvodzana aGadi akha* iDiboni,+ i-Atharothe,+ i-Aroyeri,+ 35 i-Atrothe-shofani, iJazeri,+ iJogbeha,+ 36 iBhethi-nimra,+ iBhethi-harani,+ lokungemadolobha labiyelwe, aphindze akha netibaya temfuyo yawo. 37 Emadvodzana aRubeni akha iHeshboni,+ i-Eleyale,+ iKhiriyathayimu,+ 38 iNebo,+ neBhali-meyoni,+ futsi emagama alamadolobha ashintjwa. Lamadvodzana aRubeni akha neSibima, futsi lamadolobha lawakha kabusha awaniketa emagama lamasha.

39 Emadvodzana aMakhire+ loyindvodzana yaManase ahamba ayohlasela iGileyadi, afike ayincoba, acosha nema-Amori labehlala lapho. 40 Ngako Mosi waniketa lamadvodzana aMakhire indvodzana yaManase indzawo yaseGileyadi, futsi ahlala khona.+ 41 NaJayire indvodzana yaManase wahamba wayoyihlasela, wancoba nemadolobha ayo lamancane, wabese uwabita ngekutsi yiHavothi-jayire.*+ 42 Noba naye wahlasela iKhenathi futsi wayincoba kanye nemadolobha laseceleni* kwayo, wase uyibita ngelibito lakhe lelitsi Noba.

33 Lolu luhambo lwebantfu baka-Israyeli ngesikhatsi baphuma eveni laseGibhithe+ ngemacembu abo,*+ bacondziswa nguMosi na-Aroni.+ 2 Mosi abesolo atibhala phansi tindzawo lebebasuka kuto njengobe bebachubeka neluhambo lwabo, alandzela sicondziso saJehova. Nguleti letindzawo labahamba kuto, basuka kulenye baya kulenye:+ 3 Ngelilanga lesi-15 enyangeni yekucala,+ ema-Israyeli esuka eRamsesi.+ Ngalona lelolanga lelilandzela liPhasika,+ aphuma embikwabo bonkhe bantfu baseGibhithe ahamba ngesibindzi.* 4 Ngaleso sikhatsi, bantfu baseGibhithe bebangcwaba onkhe ematibulo abo labebulewe nguJehova,+ ngobe Jehova abekhiphe sehlulelo kubonkulunkulu babo.+

5 Ema-Israyeli esuka eRamsesi efike emisa emathende eSukhothi.+ 6 Abese ayesuka eSukhothi emisa emathende e-Ethamu,+ lesemnceleni welihlane. 7 Ngemuva kwaloko esuka e-Ethamu abuyela emuva, aya ngasePhihahirothi lebukene neBhali-sefoni+ futsi emisa emathende embikweMigdoli.+ 8 Esuka nasePhihahirothi adzabula elwandle+ aya ehlane.+ Achubeka ahamba emalanga lamatsatfu ehlane lase-Ethamu,+ efike emisa emathende eMara.+

9 Ngemuva kwaloko esuka eMara aya e-Elimu. E-Elimu bekunemitfombo yemanti lengu-12 kanye netihlahla telusundvu letingu-70, ngako emisa emathende kuleyo ndzawo.+ 10 Abese ayesuka e-Elimu, emisa emathende ngaseLwandle Lolubovu. 11 Esuka naseLwandle Lolubovu, futsi emisa emathende ehlane laseSini.+ 12 Ngemuva kwaloko esuka ehlane laseSini, emisa emathende eDofkha. 13 Ngekuhamba kwesikhatsi esuka eDofkha, emisa emathende e-Alushi. 14 Abese ayesuka e-Alushi, emisa emathende eRefidimu,+ futsi kwakute emanti ekunatsa kuleyo ndzawo. 15 Ngemuva kwaloko esuka eRefidimu, emisa emathende ehlane laseSinayi.+

16 Esuka nasehlane laseSinayi, efike emisa emathende eKhibrothi-hathava.+ 17 Abese ayesuka eKhibrothi-hathava futsi emisa emathende eHaserothi.+ 18 Ngemuva kwaloko esuka eHaserothi, emisa emathende eRitma. 19 Abese ayesuka eRitma, efike emisa emathende eRimoni-pheresi. 20 Esuka eRimoni-pheresi, emisa emathende eLibna. 21 Abese ayesuka eLibna, futsi emisa emathende eRisa. 22 Ngemuva kwaloko esuka eRisa, emisa emathende eKhehelatha. 23 Esuka naseKhehelatha, efike emisa emathende eNtsabeni iSheferi.

24 Ngemuva kwaloko esuka eNtsabeni iSheferi futsi emisa emathende eHarada. 25 Abese ayesuka eHarada, efike emisa emathende eMakhelothi. 26 Esuka+ naseMakhelothi, emisa emathende eThahathi. 27 Ngemuva kwaloko esuka eThahathi, emisa emathende eThera. 28 Abese ayesuka naseThera futsi emisa emathende eMithka. 29 Ngekuhamba kwesikhatsi esuka eMithka, efike emisa emathende eHashmona. 30 Abese ayesuka eHashmona, emisa emathende eMoserothi. 31 Ngemuva kwaloko esuka eMoserothi futsi emisa emathende eBhene-jakani.+ 32 Esuka naseBhene-jakani, efike emisa emathende eHori-hagidigadi. 33 Abese ayesuka eHori-hagidigadi, emisa emathende eJotbatha.+ 34 Ngekuhamba kwesikhatsi esuka eJotbatha futsi emisa emathende e-Abrona. 35 Esuka e-Abrona, efike emisa emathende e-Esiyoni-geberi.+ 36 Ngemuva kwaloko esuka e-Esiyoni-geberi, efike emisa emathende ehlane laseZini,+ lokuyiKhadeshi.

37 Ngekuhamba kwesikhatsi esuka eKhadeshi, emisa emathende eNtsabeni iHori,+ emnceleni welive laka-Edomu. 38 Aroni umphristi wenyukela eNtsabeni iHori njengobe Jehova abeshito, futsi wafela khona. Bekulilanga lekucala enyangeni yesihlanu, ngemnyaka wesi-40 ema-Israyeli aphumile eveni laseGibhithe.+ 39 Ngesikhatsi Aroni afela eNtsabeni iHori, abeneminyaka lengu-123 budzala.

40 Inkhosi yase-Aradi+ lengumKhenani futsi lebeyihlala eNegebhu, eveni laseKhenani, yeva ngekuta kwema-Israyeli.

41 Ngekuhamba kwesikhatsi ema-Israyeli esuka eNtsabeni iHori,+ efike emisa emathende eSalmona. 42 Ngemuva kwaloko esuka eSalmona, emisa emathende ePhunoni. 43 Esuka nasePhunoni futsi emisa emathende e-Obothi.+ 44 Abese ayesuka e-Obothi efike amisa emathende e-Iye-abharimu, lesemnceleni welive lakaMowabi.+ 45 Ngekuhamba kwesikhatsi esuka e-Iyimu, emisa emathende eDiboni-gadi.+ 46 Ngemuva kwaloko esuka eDiboni-gadi futsi emisa emathende e-Alimoni-diblathayimu. 47 Esuka nase-Alimoni-diblathayimu, efike emisa emathende etintsabeni tase-Abarimu,+ nawusengakafiki eNebo.+ 48 Ekugcineni esuka etintsabeni tase-Abarimu futsi emisa emathende ehlane lakaMowabi lelingaseJordane, macondzana neJerikho.+ 49 Achubeka emise emathende awo ngaseJordane, kusukela eBhethi-jeshimothi kuze kuyewufika e-Abela-shithimu,+ ehlane lakaMowabi.

50 Jehova wakhuluma naMosi ehlane lakaMowabi lelingaseJordane macondzana neJerikho, watsi: 51 “Khuluma nema-Israyeli utsi kuwo: ‘Nyalo nitakwewela iJordane niye eveni laseKhenani.+ 52 Kufanele nibacoshe bonkhe bantfu bakulelo live embikwenu, niphihlite tonkhe tithico tabo letibatwe ngematje+ kanye nato tonkhe tithico tabo tensimbi,*+ niphindze nibhidlite tonkhe tindzawo labakhontela kuto bonkulunkulu babo.*+ 53 Lelive nitawulitsatsa libe lenu futsi nihlale kulo, ngobe nakanjani ngitawuninika lona kutsi libe lenu.+ 54 Kufanele nilehlukanise ngenkatho+ ngekwemindeni yenu. Emacembu lamakhulu atawutfola lifa lelikhulu, emacembu lamancane wona atfole lelincane.+ Lifa lemuntfu ngamunye litawuba sendzaweni lapho inkatho ikhombe khona. Nitawutfola indzawo letawuba lifa lenu ngekwetive tabobabe benu.+

55 “‘Kodvwa-ke naningabacoshi labantfu bakulelo live,+ labo lenitawubavumela kutsi basale batawuba njengetintfo letihhedletako emehlweni enu nanjengemanyeva emihlubulweni yenu, futsi batawunihlupha kulelive lenitawuhlala kulo.+ 56 Loko lebengihlose kukwenta kubo ngitawubese ngikwenta kini.’”+

34 Jehova wachubeka wakhuluma naMosi watsi: 2 “Niketa ema-Israyeli nati ticondziso: ‘Naningena eveni laseKhenani,+ lena kutawuba yimincele yalelive lenitawunikwa lona kutsi libe lifa lenu.+

3 “‘Umncele wenu longaseningizimu utawusuka ehlane laseZini ugudle i-Edomu. Ngaseningizimu lengasemphumalanga utawusuka ngasekugcineni kweLwandle Lweluswayi.*+ 4 Utawujika wendlule ngaseningizimu yemgwaco lowenyukelako wase-Akrabhimu,+ uchubeke uyewufika eZini uze uphelele eningizimu yeKhadeshi-bhaneya.+ Utawusuka lapho uye eHasari-adari,+ uze uyewufika nase-Asmoni. 5 E-Asmoni, lomncele utawujika uye eSigodzini* saseGibhithe, futsi utawuphelela eLwandle.*+

6 “‘Umncele wasenshonalanga kutawuba Lwandle Lolukhulu* kanye nelugu. Ngulowo-ke umncele wenu longasenshonalanga.+

7 “‘Nangu umncele wenu losenyakatfo: Kusukela eLwandle Lolukhulu lomncele nitawusika uze uyewufika eNtsabeni iHori.+ 8 Kusukela eNtsabeni iHori lomncele utawuchubeka uze uyewufika eLebo-hamathi,*+ futsi utawuphelela eSedadi.+ 9 Utawuhamba ufike eZifroni, uze uphelele eHasari-enani.+ Ngulowo-ke umncele wenu longasenyakatfo.

10 “‘Umncele wenu longasemphumalanga kufanele usuke eHasari-enani uze uyewufika eShefamu. 11 Utawuchubeka eShefamu uye eRibla, uze ufike emphumalanga ye-Ayini, wehle udzabule ligcuma lelisemphumalanga yeLwandle lwaseKhinerethi.*+ 12 Lomncele utawuhamba ufike eJordane, futsi uphelele eLwandle Lweluswayi.+ Nguleyo-ke indzawo yenu+ kanye nemincele leyitungeletile.’”

13 Ngako Mosi watjela ema-Israyeli watsi: “Lena-ke yindzawo lenitayehlukanisa ngenkatho kuze ibe lifa lenu,+ njengobe nje Jehova atsite ayinikwe tive letingu-9 nencenye. 14 Ngobe sive sakaRubeni ngetindlu taso, nesive sakaGadi ngetindlu taso kanye nencenye yesive sakaManase setivele tilitfolile lifa lato.+ 15 Letive letimbili nencenye setilitfolile lifa lato emphumalanga yesifundza saseJordane macondzana neJerikho.”+

16 Jehova wachubeka wakhuluma naMosi watsi: 17 “Nankha emabito emadvodza latawuhlukanisa umhlaba kuze ube wenu: Eliyezeri+ umphristi, naJoshuwa+ indvodzana yaNuni. 18 Ubotsatsa umholi abe munye esiveni ngasinye kuze nehlukanise lelive libe lenu.+ 19 Nankha emabito abo: esiveni sakaJuda+ ubotsatsa Khalebi+ indvodzana yaJefune; 20 esiveni sakaSimeyoni+ ubotsatsa Shemuweli indvodzana ya-Amihudi; 21 esiveni sakaBhenjamini+ utsatse Elidadi indvodzana yaKhisloni; 22 esiveni sakaDani+ ubotsatsa umholi, lokunguBukhi indvodzana yaJogli; 23 esiveni sakaManase lovela kuJosefa+ ubotsatsa umholi,+ lokunguHaniyeli indvodzana ya-Efodi; 24 esiveni saka-Efrayimu+ nakhona utsatse umholi lokunguKhemuweli indvodzana yaShifthani; 25 esiveni sakaZebuloni+ utsatse umholi, lokungu-Elisafani indvodzana yaPhanaki; 26 esiveni saka-Isakhari+ utsatse umholi, lokunguPhaltiyeli indvodzana ya-Azani; 27 esiveni saka-Asheri+ utsatse umholi, lokungu-Ahihudi indvodzana yaShelomi; 28 nasesiveni sakaNaftali+ utsatse umholi, lokunguPhedaheli indvodzana ya-Amihudi.” 29 Laba-ke ngibo Jehova labatfuma kutsi behlukanisele ema-Israyeli umhlaba eveni laseKhenani.+

35 Jehova wachubeka wakhuluma naMosi ehlane lakaMowabi lelingaseJordane+ macondzana neJerikho, watsi: 2 “Tjela ema-Israyeli kutsi kufanele atsatse emadolobha latsite awanikete emaLevi endzaweni lelifa lawo,+ aphindze awanikete nemadlelo laseceleni kwalawo madolobha.+ 3 EmaLevi atawuhlala kulamadolobha, futsi lamadlelo atawuba emfuyo yawo, netintfo lanato, kanye nato tonkhe letinye tilwane tawo. 4 Lamadlelo alamadolobha lenitawanika emaLevi atawutsatsa indzawo lengemamitha langaba ngu-445* kusuka elubondzeni kuto tonkhe tinhlangotsi talelidolobha. 5 Ngaphandle kulelidolobha nitawukala emamitha langaba ngu-890* eluhlangotsini lolungasemphumalanga, nikale emamitha langaba ngu-890 eluhlangotsini lolungaseningizimu, nemamitha langaba ngu-890 eluhlangotsini lolungasenshonalanga, kanye nemamitha langaba ngu-890 eluhlangotsini lolungasenyakatfo. Lelidolobha lona litawuba semkhatsini. Lawa-ke kutawuba ngemadlelo alamadolobha emaLevi.

6 “LamaLevi nitawanika emadolobha ekukhosela lasitfupha,+ lapho kutawubalekela khona umuntfu lobulele lomunye,+ bese niwanika nalamanye emadolobha langu-42. 7 Asawonkhe emadolobha lenitawanika wona kufanele abe ngu-48, niphindze niwanike nemadlelo awo.+ 8 Lamadolobha nitawatsatsa efeni lema-Israyeli.+ Emacenjini lamakhulu nitawutsatsa emadolobha lamanyenti, emacenjini lamancane nitsatse lambalwa.+ Licembu ngalinye litawuniketa emaLevi lamanye emadolobha alo, kuye ngekutsi litfole lifa lelingakanani.”

9 Jehova waphindze wakhuluma naMosi watsi: 10 “Khuluma nema-Israyeli utsi: ‘Nyalo newela iJordane, niya eveni laseKhenani.+ 11 Kufanele nikhetse emadolobha lokutawuba melula kutsi nifike kuwo kuze abe ngemadolobha ekukhosela, lapho kutawubalekela khona umuntfu lobulele lomunye angakahlosi.+ 12 Lamadolobha nitawukhosela kuwo nanibalekela umphindziseli wengati,+ kuze loyo lobulele lomunye angafi angakatekiswa licala embikwesive.+ 13 Nguleyo-ke injongo yalamadolobha ekukhosela lasitfupha lenitawakhetsa. 14 Nibokhetsa emadolobha lamatsatfu ngala kweJordane,+ nalamanye lamatsatfu eveni laseKhenani+ kutsi abe ngemadolobha ekukhosela. 15 Lamadolobha lasitfupha atawuba yindzawo yekukhosela yema-Israyeli, nebantfu labatihambi,+ nalabo labahleti kwesikhashana emkhatsini wenu, kuze loyo lobulele lomunye angakahlosi abalekele khona.+

16 “‘Kodvwa nangabe umuntfu ashaya lomunye ngentfo yensimbi bese uyafa, loyo muntfu ungumbulali. Kufanele nakanjani abulawe.+ 17 Nangabe amshaye ngelitje lebelingambulala, vele bese uyafa, loyo muntfu ungumbulali. Kufanele nakanjani abulawe. 18 Nakamshaye ngentfo lelugodvo lebeyingambulala, futsi vele afe, loyo muntfu ungumbulali. Nakanjani kufanele abulawe.

19 “‘Umphindziseli wengati nguye lotawubulala lomuntfu lobulele. Nakahlangana naye, kufanele avele ambulale. 20 Nangabe lomuntfu achilite lolomunye ngenca yekutsi abemtondza nobe wamjikijela ngentfo letsite acondze kumlimata,* futsi wafa,+ 21 nobe amshaye ngesandla ngobe amtondza futsi loyo muntfu wafa, loyo lombulele kufanele nakanjani abulawe ngobe ungumbulali. Umphindziseli wengati utambulala nakahlangana naye.

22 “‘Kodvwa nangabe amchilite angakahlosi futsi kungasiko kutsi abemtondza, nobe nakamjikijele ngentfo letsite angakacondzi kumlimata,*+ 23 nobe nangabe kwentekile kutsi awisele litje kuloyo muntfu kodvwa angakamboni, futsi angasiso sitsa sakhe, kungasiko nekutsi abefuna kumlimata, wabese loyo muntfu uyafa, 24 sive kufanele sehlulele emkhatsini walona lobulele kanye nalomphindziseli wengati, sisebentisa lemitsetfo.+ 25 Lomuntfu lobulele lomunye sive sibomsindzisa esandleni saloyo longumphindziseli wengati, futsi simbuyisele edolobheni lekukhosela labebalekele kulo. Abohlala lapho kuze kufe umphristi lophakeme, lowagcotjwa ngemafutsa langcwele.+

26 “‘Kepha nangabe lona lobulele aphuma emnceleni walelidolobha lekukhosela labalekele kulo, 27 bese umphindziseli wengati uhlangana naye ngephandle kwalelidolobha lekukhosela futsi ambulale, lomphindziseli ngeke abe nelicala lengati. 28 Ngobe lona lobulele lomunye kufanele ahlale edolobheni lekukhosela kuze kube ngulapho kufa umphristi lophakeme. Nasekafile umphristi lophakeme, sekangabuyela endzaweni yakhe.+ 29 Loku kutawuba ngumtsetfo lenitakwehlulela ngawo kuto tonkhe titukulwane tenu nakuto tonkhe tindzawo lenihlala kuto.

30 “‘Nobe ngubani lobulala lomunye umuntfu kufanele abulawe nangabe kunabofakazi,*+ ngobe ungumbulali.+ Kute umuntfu lotawubulawa nakunafakazi munye kuphela. 31 Akukafaneli nitsatse inhlawulo yekuhlenga kuphila kwembulali lofanelwe kufa, ngobe nakanjani kufanele abulawe.+ 32 Ningaboyitsatsa nenhlawulo yekuhlenga umuntfu lobalekele edolobheni lekukhosela, nimvumele kutsi abuyele endzaweni yakhe asengakafi umphristi lophakeme.

33 “‘Ningayingcolisi lendzawo lenihlala kuyo, ngobe ingati iyalingcolisa live,+ futsi ingati lecitfwe kulelive ngeke yentelwe inhlawulo kuNkulunkulu ngaphandle kwekutsi kusetjentiswe ingati yaloyo loyicitsile.+ 34 Ningalingcolisi lelive lenihlala kulo, nami lengihlala kulo, ngobe mine Jehova ngihlala emkhatsini webantfu baka-Israyeli.’”+

36 Tinhloko temindeni yebantfwana baGileyadi indvodzana yaMakhire,+ loyindvodzana yaManase, letivela emindenini yaJosefa, teta takhuluma naMosi nebaholi labatinhloko temindeni yaka-Israyeli. 2 Tatsi: “Jehova wakhuluma nawe nkhosi kutsi wehlukanise lelive ngenkatho+ futsi ulinikete ema-Israyeli kutsi libe lifa lawo. Jehova waphindze wakutjela kutsi lifa laSelofehadi umnaketfu ubolinika emadvodzakati akhe.+ 3 Nangabe lamadvodzakati atsatfwa ngemadvodza alesinye sive sema-Israyeli, lifa lawo litawuphuma efeni labobabe bese lifakwa efeni laleso sive latawube sekangephansi kwaso, kuze lingasabi yincenye yelifa letfu lesalitfola ngenkatho. 4 Nakufika uMnyaka Wekukhululwa+ webantfu baka-Israyeli, lelifa lalamadvodzakati litawufakwa efeni lalesive latawube sekangephansi kwaso, ngaleyo ndlela ngeke lisaba yincenye yelifa lesive sabobabe.”

5 Naku Mosi lakusho kuma-Israyeli njengobe abetjelwe nguJehova: “Loko lokushiwo sive semadvodzana aJosefa kuliciniso. 6 Naku lokushiwo nguJehova mayelana nemadvodzakati aSelofehadi: ‘Lamadvodzakati angaba bafati banobe ngubani lamtsandzako. Kodvwa-ke kufanele abe bafati bemuntfu lovela emndenini wesive sababe wawo. 7 Kute lifa lema-Israyeli lokufanele lisuke kulesinye sive liye kulesinye, ngobe ema-Israyeli kufanele aligcine lifa lesive sabokhokho bawo. 8 Onkhe emadvodzakati lanelifa etiveni taka-Israyeli kufanele abe bafati bemuntfu lovela emndenini wesive sabobabe wawo,+ kuze ema-Israyeli agcine lifa labokhokho bawo. 9 Kute lifa lokufanele lisuke kulesinye sive liye kulesinye, ngobe tive tema-Israyeli kufanele tiligcine lifa lato.’”

10 Lamadvodzakati aSelofehadi enta njengobe nje Jehova abetjele Mosi.+ 11 Ngako boMahala, Thisa, Hogila, Milkha naNowa, labebangemadvodzakati aSelofehadi,+ baba bafati bemadvodzana abomnakabobabe wabo. 12 Batsatfwa ngemadvodza lavela emindenini yaManase loyindvodzana yaJosefa, kuze lifa labo lihlale esiveni semndeni wababe wabo.

13 Lena yimitsetfo nemiyalo Jehova layiniketa ema-Israyeli asebentisa Mosi, ehlane lakaMowabi lelingaseJordane, macondzana neJerikho.+