Kutfutfukisa Emakhono Etfu Emsebentini Wekushumayela—Kubhala Imininingwane Yalabo Labakhombise Inshisekelo

“Hlale utinaka wena nekufundzisa kwakho.” (1 Thim. 4:16) Leseluleko lesiphefumulelwe umphostoli Pawula lasibhalela Thimothi sikhombisa kutsi kufanele sitimisele kutfutfuka, kungakhatsaliseki kutsi sisebasha nome sesinesikhatsi sishumayela. Kute sikwati kwenta loko, luchungechunge lolusha lwetihloko letitsi “Kutfutfukisa Emakhono Etfu Emsebentini Wekushumayela” titawutfolakala ku-Msebenti Wetfu WeMbuso. Sihloko ngasinye sitawucoca ngelikhono lelibalulekile netindlela lesingalitfutfukisa ngato. Kuleyonyanga, sonkhe sikhutsatwa kutsi sitfutfukise lelokhono ngalokukhetsekile. Nayiphela leyonyanga, incenye letsite yeMhlangano Wemsebenti itasinika litfuba lekusho kutsi sizuze njani ngekunaka indlela yekutfutfukisa lelokhono. Kulenyanga sikhutsatwa kutsi sibhale imininingwane yalabo labakhombise inshisekelo.

Kubaluleke Ngani?: Kute sifeze umsebenti wetfu, kufanele singagcini nje ngekushumayela. Kufanele sibuyele kulabo labakhombise inshisekelo kute sibafundzise, sinisele inhlanyelo yeliciniso lesiyihlanyele. (Mat. 28:19, 20; 1 Khor. 3:6-9) Loko kuhlanganisa kutsi uphindze ucoce naloyo muntfu, ukhulume ngalokubalulekile kuye futsi uchubeke nendzaba lenanicoce ngayo. Ngako-ke, kubalulekile kutsi nasitfola umuntfu lonenshisekelo, sibhale imininingwane.