Kusebentisa Luhlaka

BANTFU labanyenti bayetfuka nabacabanga ngekusebentisa luhlaka nabakhuluma. Bakhululeka kakhulu nangabe bakubhale phansi konkhe labatawukusho nobe bakubambe ngenhloko.

Kodvwa-ke malanga onkhe nasikhuluma sisuke singakakubhali phansi loko lesikushoko. Lesikushoko kuvele kutifikele nje nasikhuluma nemalunga emndeni kanye nebangani, nalapho sisemsebentini wekushumayela. Asibhali phansi futsi nalapho sithantaza ngalokusuka enhlitiyweni, kungaba kunasitithantazela tsine nobe nasithantazela licembu.

Uba khona yini umehluko nangabe ubhale phansi konkhe lotawukusho nobe usebentisa luhlaka nawetfula inkhulumo? Nanobe kufundza phansi lokushoko kukusita kutsi usho intfo njengobe injalo futsi usebentise emagama lowakhetsile, kodvwa awukhoni kufinyelela tinhlitiyo. Nangabe iminyenti imisho loyifundza phansi, litubane kanye nelivi lakho ngeke lifane nalelo lolisebentisa malanga onkhe nawukhuluma. Nangabe unaka kakhulu loko lokubhale phansi kunekutsi unake labo lokhuluma nabo, labo bantfu ngeke bakulalelisise ngendlela lebebangenta ngayo nangabe babona kutsi vele ucabanga ngabo futsi indzaba yakho uyivumelanisa netimo tabo. Kuze inkhulumo ibatsintse bantfu, kuncono kakhulu kutsi ukhulume ngemavi akho.

Sikolwa Semsebenti WemaKhristu sentelwe kutsi sisisite ekuphileni kwamalanga onkhe. Nasikhuluma nebangani, asikhiphi liphepha bese sifundza loko lesifuna kukusho kuze siciniseke kutsi sisebentisa emagama lakahle. Nasisensimini, asiphatsi liphepha lapho sibhale khona konkhe lesifuna kukusho, ngobe nje sesaba kutsi singahle siwakhohlwe lamanye emaphuzu lesifuna kucoca ngawo nebantfu. Nawenta umboniso esikolweni lomayelana nendlela yekufakaza etimeni letinjalo, phrakthiza kukhuluma ngendlela lovame kukhuluma ngayo. Nawulungiselele kahle, utawubona kutsi luhlaka, kungaba ngulolusengcondvweni nobe lolubhalwe phansi lutawukhona kukukhumbuta emaphuzu labalulekile lofuna kukhuluma ngawo. Kodvwa ungasitfola njani sibindzi sekusebentisa luhlaka?

Hlela Emaphuzu Akho. Kuze usebentise luhlaka nawukhuluma, kudzingeka uwahlele emaphuzu akho. Loku akusho kutsi kufanele ukhetse emagama lofuna kuwasebentisa. Kumane nje kusho kutsi kufanele ucabange ngembikwekutsi ukhulume.

Ekuphileni kwamalanga onkhe, umuntfu lomane akhulume nje angakacabangi angatitfola asasho intfo latawutisola ngayo ekugcineni. Lomunye umuntfu umane akhulume nje, atsi asasho intfo letsite bese uyashintja asho lokunye futsi. Yomibili lemikhuba ingancotjwa ngekutsi umuntfu acabange kucala ngaloko lafuna kukusho ngembikwekutsi akhulume. Kwekucala, kufanele uwati umgomo wakho, kwesibili, ucabange ngetindlela lotawufinyelela ngato, ngemuva kwaloko sewungacala-ke kukhuluma.

Kutsiwani nangabe ulungiselela kuya emsebentini wekushumayela? Akukafaneli utinike sikhatsi sekupakisha sikhwama sakho nje kuphela, kodvwa kufanele utinike nesikhatsi sekuhlela emaphuzu akho. Nawuncuma kusebentisa lenye yetinshumayelo letiku-Msebenti Wetfu WeMbuso, yifundze tikhatsi letinyentana kuze ukhone kubamba imicondvo leyinhloko. Beka emaphuzu layinhloko alenshumayelo ngemusho lowodvwa nobe lemibili. Indlela lotayibeka ngayo yente ivumelane nesimo sakho kanye nensimu yenu. Kutakusita kakhulu kutsi wente luhlaka engcondvweni. Lungahlanganisani loluhlaka? (1) Esetfulweni sakho, ungasho intfo lehlupha bantfu labanyenti endzaweni yakini. Cela loyo lokhuluma naye kutsi avete umbono wakhe. (2) Kufanele ube nalokutsite lotawukusho ngaleyo ndzaba, kuhlanganise nembhalo lowodvwa nobe lemibili leveta loko Nkulunkulu latsembisa kutsi utawukwenta kuze asikhulule. Nangabe sikhatsi sivuma, gcizelela kutsi loku Jehova utawukwenta ngeMbuso wakhe, lokunguhulumende wakhe wasezulwini. (3) Khutsata loyo lokhuluma naye kutsi ente lokutsite ngaloko lenikhulume ngako. Ungase umnikete incwadzi nobe ucele kumchubela sifundvo seliBhayibheli futsi uhlele kutsi nichubeke nicoca.

Luhlaka loludzingako kuze ufeze loku, kungaba luhlaka lolusengcondvweni. Nangabe ufuna kusebentisa luhlaka lolubhalwe phansi ngembikwekutsi ungene emtini wekucala, lolo hlaka lutawuba nemagama lambalwa lotawasebentisa esetfulweni, umbhalo lowodvwa nobe lemibili, kanye nemavi lamafisha lotawasho esiphetfweni. Kwakha luhlaka lolunjalo kanye nekulusebentisa kutawusisita singakhulumi tintfo letinyenti, nekutsi loko lesikushoko kucace futsi kube melula kutsi bantfu bakukhumbule.

Nangabe ensimini yenu bavame kubuta kakhulu nobe baphikisa, kungakusita kutsi ucale ucwaninge ngaleyo ndzaba. Esikhatsini lesinyenti, udzinga nje emaphuzu lamabili nobe lamatsatfu kanye nemibhalo lewasekelako. “Tihloko TeliBhayibheli Tekucocisana” nobe tihlokwana letibhalwe ngemagama lagcamile encwadzini letsi “Ukubonisana NgemiBhalo,” (ngesiZulu) tingaba luhlaka losuke uludzinga. Ungase utsatse liphuzu kulenye incwadzi longatsandza kulisebentisa. Bhala luhlaka lolufishane futsi ufake nalelo phuzu lofuna kulisebentisa, bese ukubeka netintfo lotawutisebentisa ensimini. Nangabe umuntfu lococa naye akubuta umbuto nobe akuphikisa, mtjele kutsi ukulungele kumchazela ngaloko lokukholelwako. (1 Phet. 3:15) Sebentisa loluhlaka nawumphendvula.

Nangabe utawuthantazela umndeni wakho, nobe utawuthantazela licembu ngembikwekuya ensimini nobe libandla, kuzuzisa kakhulu kutsi uwahlele emaphuzu akho. Ngekusho kwaLukha 11:2-4, Jesu wanika bafundzi bakhe luhlaka lolumelula labangalusebentisa kuze bente imithantazo lenengcondvo. Nakunikelwa lithempeli eJerusalema, Solomoni wathantaza sikhatsi lesidze. Kuyacaca kutsi wakucabanga kusengaphambili loko labefuna kukusho. Wacale wakhuluma ngaJehova nangesetsembiso labesente kuDavide; walandzela ngelithempeli; wase ukhuluma ngetimo letitsite nangebantfu, loko wakusho ngakunye ngakunye. (1 Khos. 8:22-53) Natsi singazuza kuletibonelo.

Luhlaka Lwenkhulumo Yakho Alube Melula. Luhlaka lwakho utawulusebentisa nawetfula inkhulumo yini? Tingakanani tintfo lokufanele utifake kulo?

Khumbula kutsi luhlaka lwentelwe kukusita kutsi ukhumbule imicondvo. Ungase ubone kutsi kutawuba lusito kubhala imisho lembalwa lotayisebentisa esetfulweni. Ngemuva kwaloko kufanele unake kakhulu imicondvo, hhayi emagama. Nangabe leyo micondvo utawuyibhala phansi, kuncono kutsi uyibhale ngemisho lemifisha. Emaphuzu lambalwa layinhloko lofuna kuwacacisa kufanele agcame eluhlakeni lwakho. Loku ungakwenta ngekutsi uwabhale ngabofeleba, uwadvwebele nobe uwafake umbala lotsite. Ngephansi kweliphuzu ngalinye leliyinhloko, faka imicondvo lofuna kuyisebentisa kuze ulicacise. Bhala nemibhalo lohlela kuyifundza. Kuncono kakhulu kutsi imibhalo uyifundze ngalokucondzile eBhayibhelini. Bhala imifanekiso lofuna kuyisebentisa. Nangabe kufanele, ungase ufake nemavi lowatsetse encwadzini yelive. Loko lokubhalako akube nemininingwane leyenele lotawuyisho. Kutawuba melula kusebentisa luhlaka nangabe luhlelekile.

Labanye basebentisa luhlaka lolumelula. Loluhlaka lungafaka ekhatsi emagama lambalwa layinhloko, imibhalo sikhulumi lesitayicaphuna ngenhloko, kanye nemidvwebo nobe titfombe letitawusisita sikhumbule imicondvo letsite. Nasineluhlaka lolumelula kanjalo, sikhulumi sitawukhona kwetfula leyo ndzaba ngendlela lehlelekile futsi sikhulume shengatsi siyacoca. Nguloyo umgomo walesifundvo.

Emakhasini 39 kuya ku-42 alencwadzi, utawutfola sihloko lesitsi “Kwakha Luhlaka Lwenkhulumo.” Kungakusita kufundza leso sihloko njengobe wetama kusebentisa lesifundvo lesitsi “Kusebentisa Luhlaka.”

Indlela Yekusebentisa Luhlaka. Nyalo umgomo wakho akusiko kulungiselela luhlaka lwenkhulumo yakho, kodvwa kutsi ulusebentise kahle.

Kwekucala longakwenta kutsi ulungiselele indlela yekwetfula inkhulumo yakho. Buka sihloko sayo, ufundze liphuzu ngalinye leliyinhloko, bese usho indlela lamaphuzu layinhloko lahlangana ngayo nesihloko. Bhala kutsi singakanani sikhatsi lotawusisebentisa ephuzwini ngalinye leliyinhloko. Buyela emuva ulungiselele liphuzu lekucala leliyinhloko. Buketa emaphuzu, imibhalo, imifanekiso kanye netibonelo lohlela kutisebentisa kuze ulichaze. Buketa indzaba yakho kuze kube ngulapho sewuyati kahle leyo ncenye yenkhulumo yakho. Yenta lokufanako nakulawa lamanye emaphuzu layinhloko. Tfola kutsi ngukuphi longakushiya nakudzingeka kuze ubambe sikhatsi. Ngemuva kwaloko yibukete yonkhe inkhulumo yakho. Kufanele unake kakhulu imicondvo hhayi emagama. Ungayibambi ngenhloko inkhulumo.

Nasewetfula lenkhulumo, kufanele ukhone kubabuka labo lokhuluma nabo. Nawucedza kufundza umbhalo, kufanele ukhone kuwuchaza usebentisa liBhayibheli lakho ngaphandle kwekutsi ubuke loko lokubhalile. Ngendlela lefanako, nawenta umfanekiso, wusho ngendlela lebewungacocela ngayo umngani wakho, kunekutsi uwufundze phansi. Umusho ngamunye lowushoko akukafaneli uwufundze phansi eluhlakeni. Khuluma ngalokusuka enhlitiyweni, futsi nawenta njalo utawukhona kutsintsa tinhlitiyo talabo labakulalele.

Nasewunelikhono lekusebentisa luhlaka, utawube sewutsetse sinyatselo lesibaluleke kakhulu sekuba sikhulumi lesiphumelelako.