Kutfutfukisa Emakhono Etfu Emsebentini Wekushumayela—Kushumayela Ngelucingo

KUBALULEKE NGANI: Kushumayela ngelucingo kuyindlela lebalulekile ‘yekufakaza ngetindzaba letimnandzi.’ (Imi 20:24)a Kusenta sikwati kushumayela bantfu nalapho timo tingasivumeli kutsi sivakashele bantfu emakhaya.

INDLELA YEKUKWENTA:

• 

  Lungiselela. Khetsa sihloko lesifanelekako. Ngemuva kwaloko, kubhale phansi loko lofuna kukusho. Ungalungiselela nemlayeto lomfishane lochaza injongo yekushaya kwakho nakutawenteka ungamtfoli lomuntfu bese kudzingeka ushiye umlayeto. Kuyasita kuhlala etafuleni nalolokubhalile naletinye tintfo lotatidzinga, lokufaka ekhatsi intfo yakho yebuchwephasha lovule kuyo i-JW Library^® nobe i-jw.org^®

• 

  Ungetfuki. Khuluma ngendlela lovamise kukhuluma ngayo. Mamatseka futsi ushukumise umtimba kube shengatsi lomuntfu uyakubona. Ungahlabi likhefu nalapho kungadzingeki khona. Kuyasita nekusebenta nalabanye. Nangabe umnikati welikhaya akubuta umbuto, wuphindze lombuto kute lolosebenta naye atokuva bese uyakusita nitfole imphendvulo.

• 

  Yakha sisekelo sekubuya. Nangabe akujabulela kucoca nawe, ungamshiya nembuto longamphendvula naniphindze nishaya ngalokulandzelako. Ungahle futsi ucele kumtfumelela incwadzi letsite nge-e-mail, nobe umletsele matfupha nobe ngeliphosi. Nobe ungahle ucele kumtfumelela lenye yema-video etfu nobe tihloko letisetincwadzini tetfu nge-e-mail nobe ngelucingo. Nangabe kufaneleka, ungamtjela ngalokutsite lokutfolakala ku-website yetfu.