Kusebentisa Indzaba Lowabelwe Yona

LIBHAYIBHELI lifanisa libandla lebuKhristu nemtimba wemuntfu. Onkhe emalunga awo ayadzingeka, kodvwa “akenti umsebenti munye.” Ngekuvumelana naloko, kufanele siwasebentise kahle onkhe ematfuba lesinikwe wona. Loku kudzinga kutsi sisicondze futsi sisente kahle nobe ngusiphi sabelo senkhulumo kunekutsi sititsatse kancane letinye tihloko ngobe sicabanga kutsi kunaletinye letingaba mnandzi kakhulu. (Rom. 12:4-8) Sisebenti lesetsembekile nalesihlakaniphile sinemsebenti wekusinika kudla “ngesikhatsi lesifanele.” (Mat. 24:45) Nangabe sisebentisa emakhono etfu kuze setfule tinkhulumo ngekuvumelana neticondziso lesinikwe tona, sisuke sikhombisa kutsi siyakujabulela kondliwa lokunjalo. Loku kwenta kutsi lonkhe libandla lichubeke lisebenta kahle.

Loko Longakusebentisa. Nangabe wabelwe sihloko esikolweni semsebenti, ciniseka kutsi usebentisa sona hhayi lokunye. Etimeni letinyenti, utawuniketwa umtfombo locondzile. Nawungakaniketwa umtfombo lotawusebentisa enkhulumeni yakho, ungatifunela kwatiswa emitfonjeni lotikhetsele yona. Nanobe kunjalo, njengobe ulungiselela, ciniseka kutsi yonkhe inkhulumo yakho ihambisana nendzaba lowabelwe yona. Nawuncuma kutsi ngukuphi lotakusebentisa, kutawudzingeka kutsi ucabange ngalabo labatawube bakulalele.

Wutadishe ngekucophelela umtfombo lonikwe wona, uhlolisise nemibhalo lekuwo. Ngemuva kwaloko cabanga ngendlela longawusebentisa ngayo kuze uzuzise labo labatawube bakulalele. Khetsa emaphuzu lamabili nobe lamatsatfu lotawasebentisa abe ngemaphuzu layinhloko enkhulumo yakho. Kulomtfombo, khetsa imibhalo lohlela kuyifundza kanye nekuyichaza.

Kungakanani kwatiswa lokufanele ukusebentise? Sebentisa kuphela loko lotawukhona kukuchaza kahle. Ungafaki kwatiswa lokunyenti kakhulu lokutakwenta kutsi ungakhoni kufundzisa kahle. Nangabe lokunye kwatiswa kungahambisani nemgomo wenkhulumo yakho, namatsela etincenyeni letitakusita ufinyelele lowo mgomo. Endzabeni lowabelwe yona, sebentisa loko lokutawubafundzisa labo labakulalele futsi kubazuzise. Umgomo wakho ngekusebentisa lesifundvo awusiko kubona kutsi kungakanani kwatiswa longakusebentisa, kodvwa kutsi inkhulumo yakho uyisekele kuloko lowabelwe kona.

Akukafaneli umane ubukete indzaba lowabelwe yona enkhulumeni yakho. Kufanele uhlele kuchaza emaphuzu latsite, kuveta leminye imininingwane ngawo, kufanekisa kanye nekuniketa tibonelo tendlela yekuwasebentisa. Leminye imicondvo kufanele isetjentiselwe kuchaza kabanti emaphuzu labalulekile endzaba lowabelwe yona kunekutsi ingene esikhundleni salawo maphuzu.

Ngekuhamba kwesikhatsi, bazalwane labakufanelako kufundzisa banganiketwa tinkhulumo eMhlanganweni Wemsebenti. Bayasicondza sidzingo sekuyisebentisa kahle indzaba lababelwe yona kunekutsi basebentisa lokunye. Ngendlela lefanako, bazalwane labetfula tinkhulumo telinyenti baniketwa luhlaka lokufanele balulandzele. Loluhlaka luyavuma kutsi kube khona lokunye lokufakako, kodvwa luwaveta ngalokucacile emaphuzu layinhloko lokudzingeka uwachaze, emaphuzu lawasekelako kanye nemibhalo leveta sisekelo salenkhulumo. Kukwati kufundzisa usebentisa indzaba lowabelwe yona kuyintfo lebalulekile nawulungiselela naletinye tabelo tekufundzisa.

Loku kungakusita nekutsi uchube tifundvo teliBhayibheli tasekhaya letitfutfukako. Utawukwati kunamatsela encwadzini leniyifundzako kunekutsi ukhweshe esihlokweni bese usho letinye tintfo lokungenteka kutsi tiyajabulisa kodvwa atidzingeki kuze indzaba yakho icondzakale kahle. Kodvwa-ke nangabe ukucondza loko lokushiwo kulesifundvo, ngeke ufune kunamatsela kakhulu encwadzini leniyifundzako uze wehluleke kuchaza tintfo letingasita umfundzi akucondze loko lenifundza ngako.