O ka Qadisa Moqoqo ka Dipampitshana Jwang?

Ho tloha ka January 2018, Bukana ya Seboka sa Bophelo le Tshebeletso ya Rona e na le karolo ya mehlala ya seo re ka se buang le batho. Re ntse re kgothalletswa hore re buisane le batho ho e na le ho ba fa dingolwa feela. E le hore bahweletsi ba finyelle sena, divideo tsa mehlala ya seo re ka se buang le batho di ntse di bontsha hore na ke jwang re ka qoqang le batho re sebedisa Bibele feela. Le ha ho le jwalo, na see se bolela hore ha re a lokela ho sebedisa dingolwa ha re bolela ka ntlo le ntlo? Tjhe. Ka mohlala, dipampitshana di ka re thusa hore re qadise moqoqo ka tsela e atlehang. Re ka sebedisa mokgwa o latelang ha re sebedisa pampitshana le ha e le efe:

1. Botsa mongantlo potso e qalang pampitshaneng, e nang le dikarabo tse sa tshwaneng.

2. Mo bontshe karabo e hlahang ka Bibeleng e fumanehang hodimo leqepheng le latelang. Haeba nako e le teng, bala dintlha tse hlahang ka hara pampitshana mme le buisane ka tsona.

3. Fa mongantlo pampitshana, mme o mo kgothalletse hore a e bale ha a fumana monyetla.

4. Pele o tsamaya, mo bontshe potso e reng “O ka Nna wa Ipotsa” mme o hlophise hore le buisane ka karabo e tswang Bibeleng nakong e tlang.

Ha o kgutla, buisanang ka karabo e tswang Bibeleng mme o mo botse potso eo le tla buisana ka yona nakong e tlang. O ka kgetha potso e hlahang websaeteng ya rona kapa e hlahang sengolweng se hlahang leqepheng la ho qetela. Haeba o bona ho loketse o ka fana ka bukana ya Ditaba Tse Molemo Tse Tswang ho Modimo! kapa wa fana ka sengolwa sa ho ithuta Bibele se hlahang ho Dithulusi Tsa ho Ruta.