Phutheho ya “Eba le Kgotso” Saule, ya neng a hlorisa

1, 2. Saule o ne a ikemiseditse ho etsa eng Damaseka?

BANNA ba hlokofetseng ba atamela Damaseka moo ba rerileng ho etsa bokgopo! Ba tla ntsha barutuwa ba Jesu malapeng ka ntshwe di sa fohlwa, ba ba tlame, ba ba hobose ebe ba ba hulanyetsa Jerusalema ho ya ahlolwa ke Lekgotla le Phahameng la Bajuda.

² Saule, moetapele wa sehlopha sena o se a ntse a le madi matsohong.a Nakwana pele ho mona, o ne a thabetse ho bona ha batho ba tjhesehelang bodumedi jwalo ka yena ba tlepetsa Setefane ka majwe. Setefane e ne e le morutuwa wa Jesu ya inehetseng. (Dik. 7:​57–8:1) Ka ha Saule ha a kgotsofalla ho hlorisa balatedi ba Jesu ba dulang Jerusalema, o hlohlelletsa hore ba hloriswe le dibakeng tse ding. O batla ho fiela lequlwana lena le lenyokonyane le bitswang “Tsela ya Morena.”​—Dik. 9:​1, 2; sheba lebokose la sehlooho se reng: “Matla ao Saule a Neng a Ena le wona Damaseka.”

3, 4. (a) Saule o ile a etsahallwa ke eng? (b) Re tla tshohla dipotso dife?

³ Ka tshohanyetso, lesedi le kganyang le potoloha Saule. Ba tsamayang le yena ba bona lesedi empa ba ema tlekelele! Saule o a foufala mme o wela fatshe. Saule ha a sa bona, mme o utlwa lentswe le tswang lehodimong le re: “Saule, Saule, ekaba o ntlhorisetsang?” Saule o maketse, mme o re: “O mang Morena?” E tlameha ebe karabo eo Saule a e fumanang e mo tshosa haholo: “Ke nna Jesu, eo o mo hlorisang.”​—Dik. 9:​3-5; 22:9.

⁴ Re ka ithuta eng mantsweng a pele ao Jesu a a bolellang Saule? Ho hlahloba se ileng sa etsahala ha Saule a sokoloha ho ka re tswela molemo jwang? Seo phutheho e ileng ya se etsa ha ho eba le kgotso ka mora hore Saule a sokolohe se re ruta eng?

“Ekaba o Ntlhorisetsang?” (Diketso 9:​1-5)

5, 6. Re ka ithuta eng mantsweng ao Jesu a ileng a a bolella Saule?

⁵ Ha Jesu a emisa Saule tseleng e yang Damaseka, ha a ka a re: “Ekaba o hlorisetsang barutuwa ba ka?” Jwalo ka ha re bone, o itse: “Ekaba o ntlhorisetsang?” (Dik. 9:4) Ka sebele diteko tse hlahelang balatedi ba Jesu di mo ama ka ho toba.​—Mat. 25:​34-40, 45.

⁶ Haeba o hatellwa ka lebaka la ho dumela ho Kreste, kgodiseha hore Jehova le Jesu ba tseba seo. (Mat. 10:​22, 28-31) Mohlomong teko eo e ke ke ya tloha hona jwale. Hopola hore Jesu o ile a bona ka moo Saule a neng a kentse letsoho ka teng lefung la Setefane, a ba a bona ha Saule a ntsha barutuwa ba tshepahalang ka ntshwe di sa fohlwa matlong a bona Jerusalema. (Dik. 8:3) Le ha ho le jwalo, Jesu ha a ka a etsa letho ka nako eo. Empa Jehova o ile a sebedisa Kreste yaba o matlafatsa Setefane le barutuwa ba bang hore ba dule ba tshepahala.

7. Ke eng seo o lokelang ho se etsa hore o mamelle mahloriso?

⁷ Le wena o ka mamella mahloriso haeba o etsa dintho tse latelang: (1) Ikemisetse ho dula o tshepahala ho sa tsotellehe hore o hlahelwa ke eng. (2) Kopa thuso ya Jehova. (Bafil. 4:​6, 7) (3) Tlohella phetetso ho Jehova. (Bar. 12:​17-21) (4) Kgodiseha hore Jehova o tla o fa matla a ho mamella ho fihlela a bona ho loketse hore a tlose teko eo.​—Bafil. 4:​12, 13.

“Saule, Ngwaneso, Morena . . . o Itse ke Tle ho Wena” (Diketso 9:​6-17)

8, 9. Ho ka etsahala hore Ananiase o ile a ikutlwa jwang ka mosebetsi oo a o filweng?

⁸ Ha a qeta ho araba potso ya Saule e reng, “O mang Morena?” Jesu o ile a re ho yena: “Ema o ye motseng, o tla bolellwa hore na o etseng.” (Dik. 9:6) Saule ya foufetseng o ile a tataisetswa moo a dulang teng Damaseka, mme a itima dijo a ba a rapela ka matsatsi a mararo. Ka yona nako eo, Jesu o ile a bolella Ananiase ka Saule. Ananiase e ne e le morutuwa ya dulang motseng oo mme o ne “a buuwa hantle ke Bajuda bohle” ba dulang Damaseka.​—Dik. 22:12.

⁹ A ko nahane hore na Ananiase o ile a ferekana hakaakang! Hlooho ya phutheho, e leng Jesu Kreste ya tsositsweng bafung, o bua le yena ka ho toba, o mo kgethela hore a etse mosebetsi o kgethehileng. Ke tlotla e kaakang empa ke mosebetsi o boima hakaakang! Ha Ananiase a bolellwa hore o lokela ho bua le Saule, o ile a re: “Morena, ke utlwile batho ba bangata ba bua ka monna enwa le ka dintho tsohle tse mpe tseo a di entseng ho barutuwa ba hao Jerusalema. Hona jwale, baprista ba baholo ba mo file matla a ho tshwara bohle ba tshepetseng lebitsong la hao.”​—Dik. 9:​13, 14.

10. Ke eng seo re ithutang sona ka Jesu tseleng eo a ileng a tshwara Ananiase ka yona?

¹⁰ Jesu ha a ka a kgalemela Ananiase ha a mo tsebisa se mo tshwenyang. Le ha ho le jwalo, Jesu o ile a mo bolella ka ho hlaka hore na o lokela ho etsa eng. A ba a mo hlompha ka hore a mo bolelle lebaka leo ka lona a batlang hore a etse mosebetsi ona o sa tlwaelehang. Jesu o ile a re ka Saule: “Ke kgethile monna enwa hore a tsebise ditjhaba, marena le Baiseraele lebitso la ka. Ke tla mo hlakisetsa hore na ke dintho tse ngata tse bohloko hakae tse tla mo hlahela hobane e le morutuwa wa ka.” (Dik. 9:​15, 16) Hanghang Ananiase o ile a etsa seo Jesu a mo laetseng sona. O ile a batla Saule wa mohlorisi mme ha a mo fumana a re ho yena: “Saule ngwaneso, Morena Jesu ya hlahileng ho wena ha o le tseleng e tlang mona o itse ke tle ho wena e le hore o ka boela wa bona mme wa tlala moya o halalelang.”​—Dik. 9:17.

11, 12. Re ithuta eng diketsahalong tse amanang le Jesu, Ananiase le Saule?

¹¹ Re ithuta dintlha tse mmalwa diketsahalong tse amanang le Jesu, Ananiase le Saule. Ka mohlala, Jesu o laola mosebetsi wa boboledi ka mafolofolo, jwalo ka ha a tshepisitse. (Mat. 28:​20) Le hoja Jesu a sa bue ka ho toba le batho kajeno, o laola mosebetsi wa boboledi ka mohlanka ya tshepahalang eo a mo kgethileng hore a okamele bahlanka ba hae ba ntlo. (Mat. 24:​45-47) Ba tataiswa ke Sehlopha se Busang, bahweletsi le bopulamadiboho ba romelwa ho ya batla ba batlang ho tseba ho eketsehileng ka Kreste. Jwalo ka ha ho boletswe kgaolong e fetileng, bongata ba bona ba rapetse Modimo hore a ba tataise yaba ka mora moo ba etelwa ke Dipaki Tsa Jehova.​—Dik. 9:11.

¹² Ka boikokobetso Ananiase o ile a etsa mosebetsi oo a o filweng mme a hlohonolofatswa. Na o mamela taelo ya ho fana ka bopaki bo hlakileng, esita le ha mosebetsi oo o sa o jese ditheohelang? Ba bang ba tshaba ho ya ka ntlo le ntlo le ho kopana le batho bao ba sa ba tsebeng. Ba bang ba thatafallwa ke ho pakela batho dibakeng tsa kgwebo, seterateng, ka fono kapa ka ho ngola mangolo. Ananiase o ile a hlola tshabo ya hae mme a ba le tlotla ya ho thusa Saule hore a amohele moya o halalelang.b Ananiase o ile a atleha hobane o ne a tshepile Jesu mme a nka Saule e le ngwanabo. Re ka hlola tshabo haeba jwalo ka Ananiase, re dumela hore Jesu o laola mosebetsi wa boboledi, re utlwela batho bohloko mme re nka hore esita le batho bao re ba tshabang haholo ba ka fetoha bara ba bo rona.​—Mat. 9:36.

‘A Bolella Batho ka Jesu’ (Diketso 9:​18-30)

13, 14. Haeba o ithuta Bibele empa o eso kolobetswe, o ka ithuta eng mohlaleng wa Saule?

¹³ Saule o ile a potlakela ho sebedisa seo a ithutileng sona. Ha a se a bona mahlong, o ile a kolobetswa mme a qala ho sebedisana mmoho le barutuwa ba Damaseka. Empa o ile a etsa ho eketsehileng. “Hanghang feela a ya matlong a thapelo mme a bolella batho hore Jesu ke Mora wa Modimo.”​—Dik. 9:20.

¹⁴ Haeba o ntse o ithuta Bibele empa o eso kolobetswe, na jwalo ka Saule o tla sebedisa seo o ithutang sona ka hore o kolobetswe? Ke nnete hore Saule o ile a bona mohlolo oo Kreste a ileng a o etsa, mme ha ho pelaelo hore sena se ile sa mo susumelletsa hore a nke kgato. Empa le ba bang ba ile ba bona mehlolo ya Jesu. Ka mohlala, sehlopha se seng sa Bafarisi se ile sa shebella ha a fodisa monna ya omeletseng letsoho mme ka kakaretso Bajuda ba bangata ba ne ba tseba hore Jesu o tsositse Lazaro bafung. Le ha ho le jwalo, bongata ba bona ba ile ba iphapanyetsa mohlolo oo mme ba bang ba ba ba mo hanyetsa. (Mar. 3:​1-6; Joh. 12:​9, 10) Empa Saule o ile a fetoha. Ke hobaneng ha Saule a ile a fetoha empa ba bang ba sa ka ba fetoha? Hobane o ne a tshaba Modimo ho feta batho mme a ananela ka ho teba mohau oo Kreste a mo bontshitseng wona. (Bafil. 3:8) Haeba le wena o etsa jwalo, o ke ke wa dumella letho hore le o sitise ho etsa mosebetsi wa boboledi le ho tshwaneleha hore o kolobetswe.

15, 16. Saule o ile a etsang matlong a thapelo, mme Bajuda ba Damaseka ba ile ba etsa jwang?

¹⁵ Na o ka inahanela ka moo bongata bo ileng ba makala, ba tshoha ba ba ba halefa ka teng ha Saule a ba bolella ka Jesu matlong a thapelo? Bo ile ba re: “Na monna eo ha se yena ya neng a hlasela barutuwa ba Jesu ba Jerusalema?” (Dik. 9:​21) Ha Saule a hlalosa lebaka le fetotseng tsela eo a neng a ikutlwa ka yona ka Jesu, o ile “a paka ka ho hlaka hore Jesu ke Kreste.” (Dik. 9:​22) Empa hase bohle ba kgodiswang ke mabaka a utlwahalang. A ke ke a fetola monahano wa batho ba tsitlellang ho latela dineano kapa ba sa batleng ho fetoha ka lebaka la boikgohomoso. Le ha ho le jwalo, Saule ha a ka a tela.

¹⁶ Dilemo tse tharo ha morao, Bajuda ba Damaseka ba ne ba ntse ba hanyetsa Saule. Qetellong, ba ile ba leka ho mo bolaya. (Dik. 9:​23; 2 Bakor. 11:​32, 33; Bagal. 1:​13-18) Ha morero oo o tsebahala, Saule o ile a tloha motseng oo ka lenyele, a theolwa ka baskete lesobeng la lerako la motse. Luka o re ba ileng ba balehisa Saule bosiung boo e ne e le “barutuwa ba [Saule].” (Dik. 9:​25) Ho bonahala mantswe ana a bontsha hore bonyane ba bang ba ileng ba utlwa ha Saule a bolela ditaba tse monate Damaseka ba ile ba amohela molaetsa wa hae mme ya eba balatedi ba Kreste.

17. (a) Batho ba etsa jwang ha ba utlwa nnete ya Bibele? (b) Re lokela ho tswela pele re etsang, hona hobaneng?

¹⁷ Ha o ne o qala ho bolella ba lelapa, metswalle le ba bang ditaba tse monate tseo o ithutang tsona, mohlomong o ne o lebelletse hore bohle ba tla amohela nnete ya Bibele hobane e a utlwahala. Ho ka etsahala hore ba bang ba ile ba e amohela empa ba bangata ha ba a ka ba e amohela. Ha e le hantle, e ka nna yaba ba lelapa ba ile ba o nka o le sera. (Mat. 10:​32-38) Le ha ho le jwalo, haeba o tswela pele ho ntlafatsa bokgoni ba hao ba ho beha mabaka ka Mangolo, mme o dula o itshwere jwalo ka Mokreste, esita le ba o hanyetsang ba ka nna ba qetella ba fetohile.​—Dik. 17:2; 1 Pet. 2:​12; 3:​1, 2, 7.

18, 19. (a) Ha Barnabase a tiisa hore Saule ke morutuwa, phello e bile efe? (b) Re ka etsisa Barnabase le Saule jwang?

¹⁸ Ha Saule a kena Jerusalema, ho a utlwahala hore ebe barutuwa ba ne ba sa dumele hore e se e le morutuwa. Le ha ho le jwalo, ha Barnabase a tiisa hore Saule e se e le morutuwa, baapostola ba ile ba mo amohela, mme a dula le bona ka nakwana. (Dik. 9:​26-28) Saule o ne a le masene mme a se dihlong ka ditaba tse monate. (Bar. 1:​16) Ka sebete o ile a bolela ditaba tse monate Jerusalema, e leng hona moo a neng a kile a hlorisa barutuwa ba Jesu Kreste ka sehloho. Bajuda ba Jerusalema ba ile ba tshoha haholo ha ba hlokomela hore moetapele wa bona o se a ba kwenehetse, mme jwale ba qala ho batla ho mo bolaya. Bibele e re: “Ha barutuwa ba bang ba utlwa taba ena, ba mo isa Sesarea ya re ha a le moo, ba mo romela Tarsase.” (Dik. 9:​30) Saule o ile a ikokobelletsa ditaelo tseo Jesu a ileng a di fetisa ka phutheho. Sena se ile sa ruisa Saule le phutheho molemo.

¹⁹ Hlokomela hore Barnabase ke yena ya ileng a ithaopela ho thusa Saule. Ha ho pelaelo hore mosa ona o ile wa etsa hore bahlanka bana ba Jehova ba tjhesehang e be metswalle e meholo. Na jwalo ka Barnabase, o ikemiseditse ho thusa ba batjha ka phuthehong ka ho sebetsa le bona tshebeletsong ya tshimo le ho ba thusa hore ba hatele pele moyeng? Haeba o etsa jwalo, o tla putswa haholo. Haeba o mohweletsi e motjha wa ditaba tse monate, na jwalo ka Saule o amohela thuso eo o e fuwang? Ka ho sebetsa le bahweletsi ba nang le phihlelo e eketsehileng, o tla ntlafatsa bokgoni ba hao tshebeletsong, thabo ya hao e tla eketseha mme o tla fumana metswalle ya hlooho ya kgomo.

“Ba Bangata ba Dumela ho Morena” (Diketso 9:​31-43)

20, 21. Bahlanka ba Modimo ba nakong e fetileng le ba hona jwale ba nnile ba sebedisa nako ya kgotso ha molemo jwang?

²⁰ Ka mora hore Saule a sokolohe a be a tlohe sebakeng seo a sireletsehile, “barutuwa bohle ba Judea, Galilea le Samaria ba eba le kgotso.” (Dik. 9:​31) Barutuwa ba ile ba sebedisa nako ee ya “ha ho le monate” jwang? (2 Tim. 4:2) Bibele e re ba ne ‘ba matlafala.’ Baapostola le bara ba bang ba bo rona ba ikarabellang ba ile ba matlafatsa tumelo ya barutuwa mme ba etella pele ha phutheho ‘e ntse e tsamaya ditseleng tsa Jehova ebile e kgothatswa ka moya o halalelang.’ Ka mohlala, Petrose o ile a sebedisa nako eo ho matlafatsa barutuwa ba motseng wa Lyda Thoteng ya Sharone. Ka lebaka la sena ba bangata ba dulang moo ba ile “ba dumela ho Morena.” (Dik. 9:​32-35) Barutuwa ha ba a ka ba kgeloswa ke mesebetsi ya botho empa ba ile ba ikitlaetsa hore ba hlokomelane ba be ba bolele ditaba tse monate. Phello e bile hore phutheho e ile ‘ya nna ya eketseha.’

²¹ Ho elella bofelong ba lekgolo la bo20 la dilemo, Dipaki Tsa Jehova dinaheng tse ngata le tsona di ile tsa “eba le kgotso .” Mebuso e nnileng ya hatella batho ba Modimo ka dilemo tse mashome e ile ya wa ka tshohanyetso, mme ha eba bonolo ho bolela ditaba tse monate dinaheng tseo ho tsona mosebetsi o neng o thibetswe kapa maemong a mang thibelo ya tloswa ka ho felletseng. Dipaki tse mashome a dikete di ile tsa sebedisa monyetla oo ho paka phatlalatsa mme ha eba le diphello tse babatsehang.

22. O ka sebedisa tokoloho eo o nang le yona ha molemo jwang?

²² Na o sebedisa tokoloho eo o nang le yona ha molemo? Haeba o dula naheng e nang le tokoloho ya bodumedi, Satane o batla ho o hokahoka hore o lelekise maruo ho ena le ho hahamalla mesebetsi e amanang le Mmuso. (Mat. 13:​22) O se ke wa kgeloswa. Sebedisa ha molemo nako le ha e le efe ya kgotso e lekanyeditsweng e teng hona jwale. E nke e le monyetla wa ho fana ka bopaki bo hlakileng le ho haha phutheho. Hopola hore maemo a hao a ka fetoha ka ho panya ha leihlo.

23, 24. (a) Re ithuta dintlha dife tlalehong e buang ka Tabitha? (b) Re lokela ho ikemisetsa ho etsa eng?

²³ Nahana ka se ileng sa etsahalla Tabitha kapa Dorkase. O ne a dula motseng wa Jopa o neng o se hole le wa Lyda. Moradi enwa wa bo rona ya tshepahalang o ile a sebedisa nako le matlotlo a hae ka bohlale, “a etsa mesebetsi e mengata e metle a bile a phallela bafutsana.” Le ha ho le jwalo, o ile a kula ka tshohanyetso mme a shwa.c Barutuwa ba Jopa, haholoholo bahlolohadi bao a neng a ba etsetsa dintho tse molemo ba ile ba sarelwa haholo ha a shwa. Ha Petrose a fihla ntlong eo setopo sa hae se neng se lokiswa teng bakeng sa lepato, o ile a etsa mohlolo oo baapostola ba Jesu Kreste ba neng ba eso ka ba o etsa. Petrose o ile a rapela yaba o tsosa Tabitha bafung! Inahanele feela hore na bahlolohadi bao le barutuwa ba bang ba ile ba thaba hakaakang ha Petrose a ba bitsetsa ka kamoreng eo mme a ba bontsha hore Tabitha o a phela! Ruri diketsahalo tsena di ile tsa ba matlafatsa hore ba tobane le diteko tse larileng ka pele. Hase feela mohlolo oo o ileng wa “tsejwa hohle Jopa mme batho ba bangata ba dumela ho Morena.”​—Dik. 9:​36-42.

²⁴ Re ithuta dintlha tse pedi tsa bohlokwa tlalehong ena e thabisang e buang ka Tabitha. (1) Bophelo bo feta ka potlako. Ka hoo, ke ha bohlokwa hakaakang hore re iketsetse lebitso le letle le Modimo ha monyetla o sa le teng! (Moek. 7:1) (2) Re na le tshepo e tiileng ya hore bafu ba tla tsoha. Jehova o ile a hlokomela diketso tse ngata tseo Tabitha a di entseng, mme a mo putsa. O tla hopola boikitlaetso ba rona mme a re tsose bafung haeba re ka shwa pele ho Armagedone. (Baheb. 6:​10) Ka lebaka leo, ebang hona jwale re phela ka thata kapa ha monate, a re phehelleng ho fana ka bopaki bo hlakileng ka Kreste.​—2 Tim. 4:2.