Davida le Saule

Ka mora hore Davida a bolaye Goliathe, Morena Saule o ile a mo kgetha hore e be molaodi wa sesole sa hae. Davida o ile a hlola dintwa tse ngata mme a tsebahala haholo. Ka mehla ha Davida a tswa ntweng, basadi ba ne ba mo kgahlanyetsa ba ntse ba tantsha mme ba bina ba re: ‘Saule o bolaile ba dikete, ha Davida yena a bolaile ba dikete tse mashome.’ Saule a ba mona mme a batla ho mo bolaya.

Davida o ne a letsa harepa ha monate. Ka letsatsi le leng ha Davida a ntse a letsetsa Saule harepa, Saule o ile a mo betsa ka lerumo. Davida o ile a le qoba yaba le otla leboteng. Ka mora moo, Saule o ile a leka ka makgetlo a mangata ho mo bolaya. Qetellong Davida a baleha yaba o ipata ka ntle ho motse.

Saule o ile a tsamaya le masole a 3 000 ho ya tsoma Davida. A kena ka lehaheng leo Davida le banna ba hae ba neng ba ipatile ka ho lona. Banna ba tsamayang le Davida ba re: ‘Ona ke monyetla wa hore o bolaye Saule.’ Yaba Davida o atamela pela Saule o seha seaparo sa hae. Empa Saule ha a ka a utlwa. Ka mora moo, Davida a ikwahlaela hore ebe ha a hlompha morena eo Jehova a mo kgethileng. O ile a hanela banna ba hae ho lwantsha Saule. A hweletsa Saule a mo bolella hore a ka be a mo bolaile ha a ne a batla ho mo bolaya. Na Saule o ile a fetola maikutlo a hae ka Davida?

Tjhe. Saule o ile a tswela pele ho tsoma Davida. Ka bosiu bo bong Davida le Abishai ba ile ba ya tenteng ya Saule. Ba fumana le molebedi wa Saule ya bitswang Abnere a robetse. Abishai a re: ‘Re fumane monyetla jwale. Ere ke mo bolaye.’ Davida a re: ‘Jehova ke yena ya tla ahlola Saule. A re nke lerumo la hae le jeke ya hae ya metsi.’

Davida a hlwella thabeng e haufi le moo Saule a neng a robetse teng. Yaba o a hweletsa o re: ‘Abnere, ke hobaneng ha o sa sireletsa morena wa hao? Lerumo la morena le jeke ya hae ya metsi di kae?’ Saule a tseba lentswe la Davida mme a re: ‘O ka be o mpolaile empa ha o a etsa jwalo. Ke a tseba hore o tlo ba morena ya latelang wa Iseraele.’ Ka mora moo, Saule a kgutlela ntlong ya hae ya borena. Le ha ho le jwalo, ha se bohle lelapeng la Saule ba neng ba hloile Davida.