Ke Hokae Moo o ka Fumanang Tataiso eo o ka e Tshepang e Tla o Thusa Hore o Phele ha Monate?

Jwalo ka ha re ithutile sehloohong se fetileng, re hlokometse hore batho ba bangata ba leka ho phela bophelo bo monate ka ho tshepa dintho tse jwalo ka ho dumela hore bophelo bo rerilwe esale pele, ho batla thuto e phahameng, ho rua le ho ba batho ba lokileng. Haeba o etsa dintho tsena e le hore o dule o phele ha monate, ho tshwana le ha o ya sebakeng seo o sa se tsebeng o sebedisa mmapa o fosahetseng. Na see se bolela hore ha ho na tataiso eo re ka e sebedisang bakeng sa bokamoso ba rona? Ha ho jwalo.

HO FUMANA TATAISO MOHLODING O TSHEPAHALANG

Ha re etsa diqeto, hangata re kopa thuso ho motho ya hodileng kapa ya bohlale ho re feta. Ka tsela e tshwanang, re ka fumana tataiso eo re ka e tshepang ka bokamoso ba rona ho motho ya moholo ka ho fetisisa le ya bohlale ho re feta. Re ka fumana tataiso eo bukeng e ileng ya ngolwa dilemo tse ka bang 3 500 tse fetileng. Buka eo e halalelang e bitswa Bibele.

Ke hobaneng ha o ka tshepa Bibele? Hobane Mongodi wa yona o moholo ebile o bohlale ka ho fetisisa bokahohleng. O hlaloswa e le “Moholoholo wa Matsatsi” eo esale a le teng “ho tloha nakong e sa lekanyetswang ho isa nakong e sa lekanyetswang.” (Daniele 7:9; Pesaleme ya 90:2) Ke yena “Mmopi wa mahodimo, Yena Modimo wa nnete, Mmopi wa lefatshe le Moetsi wa lona.” (Esaia 45:18) O a re bolella hore lebitso la hae ke Jehova.—Pesaleme ya 83:18.

Ka ha Bibele e ngotswe ke Mmopi wa batho bohle, ha hona moo e bontshang hore batho ba morabe o itseng kapa ba setso se itseng ba bohlokwa ho feta batho ba bang. Ka mehla keletso ya yona e a sebetsa mme e thusitse batho ba bangata lefatsheng lohle. E fumaneha ka dipuo tse ngata mme batho ba bangata ba na le yona ho feta buka le ha e le efe.a Sena se bolela hore batho ba bangata ba ka kgona ho e utlwisisa ha bonolo ebile e ka kgona ho ba tataisa. Taba ena e dumellana hantle le seo Bibele e se buang:

“Modimo ha a leeme, empa setjhabeng se seng le se seng motho ya mo tshabang le ya sebetsang ho loka o a amoheleha ho yena.”—LIKETSO 10:34, 35.

Jwalo ka motswadi ya lerato ya thusang bana ba hae, Jehova ke Ntate ya lerato ya batlang ho re thusa a sebedisa Lentswe la hae Bibele. (2 Timothea 3:16) Re ka tshepa Lentswe la hae hobane ke yena ya re bopileng ebile o tseba se ka re thabisang.

RE KA TSHEPA BIBELE

Re ka tshepa seo Bibele e se buang ka bokamoso hobane re bona dintho tseo e ileng ya di bolela esale pele dilemong tse ka bang 2 000 tse fetileng di etsahala.

DINTHO TSEO BIBELE E ILENG YA RE DI TLA ETSAHALA

“Setjhaba se tla tsohela setjhaba matla, le mmuso o tla tsohela mmuso matla. Mme ho tla ba le ditshisinyeho tse kgolo tsa lefatshe, le mafu a sewa le dikgaello tsa dijo sebakeng se seng ka mora se seng.”—LUKA 21:10, 11.

SEO BIBELE E ILENG YA SE BUA KA BOITSHWARO BA BATHO

“Matsatsing a ho qetela ho tla ba le dinako tse mahlonoko tseo ho leng thata ho sebetsana le tsona. Etswe batho e tla ba baithati, ba ratang tjhelete, ba ikgopolang ho tlola, ba ikgohomosang, banyefodi, ba sa mameleng batswadi, ba se nang teboho, ba sa tshepahaleng, ba se nang lerato la tlhaho, ba sa bulehelang tumellano le ha e le efe, baetselletsi, ba hlokang boitshwaro, ba bohale bo tshosang, ba hlokang lerato la se molemo, baeki, ba hlooho di thata, ba ikgohomosang ka boikakaso, ba ratang menyaka ho ena le ho rata Modimo.”—2 TIMOTHEA 3:1-4.

Empa ho tla jwang hore dintho tseo Bibele e ileng ya bolela esale pele hore di tla etsahala, di etsahale hantle ka moo e ileng ya re di tla etsahala ka teng? Mohlomong o ka dumellana hantle le seo Leung ya dulang Hong Kong a ileng a se bua ha a re: “Boprofeta bo hlahang ka Bibeleng kgale bo ngotswe. Ho ke ke ha kgoneha hore motho a bolele dintho tse tla etsahala nakong e tlang ka tsela e nepahetseng hakaana. Bibele e tlameha ebe e ngotswe ke motho ya bohlale ka ho fetisisa.”

Bibele e na le boprofeta bo bongata bo seng bo phethahetse.b Sena se bontsha hore ka nnete Bibele ke Lentswe la Modimo. Jehova o re: ‘Ke nna Modimo, mme ha ho na Modimo e mong, le ha e le mang ya jwalo ka nna.’ “Ya bolelang qetello ho tloha tshimolohong.” (Esaia 46:9, 10) Ka hoo o na le mabaka a utlwahalang a ho tshepa seo Bibele e se buang ka bokamoso.

TATAISO E KA O THUSANG HONA JWALE LE KA HO SA FELENG

O tla itswela molemo haeba o mamela tataiso e hlahang mangolong a halalelang. Nahana ka mehlala e latelang.

TATAISO E MOLEMO MABAPI LE TJHELETE LE MOSEBETSI

“Phomolo e tletseng letsoho e molemo ho feta mosebetsi o boima o tletseng matsoho a mabedi le ho lelekisa moya.”—MOEKLESIA 4:6.

HO BA LE LELAPA LE THABILENG

“E mong le e mong wa lona ka bomong a ke a rate mosadi wa hae jwalo ka ha a ithata; ka lehlakoreng le leng, mosadi o lokela ho ba le tlhompho e tebileng ho monna wa hae.”—BAEFESE 5:33.

KA MOO O KA UTLWANANG LE BATHO KA TENG

“Tlohela bohale mme o lese kgalefo; o se ke wa iponahatsa o halefile hore feela o etse bobe.”—PESALEME YA 37:8.

Haeba o mamela seo Bibele e se buang o tla thabela bophelo hona jwale le nakong e tlang. Ka Bibeleng re fumana ditshepiso tsa Modimo tse thabisang tse buang ka bokamoso tse akarelletsang hore:

BATHO BA TLA PHELA KA KGOTSO EBILE BA SIRELETSEHILE

“[Batho] ba tla fumana thabo e phethehileng kgotsong e ngata.”—PESALEME YA 37:11.

MOTHO E MONG LE E MONG O TLA BA LE BODULO LE DIJO

“Ka sebele ba tla haha matlo mme ba dule ho ona; ka sebele ba tla lema dirapa tsa morara mme ba je ditholwana tsa tsona.”—ESAIA 65:21.

HA HO NA MOTHO YA TLA KULA KAPA A HLOKAHALE

“Lefu ha le sa tla hlola le eba teng, mme ho siama kapa ho bokolla kapa bohloko ha di sa tla hlola di eba teng.”—TŠENOLO 21:4.

O lokela ho etsang e le hore o thabele bophelo bo jwalo? Fumana karabo sehloohong se latelang.

a E le hore o fumane dintlha tse eketsehileng ka ho fetolelwa le ho ajwa ha Bibele e ya ho www.jw.org/st-za mme o shebe tlasa DITHUTO TSA BIBELE > HISTORI LE BIBELE.

b Ho fumana dintlha tse eketsehileng sheba kgaolo ya 9 bukeng ya Bibele—Lentsoe la Molimo Kapa la Motho? E hatisitsweng ke Dipaki Tsa Jehova. E fumaneha websaeteng ya rona ya Watchtower Online Library.