3 | Dipale Tsa Batho ba ka Bibeleng di ka o Thusa

BIBELE E BUA KA . . . Basadi le banna ba tshepahalang ba neng ba ‘ikutlwa jwalo ka rona.’—JAKOBO 5:17 BIBELE E HALALELANG.

Taba ee e Bolelang?

Bibele e na le dipale tse ngata tsa banna le basadi ba ileng ba ikutlwa ka ditsela tse sa tshwaneng. Ha re ntse re bala dipale tsa bona, re tla fumana hore ho na le motho ya ileng a ikutlwa ka tsela eo re e ikutlwang ka yona.

Ho Tseba Taba ee ho ka re Thusa Jwang?

Kaofela ha rona re hloka ho tseba hore batho ba bang ba utlwisisa tsela eo re ikutlwang ka yona. Empa batho ba nang le kgatello ya maikutlo ba hloka ho tseba taba ena le ho feta. Ha re bala Bibele, re ithuta ka batho ba ileng ba nahana le ho ikutlwa ka tsela eo re ikutlwang ka yona. Ka hoo, re a hlokomela hore ha re bang hobane batho ba bang le bona ba ile ba eba le kgatello ya maikutlo jwalo ka rona.

Bibele e na le mantswe a mangata a batho ba neng ba ikutlwa ba le bang ebile ba tshwenyehile. Na o kile wa utlwa ho le thata hoo o seng o sa kgone ho mamella? Moshe, Elia le Davida ba ile ba ikutlwa ka tsela ena.—⁠Numere 11:14; 1 Marena 19:4; Pesaleme ya 55:4.
Bibele e bua hape ka mosadi e mong ya bitswang Anna ya ileng a “utlwa bohloko haholo” hobane a ne a sa kgone ho ba le bana ebile mosadi e mong wa monna wa hae o ne a mo soma.—1 Samuele 1:6, 10.
Bibele e boetse e bua ka monna emong ya bitswang Jobo. Le hoja a ne a ena le tumelo e matla, o ile a eba le kgatello ya maikutlo mme o ile a re: “Ke hloile bophelo ba ka, ha ke sa batla ho phela.”—Jobo 7:16.

Ho ithuta hore na banna le basadi bana ba hlahang ka Bibeleng ba ile ba etsang ha ba nahana ka dintho tse fosahetseng, ho tla re thusa hore re fumane matla a ho mamella mathata.

Bibele e Thusitse Kevin

Ka Moo Bolwetse ba Kgatello ya Maikutlo (Bipolar) bo Etsang Hore ke Ikutlwe ka Teng

“Dingaka di ile tsa mpolella hore ke na le mofuta ona wa kgatello ya maikutlo ha ke le dilemo tse ka bang 50. Ka dinako tse ding ke na le ho ikutlwa eka nka kgona ho rarolla mathata a ka. Empa ka dinako tse ding ke utlwa eka nka be ke sa phele.”

Bibele e Nthusitse

“Pale e nthusang haholo ke ya moapostola Petrose. O ile a etsa diphoso tse neng di etsa hore a ikutlwe eka ha se motho wa bohlokwa. Ho ena le hore a dule a ikutlwa ka tsela eo, o ile a leka ho qeta nako a ena le metswalle ya hae e mo tsotellang. Ha ke sa ikutlwe hantle ka lebaka la bolwetse bona, ke ikutlwa eka ha ke motho wa bohlokwa. Ke ithutile mohlaleng wa moapostola Petrose hore ke qete nako le metswalle ya ka e nthusang hore ke lwantshe bolwetse bona.[3]

Pale e nngwe e ntshedisang haholo ke ya Morena Davida. Ka makgetlo a mangata o ne a ena le kgatello ya maikutlo a bile a ikwahlaela diphoso tseo a di entseng. Ke kgona ho utlwisisa boemo boo a neng a le ho bona hobane le nna ka dinako tse ding ke bua le ho etsa dintho tseo ke ikwahlaelang tsona. Mantswe a Davida a hlahang ho Pesaleme ya 51 a a ntshedisa. Temaneng ya 3, Davida o re: ‘Ke tseba melato ya ka hantle ebile ke dula ke nahana ka sebe sa ka.’ Mantswe ana a hlalosa hantle ka moo ke ikutlwang ka teng hobane ha ke nyahame ho ba thata hore ke ikutlwe ke le motho wa bohlokwa. Ke boetse ke utlwisisa hantle mantswe a hlahang temaneng ya 10 moo Davida a reng: ‘Modimo, hlwekisa pelo ya ka, o fetole tsela eo ke nahanang ka yona e le hore nka tshepahala.’ Ke bua mantswe a tshwanang ha ke kopa Modimo hore a nthuse hore ke inke ke le motho wa bohlokwa. Temana ya 17 yona e nkgothatsa haholo ha e re: ‘Modimo, o ke ke wa iphapanyetsa pelo e utlwileng bohloko le e sithabetseng.’ Temana ena e a nkgodisa hore Modimo o a nthata.

Ho dula ke nahanisisa ka dipale tse ka Bibeleng le dintho tseo Modimo a nketseditseng tsona hona jwale, ho nthusa hore ke dule ke ena le tshepo ya hore dintho di tla loka nakong e tlang. Dipale tsena di etsa hore ke kgodisehe hore dintho tseo Modimo a di tshepisitseng di tla phethahala mme sena se nthusa hore ke mamelle.”