Thabo e Khōlō ea ho Fana—Na Ua e Latsoa?
MABONE a phapusi ea moketjana a ne a khantšitsoe hanyenyane. ’Mino o llela tlaase. Ba neng ba tjeka ba ile ba emisa. Lebone le khethehileng le bonesa mabokose a limpho a beiloeng ka mokhoa oa piramite. Ho na le mabokose a maholo le a manyenyane. A likhutlo tse ’nè le a machitja, a ’mala o mopinki le o moputsoa, oa silivera le oa khauta. Kaofela a khabisitsoe le ho thateloa ka mabanta a mebala-bala. Matsoho a thothomelang a monyaluoa a ne a phuthulla ka bonngoe, ha monyali ea sa phuthulohang a mo thusa.
Ho na le mechine e besang bohobe le e kopanyang lijo ea kichine; lijana le thepa ea silevera, masela a tafole a tšoanang le a ho itšola a phapusi ea ho jela. Ho na le lithaole le masela a ho hlapa ka bongata, le lilakane le mekotlana ea mesamo e ka tšoarellang nako e telele. Ho na le litšupa-nako tse lekaneng bakeng sa phapusi ka ’ngoe ea ntlo le libuka tsa ho pheha lijo tse tla khotsofatsa e mong le e mong ea li ratang.
Ha limpho li ntse li phuthulloa ho utloahala “bo-oho” le “bo-aa” le lipolelo tse tsoang botebong ba pelo tsa teboho tsa banyalani bana ba bacha. Ba fumane thabo ea ho amohela ho ba tsebang thabo ea ho fana.
Mekete ea manyalo, linako tsa ho hopola ketsahalo e khethehileng, Likeresemese, matsatsi a tsoalo, le mekete e meng e mengata ea thabo ke linako tsa botsoalle tseo ho fana ka limpho ho lebeletsoeng le ho amoheloa e le karolo e tloaelehileng. Empa kahobane ho lebeletsoe limpho linaheng tse ngata, hangata ho tlisa boima bo tlosang thabo ho ea fanang. Leha ho le joalo, ho na le ho fana ka boithatelo, ho fana ho sa lebelloang. Ho thabisa ea amohelang, ebang mpho e khōlō kapa e nyenyane ’me e tlisetsa mofani thabo e khōlōhali.
Ke taba e lumeloang, ba nang le ho hongata ba nolofalloa ke ho fana ka ho hongata. Ka mohlala, mookameli oa feme e khōlō Amerika oa lekholong la bo19 la lilemo Andrew Carnegie ekabe e bile moruihali oa pele oa naha ea habo. Ho e-na le hoo, o fane ka karolo e fetang 90 lekholong ea leruo la hae nakong, ea lilemo tse 18. Ha mongoli oa hae a mo hlokomelisa hore o fokotsa chelete ea hae haholo, ka thabo a araba, “Ke thabo ho utloa seo moshan’eso tšoara joalo.” Hona mehleng eo ne ho e-na le John D. Rockefeller, e mong oa banna ba ruileng haholo lefatšeng, ea faneng: ka liranta tse limillione tse 1,5 bophelong ba hae. Ho ngoliloe hore sebini Elvis Presley “o fane ka likoloi tsa Cadillac ka bongata” ’me o thabetse ho etsa joalo ka botlalo.
Hase Mokhoa o Mocha
Ho fana ka limpho ke tloaelo ea boholo-holo. Ho tloha mehleng, ea khale ho phethile karolo ea bohlokoa bophelong ba batho. Mohlanka ea hōlileng oa Abrahama o fane ka limpho tsa mabenyana ho Rebeka kamor’a ho bona bopaki ba hore Jehova o mo abetse ho ba mosali oa Isaaka. Hape tse fanoeng ebile “lintho tse khethehileng ho khaitseli ea hae le ’m’ae.” (Genese 24:13-22, 50-53) Kamor’a bomalimabe bo hlokofalitseng Jobo, a neoa limpho ke baena le likhaitseli tsa hae le metsoalle ea hae ea pele—e mong le e mong a mo fa “sekoto sa silevera le lesale la khauta.”—Jobo 42: 10, 11.
Ha mofumahali ea sa bitsoang ka lebitso oa Sheba a etetse Morena Salomone Jerusalema, a susumetsoa ke bohlale ba hae boo a bo filoeng ke Molimo ’me a hlalosa bahlanka ba Salomone e le ba thabileng ka ho tseba ho utloa le ho fumana melemo ho monna ea bohlale haholo. O ne a susumetsehile haholo hoo a ileng a nea Salamone limpho tsa khauta tsa litalenta tse 120 (tse lekanngoang ho liranta tse 100 000 000) le mahakoe a bohlokoa le oli e theko e boima ea balsame. Ho ka etsahala hore o ne a fokolitse letlotlo la ’muso oa hae haholo ka chelete e itseng, empa ntle ho pelaelo o ile a latsoa thabo ea ho fana. Salomone le eena a latsoa thabo ea ho fana, hobane o mo file limpho tse fetang theko ea matlotlo ao a mo fileng ona.—2 Likronike 9:12, American Translation, Moffatt.
Bakreste ba pele ba entse limpho kapa meneelo bakeng sa baena ba bona ba hlokang. Moapostola Pauluse o ngotse ka Bakreste ba Macedonia, le ba Akaia, bao, le hoja ba ne ba hloka, ba ileng ba fuparolla seatla sa bona ho feta matla a bona ho abeleng baena ba bona ba hlokang Judea. Pauluse o itse, “ba ’nile ba thabela ho etsa joalo.”—Ba-Roma 15:26, 27, NW.
Limpho tse “Buang”
Kajeno, ke ho totobetseng hore ho fana ka limpho ho tsoela pele ho ba tsela ea batho ea motheo ea ho hloma le ho matlafatsa tlamo ea lerato le botsoalle, ho tsebisa ba bang hore rea ba tsotella.
Ho na le limpho tseo molekane e mong oa lenyalo a li neang e mong, ho re feela, “kea u rata”—lebokosana la lipompong kapa lipalesa. Ho na le limpho tseo bana ba li neang batsoali. ’Me ke life lintho tseo kamehla batsoali ba lerato ba sa li feng bana ba bona? Ho na le limpho tsa ho tšelisa motho ea utloileng bohloko, ho khothatsa ea moea o tepeletseng, ho bolela hore “fola kapele,” ho bontša kananelo ka ketso e mosa eo u e etselitsoeng le ka baka la kamohelo e mofuthu, kapa hore feela, “ke bile le nako e monate.”
Ho teng limpho tse neoang bahloki, le ba oetsoeng ke koluoa bao re ke keng ra ba bona le bao re ke keng ra amohela polelo ea liteboho. Seroto sa litholoana bakeng sa mokuli, limela tsa ka tlung bakeng sa ea kulang liphateng, sekotoana sa lebenyane bakeng sa motsoalle ea ratehang—lintho tse nyenyane tse bolelang ho hongata. Ke ho fana ka thabo ho tsoang pelong. Tsena ke limpho tseo hangata li ananeloang.
Liketsahalong tsohle tsa ho fana, ha ho e bonahalang haholo joaleka ho fana ka boikaketsi ha lefatše lohle ka Keresemese. Ke mokete oa ho fana ka limpho o se nang taolo o qalehileng khale. Ke mokete o tsejoang ke ba bangata le oo ba bang ba kopanelang ho ’ona ka cheseho e khōlō. O ka bolela ho senyeheloa ke chelete kapa nala. Esita leha metsoalle e fana ka limpho, tloaelo ena e ka e kopanya kapa ea e arohanya. Ho itoantša hona ho ka hlahisoang ke ho fana ka limpho ka Keresemese ho tla nahaneloa sehloohong se latelang.