Pale ea Bophelo

Ho Sebeletsa ba Bang ho Thethefatsa Bohloko

JOALOKAHA HO BOLETSE JULIÁN ARIAS

Ka 1988, ha ke le lilemo li 40, mosebetsi oa ka o ne o bonahala o sireletsehile. Ke ne ke le mookameli oa k’hamphani ea machaba e sebakeng sa heso. ’Me mosebetsi oa ka o ne o akarelletsa ho fuoa koloi e majabajaba, chelete e ngata le ofisi e mabothobotho bohareng ba Madrid, Spain. K’hamphani e ile ea boela ea ama le taba ea hore e batla ho nketsa mookameli oa lik’hamphani tsohle tse naheng ena. Ke ne ke sa hlokomele hore bophelo ba ka bo ne bo le mothating oa ho fetoha haholo.

KA LETSATSI le leng hona selemong seo, ngaka ea ka e ile ea mpolella hore ke na le lefu la tsitsipano ea methapo, e leng lefu le sa foleng. Ke ile ka seleballoa. Hamorao ha ke bala hore na lefu la tsitsipano ea methapo le ka etsa motho eng, ke ile ka tšoha.a Ho ile ha bonahala hore ke tlameha ho phela ka letsoalo bophelo bohle ba ka. Ke ne ke tla khona joang ho hlokomela mosali oa ka, Milagros, le mora oa ka ea lilemo li tharo, Ismael? Re ne re ka sebetsana ka katleho le boemo boo joang? Ha ke ntse ke batlana le likarabo tsa lipotso tsena, ke ile ka hlaheloa ke tsietsi e ’ngoe.

Hoo e ka bang khoeli ka mor’a hore ngaka ea ka e mpolelle ka lefu lena le ntšoereng, mookameli oa ka o ile a mpitsetsa ka ofising ea hae ’me a mpolella hore k’hamphani e hloka batho ba “bohehang.” ’Me motho ea tšoeroeng ke lefu le holofatsang—esita leha e le hona le qalang feela—ha a tšoaneloe ke boemo bo joalo. Ka eona nako eo, mookameli o ile a nteleka mosebetsing. Ka ho panya ha leihlo, ke ne ke feletsoe ke mosebetsi!

Ke ile ka iketsa ea sebete ho litho tsa lelapa la ka, empa ke ne ke labalabela ho ba mong, hore ke lohothe ka maemo a ka a macha, ’me ke thuise ka bokamoso ba ka. Ke ile ka leka ho loantša boikutlo bo neng bo ntse bo tota ba ho tepella maikutlo. Ntho e neng e nkutloisa bohloko ka ho fetisisa ke hore ka nako le motsotso ke ne ke fetohile ntho feela e se nang thuso mahlong a k’hamphani ea heso.

Ho Fumana Matla Mefokolong

Ka lehlohonolo, nakong ena ea mahlomola ke ile ka fumana matla mehloling e mengata. Lilemo tse ka bang 20 pele ho mona, ke ile ka ba e mong oa Lipaki Tsa Jehova. Kahoo, ke ile ka rapela Jehova ka tieo ka mo tsebisa maikutlo a ka le ho se kholisehe ha ka ka bokamoso. Mosali oa ka, eo le eena e leng Paki ea Jehova, o ile a ntšehetsa haholo, hape ke ile ka tšehetsoa ke metsoalle e meng e haufi eo mosa le kutloelo-bohloko tsa bona e bileng tsa bohlokoa ka ho fetisisa.—Liproverbia 17:17.

Ho ikutloa ke tlameha ho thusa ba bang le hona ho ile ha thusa. Ke ne ke batla ho hōlisa mora oa ka hantle, ho mo ruta, ho bapala le eena le ho mo koetlisa mosebetsing oa boboleli. Kahoo, ke ne ke sa lokela ho nyahama. Ho feta moo, ke ne ke le moholo ho e ’ngoe ea liphutheho tsa Lipaki Tsa Jehova, ’me bara le barali beso ba Bakreste phuthehong ena ba ne ba hloka hore ke ba tšehetse. Haeba ke ne nka lumella hore boloetse ba ka bo fokolise tumelo ea ka, ke ne ke tla behela ba bang mohlala oa mofuta ofe?

Ka ho ke keng ha qojoa, ke ile ka ba le liphetoho ’meleng le maemong a lichelete—e leng liphetoho tseo ka litsela tse ling li ileng tsa mpefatsa bophelo ba ka, ’me tsa boela tsa bo ntlafatsa ka litsela tse ling. Ka lekhetlo le leng ke ile ka utloa ngaka e ’ngoe e re: “Boloetse ha bo bolaee motho; ho e-na le hoo, boa mo fetola.” Hape ke ithutile hore hase kamehla liphetoho tse tlisoang ke boloetse li bang mpe.

Pele ho tsohle, “moutloa nameng” ea ka o ile oa nthusa hore ke utloisise hamolemo bokuli ba batho ba bang ’me ke ba utloele bohloko. (2 Bakorinthe 12:7) Ke ile ka utloisisa hamolemo ho feta pele mantsoe a Liproverbia 3:5 a reng: “Tšepa Jehova ka pelo ea hao eohle ’me u se ke ua itšetleha ka kutloisiso ea hao.” Ka holim’a tsohle, maemo a ka a macha a ile a nthuta hore na lintho tsa bohlokoa ke life bophelong le hore na ke eng se tlisang khotsofalo ea sebele le ho ikutloa u le oa bohlokoa. Ho ne ho sa ntsane ho e-na le lintho tse ngata tseo ke neng nka li etsa mokhatlong o hlophisitsoeng oa Jehova. Ke ile ka lemoha moelelo oa sebele oa mantsoe a Jesu a reng: “Ho fana ho tlisa thabo e khōlō ho feta ho amohela.”—Liketso 20:35.

Mokhoa o Mocha oa Bophelo

Hang ka mor’a ho bolelloa ka boloetse ba ka, ke ile ka memeloa ho ea seminareng e Madrid moo baithaopi ba Bakreste ba neng ba rutoa ho etsa hore ho be le tšebelisano-’moho pakeng tsa lingaka le bakuli ba tsona ba Lipaki. Hamorao, baithaopi bana ba ile ba hlophisoa hore e be Likomiti Tsa Bohokahanyi le Lipetlele. Ho ’na, seminara ena e ile ea tla hantle ka nako e loketseng. Ke ile ka fumana mosebetsi o molemo haholoanyane, o neng o tla etsa hore ke khotsofale ho feta mosebetsi leha e le ofe oa boipheliso.

Seminareng ena re ile ra ithuta hore likomiti tsena tse neng li sa tsoa thehoa, e leng Likomiti Tsa Bohokahanyi le Lipetlele, li ne li lokela ho etela lipetlele, li buisane le lingaka ’me li buisane le basebetsi ho tsa bongaka ka sepheo sa hore ho be le tšebelisano-’moho ’me ho thibeloe ho se utloisisane. Likomiti tsena li thusa Lipaki tse ling hore li fumane lingaka tse ikemiselitseng ho li etsa opereishene ntle le ho sebelisa mali. Ho hlakile hore kaha ke motho feela, ho na le lintho tse ngata tseo ho neng ho hlokahala hore ke ithute tsona mabapi le mantsoe a sebelisoang ke lingaka, melao ea bongaka le tsela eo sepetlele se sebetsang ka eona. Leha ho le joalo, ha seminara ena e fela ke ile ka khutlela hae ke hatela holimo, ke hlomeletsoe ka phephetso e ncha e neng e nthabisa.

Ho Etela Lipetlele—Ntho e Khotsofatsang

Esita le hoja boloetse ba ka bo ne bo nkholofatsa butle ebile e le habohloko, boikarabelo ba ka ke le setho sa Komiti ea Bohokahanyi le Lipetlele bo ile ba eketseha. Kaha ke ne ke amohela penshene e fuoang liqhoala, ke ile ka ba le nako ea ho etela lipetlele. Ho sa tsotellehe ho soetseha ka linako tse ling, maeto ana a ile a ba bonolo haholoanyane ’me a nkhotsofatsa ho feta kamoo ke neng ke lebeletse. Le hoja hona joale ke tlameha ho sebelisa setulo sa likooa, sena hase tšitiso e kaalo. Kamehla ke tsamaea le e mong eo le eena e leng setho sa komiti. Ho feta moo, lingaka li tloaetse ho buisana le batho ba litulong tsa likooa, ’me ka linako tse ling ho bonahala li mamela ka tlhompho e khōloanyane ha li lemoha boiteko boo ke bo etsang ba ho li etela.

Ka lilemo tse fetileng tse ka holimo ho leshome, ke etetse lingaka tse makholo. Tse ling li ile tsa ikemisetsa ho re thusa ho tloha sethathong feela. Dr. Juan Duarte—e leng ngaka e etsang opereishene ea pelo Madrid eo hape e leng motlotlo ho hlompha letsoalo la mokuli—o ile a ithaopa hang-hang ho sebelisana le rōna. Haesale ho tloha ka nako eo, o se a entse liopereishene tse fetang 200 ntle le ho sebelisa mali ho bakuli ba Lipaki ba tsoang likarolong tse ngata tsa Spain. Ho theosa le lilemo, lingaka tse eketsehileng li qalile ho etsa opereishene ntle le ho sebelisa mali. Ho etela lingaka kamehla ho bile le seabo tabeng ena, empa tsoelo-pele e boetse e bakiloe ke khatelo-pele e entsoeng bongakeng le melemo ea ho etsa opereishene ntle le ho sebelisa mali. ’Me re kholisehile hore Jehova o hlohonolofalitse boiteko ba rōna.

Haholo-holo ke khothalitsoe ke boikutlo ba lingaka tse ling tse etsang opereishene ea pelo, tse sebetsanang le bana ka ho khetheha. Ka lilemo tse peli re ile ra etela sehlopha se seng sa lingaka tse peli tse etsang opereishene hammoho le lingaka tseo li sebetsang le tsona tse robatsang batho ka lithethefatsi pele ho opereishene. Re ile ra li fa lingoliloeng tsa bongaka tse hlalosang se etsoang ke lingaka tse ling tse etsang mosebetsi o tšoanang. Boiteko ba rōna bo ile ba putsoa ka 1999 nakong ea Seboka sa Lingaka sa ho Etsa Bana Opereishene ea Pelo le Methapo. Lingaka tsena tse peli tseo re ileng ra li thusa—tseo ka bokhabane li neng li tataisoa ke ngaka e etsang opereishene, e sebelisanang hantle le rōna e tsoang Engelane—li ile tsa etsa opereishene e thata ka ho fetisisa leseeng la Paki leo mothapo oa lona o moholo oa mali a tsoang pelong o neng o lokela ho lokisoa.b Ke ile ka thaba le batsoali ba lesea lena ha e ’ngoe ea lingaka tse etsang opereishene e tsoa ka kamoreng ea liopereishene ’me e bolela hore opereishene e atlehile ’me ho hlomphiloe letsoalo la lelapa. Hona joale, kamehla lingaka tsena tse peli li amohela bakuli ba Lipaki ba tsoang likarolong tsohle tsa Spain.

Ntho eo ke fumanang e khotsofatsa e le kannete maemong a kang ana ke ho lemoha hore ke khona ho thusa bara beso ba Bakreste. Hangata ba batla Komiti ea Bohokahanyi le Lipetlele ha ba hlile ba tobane le bothata bo boholo ka ho fetisisa bophelong ba bona. Ke nakong ea ha ho hlokahala hore ba etsoe opereishene, ’me lingaka tsa sepetlele sebakeng seo li sa batle ho ba phekola ntle le ho sebelisa mali kapa li sa khone ho etsa joalo. Leha ho le joalo, ha barab’abo rōna ba tseba hore ho na le lingaka tse sebelisanang hantle le rōna hohle mona Madrid, ba imoloha haholo. Ke ’nile ka bona ha sefahleho sa mor’abo rōna se tšoenyehileng se phutholoha, feela kahobane re e-na le eena sepetlele.

Lingaka le Melao ea Bongaka

Lilemong tsa morao tjena, litho tsa Likomiti Tsa Bohokahanyi le Lipetlele li boetse li etetse baahloli. Ha re ba etetse, re ba fa khatiso e bitsoang Family Care and Medical Management for Jehovah’s Witnesses, eo ka ho khetheha e etselitsoeng ho tsebisa batho ba joalo ba boholong boemo ba rōna mabapi le tšebeliso ea mali le hore ho na le mefuta e meng ea phekolo e sa sebeliseng mali. Ho ne ho hlokahala haholo hore re ba etele, hobane nakong e fetileng ho ne ho tloaelehile Spain hore baahloli ba laele lingaka hore li tšele mokuli mali a sa rate.

Liofisi tsa baahloli li majabajaba, ’me ha ke ne ke ile teng ka lekhetlo la pele, ke ile ka ikutloa ke le mosesaane ha ke tsamaea liphasejeng ka setulo sa ka sa likooa. Litaba li ile tsa mpefala le ho feta ha ho etsahala kotsinyana ea hore ke oele fatše ka mangole. Baahloli ba ’maloa le liakhente tse ileng tsa bona tsietsi e ntlhahetseng, ka mosa li ile tsa mphallela, empa ke ile ka hlajoa ke lihlong.

Le hoja baahloli ba ne ba sa tsebe hore na re ba etela ka life, ba bangata ba ne ba le mosa. Moahloli oa pele eo ke ileng ka mo etela o ne a se a ntse a lohotha ka boemo ba rōna, ’me o ile a re a ka thabela ho buisana le rōna haleletsana. Ha re mo etela hape, ke eena ea ileng a sututsa setulo sa ka sa likooa ra ea ofising ea hae ’me a mamela ka hloko. Katleho ea ketelo ena ea pele e ile ea nkhothatsa hammoho le bao ke tsamaeang le bona ho hlōla tšabo, ’me ka potlako re ile ra fumana melemo e eketsehileng.

Hona selemong seo, re ile ra fa moahloli e mong ea neng a re amohetse ka mosa khatiso ea Family Care, ’me o ile a tšepisa hore o tla e bala. Ke ile ka mo fa linomoro tsa ka tsa thelefono bakeng sa haeba ho ka hlokahala hore a buisane le rōna boemong ba tšohanyetso. Libeke tse peli hamorao o ile a ntetsetsa a mpolella hore ngaka e etsang opereishene sebakeng sena e mo kōpile hore a laele hore Paki e hlokang opereishene e tšeloe mali. Moahloli o ile a re bolella hore o batla hore re mo thuse ho fumana mokhoa oa ho rarolla bothata bona ka tsela e tla hlompha takatso ea Paki ena ea ho qoba mali. Ha hoa ka ha e-ba thata ho fumana sepetlele se seng, moo lingaka tse etsang opereishene li ileng tsa atleha ho e etsa ntle le ho sebelisa mali. Moahloli o ile a thaba ha a utloa ka phello ea opereishene eo, ’me o ile a re tiisetsa hore nakong e tlang o tla nka bohato bo tšoanang ho rarolla bothata bo tjena.

Ha ke ntse ke etela lipetlele, hangata ho ne ho hlaha taba e amang melao ea bongaka, kaha re ne re batla hore lingaka li nahanele litokelo le letsoalo la mokuli. Sepetlele se seng se sebelisanang hantle le rōna Madrid se ile sa ’mema hore ke ee thupelong eo se neng se fana ka eona tabeng ea melao ea bongaka. Thupelo ena e ile ea mpha monyetla oa hore ke bolelle litsebi tse ngata lefapheng lena pono ea rōna e thehiloeng Bibeleng. E ile ea boela ea nthusa hore ke utloisise liqeto tse ngata tse thata tseo lingaka li lokelang ho li etsa.

E mong oa matichere thupelong ena, e leng Moprofesa Diego Gracia, kamehla o hlophisa thupelo e hlomphehang ea lengolo la master melaong ea bongaka bakeng sa lingaka tsa Spain ’me o tšehetsa ka matla tokelo ea rōna ea ho lumela ho etsoa opereishene ka mor’a ho utloisisa hore na ho akarelletsa eng mabapi le tšelo ea mali.c Ho buisana le eena kamehla ho ile ha etsa hore baemeli ba bang ba ofisi ea lekala la Lipaki Tsa Jehova Spain ba memeloe ho hlalosa boemo ba rōna ho liithuti tsa Moprofesa Gracia tse seng li fuoe mangolo a univesithi, tseo tse ling tsa tsona li nkoang e le lingaka tse hloahloa ka ho fetisisa naheng ena.

Ho Tobana le Boemo ba Sebele

Ho hlakile hore mosebetsi o khotsofatsang oo ke o etsetsang balumeli-’moho le ’na ha oa rarolla mathata ’ohle a ka. Boloetse ba ka bo ntse bo ipha matla. Leha ho le joalo, ka lehlohonolo, kelello ea ka e chatsi. Ka thuso ea mosali oa ka le mora oa ka, bao ho seng mohla ba tletlebang, ke ntse ke khona ho phetha boikarabelo ba ka. Ho hang ke ne nke ke ka atleha hoja ba ne ba sa ntšehetsa ’me ba sa nthuse. Ke sitoa le ho qhoaela borikhoe ba ka kapa ho ikapesa jase. Haholo-holo ke thabela ho bolela litaba tse molemo Moqebelo o mong le o mong le mora oa ka, Ismael, ea sututsang setulo sa ka sa likooa e le hore nka buisana le batho ba fapa-fapaneng malapeng a bona. Hape ke sa ntse ke khona ho phetha boikarabelo ba ka ke le moholo oa phutheho.

Ke bile le linako tse mahlonoko lilemong tse fetileng tse ka bang 12. Ka linako tse ling, ha ke bona kamoo bokooa ba ka bo amang lelapa la ka kateng, sena se nkutloisa bohloko le ho feta boloetse ka bobona. Kea tseba hore ba utloela bohloko ka hare. Hase khale haholo ha ka nako e etsang selemo feela, mohoehali oa ka le Ntate ea ntsoalang ba hlokahala. Hona selemong seo, ke ile ka fumana hore ha ke sa khona ho tsamaea ntle le hore ke sebelise setulo sa likooa. Ntate, ea neng a lula ha rōna, o ile a bolaoa ke lefu le leng le holofatsang. Milagros o ne a mo hlokomela, ’me o ile a ikutloa eka o se a ntse a bona se tla nketsahalla nakong e tlang.

Leha ho le joalo, se thabisang ke hore lelapa la rōna le kopane ’me re tobana le mathata re le ngatana-’ngoe. Ho e-na le ho lula setulong sa bookameli, hona joale ke setulong sa likooa, empa ka sebele bophelo ba ka bo ntlafetse hona joale hobane ke bo sebelisa ka ho feletseng ho sebeletseng ba bang. Ho fana ho ka thethefatsa bohloko, ’me Jehova o fela a boloka tšepiso ea hae ea hore o tla re matlafatsa nakong ea mathata. Joaloka Pauluse, ka sebele nka re: “Bakeng sa lintho tsohle ke na le matla ka lebaka la ea mphang bonatla.”—Bafilipi 4:13.

[Mongolo o botlaaseng ba leqephe]

[Lebokose le leqepheng la 24]

Maikutlo a Mosali

Ho phela le molekane ea tšoeroeng ke lefu la tsitsipano ea methapo ho boima ho mosali—kelellong, maikutlong le ’meleng. Ke tlameha ho sebelisa kahlolo e molemo ha ke rera lintho tseo ke tla li etsa ’me ke tlameha ho ikemisetsa ho se tšoenyehe ka ho sa hlokahaleng ka bokamoso. (Matheu 6:34) Leha ho le joalo, ho phela har’a bohloko ho ka etsa hore motho a be le makhabane a itseng. Lenyalo la rōna le matla ho feta pele, ’me kamano ea ka le Jehova e matla haholoanyane. Lipale tsa bophelo ba batho ba bang bao le bona ba leng maemong a tšoenyang joaloka a rōna, li ’matlafalitse haholo. Le ’na ke khotsofetse joaloka Julián ka lebaka la tšebeletso ea hae ea bohlokoahali eo a e etsetsang barab’abo rōna, ’me ke fumane hore le ka mohla Jehova a ke ke a re lahla, esita le hoja letsatsi ka leng le ka re tlisetsa mathata a macha.

[Lebokose le leqepheng la 24]

Maikutlo a Mora

Ke fumana mohlala o babatsehang mamellong ea Ntate le ho beng ha hae le tšepo, ’me ke ikutloa ke phetha mosebetsi oa bohlokoa ha ke sututsa setulo sa hae sa likooa. Kea tseba hore nke ke ka khona ho etsa sohle seo ke batlang ho se etsa. Hona joale ke lilemong tsa bocha, empa ha ke se ke le moholo, ke batla ho ba setho sa Komiti ea Bohokahanyi le Lipetlele. Kea tseba ka ho bala litšepiso tsa Bibele hore bohloko ke ba nakoana le hore ho na le bara le barali babo rōna ba bangata ba utloang bohloko ho re feta.

[Setšoantšo se leqepheng la 22]

Mosali oa ka ke mohloli oa ka oa matla

[Setšoantšo se leqepheng la 23]

Ke buisana le ngaka e etsang opereishene ea pelo, e leng Dr. Juan Duarte

[Setšoantšo se leqepheng la 25]

’Na le mora oa ka re thabela ho sebetsa hammoho tšebeletsong