Oa Rapelloa Lefatšeng Lohle

NAHANA feela batho ba limilione tse makholo kapa tse likete ba se ba rapella ntho e tšoanang. Ba kōpa hore ea matla ka ho fetisisa leholimong le lefatšeng a arabe thapelo ea bona e khethehileng. Leha ho le joalo, ke ba seng bakae feela ba tsebang hore na ehlile ba kōpa’ng. Na ruri seo se ka etsahala? Ha e le hantle, se etsahala letsatsi le leng le le leng. Batho baa kaofela ba kōpa eng? Ba kōpa hore ’Muso oa Molimo o tle!

Ho hakanngoa hore ho na le malumeli a ka bang 37 000 a reng ke a Bokreste, ’me a re Jesu Kreste ke Moeta-pele oa ’ona. Malumeli ao a na le litho tse fetang limilione tse likete tse peli. Boholo ba tsona bo etsa thapelo e tsebahalang e le Ntat’a Rōna ea Maholimong kapa Thapelo ea Morena. Na ua e tseba? Joalokaha Jesu a e rutile balateli ba hae, e qala ka ho re: “Ntat’a rōna ea maholimong, lebitso la hao le ke le halaletsoe. ’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.”—Matheu 6:9, 10.

Ho se ho fetile lilemo tse makholo balumeli ba ntse ba pheta mantsoe a thapelo eo likerekeng. Hape ba ’nile ba a pheta ka hlooho boinotšing kapa e le malapa linakong tse monate le tse bohloko. Ba ’nile ba pheta mantsoe ana ho tsoa botebong ba pelo le ka tieo. Ba bangata ba ithutile ’ona ka hlooho ’me ba a pheremetsa feela ba sa natse hore na a bolela’ng. Litho tsena tsa malumeli a bolelang hore ke a Bokreste hase tsona feela tse ’nileng tsa lebella hore ’Muso oa Molimo o tle le ho o rapella.

Thapelo e Etsoang le ke Bao e Seng Bakreste

Balumeli ba Bajuda ba hlahetsoeng ke lefu ba etsa thapelo e tsebahalang e bitsoang Kaddish. Le hoja e sa amane hakaalo le lefu kapa mahlomola, hangata batho ba e rapela ha ba hlahetsoe ke lefu. Thapelo eo e re: “E se eka [Molimo] a ka hloma ’Muso oa hae bophelong ba hao . . .  a o hlome kapele-pele.”a Thapelo e ’ngoe ea boholo-holo e etsoang lisynagogeng e bua ka tšepo ea hore Morena oa ’Muso oa Mesia o tla tsoa lelokong la Davida.

Litho tse ling tsa malumeli ao e seng a Bokreste li ’nile tsa thabela ho mamela evangeli ea ’Muso oa Molimo. The Times of India e re moeta-pele e mong oa bolumeli oa Moindia oa lekholong la bo19 la lilemo, ea neng a rata ho kopanya bolumeli ba Bohindu, Bomosleme le Bokreste, o ile a re: “’Muso oa ’nete oa Molimo o ke ke oa tla ntle le hore bochabela bo kopane le bophirimela.” Ho phaella moo, haufinyane mosuoe-hlooho oa k’holeje ea Mamosleme e Strathfield, Australia, o ile a ngolla koranta e ’ngoe a re: “Joaloka Mamosleme a mang ’ohle, ke lumela [hore] Jesu o tla khutla ’me a hlome ’Muso oa ’nete oa Molimo.”

Ka sebele, hona joale ke batho ba limilione tse likete ba rapellang ’Muso oa Molimo le ba nang le tšepo ea hore o tla tla. Empa hlokomela ntlha e ’ngoe e thahasellisang.

Mohlomong ua tseba hore rōna Lipaki Tsa Jehova, bahatisi ba makasine ena, re kena ntlong e ’ngoe le e ’ngoe motseng oa heno re buisana le batho ka Bibele. Ka nako eo makasine ena e hatisoang, re etsa mosebetsi ona lefatšeng ka bophara, linaheng tse 236 ka lipuo tse fetang 400. Molaetsa oa rōna o ka sehloohong ke ’Muso oa Molimo. Ha e le hantle, hlokomela hore lebitso le feletseng la makasine ena ke Molula-Qhooa o Tsebahatsa ’Muso oa Jehova. Re atisa ho botsa batho hore na ba rapella ’Muso oo. Bongata ba bona ba re baa o rapella. Leha ho le joalo, ha ba botsoa hore na ’Muso oo ke eng, ba bangata ba re, “Ha ke tsebe,” kapa likarabo tsa bona ha li utloahale ebile baa qea-qea.

Ke hobane’ng ha batho ba bangata hakaale ba rapella ntho eo ba hlileng ba sa e tsebeng? Na ke hobane ’Muso oa Molimo o rarahane ebile o sa hlalosehe? Ha ho joalo. Bibele e hlalosa ’Muso ona ka botlalo le ka tsela e hlakileng. Ho feta moo, molaetsa oa Bibele o buang ka ’Muso ona o ka u fa tšepo ea sebele mehleng ena ea mathata. Sehloohong se latelang, re tla utloa hore na Bibele e hlalosa tšepo eo joang. ’Me re tla utloisisa hore na thapelo ea Jesu ea hore ’Muso oo o tle e tla arajoa neng.

[Mongolo o botlaaseng ba leqephe]