Ho Nehelana ka Taba Tse Molemo—Ka Limakasine
1 Ha ho na likoranta tse ling historing tse kileng tsa ba le tšusumetso ea ho etsa botle bophelong ba batho joaloka Molula-Qhooa le Tsoha! Tokollo e ’ngoe le e ’ngoe e tletse lijo tsa moea tse fanang ka bophelo. Liphello tsa patlisiso e tebileng e fanoang ka tšehetso e matla ea Mangolo li hatisa molaetsa oa ’nete likelellong le lipelong tsa rōna.
2 Molula-Qhooa, ka maqephe a oona, o hlalosa lithuto tsa Bibele ’me o re hlokomelisa ho phethahala ha boprofeta ba Bibele. O khothalletsa bohle ba lapileng moeeng ho fetola likelello tsa bona le ho apara botho bo bocha. (Ba-Roma 12:2; Ba-Ef. 4:22-24) Tsoha! e hlokomelisa babali ba eona ka liketsahalo tsa bohlokoa lefatšeng. Litšoantšo tsa eona tse hlokomelehang tse bontšang mehlolo ea pōpo li susumetsa thahasello lefatšeng le lecha ’me li tebisa kananelo ho ’Mōpi ea lerato.
HA LI TŠOANE LE LIMAKASINE TSA LEFATŠE
3 Limakasine tsa lefatše ha li bontše batho hore na ke joang ba ka thabelang bophelo bo khotsofatsang lefatšeng lena. Ha li fane ka tšepo ka bokamoso ’me li hlōleha ho ruta batho kamoo ba ka fumanang bophelo bo sa feleng. Limakasine tseno tsa lefatše li etselitsoe ho ntšetsa pele lintho tsa lefatše. Li fapane hakaakang le Molula-Qhooa le Tsoha!—1 Joh. 2:15-17.
4 Ha ho pelaelo hore uena ka bouena u ba le boikutlo bo tebileng ba teboho bakeng sa tokollo e ’ngoe le e ’ngoe ea Molula-Qhooa le Tsoha!—limakasine tse fupereng monko o monate oa ’nete e tsoang ho ‘mohlahlobi ea khabane.’ (Luka 12:42) Re ka etsa eng ho ntlafatsa ho aba ha rōna limakasine ’me re thuse ba eketsehileng ho rua molemo likoranteng tsa rōna?
HO PHETHA KAROLO EA RŌNA
5 Pele re ka khothalletsa ka nepo ba lipelo li tšepahalang ho bala limakasine tsa rōna, ho hlokahala hore re tsebe seo koranta ka ’ngoe e se fupereng. Sena se re hloka ho bala tokollo ka ’ngoe pele re e sebelisa tšebeletsong. Ha re tseba litaba tsa eona tse ka hare hantle, re ka sebelisa litšobotsi tsa tšebeletso ea ntlo le ntlo, mosebetsi oa seterata, le bopaki bo sa reroang bakeng sa ho aba limakasine.
6 Ho phaella moo, ha re na le limakasine tsa morao-rao ha re ntse re reka mabenkeleng, ha re palame lipalangoang tsa sechaba, ha re le sekolong, ha re le moo re sebetsang, kapa kae kapa kae moo re eang teng, re tla khona ho sebelisa menyetla e nepahetseng ea ho paka. Kenyelletso e khethiloeng hantle bukeng ea Ho Bea Mabaka hammoho le ntlha e tsoang sehloohong se seng li ka ’na tsa tsosa takatso ea motho ea ho bala limakasine tsa rōna.
7 Le hoja lipuisano tsa rōna li ka ’na tsa ba khutšoanyane ha re nehelana ka limakasine, ha ho hlokahale hore re lekanyetse puisano ea rōna ho nako e ka bang motsotso o le mong feela. Re batla ho nka nako ho hlokomela hore na ebe motho eo o hlile o thahasella molaetsa kapa che le hore na o tla bala makasine oo kapa che. Ha ho hlaha lipotso, ka mehla re lokela ho leka ho arabela lipotso ka ho sebelisa ka botlalo Bibele ea rōna kapa buka ea Ho Bea Mabaka. Ka ho itokisetsa ho sireletsa tumelo ea rōna, re ka kotula mahlohonolo a tsotehang.—1 Pet. 3:15.
8 Haeba motho eo a lumela ho bala limakasine, re ka bua ka boleng ba mosebetsi oa rōna le kamoo limakasine tsena li hatisoang ka teng habeli ka khoeli e le karolo ea mosebetsi oa lefatše ka bophara oa ho ruta Bibele. Boitsebiso bo leqepheng la 2 la Molula-Qhooa kapa leqepheng la 4 la Tsoha! bo hlalosa hona hantle haholo. Kaha ka mehla litaba tse ka hare tsa tokollo e latelang li thathamisitsoe, re ka hlahisa lipotso tse amanang le lihlooho tse tlang kapa ra lebisa tlhokomelo ho tsona. Sena se ka ’na sa leotsa takatso ea motho eo ’me sa mo susumelletsa ho bontša takatso ea ho fumana tokollo eo ha e tsoa. Sena e ka ba qalo ea tselana ea makasine.
9 Ha bofelo ba tsamaiso ena bo ntse bo atamela, e se eka re ka potlakisa mohato ho thusa ba lipelo li tšepahalang ho tsoa ho Babylona e Moholo ’me ba kene ’neteng. (Tšen. 18:4) Molula-Qhooa le Tsoha! li phetha karolo e matla mosebetsing oa rōna oa lefatše ka bophara oa ho ruta Bibele. Re leboha hore ebe Jehova o fane ka tsona hore re li sebelise tšebeletsong. E se eka Jehova a ka tsoela pele ho hlohonolofatsa ho sebelisa ha rōna likoranta tsena ka hloko le ka matla!