Falimehela ho Qalisa Lithuto Tsa Bibele
1 Ho qalisa lithuto tsa lehae tsa Bibele le ho li khanna ke karolo ea thōmo ea rōna joaloka Lipaki tsa Jehova. (Matt. 28:19, 20) Ka hona, na u tla ba e mong oa basebetsi-’moho le Molimo ho etseng see? (1 Ba-Kor. 3:9) Ke tokelo e khōlō hakaakang ho thusa ba bang ho tseba Motho e moholo ka ho fetisisa bokahohleng!
2 Joalokaha ho na le mathata a mangata a amanang le liketsahalo tsa lefatše tse fetohang ka potlako, batho ba bangata ba lipelo li tšepahalang ba batla likarabo mabapi le hore na ke hobane’ng ha lintho tsena li etsahala. Nakong e fetileng khale Jehova o ile a fana ka likarabo lipotsong tsa bona. Ha batho ba lipelo li tšepahalang ba rutoa ka Lentsoe la Molimo, baa tšeliseha. Ka hona, ho hlokahala hore re falimehele menyetla ea ho qalisa lithuto tsa Bibele.—Liprov. 3:27.
FALIMEHELA MENYETLA
3 Na u se u nahanne ka ho qala thuto ea Bibele le mong ka uena ea haufi-ufi kapa motho eo u tloaelaneng le eena ea seng ’neteng? Ho tseba batho bana ho tla u susumetsa ho sebelisa masene mabapi le nako e loketseng ea ho buisana le bona ka taba e itseng. Hopola hore potso e khethiloeng hantle kapa lentsoe le buuoang ka nako e nepahetseng li ka tsosa thahasello ea bona ’neteng. Ha cheseho ea motho eo e tsositsoe, hangata ho ee ho latele lipuisano tse behang litholoana, ’me ho ka ba ha qalisoa thuto ea Bibele.
4 Maemong a mangata boitšoaro bo botle ba molekane oa Mokreste bo sebelelitse ho bula tsela bakeng sa hore ea sa lumelang a kene ’neteng. (1 Pet. 3:1, 2) Ka kakaretso balekane ba sa lumelang le litho tse ling tsa lelapa tse sa lumelang ba ananela ha ho lebisoa tlhokomelo ho bona le ho hlomphuoa ke litho tsa phutheho. Ho ba bontša thahasello ea botho ho ka etsa ho hoholo ho theeng likamano tsa botsoalle le bona. Ka ho sebelisana ’moho le molekane kapa setho sa lelapa se ’neteng, u ka khona ho qalisa thuto ea Bibele.
5 Ha re ntse re etsa mosebetsi oa ntlo le ntlo, re ka leka ho qalisa thuto ea Bibele leetong la pele. See se ka etsoa joang? Bahoeletsi ba bang ba bile le katleho ea ho etsa sena ha mong’a ntlo a botsa lipotso tse ka arabeloang ka ho toba ho tsoa bukeng. Haeba motho eo a lumela ho bala lingoliloeng kapa haeba a re memela ho kena ka tlung, re ka nka monyetla oo ho ntšetsa puisano pele ’me mohlomong re bontše se amehang thutong. Ikhakanyetse hore na u tla lula nako e kae leetong la pele. Ho ka ’na ha ba molemo ho khutla hamorao ka mor’a nako e itseng kapa ka letsatsi le leng ho ntšetsa puisano pele. Maetong a tlang, mohlomong u ka lakatsa ho tsoela pele ho buisana ka taba eo u ileng ua bua ka eona leetong la pele. Kapa u ka hlahisa potso e ileng ea botsoa qetellong ea leeto le fetileng.
MAEMO A SA REROANG
6 Bopaki bo sa reroang e ka ba karolo e ’ngoe e behang litholoana boitekong ba rōna ba ho qalisa lithuto tsa Bibele. Mesebetsing ea rōna ea letsatsi le letsatsi, re teana le batho ba bangata ba ka ’nang ba lakatsa ho ithuta. Ho re thusa ho atleha hamolemo, re ka sebelisa likenyelletso tse ling tse tšoanelehang bukeng ea Ho Bea Mabaka ho qalisa lipuisano. ’Me u se ke ua tsila-tsila ho kōpa thuto ea Bibele ho tloha qalong hobane motho eo a phela sebakeng se seng ’me mohlomong re ke ke ra ba le monyetla oa ho khanna thuto eo ka borōna.
7 Falimehela menyetla e ka lebisang bopaking bo sa reroang, ’me u itokisetse ka ho nka lipampitšana tse ngata le limakasine tse tla eketsa thahasello ea motho ea mametseng ’neteng. (Moek. 11:1) Haeba motho a bontša thahasello ’neteng ’me a le tšimong eo eseng ea phutheho ea heno, nka aterese ea hae le boitsebiso bo bong bo hlokahalang ’me u bo fetisetse phuthehong ea moo a phelang teng e le hore e mong a ka mo hlokomela hantle.
8 Mosebetsi oa ho etsa barutuoa hase oa ba seng bakae feela. Ke oa bohle ba ka phuthehong. Ho hopola hore ke thōmo ea Bokreste ea ho fetoha baetsi ba barutuoa ho tla re khothalletsa ho falimehela menyetla ea ho qalisa lithuto tsa Bibele.