Karolo ea Lipotso

● Ha mohoeletsi a fallela sebakeng se seng, ke eng se lokelang ho etsoa ho mo thusa ho fetela phuthehong e ncha?

Hang ha mohoeletsi ea tsoang phuthehong e ’ngoe a fihla, mongoli oa phutheho o lokela ho mo botsa lebitso la phutheho eo a tlohang ho eona le lebitso le aterese tsa mongoli oa phutheho eo. Joale o lokela hore a ngolle mongoli oa phutheho eo mohoeletsi a tlohang ho eona, a kōpa karete ea Tlaleho ea Mohoeletsi ea Phutheho le lengolo la boitsebiso. Mongoli eo kōpo ena e lebisitsoeng ho eena o lokela ho araba kapele.—Bona Ho Hlophisetsoa ho Phetha Tšebeletso ea Rōna, maqephe 104-5.

Mohoeletsi ea rerang ho falla a ka thusa ka ho tiiseha hore o fana ka lebitso le nepahetseng la phutheho eo a tlohang ho eona le lebitso le aterese tsa mongoli. Ha a fihla phuthehong e ncha, boitsebiso bona bo ka fuoa mongoli oa eona e le hore a ka khona ho bo sebelisa hang-hang. Lipeho tsa tšebeletso ea tšimo tse tlisoang phuthehong e ncha li ka bolokoa ho fihlela karete ea peho e amohetsoe. Ka mor’a moo mosebetsi oa mohoeletsi o ka kenngoa kareteng ’me oa kenyelletsoa tlalehong ea khoeli le khoeli ea phutheho khoeling e latelang.

Maemong a mang mohlomong mohoeletsi o tseba lebitso le aterese tsa mongoli oa phutheho eo a eang ho eona. Haeba ho joalo, ha ho hlokahale hore baholo ba emele kōpo. Tlaleho ea mosebetsi oa mohoeletsi le lengolo la boitsebiso li ka romeloa hang-hang ka poso ho mongoli oa phutheho eo mohoeletsi a tla kopanela le eona.