Ho Nehelana ka Taba Tse Molemo
Ka ho Paka Seterateng
1 Liproverbia 1:20 e re: “Bohlale bo meketsa kantle, bo tlerola ka lentsoe le leholo mapatlelong.” Mantsoe ana ke ’nete ka ho khethehileng kajeno ha bahlanka ba Jehova ba bolela litaba tse molemo tsa ’Muso ka mafolo-folo hohle moo ba fumanang batho teng. Joaloka Jesu le baprofeta ba pele ho mehla ea Bokreste, lerato la rōna la sebele bakeng sa batho le re susumelletsa ho bolella motho e mong le e mong ’nete, hohle.—Jer. 11:6; Mar. 6:56; Luka 13:22, 26.
2 Le hoja lehae la motho e le sebaka se loketseng haholo sa ho buisana le motho ka ’nete, ha se batho ba bangata ba fumanehang mahaeng ha re e-ea ka ntlo le ntlo. Ha beng ba matlo ba le teng hae, hangata e e-ba motho eo re kileng ra bua le eena pele ea bulang monyako ’me ha re bone litho tse ling tsa lelapa. Kahoo, ho paka seterateng ho lokela ho nka sebaka sa bohlokoa boboleling ba rōna. Mohlomong u ka fumana ho paka seterateng ho tšoana le kamoo pula-maliboho e mong a ho hlalositseng ka teng hore ke “tšimo e thahasellisang, e khathollang, le ea lapeng.”
BOIKUTLO BO MOFUTHU BO KHOLISEHILENG
3 Ke hobane’ng ha u sa leke ho etsa bopaki ba seterateng sebakeng se le seng ka mehla? Khaitseli e mong ea etsang joalo o bolela hore o se a tloaelane le bo-ramabenkele ba bangata le batho ba bang ba leng seterateng sa “hae.” Ho hōlisitse botsoalle bo molemo bo butseng tsela bakeng sa lipuisano tsa Bibele tse behang litholoana. Pula-maliboho ea thusang ea thabelang ho paka seterateng o bolela hore o leka ho atamela batho ba shebang lintho lifensetereng tsa mabenkele, batho ba lutseng ka makoloing, ba emetseng libese, esita le ba ileng ba hana ho mamela nakong e fetileng. Ho hlokahala mamello le kahlolo e molemo hore re be sebete le ho ba ba phehellang, empa eseng ka mokhoa o fetelletseng haholo.
4 Senotlolo sa ho atleha ho paka seterateng ke ho ba le katamelo e mofuthu, e mosa le e tšepahalang. Bososela. Talima motho ka mahlong haeba u ka khona, empa haeba ho se joalo, tsoela-pele ’me u mo atamele ka mofuthu. Hlokomela maemo, ’me u a sebelise. Khaitseli e mong o hlokomela basali ba imetsoeng ke mekotlana ea krosari e be o re, “Kea hlokomela hore u ne u tlil’o reka lijo. Ka sebele lintho lia tura matsatsing ana. U re’ng ka lijo tsa kelello le pelo? Ke thabetse sehlooho sena . . . .” Ho ba tsamaeang le bana o re, “Kea bona o na le bana ba babeli ba batlenyana. Na u ne u tseba hore Bibele e re bana ke tlhohonolofatso e tsoang ho Molimo? E re ke u bontše . . . .” Ha a atamela motho ea nahanang ka ho tebileng, o re, “Kea bona hore u nahana ka ho hong. Lefatše la kajeno le tletse likhathatso, na ha ho joalo? Na u nahana hore ho tla ke ho tle nako eo . . . ?”
5 Haeba motho a potlakile haholo seterateng, u ka ’na ua mo neha pampitšana ’me ua re, “Litaba tse molemo ke tsena tseo u ka li balang ha u e-na le nako.” Haeba ho bonahala batho ba sa potlaka, nehelana ka limakasine. Ke ho molemo ho siea libuka matsohong a batho neng kapa neng ha ho ka etsahala.
6 Bahoeletsi ba bangata ba neng ba tšaba ho paka seterateng joale ba ho talima e le tšobotsi ea bona eo ba e ratang haholo ea boboleli. Leha ho le joalo, re lokela ho ela hloko haholo ha re sebetsa libakeng tse kotsi kapa linakong tseo ho leng kotsi. Esita le litoropong tse nyenyane hangata ho na le libaka tse nang le batho ba bangata, moo ho emeloang lipalangoang tsa sechaba, kapa moo ho emisoang makoloi moo batho ba ka atameloang ka litaba tse molemo. Sebelisa monyetla oo ’me ka bohlale lentsoe la hao le phatlalatse litaba tse molemo literateng le mapatlelong a motse tlhohonolofatsong ea ba utloang le tlotlisong ea Jehova.—Liprov. 1:20.