Susumeletsa ba Bang Hore ba Talime ka Hloko ho Jesu
1 Motho e Moholo ka ho Fetisisa ea Kileng a Phela ke buka e ikhethang. Likhaolo tsa eona tse 133 li ka susumeletsa babali hore ba talime ka hloko ho Jesu ’me tsa ba khothaletsa hore ba etsise mohlala oa hae. Ho boletsoe hantle hore marena ’ohle a kileng a busa, ha a kopantsoe hammoho, ha a e-s’o ame bophelo ba motho holim’a lefatše lena ka matla joalokaha Jesu a entse. Ka sebele ba talimang ka hloko ho Jesu ba tla rua molemo.
2 Jesu o rutile barutuoa ba hae ka Ntate oa hae ’me a bonahatsa litšoaneleho tsa bohlokoa tsa Molimo. Lipelo tsa rōna lia ameha ha re nahana ka tsebo ea Jesu e babatsehang joaloka tichere, ho etella ha hae pele a se na tšabo, le mosa oa hae o bonolo. Ha re hopola ka ho utloisoa bohloko ha hae ha a ne a nehelana ka bophelo ba hae ho re rekolla, re tlala kananelo! Motho e Moholo ka ho Fetisisa ea Kileng a Phela e ka thusa batho hore ba talime Jesu ka tsela ena.
3 Lokisetsa ka Botlalo: Itokisetse hantle ho qala puisano ea Bibele e tla susumeletsa ba bang hore ba talime ka hloko ho Jesu. Lihlopha tsa malapa le ba bang ba ka ikoetlisa ba le ’moho. Leka ka tieo ho tsosa thahasello le ho susumeletsa batho hore ba bale buka Motho e Moholo. Ho ka etsahala hore le be le puisano ka makhetlo a ’maloa le motho hore u finyelle sena. Haeba motho a ke ke a khona ho fumana buka kapa a sa e thabele, u ka nehelana ka limakasine tsa morao-rao kapa ua siea pampitšana. Haeba thahasello e bontšitsoeng pele e se kaalo, re ka siea pampitšana kapa mohlomong bukana e lekanang le makasine kapa makasine.
4 Ka December puisano ea rōna ka ntlo le ntlo e tla itšetleha ho Jesu ’me e khothaletse batho hore ba mo tsebe hamolemonyana. Ka ho buella lintlha tse boletsoeng bukeng ea Motho e Moholo, re tla thusa batho hore ba nke Jesu, eseng feela joaloka motho oa histori, empa e le Mora oa Molimo le Morena ea busang oa ’muso o tla rarolla mathata a batho.
5 Joalokaha ho ile ha hatelloa ho Tšebeletso ea Rōna ea ’Muso ea khoeli e fetileng, re batla ho sebelisa lingoliloeng tsa rōna ka bohlale. Ka December, nakong ea ha batho ba bangata ba nahanne ka Jesu, re tla ba le menyetla e eketsehileng ea ho buella buka Motho e Moholo. Re boetse re tlameha ho falimehela ho buella buka bopaking bo sa reroang. Nahana ka litsela tsa ho pakela baeti, beng ka uena, bao u sebetsang le bona, le batho bao re teanang le bona ha re ile mabenkeleng. Rera esale pele, ’me u be le libuka tse lekaneng tsa Motho e Moholo tseo u tla nehelana ka tsona mosebetsing oa ntlo le ntlo le bopaking bo sa reroang.
6 Motho e mong ea sa rateng ho bala o ile a bontša kananelo bakeng sa buka Motho e Moholo, a bolela hore e entse hore ho bala e be ntho eo a phethang letsatsi ka eona ho le natefisa. E se eka re ka thusa ba bang hore ba ikutloe ka tsela e tšoanang, re leke ka hohle ho ba susumeletsa hore ba talime ka hloko ho Jesu ka ho bala Motho e Moholo ka ho Fetisisa ea Kileng a Phela ka thahasello ea sebele.