Na U Tlaleha Kamehla?
1 Ke ho thabisang hakaakang ho amohela litlaleho tsa mosebetsi o finyeletsoeng tšimong! Sena se bontša hore Jehova o tsoela pele ho hōlisa. (1 Bakor. 3:6) E mong le e mong oa rōna oa ikarabella bakeng sa ho etsa bonnete ba hore tlaleho e feletseng le e nepahetseng e romeloa ofising ea lekala.
2 Ha ho pelaelo hore kaofela ha rōna re ile ra thabela ho utloa ka litlhōrō tse ncha tsa bahoeletsi tse ileng tsa finyelloa ka August 1996 linaheng tse ngata tse leng tlas’a tsamaiso ea lekala la Afrika Boroa. Leha ho le joalo, ho ile ha hlokomeleha hore liphutheho tse 111 tsa Afrika Boroa ha lia ka tsa romela litlaleho tsa tsona ka nako bakeng sa tlaleho ea August. Ho bile joalo ka liphutheho tse 15 tsa Botswana, tse 22 tsa Lesotho, tse 5 tsa Namibia le tse 35 tsa Swaziland. Ho feta moo, ho latela lipalo tse leng ho Tlhahlobo ea Peho ea Phutheho (S-10) e rometsoeng ke mongoli oa phutheho ka ’ngoe, ho na le bahoeletsi ba likete tse ’maloa liphuthehong ba sa tliseng litlaleho tsa bona. Mohlomong bothata bona bo habeli: Bangoli ba bang mohlomong ha ba romele litlaleho esale nako ’me bahoeletsi ba bang mohlomong ha ba tlise litlaleho.
3 Mohoeletsi ka mong o lokela ho ipotsa: ‘Na ke tlaleha tšebeletso ea ka ea tšimo kamehla hona ebile e le kapele-pele bofelong ba khoeli e ’ngoe le e ’ngoe?’ Kaofela ha rōna rea ikarabella bakeng sa ho etsa hore tlaleho ea khoeli e ’ngoe le e ’ngoe e be e feletseng le e nepahetseng. Ho etsa joalo ho tla bontša tlhompho ea rōna bakeng sa litokisetso tsa mokhatlo o hlophisitsoeng oa Jehova le ho bontša kananelo ea rōna bakeng sa karolo e nyenyane eo re nang le eona ho etseng hore tlaleho e be e nepahetseng.
4 Kaha mongoli o lokela hore a be a rometse tlaleho ea tšebeletso ea tšimo ea phutheho ho Mokhatlo letsatsing la botšelela la khoeli e latelang, re ka bona hore na ke hobane’ng ha ho le bohlokoa hore mohoeletsi e mong le e mong a nehelane ka tlaleho ea hae ea tšebeletso ea tšimo hang-hang bofelong ba khoeli. Na u sebetsa tumellanong le tokisetso ee ka ho tlaleha kapele-pele le ka nepo bofelong ba khoeli ka ’ngoe?
5 Mohoeletsi ka mong eo ka ho rata a sebetsang tumellanong le litokisetso tse boletsoeng ka holimo a ka ba le khotsofalo ea ho tseba hore o tlatselitse ho etseng hore tlaleho ea khoeli le khoeli ea mosebetsi oa Lipaki tsa Jehova e be e nepahetseng. (Bapisa le Ezekiele 9:11.) E se eka kaofela ha rōna re ka nehelana ka litlaleho tsa rōna tsa tšebeletso ea tšimo tse nepahetseng esale nako kamehla khoeli e ’ngoe le e ’ngoe!