Thabela ho Ithuta Buka ea Ha e le Hantle ke Eng Seo Bibele e se Rutang?
1 Tšobotsi e thahasellisang ea Likopano Tsa Setereke tsa “Ho Mamela Molimo” e bile ho lokolloa ha buka ea Ha e le Hantle ke Eng Seo Bibele e se Rutang? Haufinyane re tla be re e sebelisa haholo tšebeletsong ea rōna ea tšimo, haholo-holo ha re khanna lithuto tsa lehae tsa Bibele. Ka lebaka leo, ho hlokahala hore re tsebe buka ena e ncha hantle. Ho tla ba bonolo ho e tseba hantle kaha re tla ithuta eona Thutong ea Buka ea Phutheho ho tloha bekeng e qalang ka la 17 April, 2006.
2 Molebeli oa Thuto ea Buka ea Phutheho o tla totobatsa lipotso tse hlahang qalong ea khaolo ka ’ngoe. Ebe thuto e khannoa ho sebelisoa lipotso tse botlaaseng ba leqephe. Ho tla baloa mangolo a sehlooho a be a tšohloe, ’me lebokose le reng “Seo Bibele e se Rutang” le qetellong ea sehlooho ka seng le tla re thusa haholo ha re ikhopotsa boitsebiso boo hobane lebokose leo le na le likarabo tsa Mangolo tsa lipotso tsa selelekela tsa khaolo. Le tla thabela ho araba hobane buka ena e tšohla lintlha ka tsela e hlakileng, e bonolo le e thahasellisang.
3 Sehlomathiso sa buka ena se fana ka boitsebiso ba lihlooho tse fapa-fapaneng. Re tla khona ho sebelisa boitsebiso bona ha liithuti tsa Bibele li hloka boitsebiso bo eketsehileng tabeng e itseng. Ka linako tse ling ho tla tšohloa likarolo tsa sehlomathiso Thutong ea Buka ea Phutheho. ’Mali oa thuto ea buka o tla bala boitsebiso bohle ba sehlomathiso ba sehlooho se tla beng se baloa, ’me lihlooho tse telele li tla tšohloa ka likarolo. Sehlomathiso ha se na lipotso tsa ho ithuta. Empa molebeli a ka kōpa litlhaloso tsa bamameli ka ho ba botsa lipotso tse totobatsang lintlha tsa bohlokoa.
4 Thuto ea Buka ea Phutheho e thehiloeng bukeng ea Seo Bibele e se Rutang e tla etsoa ka potlako. Leha ho le joalo, ha hoa lebelloa hore re shape pere joalo ha re khannela batho ba bang thuto ka buka eo, haholo-holo haeba ba e-na le tsebo e fokolang kapa ba sa tsebe letho ka Bibele. (Lik. 26:28, 29) Ha re khanna lithuto tsa lehae tsa Bibele, ho tla hlokahala hore re tšohle mangolo ka botlalo, re hlalose lipapiso joalo-joalo. Kahoo, etsa hore pakane ea hao e be ho ba teng beke e ’ngoe le e ’ngoe ’me u be le seabo se feletseng thutong ea rōna ea buka ea Ha e le Hantle ke Eng Seo Bibele e se Rutang?