Karolo 9
Bolumeli ba ’Nete bo ka U Tsoela Molemo ka ho sa Feleng!
1. Ho tla etsahala’ng haeba re ‘atamela ho Molimo’?
JEHOVA o rata ba mo sebeletsang. Haeba u sebeletsa Jehova, o tla u hlohonolofatsa hona joale le nakong e tlang. Bibele e re: “Atamelang ho Molimo, ’me o tla atamela ho lōna.”—Jakobo 4:8.
2. Re ka atamela ho Molimo joang, hona see se tla ama lithapelo tsa rōna joang?
2 Hore u atamele ho Molimo, u lokela ho ithuta Lentsoe la hae le ho phela tumellanong le lona. Ha u rapela ho ea ka thato ea hae, Jehova o tla mamela lithapelo tsa hao ’me a li arabe. Moapostola oa Mokreste, Johanne, o ile a ngola: “Ena ke kholiseho eo re nang le eona ho [Molimo], hore, ho sa tsotellehe hore na ke eng eo re e kōpang ho ea ka thato ea hae, oa re utloa. Ho ekelletsa moo, haeba re tseba hore oa re utloa mabapi le eng kapa eng eo re e kōpang, rea tseba hore re tla ba le lintho tse kōpiloeng kaha re li kōpile ho eena.”—1 Johanne 5:14, 15.
3-7. Re ka fumana bohlale ba bomolimo joang, hona bo ka re thusa joang?
3 Ho feta moo, ha u atamela ho Molimo, o tla u fa bohlale ba ho sebetsana ka katleho le mathata a bophelo a letsatsi le letsatsi. Bibele e re: “Haeba mang kapa mang oa lōna a haelloa ke bohlale, a ’ne a kōpe Molimo.”—Jakobo 1:5.
4 Bohlale ba bomolimo bo ka u thusa joang? Har’a tse ling, bo ka u thusa ho tseba lintho tse sa khahliseng Jehova. U ka boetse ua ithuta hore na ke hobane’ng ha lintho tsena li fosahetse le hore na u ka qoba joang ho li etsa. Tsebo eo e ka u sireletsa mathateng a mangata a hlaselang batho ka kakaretso. Ka mohlala, ho mamela temoso ea Molimo ea ho hloeka boitšoarong ho thusa ho sireletsa batho ba Molimo ho imeng ho sa batleheng, mafung a tšoaetsanoang ka ho kopanela liphate le manyalong a sa thabang kapa a qhalanang.
5 Bohlale bo tsoang ho Molimo bo ka boela ba u etsetsa eng? Bo ka u nolofalletsa ho phela ka tsela e molemohali. Bo ka u thusa ho etsa liqeto ka bohlale ha u sebetsana le lintho tse itseng, tse kang ho sebelisa chelete. U tla khona ho hahamalla lipakane tse molemo le ho lahla lipakane tse se nang molemo oa ka ho sa feleng.
6 Bohlale ba bomolimo bo ka boela ba u thusa likamanong tsa hao le ba bang. Bophelo ba lelapa la hao e ka ba bo thabileng haholoanyane. U ka etsa setsoalle sa sebele le se tšoarellang le ba bang, u ka hlomphuoa le ke ba sa sebeletseng Molimo.
7 Ho feta moo, ho ba le bohlale ba bomolimo ho tla ntlafatsa pono ea hao bophelong. Ho tla u thusa ho sebetsana ka katleho le mathata le masisa-pelo a bophelo. Hape u tla ba le pono e leka-lekaneng le tšepo ka bokamoso. Ka lehlakoreng le leng, ho ba le tšepo ho tla tlatsetsa hore u phele hantle kelellong le ’meleng.—Liproverbia 14:30; Esaia 48:17.
8. Haeba u sebeletsa Molimo, u ke ke ua tšaba eng?
8 Haeba u sebeletsa Molimo oa ’nete, u tla lokoloha tšabong e aparetseng ba sa mo sebeletseng. Kaha ua tseba hore bafu ha ba phele lebitleng, u ke ke ua tšaba bafu. Kaha u kholoa tšepiso ea Molimo ea ho tsosa bafu, u ke ke ua tšaba ho shoa. ’Me kaha ua tseba hore Molimo o matla ’ohle, u ke ke ua tšaba boloi.—Johanne 8:32.
Ba Lokileng ba Tla Rua Lefatše
9-11. Ke bo-mang ba tla phela Paradeiseng, hona ke bo-mang ba ke keng ba phela ho eona?
9 Ha u atamela ho Molimo, u ke ke ua tšaba bokamoso. Joalokaha re bone, Bibele e ile ea bolela esale pele mathata a mangata ao re a bonang kajeno lefatšeng. Jehova o re bolella hore lintho tsena ke tsa nakoana; haufinyane ’Muso oa Molimo o tla etsa lefatše lena paradeise.—Luka 21:10, 11, 31; 23:43.
10 Ke feela ba atamelang ho Jehova le ba mo sebeletsang ba tla phela Paradeiseng. Bibele e re: “Ho setse nakoana e seng kae, ’me ea khopo ha a sa tla hlola a e-ba teng; ka sebele u tla lebisa tlhokomelo sebakeng sa hae, ’me o tla be a le sieo. Empa ba bonolo ba tla rua lefatše, ka sebele ba tla fumana thabo e phethehileng khotsong e ngata.”—Pesaleme ea 37:10, 11.
11 Bao ka manganga ba hanang ho mamela melao e lokileng ea Molimo ba tla lahleheloa ke bophelo ka ho sa feleng. (2 Bathesalonika 1:8, 9) Ba ke ke ba hlola ba e-ba teng. Ba tla shoa lefu la ka ho sa feleng le Satane le bademona ba hae. (Tšenolo 20:10, 14) Empa ba ithutang ka Jehova le ba mo sebeletsang ba tla fumana thabo e phethehileng Paradeiseng ea lefatšeng.
Bokamoso bo Babatsehang!
12. Bibele e re’ng ka bokamoso?
12 Jehova o boloketse ba mo ratang lintho tse hlollang! Ak’u bone feela seo Lentsoe la hae le se buang ka bophelo lefatšeng la Paradeise:
● Nala: “Ho tla ba le lijo-thollo [kapa, lijo] tse ngata lefatšeng; ho tla ba le nala holim’a litlhōrō tsa lithaba.”—Pesaleme ea 72:16.
● Matlo a matle: “Ka sebele ba tla haha matlo ’me ba lule ho ’ona.”—Esaia 65:21.
● Mosebetsi o thabisang: “Bakhethoa ba ka ba tla sebelisa mosebetsi oa matsoho a bona ka botlalo. Ba ke ke ba sehlela lefeela.”—Esaia 65:22, 23.
● Ho kula ho ke ke ha e-ba teng: “Ha ho moahi ea tla re: ‘Kea kula.’”—Esaia 33:24.
● Kholofalo e ke ke ea e-ba teng: “Ka nako eo mahlo a lifofu a tla tutuboloha, ’me litsebe tsa ba sa utloeng litsebeng li tla buleha. Ka nako eo ea holofetseng o tla tlōla joalokaha khama e tona e tlōla, ’me leleme la ea sa khoneng ho bua le tla hooa ka nyakallo.”—Esaia 35:5, 6.
● Bohloko, masoabi, lefu, li ke ke tsa e-ba teng: “[Molimo] o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:4.
● Ntoa e ke ke ea e-ba teng: “[Molimo] o felisa lintoa ho isa pheletsong ea lefatše.”—Pesaleme ea 46:9.
● Bophelo bo sa feleng: “Ba lokileng ba tla rua lefatše, ba tla lula ho lona ka ho sa feleng.”—Pesaleme ea 37:29.
13. Ke mang feela ea ka etsang lefatše lee paradeise, hona hobane’ng?
13 Batho ba ke ke ba tlisa lintho tseo, empa Jehova o na le matla a ho etsa ntho e ’ngoe le e ’ngoe eo a reng o tla e etsa. Ha ho letho le ka mo sitisang ho etsa ntho eo a batlang ho e etsa. Bibele e re: “Ho Molimo ha ho polelo e ke keng ea khoneha.”—Luka 1:37.
14. U ka tsamaea tseleng e isang bophelong bo sa feleng joang?
14 Jehova o sebelisa Lipaki tsa hae ho fa batho libakeng tsohle monyetla oa ho ‘kena ka heke e moqotetsane’ le ho tsamaea tseleng e isang bophelong bo sa feleng. E se eka u ka ba e mong oa batho ba thabileng ba amohelang memo eo. E se eka u ka ba bolumeling ba ’nete ’me ua thabela tlhohonolofatso ea Jehova ka ho sa feleng!—Matheu 7:13, 14.
[Setšoantšo se tletseng leqephe la 31]