Baboleli ba ’Muso Baa Tlaleha

“Khopotso ea Moea oa Tšebelisano-’moho”

PEL’A tlhōrō e phahameng ka ho fetisisa ka boroa ho Spain ho na le lejoe la mokoetla le leholo le hlaheletseng ka holimo-limo le tsejoang e le Lefika la Gibraltar. Ka lilemo tse makholo-kholo, lefika lena e ’nile ea e-ba bopaki bo thotseng ba tsekisano le ho se lumellane ha lichaba. Ka ho fapaneng, haufinyane tjena Lefika la Gibraltar e bile sesosa sa ho utloisisa ho bonahatsoa ha tšebelisano-’moho le bonngoe tse bonoang ka seoelo lefatšeng kajeno.

Lik’hilomithara tse tharo feela ho tloha Lefikeng leo ho na le toropo ea La Línea, Spain. Mono kaho ea Holo ea ’Muso ea Lipaki tsa Jehova e ile ea kopanya basebetsi ba baithaopi ba makholo-kholo ba chesehelang ho nehelana ka nako ea bona le matla. Ha ba ntse ba sebetsa ho haha sebaka se loketseng borapeli ba ’Mōpi, Jehova Molimo, esita le bohlokoa ba tikoloho e hlollang ea Lefika la Gibraltar e ne e se letho ha e bapisoa le mosebetsi o neng o etsoa moo.

Baboleli ba ’Muso karolong eo ea lefatše ba romela tlaleho e latelang:

“Baithaopi ba chesehang ba 900 ba ile ba sebetsa motšehare le bosiu, ho tloha motšehare oa mantsiboea, ka Labohlano la la 24 September, 1993. Ka hora ea bosupa ka Sontaha mantsiboea, ho ne ho emisitsoe letšoao le lecha le khethollang mohaho oo e le Holo ea ’Muso ea Lipaki tsa Jehova ’me, mohaho ona o mocha o khahlehang o ile oa sebelisetsoa seboka sa oona sa pele sa phatlalatsa.

“Lipaki tse ngata tse tsoang haufi le Gibraltar li ile tsa tšela moeli ho ea thusa baena ba tsona ba Spain. E mong oa baithaopi eo e leng letsoalloa la Gibraltar o ile a hlalosa hore ‘likarohano tsa lipolotiki ha li felise boena ba rōna ba machaba.’ O ile a phaella: ‘Lilemo tse ’maloa tse fetileng, metsoalle e tsoang La Línea e ile ea tla ho tla re thusa ho haha Holo ea rōna ea ’Muso Gibraltar, kahoo hona joale re thabela ho ba buseletsa mosa oo.’

“Ho tlatseletsa boitekong bo sa khaotseng ba liphutheho tse peli tsa Lipaki tsa Jehova le litsebi tse makholo-kholo tsa bathusi ba tsoang tikolohong ea Andalusia, motse oa La Línea o ile oa etsa qeto ea ho nehelana ka setša se hlokahalang. Ha ramotse oa La Línea a etetse setšeng sena o ile a hlalosa hore ‘ho latela neano, kamehla ba boholong pusong ea Spain ba ’nile ba fana ka litša bakeng sa kaho ea likereke tsa K’hatholike. Ke hobane’ng re ke ke ra etsa se tšoanang ka lihlopha tse ling tsa bolumeli? Ke khahliloe haholo ke ho hloka boithati ha baithaopi bana, ’me ke ikutloa hore ba lokela ho fumana tšehetso ea rōna. Re hloka moea o eketsehileng oa mofuta ona lefatšeng la kajeno le arohaneng.’

“O ile a supa Holo ea ’Muso e le ‘khopotso ea moea oa tšebelisano-’moho.’ Ruri, ntho e neng e khahleha ka ho fetisisa e ne e se moetso oa mohaho oo leha e le boholo ba oona. Ho ena le hoo, se ileng sa khahla batho ba bangata tikolohong eo ke ’nete ea hore o ne o hahiloe ka ho feletseng ke baithaopi ’me o ne o emisitsoe ka lihora tse 48 feela!”

Ho totobetse hore Lipaki tsa Jehova La Línea le libakeng tse mathōkong a teng li ipaka li tšepahalla mantsoe a Ba-Galata 6:10. (NW) Mono moapostola Pauluse o ile a eletsa balumeli-’moho le eena: “Ka hona‚ ka sebele ha re sa na le nako e loketseng a re etseng ho leng molemo ho bohle‚ empa haholo ba amanang le rōna tumelong.”