Na U Tseba Thabo e Tlisoang ke ho Fana?
O NE a qetile lilemo tse ka bang 50 a le mafolofolo tšebeletsong ea Bokreste. Le hoja a ne a fokotse ’meleng ka lebaka la botsofali, o ne a ikemiselitse ho ea Holong ea ’Muso e neng e sa tsoa hahoa. O ile a kena ka holong a ikokotlela ka mor’abo rōna ea mosa oa Mokreste, eaba o tsamaea butle a tobile moo a neng a habile teng—lebokoseng la monehelo. Chelete e fokolang eo a neng a ntse a e boloka ka morero oa ho etsa monehelo o ile a e kenya ka lebokoseng lena. Le hoja a sa ka a khona ho kopanela ka sebele kahong ea holo, o ne a batla ho thusa.
Mosali enoa oa Mokreste a ka ’na a u hopotsa mosali e mong ea tšepahalang—‘mohlolohali oa mofutsana’ eo Jesu a ileng a mo bona a akhela licheletana tse peli tsa tšepe ka letlōleng la tempele la polokelo ea matlotlo. Ha rea bolelloa hore na maemo a hae e ne e le afe, empa ho hloka monna mehleng eo, ho ne ho ka kenya mosali mathateng a maholo a lichelete. Ha ho pelaelo hore Jesu o ile a mo qenehela, etsoe o ne a utloisisa bothata ba hae hantle. Ha a etsetsa barutuoa ba hae mohlala ka eena, o ile a re mpho ea hae e nyenyane e ne e emela “sohle seo a neng a e-na le sona, sohle seo a neng a phela ka sona.”—Mareka 12:41-44.
Ke hobane’ng ha mosali oa mohloki ea joaloka mohlolohali eo ea futsanehileng a ile a itela hakaalo? Ho hlakile hore lebaka ke hore o ne a inehetse ka matla ho Jehova Molimo, eo setsi sa hae sa borapeli se neng se le tempeleng Jerusalema. Le hoja ho ne ho e-na le lintho tse itseng tseo a neng a ke ke a khona ho li etsa, o ne a batla ho ntšetsa pele tšebeletso e halalelang. ’Me e tlameha ebe o ile a thaba e le kannete ha a nehelana ka ntho leha e le efe eo a neng a ka khona ho nehelana ka eona.
Ho Fana Bakeng sa ho Tšehetsa Mosebetsi oa Jehova
Ho ntša menehelo ea lintho tse bonahalang le ea chelete e ’nile ea e-ba karolo ea bohlokoa ea borapeli bo hloekileng, ’me e ’nile ea e-ba ho thabisang haholo. (1 Likronike 29:9) Iseraele ea boholo-holo, menehelo e ne e sa sebelisetsoe feela ho khabisa tempele, empa e ne e boetse e sebelisetsoa ho boloka lintho tsohle tse amanang le borapeli ba Jehova sebakeng seo li ntse li sebetsa. Molao o ne o boletse ka ho toba hore bara ba Iseraele ba nehelane ka karolo ea leshome ea lihlahisoa tsa bona bakeng sa ho tšehetsa Balevi, ba neng ba sebeletsa tempeleng. Empa Balevi le bona ba ne ba lokela ho nehela ho Jehova karolo ea leshome ea lihlahisoa tseo ba neng ba li amohetse.—Numere 18:21-29.
Le hoja Bakreste ba ne ba lokolotsoe linthong tse neng li hlokoa ke selekane sa Molao, molao-motheo o reng bahlanka ba Molimo ba lokela ho nehelana ka lintho tse bonahalang ho tšehetsa borapeli ba ’nete ha oa ka oa fetoha. (Bagalata 5:1) Ho phaella moo, Bakreste ba lekholong la pele la lilemo ba ile ba thabela ho ntša menehelo bakeng sa ho thusa barab’abo bona ba hlokang. (Liketso 2:45, 46) Moapostola Pauluse o ile a hopotsa Bakreste hore feela joalokaha Molimo a ile a ba fa lintho tse molemo ka seatla se bulehileng, le bona ba ne ba lokela ho fa ba bang ka seatla se bulehileng. O ile a ngola a re: “Fana ka litaelo ho ba ruileng tsamaisong ea hona joale ea lintho hore ba se ke ba iphahamisa, le hore ba se ke ba beha tšepo ea bona maruong a sa tsitsang, empa ba e behe ho Molimo, ea re fang lintho tsohle ka ho enneng hore re li thabele; hore ba sebetse se molemo, hore ba rue mesebetsing e metle, hore ba be seatla se bulehileng, ba itokisetse ho arolelana, ba ipolokele ka mokhoa o sireletsehileng motheo o motle bakeng sa ka moso, e le hore ba ka tšoara ka tieo bophelo ba sebele.” (1 Timothea 6:17-19; 2 Bakorinthe 9:11) Ka lebaka la phihlelo eo a bileng le eona, ka sebele Pauluse o ne a ka tiisa mantsoe a Jesu a reng: “Ho fana ho tlisa thabo e khōlō ho feta ho amohela.”—Liketso 20:35.
Kamoo Bakreste ba Fanang Kateng Kajeno
Kajeno, bahlanka ba Jehova ba tsoela pele ho sebelisa maruo a bona bakeng sa ho thusana le ho tšehetsa mosebetsi oa Molimo. Esita le ba futsanehileng ba nehelana ka seo ba ka se khonang. “Lekhoba le tšepahalang le le masene” le ikutloa le ikarabella ho Jehova hore le sebelise hamolemo haholo lichelete tsena tse nehetsoeng. (Matheu 24:45) Lichelete tsena li sebelisetsoa ho hlokomela liofisi tsa makala, ho fetolela le ho hlahisa Libibele le lingoliloeng tsa Bibele, ho hlophisa lipokano tse khōlō tsa Bokreste, ho koetlisa balebeli ba tsamaeang le baromuoa le ho ba romela libakeng tse ling, ho fana ka liphallelo esita le bakeng sa merero e meng e mengata ea bohlokoa. A re bueng ka morero o le mong o joalo—e leng oa ho thusa ka ho fana ka lichelete tsa ho haha libaka tsa borapeli.
Lipaki Tsa Jehova li kopana Liholong tsa tsona Tsa ’Muso ka makhetlo a ’maloa ka beke e le hore li rue molemo thutong ea moea le botsoalleng bo hahang. Leha ho le joalo, maemo a moruo a etsa hore Lipaki linaheng tse ngata, li sitoe ho ikahela Liholo Tsa ’Muso haeba li sa thusoe ka lichelete. Ka hona, ka 1999, Lipaki Tsa Jehova li ile tsa thakhola lenaneo la ho sebelisa lichelete tse tsoang linaheng tse ruileng bakeng sa ho thusa ho haha Liholo Tsa ’Muso linaheng tse futsanehileng. Ho phaella moo, baithaopi ba likete ba ile ba nehelana ka nako ea bona le ho sebelisa bokhoni ba bona, hangata ba sebetsa libakeng tse ka thōko linaheng tsena. Ha ho ntse ho hahoa, Lipaki tsa sebaka ka seng li ithuta tsebo ea ho haha le bokhoni ba ho hlokomela mohaho, ’me Letlōle la Liholo Tsa ’Muso le ba thusa ho reka thepa le lisebelisoa tse hlokahalang. Lipaki tseo hona joale li sebelisang liholo tsena tse ncha li leboha haholo hore ebe balumeli-’moho le tsona ba ile ba nehelana ka nako le chelete. Le tsona li ntša menehelo khoeli le khoeli ho hlokomela Holo ea ’Muso e ncha le ho thusa ho lefella litšenyehelo tsa kaho, kahoo li thusa hore ho hahoe Liholo Tsa ’Muso tse eketsehileng.
Ha ho hahoa Liholo Tsa ’Muso ho sebelisoa mekhoa le thepa ea sebaka ka seng. Le hoja liholo tsena li se majabajaba, empa li ntle, li loketse boemo ebile ke libaka tseo batho ba ka lulang ba phutholohile ho tsona. Ha lenaneo la ho haha le ne le thakholoa ka 1999, linaha tse ka bang 40 tse futsanehileng li ile tsa kenngoa lenaneong lena. Ho tloha nakong eo, lenaneo lena la kaho le ’nile la atolosoa hore le kopanyelletse linaha tse ling tse joalo tse 116, tse akarelletsang karolo e ka holimo ho halofo ea liphutheho tsa Lipaki Tsa Jehova lefatšeng. Lilemong tse hlano tse fetileng, ho ile ha sebelisoa tokisetso ena hore ho hahoe Liholo Tsa ’Muso tse ka holimo ho 9 000, e leng karolelano ea liholo tse ncha tse ka holimo ho tse 5 ka letsatsi! Ho ntse ho le joalo, linaheng tsena tse 116, ho sa ntse ho hlokahala Liholo Tsa ’Muso tse ncha tse 14 500. Ho tšeptjoa hore ka lebaka la tlhohonolofatso ea Jehova, ho ithaopa le ho fana ka seatla se bulehileng ha Lipaki lefatšeng lohle, ho tla ba le lichelete tse lekaneng tsa ho khahlametsa tlhokahalo ena.—Pesaleme ea 127:1.
Liholo Tsa ’Muso li Tlisa Keketseho
Boiteko bona bo boholo bo bile le liphello life ho Lipaki tsa sebaka ka seng le mosebetsing oa ho bolela ka ’Muso? Libakeng tse ngata, palo ea ba bang teng libokeng e eketseha haholo ha Holo ea ’Muso e ncha e qeta ho hahoa. Mohlala oa sena ke tlaleho ena e tsoang Burundi: “Hang feela ha Holo ea ’Muso e qeta ho hahoa, e tlala tsoete! Ka mohlala, ho ile ha hahoa Holo e ’ngoe ea ’Muso bakeng sa phutheho e neng e e-ba le karolelano ea batho ba 100 libokeng tsa eona. Ka har’a Holo ena ea bona e ncha ea ’Muso, batho ba 150 ba khona ho lula hantle. Ha e ne e phethoa, batho ba 250 ba ne ba e-ba teng libokeng.”
Ke hobane’ng ha ho e-ba le keketseho e kaalo? Lebaka le leng ke hore, ka linako tse ling batho ha ba tšepe lihlopha tsa bahoeletsi ba ’Muso tse se nang sebaka se loketseng sa ho kopana tse kopanang ka tlas’a sefate kapa lebaleng. Naheng e ’ngoe, lintoa tsa morabe li ’nile tsa amahanngoa le lihlotšoana tse joalo tsa bolumeli, ’me molao o batla hore liboka tsohle tsa bolumeli li tšoareloe ka har’a ntlo ea borapeli.
Ha Lipaki Tsa Jehova li e-na le liholo tsa tsona sena se boetse se li thusa ho bontša batho ba motse hore ha li latele moruti ea itseng. Ofisi ea lekala ea Lipaki Tsa Jehova e Zimbabwe ea ngola e re: “Nakong e fetileng, barab’abo rōna ba sebakeng sena ba ne ba atisa ho kopanela malapeng, ’me batho ba motse ba ne ba re phutheho ke ea motho eo ho kopaneloang ntlong ea hae. Ba ne ba atisa hore barab’abo rōna ba kena kereke ea ’Nyeo. Hona joale lintho lia fetoha hobane batho ba bona ka ho hlakileng matšoao a khethollang holo e ’ngoe le e ’ngoe e le ‘Holo ea ’Muso ea Lipaki Tsa Jehova.’”
Ba Fanang ba Thabile
Moapostola Pauluse o ile a ngola a re: “Molimo o rata ea fanang a nyakaletse.” (2 Bakorinthe 9:7) Ha ho pelaelo hore menehelo e meholo e thusa haholo. Empa karolo e khōlō ea lichelete tse neheloang bakeng sa mosebetsi oa Lipaki Tsa Jehova e tsoa mabokoseng a menehelo a Holong ea ’Muso. Ebang e meholo kapa e menyenyane, menehelo eohle ke ea bohlokoa ebile ha e hlokomolohuoe. Hopola hore Jesu o ile a ema sebakeng seo ho sona a neng a ka bona ha mohlolohali ea futsanehileng a nehelana ka licheletana tsa hae tse peli tsa tšepe. Mangeloi le Jehova le bona ba ile ba mo bona. Ha re tsebe le lebitso la mohlolohali eo, empa Jehova o ile a tiisa hore ketso ea hae e se nang boikhabi e lula e ngotsoe ka Bibeleng ka linako tsohle.
Ho phaella tabeng ea ho haha Liholo Tsa ’Muso, menehelo ea rōna e tšehetsa likarolo tse ling kaofela tsa mosebetsi oa bohlokoa oa ’Muso. Ho sebelisana ka tsela ena ho re fa lebaka la ho thaba le la ho “rua lipolelo tse ngata tsa teboho ho Molimo.” (2 Bakorinthe 9:12) Barab’abo rōna ba Bakreste ba Benin ba fana ka tlaleho e latelang: “Letsatsi le letsatsi lithapelo tse ngata tsa liteboho li nyolohela ho Jehova bakeng sa ho leboha thuso ea lichelete e tsoang mokhatlong oa bara ba motho oa machaba.” Ka nako e tšoanang, rōna kaofela ba kenyang letsoho ho tšehetseng mosebetsi oa ’Muso ka lichelete re ba le thabo e tlisoang ke ho fana ha Mokreste!
[Lebokose le leqepheng la 22, 23]
Litsela Tseo ba Bang ba Khethang ho Fana ka Tsona
MENEHELO BAKENG SA MOSEBETSI OA LEFATŠE LOHLE
Ba bangata ba behella ka thōko, kapa ba lekanyetsa esale pele chelete eo ba e tšelang mabokoseng a monehelo a ngotsoeng “Menehelo Bakeng sa Mosebetsi oa Lefatše Lohle—Matheu 24:14.”
Khoeli le khoeli, liphutheho li romela chelete ena ofising ea Lipaki Tsa Jehova e sebeletsang linaha tsa habo tsona. Menehelo ea boithatelo ea chelete le eona e ka romeloa ka ho toba ho Watch Tower Bible and Tract Society of Pennsylvania, c/o Accounting Office, Private Bag X2067, Krugersdorp, 1740, South Africa kapa ofising ea lekala e sebeletsang naha ea heno. Licheke li lokela ho ngoloa hore li lefuoe “Watch Tower.” Mabenyane le lintho tse ling tsa bohlokoa le tsona ho ka nehelanoa ka tsona. Menehelo ena e lokela ho tsamaea le lengolo le lekhutšoanyane le bolelang hore lintho tse joalo ke mpho e tobileng.
HO FANA HO RERILOENG
Ho phaella limphong tse tobileng tsa chelete, ho na le mekhoa e meng ea ho fana e ka thusang mosebetsing oa ’Muso o etsoang lefatšeng lohle. Eona e akarelletsa:
Inshorense: Mokhatlo oa Watch Tower o ka ngolisoa e le mojalefa oa inshorense ea bophelo kapa oa tokisetso ea ho tlohela mosebetsi/ea penshene.
Li-stock le Li-bond: Ho ka ’na ha nehelanoa ka li-stock le li-bond ho Mokhatlo oa Watch Tower e le mpho e tobileng.
Litša Tse Nang le Mehaho: Ho ka ’na ha nehelanoa ka litša tse nang le mehaho tse ka rekisoang, ebang ke ka ho li etsa mpho e tobileng, kapa haeba e le litša tsa bolulo, ka ho lokisetsa hore mong’a tsona a tsoele pele a lula ho tsona ha a sa ntse a phela. Ikopanye le ofisi ea lekala naheng ea heno pele u ngolisa setša leha e le sefe se nang le mohaho.
Mangolo a Kabo ea Lefa: Thepa kapa chelete e ka ’na ea fuoa mokhatlo oa Watch Tower e le lefa ka ho e ngolisa ka molao lengolong la kabo ea lefa.
Bakeng sa boitsebiso bo eketsehileng, u ka ikopanya le Accounting Office, ka lengolo kapa ka thelefono, u sebelisa aterese e bontšitsoeng mona ka tlaase kapa ofising ea lekala e sebeletsang naha ea heno.
Accounting Office
Watch Tower Bible and Tract
Society of Pennsylvania
Private Bag X2067,
Krugersdorp, 1740,
South Africa
Thelefono: (011) 761-1000
[Litšoantšo tse leqepheng la 20, 21]
Libaka tse ncha le tsa khale tseo Lipaki Tsa Jehova li tšoarelang liboka ho tsona
Zambia
Central African Republic