Moea o Halalelang​—Ke Hobane’ng ha Batho ba Ferekane Hakaale Hore na ke Eng?

MOEA o halalelang ke eng? Potso ena eona e utloahala e le bonolo, empa ho ka ’na ha e-ba boima ho e fumanela karabo e bonolo. Mopapa Benedict XVI o ile a bolella letšoele le neng le le Australia hore: “Ho bonahala eka ke ntho e ke keng ea etsahala hore re utloisise ka botlalo hore na moea o halalelang ke eng.”

Ha ho pelaelo hore batho ba na le maikutlo a mangata ebile ha ba tsebe hantle hore na ba ka araba joang potso e reng, Moea o halalelang ke eng? Batho ba tloaetse ho araba ka tsela ena:

• Ke motho oa sebele ea phelang ka hare ho barutuoa ba Kreste.

• Ke melao ea saense eo Molimo a e sebelisang.

• Ke pontšo ea hore Molimo o teng linthong tse etsahalang lefatšeng.

• Ke karolo ea Boraro-bo-bong.

Ke hobane’ng ha ho e-na le pherekano e kaale? Pherekano ena e qalile khale lekholong la bone la lilemo C.E. ha batho ba bang ba rutang thuto ea bolumeli ba ne ba re moea o halalelang ke motho eo ka tsela e itseng a lekanang le Molimo. Leha ho le joalo, ena e ne e se thuto e neng e rutoa ke Mangolo kapa e neng e rutoa ke balateli ba pele ba Kreste. New Catholic Encyclopedia e hlalosa taba tjena: “Ho hlakile hore Testamente ea Khale ha e hlalose moea oa Molimo e le motho . . . Moea oa Molimo ha e le hantle ke matla a Molimo.” Eona buka eo e phaella ka ho re: “Litemana tse ngata tsa Testamente e Ncha li hlalosa moea o halalelang e le ntho e itseng, eseng motho; sena se bonoa haholo-holo ha ho shejoa tsela eo moea oa Molimo le matla a hae li tšoanang ka eona.”

Ke ntho e utloahalang hore batho ba thatafalloe ke ho utloisisa tlhaloso ea hore matla ke motho. Ke ka hona phuputso e ’ngoe e ileng ea etsoa United States e ileng ea bontša hore batho ba bangata ba hanana le taba ea hore moea o halalelang ke motho kapa “ntho e phelang.” Na ba nepile? Kapa na re lokela ho lumela batho ba rutang thuto ea bolumeli, ba tsitlellang tabeng ea hore “Moea o Halalelang ke Motho ea ikemetseng joaloka Ntate le Mora”?

E le hore re fumane karabo e ka tšeptjoang, re lokela ho bala Lentsoe la Molimo, e leng Bibele, e hlalosang ka botlalo hore na moea o halalelang ke eng. Moapostola Pauluse o ile a ngola, a re: “Mangolo ’ohle a ngotsoe ka tšusumetso ea Molimo ’me a molemo bakeng sa ho ruta ’nete, ho lokisa liphoso.”—2 Timothea 3:16, Today’s English Version.

Ke hobane’ng ha u lokela ho tseba seo e leng ’nete ka moea o halalelang? Hobane ho tseba ’nete eo ho ka ’na ha u fa monyetla oa hore u fumane thuso e tsoang ho Molimo. Na ka linako tse ling u ee u ikutloe u felloa ke matla a hore u tsoele pele? Jesu o ile a tšepisa barutuoa ba hae ho re: “Le ’ne le kōpe, ’me le tla fuoa . . . Haeba lōna . . . le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!”—Luka 11:9, 13.

Lihloohong tse latelang, Mangolo a tla re hlalosetsa hore na moea o halalelang ke eng. Re tla boela re bone hore na o ka re thusa joang bophelong.

[Ntlha e Qolotsoeng e leqepheng la 3]

Mangolo a re hlalosetsa hore na moea o halalelang ke eng