Ho Hlaolela Thahasello Maetong a ho Boela
1 Ka nepo tšebeletso e ’nile ea tšoantšoa le ho lema, ’me ho etsa maeto a ho boela ha bapisoa le ho hlaolela lijalo le ho nosetsa. (Matt. 13:23; Luka 10:2; 2 Ba-Kor. 9:10) Kaha re “ba sebetsang le Molimo,” re na le boikarabelo ba ho thusa peō leha e le efe e sa tsoa mela hore e hōle ’me e behe litholoana. (1 Ba-Kor. 3:6, 9) Re ka finyella see hamolemo joang?
2 Potlakela ho etsa maeto a ho boela ho bohle ba bontšitseng thahasello. Hlahloba litlaleho tsa hao tsa ntlo le ntlo, ’me u etse qeto hore na u tla etela mang ’me u bue ka eng. Ka tloaelo taba eo le tla buisana ka eona e tla reroa ke seo le buisaneng ka sona ketelong ea pele. Tenyetseha, u nahanne likhopolo tse ling tsa Mangolo tseo u ka li kenyelletsang. Kamehla ho molemo ho sebelisa Bibele, u lemoha matla a eona a ho finyella pelo.—Ba-Heb. 4:12.
3 Haeba u siile bukana e lekanang le makasine “Na Ruri Molimo oa re Tsotella?,” u ka qala ka ho bua mantsoe a kang ana:
◼ “Batho ba bangata ba tšepahalang ba lumela hore Molimo o tla felisa lefatše, ha ba bang ba tšaba hore motho o tla etsa seo ka boeena. U nahana joang? [Emela karabo.] Bibele e re bolella hore ho e-na le ho felisa lefatše, Molimo o tla le hloekisa ho se loke, a le etse sebaka sa khotso le tšireletseho.” Lebisa tlhokomelo leqepheng la 22, ’me u bale Liproverbia 2:21, 22, e qotsitsoeng moo. Haeba ho bontšoa thahasello, hlalosa tokisetso ea thuto ea Bibele ea lehae kapa u nehelane ka limakasine tsa morao-rao, ’me le behelane nako bakeng sa ho khutlela le ho buisana ka ho eketsehileng ka lefatše le lecha le tšepisitsoeng ke Molimo.
4 Haeba u tsamaisitse bukana e lekanang le makasine ea “Bonang,” u ka ’na ua re:
◼ “Ha ke ne ke u etetse lekhetlong le fetileng, re ile ra bala ka Bibeleng ka tšepiso ea Molimo ea ho etsa lefatše paradeise, e tšoanang le e bontšitsoeng sekoahelong sa bukana e lekanang le makasine eo ke u sietseng eona. Re ka thabela tlhohonolofatso ena ka ho ithuta ho eketsehileng ka thato ea Molimo le kamoo e re amang kateng.” Bala Johanne 17:3, ebe u phetla lirapeng tsa 52 le 53 leqepheng la 27. Ka bokhutšoaane bua ka hore na ke hobane’ng ha ho hlokahala ho fumana tsebo e nepahetseng ea Lentsoe la Molimo.
5 Ha u khutlela moo u tsamaisitseng bukana e lekanang le makasine “Morero oa Bophelo” ho motho ea sekametseng bolumeling, u ka ho fumana ho loketse ho re:
◼ “Ho ka etsahala hore ebe u ’nile ua pheta Thapelo ea Morena ka makhetlo a mangata. Ho tla monahano ofe kelellong ea hao ha u kōpa hore ’Muso oa Molimo o tle?” Ka mor’a hore mong’a ntlo a arabe, bua ka lirapa tsa 8 le 9 leqepheng la 26, ebe u bala Daniele 2:44. Mohlomong u ka ntšetsa pele puisano ka ho hlalosa hore ho tla ha ’Muso oa Molimo ho tla bolela ho felisoa ha bokhopo le ho utloa bohloko. Totobatsa hore haeba re lokile mahlong a Molimo, re ka thabela bophelo bo sa feleng Paradeiseng lefatšeng lena.
6 Hopola hore leeto la ho boela le ka etsoa ho mang kapa mang ea ikemiselitseng ho mamela, ebang ho tsamaisitsoe sengoliloeng kapa che. Leka ho behella nako ka thōko beke e ’ngoe le e ’ngoe bakeng sa ho etsa maeto a ho boela. Jehova o tla hlohonolofatsa boiteko ba hao bo mafolo-folo ba ho hlaolela thahasello eo u e fumaneng. E se eka bo ka beha litholoana tlotlisong ea hae.—Joh. 15:8.