Bontša Hore Ua Tsotella ka ho Etsa Maeto a ho Boela
1 Ho batla ba thahasellang ka ntlo le ntlo ho bontša takatso ea hao ea ho neha ba bang monyetla oa ho utloa molaetsa oa ’Muso. Kahoo tiisa hore u khutlela moo u tsamaisitseng buka khoeling ea January, kaha ena e le tsela e molemo ea ho bontša hore u tsotella ba bang.
2 U ka khutlela moo u tsamaisitseng buka “Khotso ea ’Nete le Tšireletseho—U Ka Li Fumana Joang?” ka nehelano e khutšoanyane e kang ena:
◼ “Baeta-pele ba lefatše kajeno ba hlōlehile ho tlisa khotso le tšireletseho. Jehova Molimo ke eena feela ea ka etsang sena. Bibele e re bontša seo re lokelang ho se etsa. [Buisana ka lintlha tse serapeng sa 1 le 2 leqepheng la 175, ebe u bala Esaia 26:4.] Ke rata ho u bontša kamoo buka ena e ka u thusang kateng.”
3 Haeba mong’a ntlo a sa ka a nka buka leha e le efe, empa a bontšitse thahasello molaetseng oa rōna, u ka leka katamelo ena:
◼ “Ke thabile haholo ho u fumana lapeng hape. Leetong la ka la pele u bontšitse thahasello tšepisong ea Bibele e tlalehileng ho Tšenolo 21:3, 4. Kajeno ke rata ho u bontša kamoo Molimo a tla phethahatsa tšepiso ea hae ea ho etsa lefatše lena paradeise. Hlokomela se boletsoeng mona ho Pesaleme ea 37:9-11. [E bale.] Molimo o tla felisa batho ba khopo. Na u ka rata ho ba har’a ba bonolo ba tla thabela khotso e ngata? [Emela karabo.] Hape, boela u hlokomele temana ea 29 le 34. Ke tla rata ho khutla le ho ntšetsa puisano ea rōna pele ka nako e ho loketseng.” Ho itšetlehile ka maemo, mohlomong u ka batla ho nehelana ka limakasine tsa morao-rao. Etsa tokisetso e tiileng ea ho khutla.
4 Mohlomong u ka khutlela moo bukana e lekanang le makasine “Na Ruri Molimo oa re Tsotella?” e tsamaisitsoeng ka ho sebelisa tlhahiso ena:
◼ “Nakong e fetileng ke u sietse kopi ea bukana ena e lekanang le makasine, e phahamisang potso ea bohlokoa: ‘Na ruri Molimo oa re tsotella?’ Ka mor’a ho hlahloba bukana ena, u entse qeto efe? [Emela karabelo.] Mohlomong u ile ua khothatsoa ke ho bala mangolo a tšepisang lefatše le lecha la paradeise, moo re ka phelang ka khotso. [Phetla setšoantšo se leqepheng la 2 le 3, ’me u totobatse tse ling tsa likarolo tse ipiletsang tsa lefatše le lecha.] Ke kholisehile hore uena le baratuoa ba hao le ka rata ho phela lefatšeng le joalo. Hlokomela seo serapa sa 16 leqepheng la 31 se se bolelang ka sena.” Bala serapa, ’me u bontše hore ho batla Jehova ho bolela ho ithuta ho eketsehileng ka eena le ka merero ea hae ka ho ithuta Lentsoe la hae, Bibele.
5 Ho etsa maeto a ho boela a atlehang, re tlameha ho bontša batho hore rea ba tsotella. Ho tla thusa haholo ho hopola melao-motheo e meraro. E-ba ea ikamahanyang le maemo. E ka ’na eaba mong’a ntlo ha aa tloaela ho beha nako ka thōko bakeng sa ho buisana ka Bibele. Beha taba ka bokhutšoanyane. U se ke ua lula nako e telele haholo kapa ho tšohla lintlha tse ngata qalong. Makhetlong a mangata, ho tla ba le karabelo e molemo maetong a hao ha u tšohla lintlha tse ’maloa ka nako e khutšoanyane. E-ba le mofuthu le botsoalle. Bontša mong’a ntlo hore u mo thahasella joaloka motho ka bomong. Pakane ea rōna nakong eo ke ho etsa hore mong’a ntlo a kopanele moqoqong oa Mangolo. Joale re batla ho qala thuto e atlehang ea Bibele.
6 Jehova u behile mohlala o phethahetseng e le Molisa ea nang le lerato ea tsotellang linku tsa hae. (Ezek. 34:11-14) Boiteko ba rōna bo tšepahalang ba ho etsisa tlhokomelo ea hae boa mo khahlisa, bo bontša lerato la rōna, ’me bo tlisetsa ba bang litlhohonolofatso.