Lentsoe la ’Muso—Ho le Utloisisa
1 Setšoantšong sa hae sa mojali, Jesu o ile a bolela hore peō e oetseng “mobung o motle” e emela “motho ea utloang lentsoe, ea le utloisisang.” (Matt. 13:23) Ka mor’a ho utloa ka ’Muso, na re ‘utloisisitse’? O susumetsa bophelo ba rōna hakae? Na re behile lithahasello tsa ’Muso sebakeng sa pele, ka hona re senola hore re utloisisitse molaetsa?
2 Kutloisiso e nepahetseng ea molaetsa oa ’Muso e hloka thuto ea botho. Ho hlokahala hore re iphe nako ea ho nahanisisa ka lijo tsa moea tse fanoang. Ho bala Molula-Qhooa ka lepotla-potla ho tšoana le ho ja lijo tse monate tsa phepo e ntle ka ho phaka. Na u ipha nako ea ho nahanisisa ka lijo tsa moea? Bakeng sa ho rua molemo o moholo, ho tlameha ho be le tšusumetso le takatso e matla ea lijo tsa moea. Haeba tsena li le sieo, mesebetsi e meng e ka nyenyefatsa ea thuto ea botho kapa ea qeta nako eo re e hlokang bakeng sa eona. Ho tšoarella kemisong e ntle ea ho ithuta ha ho bonolo. Le hoja ho hloka hore motho a leka-lekanye ka hloko lintho tse tlang pele, matlotlo a moea a fumanoang ka hona ke a bohlokoahali.—Liprov. 3:13-18; Ba-Kol. 1:27.
3 Ho Hlahlobisisa Mangolo ho re thusa hore letsatsi le leng le le leng re be le mehopolo e metle, e hahang ka ’Muso. “Bafumanehi moeeng” ba lokisetsa ho qeta metsotso e seng mekae letsatsi le leng le le leng ba bala temana ea letsatsi le litlhaloso. (Matt. 5:3) Litemana tse ngata li hlalosa litšobotsi tse sa tšoaneng tsa ’Muso. Ka mohlala, ka la 22 November, 1994, temana e bontšitsoeng e ne e le Mattheu 13:4. Tlhaloso e ile ea tšohla tšepo ea ’Muso ’me ea re hopotsa ka likotsi tsa botsoalle bo bobe le beng ka motho le baahisani. ’Nete ea hore mahaeng a Bethele ho potoloha lefatše, ho ba le puisano ea metsotso e 15 ka temana ea letsatsi hoseng ho hong le ho hong ha letsatsi la mosebetsi ho hatisa melemo le botebo ba ho nahana ka temana ea letsatsi hammoho. Na lelapa la hao le kenyellelitse ho nahana ho joalo kemisong ea lōna ea letsatsi le letsatsi?
4 Ha kananelo ea hao e hōla bakeng sa ’Muso, ho tla ba le tšusumetso e khōloanyane ea ho arolelana molaetsa oa ’Muso le ba bang. Molula-Qhooa le Tsoha! li fana ka se ka bapisoang le mafura a kelello a fepang likelello tsa rōna ka boitsebiso bo bocha, bo nakong. Li re thusa ho hlokomelisisa kamoo lefatše le hlokang ’Muso oa Molimo kateng. Li re thusa ho ba batho ba moea, ba ‘tsebang khopolo ea Kreste.’ (1 Ba-Kor. 2:15, 16) Sena sohle se ka matlafatsa tšepo ea rōna ’me sa eketsa cheseho ea rōna ea ho arolelana le ba bang tšepo ea ’Muso.—1 Pet. 3:15.
5 Ke habohlokoa haholo hore rōna ka borōna re utloisise molaetsa oa ’Muso. ’Muso ke tsela eo Molimo a tla e sebelisa ho tšehetsa bobusi ba hae, a felise bokhopo, ’me a tlise lefatše le lecha—paradeise. Jesu o ile a re laela hore re o behe pele bophelong ba rōna. Re tlameha ho ba bafo ba kang linku e le hore re ka phela tlas’a puso ea oona. (Matt. 6:10, 33) Sebelisa monyetla o mong le o mong ho thabela litlhohonolofatso tsa oona.