Tokisetso—Senotlolo sa Katleho
1 Ho lokisetsa esale pele bakeng sa tšebeletso ho tla thusa ho hlōla ho tsila-tsila leha e le hofe hoo motho a ka bang le hona ka ho kopanela tšebeletsong ea tšimo. Ha u atamela menyako, u tla tseba seo u batlang ho se bolella beng ba matlo. U ke ke ua tšoha maemo a thata ao mohlomong u ka thulanang le ’ona. Ha u khutlela lapeng u e-tsoa tšebeletsong, u tla ikutloa u khothetse ka ho tseba hore u entse boiteko bo matla tšebeletsong. E, ho lokisetsa hantle ke senotlolo se chorisang tsebo ea rōna ea ho bolela le ho ruta.
2 Pauluse o hateletse ho itokiselletsa ka ho re phehella hore ‘maotong a rōna re roale lihlomo tsa litaba tse molemo tsa khotso.’ (Baef. 6:15) Sena se akareletsa ho lokisa kelello ea rōna le pelo le ho ba le kholiseho le ho ba le boikutlo ba boikemisetso. Ha re itokiselitse ho abelana ’nete le ba bang, mosebetsi oa rōna o tla putsoa ka litholoana tsa ’Muso tse tlang ho re thabisa.—Lik. 20:35.
3 Kamoo ho ka Lokisetsoang Mosebetsi oa Boboleli: Re lokela ho khetha nehelano eo re ikutloang hore re tla nolofalloa ho e sebelisa, mohlomong re ka e khetha har’a tseo ho entsoeng litlhahiso ka tsona bukeng ea Ho Bea Mabaka kapa tse fumanoang leqepheng la ho qetela la Tšebeletso ea Rōna ea ’Muso. Nahanela ka botebo mangolo ao u rerang ho a sebelisa, u hlahlobe hore ke mantsoe afe kapa lipolelo tseo u tla li hatisa hore lintlha tsa hao tsa sehlooho li hlake. Ha ho hlokahale hore u tšoare nehelano ka hlooho; ho e-na le hoo, ho molemo ho kenya khopolo eo ka kelellong, e hlalose ka mantsoe a hao ’me u e bue ka tsela eo u nahanang hore e tla ipiletsa ho momameli oa hao.
4 Hlahloba khatiso eo u rerang ho nehelana ka eona ’me u khethe lintlha tsa puisano tse seng kae tse thahasellisang. Khetha ntho e itseng eo u ikutloang hore e tla ba e thahasellisang ho batho tšimong ea lōna. Nahanela kamoo u ka ’nang ua feto-fetola nehelano ea hao kateng bakeng sa beng ba matlo ba sa tšoaneng—monna, mosali, motho ea hōlileng kapa mocha.
5 Na u kile ua leka ho itlhakisa? Kopanang joaloka lelapa kapa le le bahoeletsi ho buisana ka linehelano tse tla sebetsa ka ho atlehileng, ebe joale le li pheta ka lentsoe le phahameng hore bohle ba tle ba li hopole. Lekang ho sebelisa boemo ba sebele bophelong esita le likhanyetso tseo ho ka thulanoang le tsona tšimong. Boikoetliso bo joalo bo tla ntlafatsa ho bua ha lōna phollatsi, ho tla atlehisa boboleli ba lōna haholoanyane le hore le be ba sebete haholoanyane.
6 Ho phaella ho lokisetseng le ho ikoetlisetsa nehelano ea hao, u lokela ho ipotsa hape: ‘Na liaparo tseo ke rerang ho li apara li loketse tšebeletso? Na ke na le seo ke se hlokang mokotlaneng oa ka oa libuka, ho akareletsa lingoliloeng tseo ke rerang ho li sebelisa? Na li boemong bo botle? Na ke nkile buka ea ka ea Ho Bea Mabaka, lipampitšana, litlaleho tsa ntlo le ntlo le pensele?’ Ho lokisetsa hantle esale pele ho tla tlatsetsa haholo letsatsing le hlahisang litholoana tšebeletsong.
7 Hoba re etse sohle se matleng a rōna ho itokisa, re lokela ho rapella moea oa Jehova hore o re thuse hore re atlehe. (1 Joh. 5:14, 15) Ho ba seli ka ho lokisetsa ho tla fella ka hore re fumane thabo e khōloanyane mosebetsing oa rōna ha re ntse re ‘phetha bosebeletsi ba rōna ka botlalo.’—2 Tim. 4:5.