U Rerile ho Etsa’ng Lehlabuleng Lee?
1 Na hase ’nete hore ho ka etsahala hore re finyelle lipakane tsa rōna tsa bohlokoa haeba re rera ho sebelisa nako eo re nang le eona ka tsela e molemo ka ho fetisisa? Nako ea lehlabula e re fa menyetla e sa tšoaneng eo ka eona re ka ntšetsang pele lithahasello tsa puso ea Molimo. (Liprov. 21:5) E meng ea eona ke efe?
2 Kopano ea “Tsela ea Molimo ea Bophelo” ke ketsahalo e ’ngoe eo kaofela ha rōna re lokelang ho e akarelletsa mererong ea rōna. Lokisetsa nako ea ho ba sieo mosebetsing e le hore u tle u be teng letsatsi le leng le le leng la kopano. Etsa litokisetso bakeng sa bolulo le mokhoa oa ho tsamaea nako e telele esale pele.
3 Ke hobane’ng ha u sa itherele ho eketsa mosebetsi oa hao oa tšebeletso ea tšimo nakong ea lehlabula? Lihora tse teletsana tsa motšehare le boemo bo futhumetseng ba leholimo li ka ’na tsa u lumella hore u qete nako e eketsehileng mosebetsing oa boboleli. Nako ea phomolo ea likolo e fa bacha monyetla oa hore ba nke bopula-maliboho bo thusang ba khoeli kapa ba likhoeli tse ’maloa tsa lehlabula. Ba bang le bona ba ka rera esale pele ho nka bopula-maliboho bo thusang ka November, kaha e tla be e e-na le Lisontaha tse hlano. Kaofela ha rōna a re itekeng ka matla ho kopanela tšebeletsong ka ho feletseng ka hohle kamoo ho ka khonehang kateng.
4 Haeba tšimo ea phutheho ea lōna e sebetsoa khafetsa, ke hobane’ng ha u sa itherele ho thusa phutheho e ’ngoe e haufi e hlokang thuso ho koahela tšimo ea eona? Molebeli oa potoloho a ka tsebisa baholo ka litlhoko tsa sebaka sa lōna. Haeba u tla be u ea matsatsing a phomolo hōle le hae, lokisetsa ho ba teng libokeng le ho kopanela tšebeletsong ea tšimo le phutheho ea sebakeng seo. Haeba u etela beng ka uena bao eseng Lipaki tsa Jehova, lokisetsa esale pele litsela tseo ka tsona u ka arolelanang ’nete le bona.
5 U rerile ho etsa’ng lehlabuleng lee? Ntle ho pelaelo u batla ho ikhatholla ’meleng. Empa u se ke ua hlokomoloha menyetla ea bohlokoa haholoanyane ea ho imatlafatsa moeeng ka ho tsoela pele u beha ’Muso pele bophelong ba hao.—Mat. 6:33; Baef. 5:15, 16.