Ho Qalisa Lithuto ka Bukana ea Seo a se Hlokang
1 Litlaleho tse tsoang lefatšeng ka bophara li bontša hore bukana ea Ke Eng Seo Molimo a se Hlokang ho Rōna? ke thuluse e matla ea ho ruta batho ’nete. Beke le beke ho qalisoa lithuto tsa Bibele tse likete ka bukana ena. Na u se u atlehile ho qalisa le ho khanna thuto ea Bibele ka bukana ea Seo a se Hlokang?
2 Le hoja ba bangata ba nolofalloa ke ho nehelana ka bukana ena, ba bang ba thatafalloa ke seo ba ka se buang hore ba hle ba qalise thuto. Ke mekhoa efe eo ba bang ba fumaneng e atleha ha ba qalisa lithuto tsa Bibele ba sebelisa bukana ea Seo a se Hlokang? Litlhahiso tse latelang li ka thusa.
3 Bontša Mokhoa oa ho Khanna Thuto: Ha re eta ka lekhetlo la pele kapa re etsa leeto la ho boela, re ka bontša kamoo thuto ea Bibele e tla tsamaisoa kateng, ho e-na le ho buella thuto ea Bibele feela ho mong’a ntlo. Sena se tla felisa lithuto tsa sephiri le ho tšoenyeha tse ka bang teng tseo beng ba matlo ba bangata ba li amahanyang le lentsoe lena “thuto.” Hang ha re ithutile ho bontša mokhoa oo thuto e khannoang ka oona, re tla fumana hore re ka hla ra qalisa thuto ka kenyelletso e bonolo feela.
4 Senotlolo ke ho Lokisetsa: Cheseho ea rōna ea ho qalisa lithuto tsa Bibele e amana ka ho toba le hore na re lokiselitse hantle hakae. Ho lokisetsa esale pele ho tla re thusa ho hlōla ho tsilatsila leha e le hofe hoo re ka bang le hona hore re kopanele mosebetsing oa ho khanna lithuto tsa Bibele. Ha re itloaetsa linehelano tsa rōna khafetsa, re tla bua ka mokhoa o phollatsi haholoanyane, re khone ho itlhalosa ka mokhoa oa tlhaho re sebelisa mantsoe a rōna. Sena ha se na ho thusa rōna feela hore re phutholohe, empa se tla etsa hore mong’a ntlo le eena a phutholohe.
5 Ha u etsa boitlhakiso, ho molemo ho lekanyetsa nako ea nehelano ea hao e le hore u ka tsebisa mong’a ntlo hore na ho tla nka nako e kae ho bontša mokhoa oa ho khanna thuto. Ka mor’a hore a ipolele lebitso, mor’abo rōna e mong o re: “Ke tlile mona ho tla u bontša lenaneo la rōna la thuto ea Bibele e sa lefelloeng. Ho nka metsotso e ka bang mehlano hore ke u bontše kamoo e tšoaroang kateng. Na u ka ba le nako ea ho mamela ka metsotso e mehlano?” Thuto ea 1 ea bukana ea Seo a se Hlokang e ka bontšoa ka metsotso e ka bang mehlano. Ho hlakile hore ke mangolo a itseng feela a ka baloang ka nako eo, empa ka ho phetha thuto ea pele ka metsotso e seng mekae, mong’a ntlo o tla khona hore a latsoe thuto ea hae ea pele. Joale mo tsebise hore ha u khutlela ho tla ithuta Thuto ea 2, u tla nka metsotso e 15 feela.
6 Kenyelletso e latelang e ipakile e atleha:
◼ “Ke lakatsa ho u bontša kamoo thuto ea Bibele ea lehae e bonolo e tšoaroang kateng, empa e le e khutsufalitsoeng, re sebelisa bukana ena ea Ke Eng Seo Molimo a se Hlokang ho Rōna? Batho ba bangata ba fumane hore ka metsotso ena e fokolang e 15 feela ka beke, ka libeke tse 16, ba ka fumana likarabo tsa Mangolo tse khotsofatsang lipotsong tsena tsa bohlokoa tsa Bibele.” Ka bokhutšoanyane bontša lethathamo la tse ka hare. Ha u phetla Thuto ea 1, e-re: “Haeba u ka re fa metsotso e ka bang mehlano, re lakatsa ho u bontša kamoo sena se sebetsang kateng. Sehlooho sa Thuto ea 1 se re ‘Kamoo U ka Fumanang Seo Molimo a se Hlokang.’” Ebe joale u bala lipotso tse tharo, ’me u hlalose lipalo tse ka masakaneng. Bala serapa sa 1, ’me u bontše mong’a ntlo kamoo a ka fumanang karabo kateng. Joale mong’a ntlo a ka ’na a kōptjoa hore a bale serapa sa 2. Ebe joale u re: “U itšetlehile ka boitsebiso bona, u ne u tla araba potso ee joang? [Bala potso hape, ’me u emele mong’a ntlo ho fana ka tlhaloso.] U tla hlokomela hore ho na le mangolo a tsamaisanang le serapa ka seng. Mangolo ao a lebisa tlhokomelo ea rōna karabong ea Bibele lipotsong tsena. Ka mohlala, e-re re bale 2 Timothea 3:16, 17 ’me re bone hore na e tšehetsa karabo eo u faneng ka eona mabapi le mongoli oa Bibele.” Ka mor’a hore u bale serapa sa 3, u botse potso le ho bala Johanne 17:3, lebisa tlhokomelo ea mong’a ntlo tsebong eo a seng a e fumane ka ho hlahloba Thuto ea 1. Mothating ona u ka phetla Thuto ea 2 ’me ua bala potso ea ho qetela, “Ke litsela life tse peli tseo re ka ithutang Molimo ka tsona?” Ebe joale ua botsa: “U tla ba le metsotso e 15 neng e le hore re ka tla hlahloba Thuto ea 2 le ho fumana karabo?”
7 Ke habohlokoa ho boloka puisano e le bonolo le ho babatsa mong’a ntlo neng le neng ha ho khoneha. Ha u lokisetsa leeto le leng, ho e-na le ho ’motsa hore na a ka thabela ho tsoela pele, mo khothalletse feela hore a latele mokhoa o tšoanang bakeng sa thuto e latelang. Mo tsebise hore u tla thabela ho khutlela ho eena. Bahoeletsi ba bang ba ile ba etsa tlhahiso ea ho hlahloba thuto ka thelefono haeba ho le boima ho behelana nako. U ka boela ua khothalletsa seithuti hore se behe bukana eo sebakeng se sireletsehileng, moo e ka fihleloang habonolo e le hore e ka ba haufi bakeng sa ha u etsa leeto le latelang.
8 E-ba le Boikemisetso: Le hoja senotlolo sa katleho e le ho lokisetsa, re lokela ho ikemisetsa ho latella thahasello. Ho ruta thuto e itseng ka metsotso e seng mekae e ka ba ho phephetsang, kahoo ikemisetse ho itloaetsa nehelano ka makhetlo a mangata kamoo ho hlokahalang e le hore u bue ka mokhoa o phollatsi ha u bontša kamoo thuto e khannoang kateng. Leka ho bontša motho e mong le e mong eo u kopanang le eena lapeng, ha u paka ka mokhoa o sa reroang le ha u paka ka thelefono hore na thuto e khannoa joang. Haeba u thatafalloa ke ho qalisa thuto ea Bibele, u se ke ua nyahama. Hore re atlehe ho qalisa lithuto tsa Bibele ho hlokahala boikemisetso le takatso e tiileng ea ho fetisetsa ’nete ho ba bang.—Bagal. 6:9.
9 Ka ho sebelisa litlhahiso tsena, le uena u ka ba le tokelo ea ho thusa motho e mong hore a kene tseleng e isang bophelong, ka ho qalisa le ho khanna thuto ea Bibele ka bukana ea Seo a se Hlokang.—Mat. 7:14.