Ho Rua Molemo ka ho Feletseng Kopanong ea Setereke ea “Baboleli ba ’Muso ba Chesehang”
1 Lenaneo le Susumetsang: E bile lenaneo le susumetsang hakaakang leo re ileng ra le thabela kopanong e sa tsoa feta ea setereke! Re ne re bokane hammoho ka morero o tšoanang, oa ho hlomelloa hamolemo ho bolela ’Muso oa Molimo ka cheseho. Na u sa hopola hore sebui sa pele se ile sa hlalosa poleloana “ho bolela” joang? Na u sa hopola hore na re ile ra khothalletsoa ho batlisisa eng puong e neng e e-na le sehlooho se reng “U se ke Ua Tšoha U Tsebe Hore Jehova o na le Rōna”? Ho fihlela joale u se u hlahlobile lipale tse kae tsa bophelo?
2 Neheletsano tlas’a sehlooho se reng “Boleng ba Tumelo ea Rōna bo Lekoa ka Liteko Tse sa Tšoaneng” e ile ea fana ka mabaka a mararo a ka sehloohong ao ka ’ona Jehova a lumellang mahloriso. Na u ka hlalosa hore na ke afe? Ho na le motheo ofe oa Mangolo oa ho se jele paate ha rōna ha Bokreste? Re ile ra khothalletsoa hore re etse eng ho itokiselletsa liphephetso tse ka ’nang tsa tlisoa ke ho se jele paate ha rōna? Ho mamella ha rōna liteko ka botšepehi ho tlotlisa Jehova joang?
3 Ke ketsahalo efe eo ka ho khetheha e ileng ea u matlafatsa tšoantšisong e nang le sehlooho se reng “Ema U Tiile Linakong Tse Thata”? Re ka tšoana le Jeremia joang?
4 Puo ea phatlalatsa e neng e re “Boemo ba Lefatše Lena Boa Fetoha,” e ile ea hlalosa liphetoho life tsa bohlokoa tse larileng ka pele le tse lebisang letsatsing la Molimo le susumetsang tšabo? Ha u ntse u mametse puo e phethelang e neng e re “Ateloang ke Mesebetsi e Metle Joaloka Baboleli ba ’Muso ba Chesehang,” u ile ua amahanya boitsebiso boo joang le tšebeletso ea hao?
5 Ho Sebelisa Lintlha Tse Khōlō: Joalokaha ho ile ha hlalosoa puong e reng “Iponahatseng le le ba Lebohang,” re ka bontša ho teba ha kananelo ea rōna ho Jehova joang? Puong ea sehlooho e reng “Baboleli ba ’Muso ba Susumetsoang ke Cheseho,” re ile ra khothalletsoa ho etsisa cheseho ea mang? Re ile ra khothalletsoa ho itlhahloba lintlheng life?
6 Neheletsano tlas’a sehlooho se reng “Boprofeta ba Mikea bo re Matlafalletsa ho Tsamaea ka Lebitso la Jehova,” e ile ea totobatsa litlhokahalo life tse tharo tseo re lokelang ho li finyella e le hore Jehova a re amohele? Na li ka finyelloa? (Mik. 6:8) Ho latela puo e neng e re “Lula U Hloekile ka ho Sireletsa Pelo ea Hao,” re lokela ho lula re hloekile boitšoarong ka litsela life? Puo e neng e re “Itebele Khahlanong le Thetso” e ile ea re lemosa hore re se ke ra thetsoa le ho thetsa ba bang lintlheng life?
7 Ke lintlha life tse molemo tse hlahileng neheletsanong e nang le sehlooho se reng “Baboleli ba ’Muso ba Tlotlisang Tšebeletso ea Bona” tseo u seng u qalile ho li sebelisa tšebeletsong ea hao? Ho ile ha sekasekoa Bafilipi 4:8 puong e neng e re “Moqoqo o Likolohang Linthong Tsa Moea oa Haha.” Lengolo leo le re thusa joang ho etsa hore moqoqo oa rōna e be oa moea, hona re ka etsa see neng?
8 Puo e neng e re “Tšepa Jehova ka ho Feletseng Linakong Tsa Mahlomola” e ile ea tšohla kamoo re ka sebetsanang le likoluoa kateng, maemo a thata a tsa lichelete, ho kula, mathata a lelapa le bofokoli bo phehellang. Re ka bontša joang hore re tšepa Jehova ha re tobane le maemo aa?
9 Matlotlo a Macha a Moea: Re ile ra thabela ho amohela buka e ncha ea Rapela Molimo a le Mong Feela oa ’Nete. U ile ua ikutloa joang ha ho phatlalatsoa morero oa eona? Ke hobane’ng ha ho tla ba molemo ho e sebelisa e le buka ea bobeli e ithutoang mosebetsing oa rōna oa ho etsa barutuoa?
10 Ka mor’a moo re ile ra amohela buka ea bohlokoa e nang le sehlooho se reng Atamela ho Jehova. E na le litšobotsi life tse ling tse ikhethang? U rata lipapiso life ka ho khetheha? Na ho e bala ho u atamelitse haufi-ufi le Jehova? Ke bo-mang ba bang ba ka ’nang ba rua molemo ho eona?
11 Kopano ea Setereke ea “Baboleli ba ’Muso ba Chesehang” e re file khothatso ea moea eo re e hlokang hore re tobane le linako tsena tse thata. E le hore re rue molemo ka ho feletseng tokisetsong ena e ikhethang ea moea, e se eka re ka etsa sohle se matleng a rōna ho hopola se builoeng, re ananele seo re se amohetseng le ho sebelisa seo re ithutileng sona. (2 Pet. 3:14) Ho etsa joalo ho tla re matlafalletsa ho lula re tšepahala le ho ba baboleli ba ’Muso ba chesehang, re etsisa Morena oa rōna Jesu Kreste, ’me re etsa tsohle tlotlisong ea Jehova.—Bafil. 1:9-11.