Tšebeletso ea Bokreste—Ke Mosebetsi oa Rōna o ka Sehloohong
1 Kaofela re na le mesebetsi e sa tšoaneng eo re tlamehang ho e etsa. Molimo o hloka hore motho a hlokomele ba ntlo ea hae. (1 Tim. 5:8) Leha ho le joalo, mosebetsi ona o hlokoang ke Molimo oa hore motho a hlokomele ba ntlo ea hae ha ea lokela ho ba oa bohlokoa ho feta mosebetsi oa ho bolela ka ’Muso le oa ho etsa barutuoa.—Mat. 24:14; 28:19, 20.
2 Jesu o re sietse mohlala hore re o latele ha re ‘batla ’muso pele.’ (Mat. 6:33; 1 Pet. 2:21) Le hoja a ne a se na lintho tse ngata tse bonahalang, o ne a amehile ka ho feletseng ka ho etsa thato ea Ntate oa hae. (Luka 4:43; 9:58; Joh. 4:34) O ile a ikitlaelletsa ho paka ha monyetla o mong le o mong o hlaha. (Luka 23:43; 1 Tim. 6:13) O ile a khothalletsa barutuoa ba hae ho ba le thahasello e tebileng joalo mosebetsing oa kotulo.—Mat. 9:37, 38.
3 Ho Etsisa Jesu Kajeno: Re ka etsisa mohlala oa Jesu ka ho phehella ho phela bophelo bo sa rarahanang bo likolohang tšebeletsong ea Bokreste. Haeba re e-na le lintho tse hlokahalang bophelong, a re eleng hloko keletso ea Bibele e reng re se ke ra ipokella ka lintho tse eketsehileng tsa lefatše lena. (Mat. 6:19, 20; 1 Tim. 6:8) Leha ho le joalo, ke habohlokoa hakaakang ho batla ho atolosa mosebetsi oa rōna oa boboleli! Haeba re tobana le maemo a thata, e se eka re ka ikitlaetsa joaloka Jesu, re se ke ra lumella matšoenyeho a bophelo hore ebe a bohlokoa ho feta mosebetsi oa rōna o ka sehloohong oa ho bolela litaba tse molemo tsa ’Muso.—Luka 8:14; 9:59-62.
4 Esita le ba nang le boikarabelo bo bongata ba nka mosebetsi oa boboleli e le oa bohlokoa ka ho fetisisa. Mor’abo rōna e mong ea nang le lelapa le leholo, ea maemong a phahameng mosebetsing le ea sebeletsang e le moholo phuthehong ea Bokreste o re: “Ke nka tšebeletso ea ka e le mosebetsi oa ka o ka sehloohong.” Morali’abo rōna e mong oa pula-maliboho o re: “Ke nka bopula-maliboho bo le bohlokoa ho feta mosebetsi oa boipheliso o lefang haholo.”
5 Ho sa tsotellehe maemo a rōna, e se eka re ka etsisa mohlala oa Jesu. Joang? Ka ho etsa tšebeletso ea Bokreste mosebetsi oa rōna o ka sehloohong.