U ’ne U Hatele Pele Moeeng!
Letsatsi Leo Re Kolobetsoang Ka Lona Ke Letsatsi Leo Kamehla Re Lokelang Ho Le Nka E Le La Bohlokoa Le Ho Le Hopola. Etsoe Ke Letsatsi Leo Ka Lona Re Bolelang Phatlalatsa Hore Re Entse Boinehelo Bakeng Sa Ho Sebeletsa Molimo.
HO BATHO ba bangata ho hlokahala boiteko bo boholo hore ba fihle boemong bona—ho khaotsa mekhoa e mebe ea nako e telele, ho ikarola metsoalleng e mebe, ho fetola mekhoa ea ho nahana le ea boitšoaro e metseng ka metso.
Leha ho le joalo, le hoja kolobetso e le ketsahalo e thabisang le ea bohlokoa bophelong ba Mokreste, e sa ntse e le qalo feela. Moapostola Pauluse o ile a bolella Bakreste ba kolobelitsoeng ba Judea: “Kaha joale re tlohetse thuto ea mathomo mabapi le Kreste, a re hateleng pele ka matla khōlong e feletseng.” (Baheberu 6:1) E, ho hlokahala hore Bakreste bohle ba ‘fihlele bonngoeng tumelong le tsebong e nepahetseng ea Mora oa Molimo, ho isa ho monna ea hōlileng ka ho feletseng, ho isa tekanyong ea boholo boo e leng ba botlalo ba Kreste.’ (Baefese 4:13) Ke feela ka ho hatela pele ho fihlela khōlong e feletseng re ka ‘tsitsisoang tumelong’ e le kannete.—Bakolose 2:7.
Ho theosa le lilemo tse ’maloa tse fetileng, barapeli ba makholo a likete ba sa tsoa inehela ba kene ka phuthehong ea Bokreste. Mohlomong u e mong oa bona. Joaloka barab’eno ba lekholong la pele la lilemo, ha u batle ho lula u le lesea la moea. U batla ho hōla, ho tsoela pele! Empa u ka tsoela pele joang? Hona litsela tse ling tseo ka tsona u ka hatelang pele joalo ke life?
Ho Hatela Pele ka ho Sebelisa Thuto ea Botho
Pauluse o ile a bolella Bakreste ba Filippi: “Sena ke seo ke tsoelang pele ho se rapella, hore lerato la lōna le ka ata ka ho eketsehileng haholoanyane ka tsebo e nepahetseng le temoho e feletseng.” (Bafilippi 1:9) Ho hōla ‘tsebong e nepahetseng’ ke habohlokoa bakeng sa hore u hatele pele moeeng. ‘Ho tsoela pele ho ithuisa tsebo ka Jehova Molimo le Jesu Kreste’ ke mosebetsi o tsoelang pele, hase ntho e khaotsang ka mor’a kolobetso.—Johanne 17:3.
Morali e mong oabo rōna oa Mokreste, eo re tla mo bitsa Alexandra, o ile a hlokomela sena lilemo tse leshome ka mor’a hore a kolobetsoe a le lilemo li 16. O ile a hōlisetsoa ’neteng ’me o ne a bile teng libokeng tsa Bokreste kamehla le ho kopanela mosebetsing oa boboleli. Oa ngola: “Likhoeling tse ’maloa tse fetileng, ke ile ka hlokomela hore ho na le ho hong ho hlileng ho leng phoso. Ke ile ka etsa qeto ea ho itlhahloba ka tieo le ka botšepehi, mabapi le boikutlo ba ka ka ’nete, le lebaka leo ka lona ke sa ntseng ke le ’neteng.” O ile a fumana eng? O tsoela pele: “Ke ile ka fumana hore mabaka a ka a ho ba ’neteng aa ntšoenya. Ke ile ka hopola hore ha ke ntse ke hōla, ho ile ha hatisoa liboka le tšebeletso ea tšimo. Ho ne ho le joalokaha eka mekhoa ea thuto ea botho le thapelo e tla iketsahalla feela tjee ka tsela e itseng. Empa ha ke ntse ke hlahloba boemo ba ka, ke ile ka hlokomela hore sena ha sea ka sa etsahala.”
Moapostola Pauluse oa eletsa: “Ho ea bohōleng boo ho bona re hatetseng pele, a re tsoeleng pele re tsamaea ka ho laolehileng ka mokhoa ona o tšoanang.” (Bafilippi 3:16) Mokhoa o tšoanang o ka rala tsela ea khatelo-pele. Ntle ho pelaelo, pele u kolobetsoa u ne u e-na le mokhoa o tšoanang beke le beke oa ho ithuta Bibele le tichere e tšoanelehang hantle. Ha kananelo ea hao e ntse e hōla, u ile ua phaella mokhoa ona ka ho lokisetsa bakeng sa thuto ea beke ka ’ngoe, ho phetla mangolo a bontšitsoeng ka Bibeleng, joalo-joalo. Ho tloha ha u kolobetsoa, na u ’nile ua tsoela pele ho ‘tsamaea ka mokhoa oona oo o tšoanang’?
Haeba ho se joalo, ho ka ’na ha hlokahala hore u boele u hlahlobe lintho tse tlang pele bophelong ba hao, ‘u nepisise lintho tsa bohlokoa haholoanyane.’ (Bafilippi 1:10) Bophelong ba rōna bo maphathaphathe, ho hlokahala boitšoaro hore re behelle nako ka thōko bakeng sa ’malo oa botho oa Bibele le ho ithuta. Empa melemo e etsa hore boiteko bo joalo e be bo tšoanelehang. Nahana hape ka phihlelo ea Alexandra. Oa lumela: “Bonneteng ke ’nile ka ba ’neteng ka lilemo tse fetileng tse ka bang 20 ka ho ea libokeng le ho kopanela tšebeletsong ea tšimo feela.” Leha ho le joalo, o tsoela pele, “Ke fihletse qeto ea hore le hoja lintho tsena e le tsa bohlokoa, hase tsona feela tse ka ’matlafatsang ha lintho li qala ho ba boima. Sena sohle se hlaheletse kahobane ha e le hantle ha ke na mekhoa ea thuto ea botho, ’me lithapelo tsa ka lia hlahlathela ebile ke tse hlokang boikutlo. Joale kea hlokomela hore ke lokela ho lokisa monahano oa ka le ho qalisa lenaneo la ho ithuta le nang le morero e le hore nka tseba Jehova hantle ’me ke mo rate le ho ananela seo Mora oa hae a re fileng sona.”
Haeba u hloka thuso ea ho rala mokhoa o motle oa thuto ea botho, baholo le Bakreste ba bang ba hōlileng tsebong ka phuthehong ea heno ba tla thabela ho u thusa. Ho phaella moo, lihlooho tse hlahang litokollong tsa Molula-Qhooa tsa May 1, 1995; August 15, 1993; le May 15, 1986, li na le litlhahiso tse ’maloa tse molemo.
Tlhokahalo ea ho Atamela ho Molimo
Karolo e ’ngoe eo u lokelang ho loanela ho hatela pele ho eona ke kamano ea hao le Molimo. Maemong a mang e ka ’na eaba ehlile ho na le khaello e matla tabeng ena. Nahana ka Anthony, ea ileng a kolobetsoa a sa le monyenyane lilemong. Oa pheta: “Ke ’na ngoana oa pele lelapeng leso ea ileng a kolobetsoa. Ka mor’a hore ke kolobetsoe, ’Mè o ile a nkopa ka mofuthu. Ho ne ho se mohla nkileng ka bona a thabile joalo. Ho ne ho e-na le thabo e khōlō hoo ke ileng ka ikutloa ke le matla.” Leha ho le joalo, boemo bona e ne e se bona feela. Anthony o tsoela pele: “Ka nako e teletsana, ho ne ho sa ka ha e-ba le bacha ba kolobetsoang phuthehong ea rōna. Kahoo ke ile ka ikutloa ke le motlōtlō. Hape ke ne ke le motlōtlō ka litlhaloso le lipuo tsa ka libokeng. Ho fumana thoriso le pabatso ea batho e ile ea e-ba habohlokoa ho ’na ho feta ho lebisa thoriso ho Jehova. Ka sebele ke ne ke se na kamano e haufi le eena.”
Joaloka Anthony, e ka ’na eaba ba bang ba inehetse haholo-holo ka lebaka la takatso ea ho khahlisa ba bang ho feta ho khahlisa Jehova. Leha ho le joalo, Molimo o lebeletse hore ba joalo ba phelele tšepiso ea bona ea ho mo sebeletsa. (Bapisa le Moeklesia 5:4.) Leha ho le joalo, kahobane ba se na kamano ea botho le Molimo hangata ba thatafalloa ke ho etsa joalo. Anthony oa hopola: “Thabo e matla eo ke neng ke e-na le eona ha ke kolobetsoa e ile ea e-ba ea nakoana. Ho ne ho e-s’o fete le selemo se tletseng ka mor’a hore ke kolobetsoe ha ke oela phosong e tebileng eaba ke lokela ho khalemeloa ke baholo ka phuthehong. Boitšoaro bo bobe bo sa khaotseng bo ile ba etsa hore ke khaoloe ka phuthehong. Lilemo tse tšeletseng ka mor’a hore ke inehele ho Jehova, ke ile ka tšoaroa ’me ka kenngoa teronkong ka lebaka la polao.”
Ho Hōlisa Kamano e Haufi-ufi le Jehova
Ho sa tsotellehe hore na boemo ba hao ke bofe, Bakreste bohle ba ka arabela memong ena ea Bibele: “Atamelang ho Molimo, ’me o tla atamela ho lōna.” (Jakobo 4:8) Ntle ho pelaelo u ile ua hlaolela katamelano e itseng le Molimo ha u qala ho ithuta Bibele. U ile ua ithuta hore Molimo hase molimo ea se nang botho ea rapeloang Bokreste-’mōtoaneng, empa ke motho ea nang le lebitso, Jehova. U ile ua boela ua ithuta hore o na le litšoaneleho tse ipiletsang, hore ke “Molimo o mohau, o lereko, o liehang ho halefa, o tletseng mohau.”—Exoda 34:6.
Leha ho le joalo, e le hore u phelele boinehelo ba hao ba ho sebeletsa Molimo, u tlameha ho atamela ho eena haholoanyane! Joang? Mopesaleme o ile a rapela: “Jehova, mpontše litsela tsa hao, u nthute mekhoa ea hao.” (Pesaleme ea 25:4) Thuto ea botho ea Bibele le ea lingoliloeng tsa Mokhatlo e ka u thusa ho tloaelana hamolemo le Jehova. Ho kopanela kamehla thapelong e tiileng le hona ke habohlokoa. Mopesaleme oa phehella: “Le tšollele lipelo tsa lōna pel’a oona.” (Pesaleme ea 62:8) Ha u bona lithapelo tsa hao li ntse li arabeloa, u tla hlokomela thahasello ea botho ea Molimo ho uena. Sena se tla u thusa hore u ikutloe u le haufi le eena haholoanyane.
Liteko le mathata li hlahisa monyetla o mong hape oa ho atamela ho Molimo. U ka ’na ua tobana le liphephetso le liteko tsa tumelo, tse kang ho kula, likhatello sekolong le mosebetsing, kapa mathata a moruo. Mohlomong esita le mokhoa o tloaelehileng oa puso ea Molimo oa ho kopanela tšebeletsong, ho ba teng libokeng, kapa ho ithuta Bibele le bana ba hao, oa u thatafalla. U se ke ua tobana le mathata a joalo u le mong! Kōpa Molimo ka tieo hore a u thuse, u kōpe tataiso le ketello-pele ea hae. (Liproverbia 3:5, 6) Mo kōpe hore a u fe moea oa hae o halalelang! (Luka 11:13) Ha u ntse u latsoa thuso e lerato ea Molimo, u tla atamela ho eena haholoanyane. Joalokaha mopesaleme Davida a boletse, “latsoang, le bone hoba Jehova o molemo! Ho lehlohonolo motho ea tšabelang ho eena!”—Pesaleme ea 34:8.
Ho thoe’ng ka Anthony? Oa hopola: “Ke ile ka qala ho nahana ka nako eo ka eona ke neng ke e-na le lipakane tse ngata tsa moea tse likolohang ho etseng thato ea Jehova. Ke ile ka utloa bohloko. Empa bohlokong le masoabing ana ’ohle, ke ile ka hopola lerato la Jehova. Ho ile ha feta nakoana pele ke khona ho rapela Jehova, empa ke ile ka fela ka etsa joalo, ’me ka tšollela pelo ea ka ho eena, ka kōpa hore a ntšoarele. Ke ile ka boela ka qala ho bala Bibele ’me ka makatsoa ke hore na ke ne ke se ke lebetse lintho tse ngata hakaakang le hore na ke ne ke ke tsebile ho honyenyane hakaakang ka Jehova.” Le hoja ho sa ntsane ho hlokahala hore Anthony a qete nako eo a e ahlotsoeng teronkong bakeng sa tlōlo ea hae ea molao, o fumana thuso ho Lipaki tsa sebakeng seo ’me o tseleng ea ho hlaphoheloa moeeng. Ka ho thabisang, Anthony o re: “Ka lebaka la Jehova le mokhatlo oa hae o hlophisitsoeng, ke khonne ho hlobola botho ba khale, ’me ke loanela ho apara bo bocha letsatsi ka leng. Hona joale kamano ea ka le Jehova ke ea bohlokoa ka ho fetisisa ho ’na.”
Khatelo-pele ea Moea Tšebeletsong ea Hao
Jesu Kreste o ile a laela balateli ba hae hore e be baboleli ba ‘litaba tse molemo tsa ’muso.’ (Matheu 24:14) Joaloka mohoeletsi oa litaba tse molemo ea batlang a le mocha ’neteng, e ka ’na eaba phihlelo ea hao tšebeletsong ea fokola. Joale, u ka hatela pele joang e le hore “u phethe bosebeletsi ba hao ka botlalo”?—2 Timothea 4:5.
Tsela e ’ngoe ke hore u hlaolele boikutlo bo nepahetseng. Ithute ho talima mosebetsi oa boboleli e le “letlotlo,” tokelo. (2 Bakorinthe 4:7) Ke monyetla oa ho bonahatsa lerato le botšepehi ba rōna bo sa sekisetseng le bo tiileng ho Jehova. Ho boetse ho re nolofalletsa ho bonahatsa kameho ka baahelani ba rōna. Ho itela ka ho hloka boithati ntlheng ena e ka ba mohloli oa thabo ea sebele.—Liketso 20:35.
Jesu ka boeena o ne a e-na le pono e nepahetseng ka mosebetsi oa boboleli. Ho arolelana linnete tsa Bibele le ba bang ho ne ho le joaloka “lijo” ho eena. (Johanne 4:34) Ka hona se neng se mo susumelletsa ho thusa ba bang se ka akaretsoa hamolemo ka mantsoe ana a hae, “Kea batla.” (Matheu 8:3) Jesu o ne a e-na le kutloelo-bohloko ho batho, haholo-holo ba neng ba ‘sohlokehile ’me ba qhalakantsoe’ ke lefatše la Satane. (Matheu 9:35, 36) Na le uena ka ho tšoanang u “batla” ho thusa ba lefifing moeeng le ba hlokang leseli le tsoang Lentsoeng la Molimo? Joale u tla ikutloa u susumelletseha ho arabela taelong ena ea Jesu: “Ka hona e-eang ’me le etse batho ba lichaba tsohle barutuoa.” (Matheu 28:19) Ka sebele, u tla susumelletseha ho ba le karolo e feletseng mosebetsing ona ho fihlela moo bophelo ba hao le maemo a hao a u lumellang.
Senotlolo se seng sa khatelo-pele ke ho kopanela kamehla tšebeletsong—beke le beke, haeba ho khoneha. Ho etsa joalo ho ka fokotsa tšabo e ka ’nang ea sitisa motho ea bolelang ka linako tse itseng feela. Ho kopanela kamehla tšebeletsong ea tšimo ho tla u tsoela molemo esita le ka litsela tse ling. Ho tla eketsa kananelo ea hao bakeng sa ’nete, ho matlafatse lerato la hao ho Jehova le moahelani, ’me ho u thuse hore u lule u lebisitse tlhokomelo tšepong ea ’Muso.
Leha ho le joalo, ho thoe’ng haeba boemo ba hao ba hona joale bo u thatafalletsa ho kopanela mosebetsing oa boboleli? Haeba liphetoho li sa khonehe ho hang, joale tšeliseha ka ho tseba hore Molimo o khahlisoa ke eng kapa eng eo u khonang ho e etsa, hafeela u ikakhela ka moea oohle tšebeletsong ea hao. (Matheu 13:23) Mohlomong u ka hatela pele ka litsela tse ling, tse kang ho ntlafatsa tsebo ea hao ea boboleli. Ka phuthehong, Sekolo sa Tšebeletso sa Puso ea Molimo le Seboka sa Tšebeletso li fana ka koetliso e ngata e ntle tabeng ena. Joalokaha ho ka lebelloa, ha re le hloahloa haholoanyane tšebeletsong, re tla e thabela haholoanyane le ho bona liphello.
Kahoo, ho hlakile hore khatelo-pele ea moea ha ea lokela ho khaotsa mohla motho a kolobetsoang. Moapostola Pauluse o ile a ngola tjena mabapi le tšepo ea hae ea ho finyella bophelo ba ho se shoe maholimong: “Barab’eso, ha ke inke ke se ke o tšoere; empa ho na le ntho e le ’ngoe ka oona: Ha ke lebala lintho tse ka morao le ho hahamalla linthong tse ka pele, ke phehella pakaneng bakeng sa moputso oa pitso ea holimo ea Molimo ka Kreste Jesu. Joale, ho ea ka hore na ke ba bangata hakae ba rōna ba hōlileng ka ho feletseng, a re beng le boikutlo bona ba kelello; ’me haeba likelello tsa lōna li sekametse hosele tabeng leha e le efe, Molimo o tla le senolela boikutlo bo ka holimo.”—Bafilippi 3:13-15.
E, Bakreste bohle, ebang tšepo ea bona ke bophelo ba ho se shoe maholimong kapa bophelo bo sa feleng Paradeiseng lefatšeng, ba tlameha ho ‘hahamalla pele’—ba ikitlaelletse ho finyella pakane ea bophelo! Ho kolobetsoa ha hao e bile ntho e ntle, empa ke qalo feela. Tsoela pele u loanela ho hatela pele moeeng. Ka liboka le thuto ea botho, ‘u be ea hōlileng ka ho feletseng matleng a kutloisiso.’ (1 Bakorinthe 14:20) U be ea ‘khonang ho utloisisa kelellong . . . bophara le bolelele le bophahamo le botebo’ ba ’nete. (Baefese 3:18) Khatelo-pele eo u e etsang e ke ke ea u thusa feela ho ba le thabo le nyakallo hona joale empa hape e tla u thusa ho iphumanela sebaka se sireletsehileng lefatšeng le lecha la Molimo, leo ho lona u tla khona ho hatela pele ka ho sa feleng, tlas’a puso ea ’Muso oa hae oa leholimo!
[Setšoantšo se leqepheng la 29]
Ho hlokahala boitšoaro hore re fumane nako bakeng sa thuto ea botho
[Setšoantšo se leqepheng la 31]
Ho ba le boikutlo bo nepahetseng ho ka re thusa ho fumana thabo tšebeletsong