Bacha Baa Botsa . . .

Ke Hobane’ng ha Ke Lokela ho Bua ka Molimo?

“Motho e mong le e mong o na le bolumeli ba hae. Ha ua lokela ho leka ho qobella Molimo oa hao bathong ba bang.”—Racish ea lilemo li 14, Guyana.

“Kea tsila-tsila ho bua ka Molimo hobane ke hlajoa ke lihlong ka lebaka la litšomo tse tla latela.”—Rohan ea lilemo li 17, Guyana.

“Re lokela ho bua ka Molimo hobane ke ’Mōpi oa rōna ’me bophelo ba rōna bo tsoa ho eena.”—Marco ea lilemo li 13, Jeremane.

MAMELA ka hloko sehlopha sa bacha ba qoqang ’me mohlomong u tla etsa qeto ena e utloisang bohloko: Ho hang ho bua ka Molimo hase sehlooho se ratoang haholo ka linako tse ngata moqoqong oa bacha. Haeba u bua ka lipapali, liaparo, libaesekopo tsa morao-rao, kapa ba batona kapa ba batšehali ka tloaelo u tla susumetsa puisano e phelang. Leha ho le joalo, ha u ka iteta sefuba ua bua ka Molimo, kapele-pele ho ba teng ho khutsa ho sa tloaelehang ho matla joaloka moholi.

Bacha ba bang ha ba hlile ha ba lumele ho Molimo. Ba ka ’na ba beha mabaka a hore kaha ha ba mo bone, e tlameha e be ha a eo—ho bua ka eena ho bonahala e le tšenyo ea nako. Leha ho le joalo, ka ho tiileng batho ba sa lumeleng hore Molimo o teng baa fokola har’a bacha. Ho latela patlisiso ea Gallup, hoo e ka bang karolo ea 95 lekholong ea bacha ba United States e lumela ho Molimo. Ha e le hantle, Gallup o ile a etsa qeto: “Ho bacha ba bangata Molimo eo ba lumelang ho eena hase molao-motheo o itseng o sa utloahaleng, empa ke Molimo ea nang le botho ea hlokomelang liketso tsa bona le ea ba putsang kapa ho ba ahlolela liketso tsa bona ka ho loketseng.” Joale, ke hobane’ng ha bacha ba bangata hakaale ba tsila-tsila hore ba bue ka seo ba se lumelang?

Lebaka Leo ba Bang ba Tšabellang

Ba bangata ba mpa ba nahana hore ke ho hloka mekhoa e metle ho bua ka litaba tsa tumelo le hore motho o lokela ho ipolokela likhopolo tsa bolumeli. Bacha ba bang ba bonahala ba soabisoa ke khopolo e pala ea ho bua ka Molimo. Ba beha lebaka la hore ‘ke ntho e sa amoheleheng har’a bacha ho etsa joalo.’

Ho sa tsotellehe pono ea lithaka tsa hao, uena u ema hokae tabeng ee? Potso ena ke e loketseng haholo-holo haeba u ile ua hōlisoa joaloka e mong oa Lipaki tsa Jehova. Hobane’ng? Hobane ho paka, ho bolella ba bang ka Molimo, ke motheo oa mantlha oa seo li se lumelang!—Esaia 43:9, 10; Mattheu 24:14.

Esita leha ho le joalo, ba nyahamisitsoe ke lehloeo leo ba thulanang le lona ka linako tse ling, bacha ba bang ba Lipaki ba tšabella ho kopanela mosebetsing oa boboleli ba phatlalatsa—kapa ba kopanela feela hobane ba phehelloa ke batsoali ba bona. Ba bang ba kopanela mosebetsing oo empa ka sephiring ba tšepile hore ha ho lea mong oa metsoalle ea bona ea sekolo ea ba bonang ba etsa joalo. Sekolong, ba bang ba leka ho boloka litumelo tsa bolumeli ba bona sephiring. Hangata sena se etsahala ka lebaka la ho tšaba ho songoa ke ba kenang tlelaseng le bona. Ryan e monyenyane oa lumela: “Ke ne ke tšaba ho bua ka Molimo, hobane metsoalle ea ka e ne e tla ntheha mabitso-bitso ’me ke ne ke se na sebete sa ho ntšetsa moqoqo pele.”

Joale ho na le ba bang ba tšabellang hobane ba tšaba hore ba ke ke ba phela tumellanong le litekanyetso tsa Bibele. Ba utloa leraba la “litakatso tsa bocha,” ba beha mabaka ka hore ho tla ba molemo ho se itsebahatse e le Bakreste haeba mohlomong ho etsahala hore ba etse ntho e itseng e fosahetseng.—2 Timothea 2:22.

Ba bang ha ba bue ka Molimo hobane feela ba ikutloa ba sa tšoanelehe. Wilton ea lilemo li 19 o ile a bolela tjena: “Ke ile ka ho fumana ho le thata ho bua ka Molimo ho basebetsi-’moho le ’na hobane ke ne ke ikutloa ke sa tšoanelehe hore nka sireletsa lintho tseo ke li buang ka eena. Ke ile ka ikutloa hore haeba nka phephetsoa ka litumelo tsa ka, ke ne nke ke ka ba le karabo e khotsofatsang.”

Tlamo ea Bokreste

Na ho ka etsahala hore e be u ’nile ua tšabella ho bua ka Molimo ka mabaka a tšoanang? Haeba ho joalo, ha u mong. Bacha ba bang ba ’nile ba loantšana le maikutlo a tšoanang. Leha ho le joalo, ba bangata ba fihletse ho utloisisa hore ho sa tsotellehe lintho tsohle tse ka ’nang tsa nyahamisa motho hore a etse joalo, ho na le mabaka a tlamang a ho bua ka Molimo ho ba bang. A mang a ’ona ke afe?

Marco e monyenyane, ea boletsoeng qalong, o boletse hantle ha a re Molimo “ke Mōpi oa rōna ’me bophelo ba rōna bo tsoa ho eena.” (Tšenolo 4:11) E, bophelo ke mpho ea bohlokoa. Mopesaleme o itse ka Molimo: “Hobane seliba sa bophelo se ho uena.” (Pesaleme ea 36:9) Ha u se u fumane mpho ee, na ha ua lokela ho bontša teboho bakeng sa eona?

Tsela e ’ngoe ea ho bontša teboho ke ho rorisa Jehova Molimo bathong ba bang. Ke Moqapi oa letsatsi, khoeli, pula, moea oo re o phefumolohang, le lijo tseo re li jang. (Liketso 14:15-17) Morutuoa Jakobo o itse: “Mpho e ’ngoe le e ’ngoe e ntle, leha e le neo e ’ngoe le e ’ngoe e phethehileng, e tsoa holimo.” (Jakobo 1:17) Na u leboha Molimo bakeng sa limpho tsee? (Ba-Kolosse 3:15) Ke tsela efe e molemonyana eo ka eona u ka bontšang liteboho tsa hao ho feta ho bua ka Molimo?—Luka 6:45.

Leha ho le joalo, ha e le hantle, Molimo o re laela hore re bue ka eena. Mor’a hae Jesu Kreste, o ile a laela Bakreste: “E-eang ke hona, le rute lichaba tsohle.” (Mattheu 28:19, 20) Bacha ha baa behelloa ka thōko boikarabelong ba ho kopanela mosebetsing ona. Mopesaleme oa laela: “Rorisang Jehova . . . bahlankana le baroetsana, maqheku hammoho le bana! A ba ke ba rorise lebitso la Jehova, hobane lebitso la hae ke lona le inotši le phahamileng, bokhabane ba hae bo phahamile ho fetisa lefatše le maholimo.” (Pesaleme ea 148:7, 12, 13) Empa ha ho hlokahale hore u talime kabelo ena e le moroalo. Ka sebele, ke tokelo—ha e le hantle u ka ba e mong oa “ba sebetsang le Molimo.”—1 Ba-Korinthe 3:9.

Ho thoe’ng haeba u mpa feela u ikutloa hore ha u tšoanelehe? Moprofeta Jeremia o ne a e-na le boikutlo bo joalo mehleng ea Bibele. O ile a re: “Oho Morena Jehova, bona, ha ke tsebe ho bua, hobane ke sa le ngoana.” Karabelo ea Jehova e ile ea e-ba efe? “U se ke ua re: Ke sa le ngoana, u mpe u ee ho bohle bao ke tla u romela ho bona, u bolele tsohle tseo ke tla u laela tsona.” (Jeremia 1:6, 7) Ka thuso ea Jehova, Jeremia o ile a etsa sona seo ka lilemo tse 40!

Kajeno hoa tšoana ho Bakreste, “ho tšoaneleha ha rōna ka ho lekaneng ho tsoa ho Molimo.” (2 Ba-Korinthe 3:5, NW) Esita le haeba ka tlhaho u lihlong, u motho ea tšabang batho, Molimo a ka u thusa hore u be le sebete sa ho bua. Ka hare ho phutheho ea Bokreste ho na le litokisetso tse ka u thusang hore u fetohe ea ‘tšoanelehang ka ho lekaneng’ joaloka tichere ea Lentsoe la Molimo. Haeba u ikutloa eka u hloka thuso e itseng ea botho, ke hobane’ng ha u sa buisane le e mong oa balebeli ba phutheho? E ka ’na ea e-ba feela taba ea ho hōlisa lenaneo la thuto ea botho ea Bibele kapa ho sebetsa le e mong ea nang le phihlelo haholoanyane.

Seo U ka se Finyellang

Ho bua ka Molimo ho ka u neha boikutlo ba sebele ba ho finyella se itseng. Taba ea pele, ba bangata ba lithaka tsa hao ba ntse ba batla likarabo, ba hloka thuso e le ka ’nete. Ha ba na tataiso ’me ha ba na pono e hlakileng ea bokamoso. Baa ipotsa, ‘Ke hobane’ng ha re le teng? Re ea hokae? Ke hobane’ng ha lefatše le tletse likhathatso hakaale?’ Joaloka Mokreste, u na le likarabo, ’me mohlomong u boemong bo molemo ka ho fetisisa ba ho fetisetsa tsebo ho lithaka tsa hao. Kaha le bacha ka ho tšoana ’me le na le lintho tse tšoanang mohlomong ba ka buisana le e mong ea lilemong tsa bona ho e-na le motho e moholo.

Ke ’nete, ka linako tse ling u tla tobana le khanyetso. Empa hape u ka ’na ua fumana batho ba amohelang molaetsa oa Bibele. Paki e ’ngoe e nyenyane e ne e lutse ka beseng e ntse e bala kopi ea eona ea botho ea buka Lipotso Bacha Baa Botsa—Likarabo tse Sebetsang.a Moshemane ea neng a lutse pel’a hae o ile a qala ho bala le eena. Moshemane eo ile a khotsa: “Buka ee ke e ntle hakaakang! Buka ena e bua haholo ka Molimo. Batho ba bangata ha ba thahaselle bolumeli.” Paki e nyenyane e ile ea sebelisa sena e le monyetla oa ho ba le moqoqo o tebileng ka taba e buang ka lebitso la Molimo.

Ke ho utloahalang hore ha u itsebahatsa u le Mokreste, u tlameha ho itšoara joaloka eena. (1 Petrose 2:12) Empa boitšoaro bo botle ba Bokreste bo tla ekelletsa tšusumetsong ea molaetsa oa hao. Nahana ka phihlelo ea mocha ea bitsoang Eric. O ile a khahloa ke boitšoaro bo botle ba bacha ba Lipaki sekolong sa habo. Sena se ile sa tsosa thahasello ea hae ea ho ithuta ho eketsehileng ka Molimo. Ho ile ha qalisoa thuto ea Bibele le eena, ’me kajeno ke Mokreste ea kolobelitsoeng ea sebeletsang ntlo-khōlō ea lefatše ea Lipaki tsa Jehova New York.

Ho bua ka Molimo ho ka boela ha u thusa! Ho ka sebeletsa e le tšireletso. Ha metsoalle ea hao e tseba hore u e mong oa Lipaki tsa Jehova, ba bangata ba tla u hlompha. Ba ka ’na ba se ke ba sekamela hore ba u hatelle ho kopanela liphosong ha ba hlokomela hore u na le litekanyetso tse phahameng ’me baa tseba hore ho ka etsahala hore u ba pakele ha ba leka ho u hatella.

Ka ho hlakileng, sena hase bolele hore nako le nako ha u ahlamisa molomo u tlameha ho qotsa mangolo. U tla ’ne u be le thahasello lipapaling, liaparong, kapa ’minong ’me u tla batla ho bua ka lintho tse joalo nako le nako. Empa hopola: “Molomo o buisoa ke seo pelo e tletseng sona.” (Mattheu 12:34) Haeba ho rata Molimo ho hlile ho le pelong ea hao, ka tlhaho u tla batla ho bua ka eena. Tokollong ea nakong e tlang, re tla tšohla litsela tse ling tseo ka tsona u ka etsang joalo ka katleho.

[Mongolo o botlaaseng ba leqephe]

[Setšoantšo se leqepheng la 15]

Na u lihlong hore u bonoe ke bao u kenang sekolo le bona ha u le mosebetsing oa ho bolela phatlalatsa?