Kutoka kwa Wasomaji Wetu
Dini na Vita Ninaandika ili kutoa shukrani zangu kwa ule mfululizo wenye kuarifu uliozungumzia dini katika vita. (Aprili 22, 1997) Makala ya kwanza, “Kuua Katika Jina la Mungu,” ilivuta uangalifu wangu kwelikweli. Ilikuwa fupi na ya moja kwa moja, hasa ilipokuwa ikitoa sababu kuhusu kwa nini Yehova Mungu aliwakubali Waisraeli wa kale kuwaua Wakanaani.
S. J., Marekani
Hadithi ya Ginger Klauss Acheni niwaambie jinsi nilivyotiwa moyo na mambo yaliyoonwa ya Ginger Klauss, “Sasa Nafurahi Kuwa Hai!” (Aprili 22, 1997) Kama yeye nilipoteza kujitumaini kwote, nikihisi kuwa asiyefaa kitu na asiyependwa. Nikiwa nimeshindwa kukabiliana na hisia hizi, kwa machozi nilimwambia Mungu kila siku kuwa nilitaka kufa. Nilikiona kifo kuwa kitulizo ambacho ningekipokea kwa furaha. Lakini siku moja nilisali, “Ikiwa ni mapenzi yako, tafadhali nipe kitia-moyo ili niishi.” Baada tu ya kusali hivyo, nikapokea nakala hii ya Amkeni! Nilipoiona makala hiyo, nikatambua kwamba Mungu alikuwa ameijibu sala yangu. Nilijifunza kutoka kwa Ginger kwamba kuwa mwenye ucheshi na kutokuwa na ubinafsi kwaweza kunisaidia kudumisha mtazamo chanya. Naweza kusema kwa wazi kwamba gazeti hili moja limenipa nguvu ya kuishi.
M. K., Japani
Nimetoka tu kumaliza kuisoma makala hiyo kwa mara ya sita, na haitakuwa mara ya mwisho! Nina umri wa miaka 21 na mimi ni mweneza-evanjeli wa wakati wote. Namsifu sana kwa kustaajabia Ginger Klauss kwa sababu ya bidii aliyo nayo katika kazi ya kuhubiri ijapokuwa yeye hutumia kiti chenye magurudumu sikuzote. Mambo yaliyompata yalinisukuma nifanye yote niwezayo ili kumtumikia Yehova.
S. Z., Italia
Shukrani zisizo na kikomo kwa sababu ya hilo jambo lililoonwa lenye kugusa moyo. Kwa sababu ya ugonjwa wa misuli wa dystrophy, ninakaa kitandani kwa sehemu kubwa ya kila siku na ninapata ugumu mwingi katika kutimiza kazi ya kuhubiri nikiwa katika kiti chenye magurudumu. Mambo yaliyompata Ginger yalinitia moyo sana na hunisaidia kukabili zile nyakati ambapo nashuka moyo kidogo kwa sababu ya ugonjwa wangu.
M. R., Italia
Kwa Nini Mgonjwa Sana? Asanteni kwa ile makala “Vijana Huuliza . . . Kwa Nini Nalazimika Kuwa Mgonjwa Sana?” (Aprili 22, 1997) Nina umri wa miaka 21 na nina anemia ya sickle-cell. Naelewa hisia za vijana katika makala hii. Mara nyingi mimi huwaza ikiwa yeyote atanipenda na kutaka kunioa ijapokuwa tatizo hili la kiafya. Lakini makala yenu ilinisaidia kwa sababu sasa najua kwamba siko peke yangu katika kuhisi hivi.
D. R., Marekani
Marafiki wa Chanda na Pete Asanteni kwa mambo yaliyoonwa ya Anne-Marie Evaldsson. (Aprili 22, 1997) Nilijawa na sifa za kustaajabia kwa sababu ya jinsi ambavyo dada huyu aendelezavyo hali yake ya kiroho ijapokuwa kizuizi chake. Simulizi hilo lilinifanya nifikiri kwa utulivu na kimya-kimya. Wengi wetu hatuthamini tulichopewa tukitumie katika kumtumikia Yehova. Ningependa kumpongeza huyo dada pamoja na rafiki yake mwaminifu. Ni kielelezo bora kama nini!
R. A., Ekuado
Kujua kwamba mtu aliye kipofu kimwili hufanya kazi, hushiriki katika huduma ya nyumba hadi nyumba, huongoza mafunzo ya Biblia, na huhudhuria mikutano ya Kikristo kila juma kwatia moyo sana. Ilinifanya nihisi kuwa kufanya yote niwezayo katika huduma, kuiweka mahali pa kwanza, kwastahili jitihada. Thamani ya uwezo wa kuona kiroho ni bora zaidi. Nitamkumbuka Anne-Marie Evaldsson kwa upendo na uthamini wenye kina kirefu.
J. O., Nigeria