Kupanga Kimbele kwa Ajili ya Desemba

¹ Kabla hatujatimiza mradi fulani, lazima tufanye mipango. Kwa kielelezo, huenda tukataka kuchukua likizo linalotia ndani kuhudhuria mkusanyiko. Huenda hilo likatia ndani kupanga kimbele kwa kuokoa fedha, kupata mahali pa kulala, kupeleka gari letu likafanyiwe kazi kwa ajili ya safari, na kadhalika. Mipango yote hii inahitajiwa ikiwa tutatimiza mradi wetu.—Mit. 21:5.

² Katika njia ile ile, kupanga kunahitajiwa ikiwa tutafaulu katika kushiriki utumishi wa painia msaidizi. Makumi ya maelfu ya ndugu na dada zetu ulimwenguni pote wanachukua sehemu hii ya utumishi kwa ukawaida na wanapata manufaa nyingi za kibinafsi. Madokezo yanayofuata yanaweza kukusaidia katika kufanya mipango yako ili ushiriki utumishi wa painia msaidizi, labda mapema mwezi ujao.

³ Chagua kipindi kizuri unapoweza kupanga ili utumie wakati mkubwa katika utumishi wa shambani ili utimize mradi wa saa 60. Huenda hili likatia ndani kutumia wakati fulani wa likizo uliyo nayo. Vijana walio shuleni wanaweza kutumia vipindi vya likizo ili wafanye upainia msaidizi.

⁴ Miezi ambayo ina miisho-juma mitano kamili kwa kawaida huandaa wakati zaidi wa kutumia katika huduma ya shambani. Angalia kwamba Desemba huu una miisho-juma mitano kamili. Zungumza pamoja na wengine ambao wanaweza kufanya kazi pamoja nawe wakiwa mapainia au wahubiri.—Mit. 20:18.

⁵ Tengeneza ratiba yenye mafaa yenye kutumika ili uweze kutumia mwingi wa wakati wako kwa njia yenye hekima. Fanya mipango ili utumie sehemu kubwa ya wakati wako katika kazi ya mlango kwa mlango. Unaweza pia kupanga wakati wa kutoa ushahidi barabarani na duka kwa duka katika sehemu fulani na pia kufanya ziara za kurudia na mafunzo ya Biblia. Fikiria kutoa ushahidi jioni mahali ambapo inawezekana, shirikiana na mipango ya kundi kwa ajili ya utendaji wa shambani wakati wa juma na miisho-juma. Kutoa utegemezo wako na kufanya kazi pamoja na ndugu na dada wengine kunaweza kuwatia moyo nyote wawili. Endelea kusali kwa Yehova kuhusu jambo hilo. (Kol. 4:2) Mwombe mwongozo wake unapopanga kushiriki katika utumishi wa painia msaidizi.

⁶ Wengi wamejaribu utumishi wa wakati wote kwanza wakiwa mapainia wasaidizi, na jambo hili limewachochea wawe mapainia wa kawaida. Kila siku yatuleta karibu na utimizo wa ahadi za ajabu za Yehova kuhusu mwisho wa mfumo huu mbovu wa mambo na Ufalme unaokuja wa uadilifu kupitia Kristo Yesu. Ni baraka iliyoje kwa wale wanaoweza kuonea shangwe aina fulani ya utumishi wa wakati wote! Panga kimbele kwa ajili yayo, Yehova na abariki jitihada zako.