Panda kwa Wingi Lakini kwa Busara
1 Kila mkulima anajua kwamba akipanda mbegu zake kwa wingi, inaelekea atavuna kwa wingi, lakini akipanda kwa uhaba, bila shaka atavuna kwa uhaba. (2 Kor. 9:6) Wakulima huwa waangalifu kutoharibu mbegu kwa kuzipanda mahali ambapo haziwezi kukua. Vivyo hivyo tunahitaji busara tunapotoa vichapo vyetu shambani. Nia yetu ni kuwaachia vichapo wale wanaopenda kuvisoma. Tunataka kuwapa nafasi watu wanaostahili wajifunze kuhusu fadhili zisizostahiliwa za Yehova na tumaini la Ufalme.
2 Je, magazeti, broshua, na vichapo vingine ambavyo vingetumiwa kuwasaidia wale wanaostahili katika eneo lenu kupata ujuzi wa kweli vinarundamana nyumbani mwako? (Linganisha Mathayo 25:25.) Je, nyakati nyingine wewe huogopa kutoa magazeti au vichapo vingine katika ziara ya kwanza kwa sababu unaona aibu kutaja jinsi kazi ya kuhubiri kuhusu Ufalme inavyotegemezwa? Wahubiri wenye uzoefu wamegundua kwamba wenye nyumba wanaothamini huitikia vizuri wanapoelezwa kwa urahisi na moja kwa moja jinsi michango ya kazi ya Ufalme inavyotumiwa.
3 Unaweza kusema:
◼ “Huenda ukauliza, tunawezaje kutoa vichapo bila malipo? Hii ni sehemu ya kazi ya elimu ya ulimwenguni pote inayotegemezwa na michango ya hiari. Kama ungependa kutoa mchango mdogo kwa ajili ya kazi hii, nitafurahi kuuchukua.”
4 Wenye nyumba wengi watauliza vichapo vinauzwa pesa ngapi.
Unaweza kujibu hivi:
◼ “Vichapo vyetu haviuzwi kwa sababu kazi yetu inategemezwa na michango ya hiari. Kama ungependa kutoa mchango mdogo leo, tutafurahi kuhakikisha kwamba unatumiwa katika kazi ya kuhubiri ulimwenguni pote.”
Au unaweza kusema hivi:
◼ “Tunawapa vichapo vyetu wote ambao wanapendezwa kujifunza mengi kuhusu Biblia. Kama ungependa kutoa mchango mdogo kwa ajili ya kazi hii ya ulimwenguni pote, nitafurahi kuupeleka kwa niaba yako.”
5 Wanapotoa magazeti, wahubiri wengine huwaonyesha watu ukurasa wa ndani wa gazeti na kusema:
◼ “Kama unavyoona hapa, kazi yetu inategemezwa na michango ya hiari. Kama ungependa kutoa mchango mdogo kwa ajili ya kazi hii, ninaweza kuuchukua.”
Pia unaweza kutumia utangulizi huu rahisi:
◼ “Ingawa vichapo vyetu vinatolewa bila malipo, sisi hukubali michango kwa ajili ya kazi yetu ya ulimwenguni pote.”
6 Hatupaswi kamwe kusitasita kupanda mbegu ya Ufalme kwa sababu ya kuogopa kutaja jinsi kazi hiyo inavyogharimiwa. Wakati huohuo, tunahitaji busara ili vichapo vyetu visiharibikie kwenye ‘udongo wenye miamba.’ (Marko 4:5, 6, 16, 17) Wale wanaothamini habari njema tunazotangaza hufurahi kuunga mkono kazi hiyo kwa kutoa michango.—Linganisha Mathayo 10:42.