Toa Magazeti Yaliyo Bora Zaidi Ulimwenguni
1 Kusudi la Mnara wa Mlinzi lililotaarifiwa ni “kukweza Yehova Mungu kuwa ndiye Bwana Mwenye Enzi Kuu wa ulimwengu wote mzima.” Amkeni! ni “la kupatia familia nzima nuru. . . . Gazeti hili hujenga uhakika katika ahadi ya Muumba ya kuleta ulimwengu mpya wenye amani na usalama.” Manukuu hayo yanatoka katika magazeti hayo yenyewe. Kufuatia miradi hiyo kumeyafanya yawe chanzo cha faraja kwa mamilioni ya wasomaji.
2 Katika huduma yetu wakati wa Aprili na Mei tutakuwa tukitoa majarida hayo. Ili tuwe wenye matokeo, twahitaji kujua vema yale yaliyomo ndani yayo. Soma kila toleo, ukitia alama mambo makuu uwezayo kutumia unapoyatoa. Fikiria yale yanayowahangaisha watu. Ni masuala gani ya kijamii, ya kifamilia, au ya kihisiamoyo yanayofikiriwa sana na wengi wa majirani wako? Jaribu kufikiria jambo uwezalo kusema litakaloathiri mioyo yao na kuchochea tamaa ya kujifunza zaidi.
3 Kutoa Mnara wa Mlinzi la Aprili 1: Watu walio wengi hutamani ulimwengu bora zaidi, ulimwengu usio na yale matatizo mengi ambayo mara nyingi huwanyang’anya watu shangwe yao.
Baada ya kujijulisha, waweza kusema hivi:
◼ “Ningependa kukuonyesha jambo lenye kupendeza katika makala hii yenye kichwa ‘Ulimwengu Bora Zaidi—Je! Ni Ndoto Tu?’ Lasema hivi: ‘Ulimwengu huu, ulio ulimwengu wetu, si mahali pazuri hata kidogo. . . . Orodha ya ole zilizopo yaonekana haina mwisho.’ Hali hii hufanya iwe vigumu kuwa na matazamio mazuri juu ya wakati ujao, sivyo? Hata hivyo, ebu nikuonyeshe, yale ambayo Zaburi 37:11 lasema juu ya wakati ujao.” Baada ya kusoma mstari huo, muulize mwenye nyumba jinsi ahisivyo juu ya ahadi hiyo. Akiitikia vizuri, geukia makala “Ulimwengu Bora Zaidi—U Karibu!,” ukurasa 4, na useme: “Maandiko kadhaa yanatajwa, kutia na lile tulilotoka tu kusoma katika Zaburi 37:11. Nasadiki ungefurahia kusoma makala hizi na kusoma marejezo katika Biblia yako.” Onyesha thamani ya kupokea magazeti hayo nyumbani kwa ukawaida kupitia posta na utoe uandikishaji. Wakati uandikishaji haukubaliwi waweza basi kutoa magazeti mawili na broshua kwa mchango wa kawaida.
4 Kutoa Mnara wa Mlinzi la Aprili 15: Makala iliyo kwenye ukurasa wa 4 yauliza hivi: “Waweza Kupata Wapi Mwongozo Wenye Kutumainika?”
Baada ya kujijulisha, ungeweza kusema hivi:
◼ “Kuna matatizo mengi sana ulimwenguni leo, kama vile [taja jambo fulani linalohangaisha jumuiya wakati huu au kichwa fulani kikuu cha habari]. Jambo hilo latufanya tujiulize ikiwa mtu yeyote aweza kupata suluhisho la matatizo haya yote. Kwa furaha, 2 Timotheo 3:16, 17 latuhakikishia kwamba Biblia ni mwongozo kwenye maisha ya furaha na yenye usalama.” Baada ya kusoma mistari hiyo, onyesha jinsi Mnara wa Mlinzi linavyotusaidia tuelewe ni kwa nini Biblia ni mwongozo wenye kutumainika.
5 Ikiwa wapendelea kutoa Amkeni!, waweza kutumia toleo la Mei 8 na makala “Tumaini Halisi Kwa Hao Watoto?” Yaelekea utapata kwamba wazazi huguswa na mahitaji ya watoto nao hutaka kujua yale yawezayo kufanywa kuwasaidia.
6 Ikiwa tuna idili kuhusiana na magazeti yetu, yaliyo mazuri zaidi ulimwenguni, tutataka sana kuyaangusha kwa wengine ili wao pia waweze kukubali tumaini la Ufalme na kushiriki katika kumtukuza Yehova akiwa Bwana Mwenye Enzi Kuu wa ulimwengu wote mzima.—Zab. 83:18.