Sanduku La Swali

◼ Ni uangalifu gani unaohitaji kuelekezwa kwenye vifaa tunavyotumia katika kazi ya kutoa ushahidi?

¹ Ingawa mhubiri ana utoaji wa Kimaandiko unaofaa akilini, huenda asiwe tayari kwa habari ya vifaa atumiavyo. Akiwa mlangoni, huenda asiwe na toleo la fasihi linalotumiwa wakati huo. Magazeti, broshua, na trakti katika mkoba wake wa kutoa ushahidi huenda zikawa zenye makunyanzi au kutatukatatuka. Huenda asiweze kupata kalamu au rekodi ya nyumba kwa nyumba kwa sababu mkoba wake haujapangwa ifaavyo. Ni jambo la maana kuelekeza uangalifu mwingi kwenye vifaa vyako kabla ya kushiriki katika utumishi wa shambani.

² Ni vitu vipi vipaswavyo kuwa katika mkoba wa kutolea ushahidi uliopangwa vizuri? Biblia ni ya lazima. Tia ndani rekodi kadhaa za nyumba kwa nyumba. Hakikisha una kichapo kinachokaziwa mwezi huo. Matoleo ya karibuni ya magazeti, pamoja na trakti na broshua, zinahitajiwa pia. Chukua nakala ya kitabu Kutoa Sababu. Kuwa na Huduma ya Ufalme Yetu ya karibuni zaidi kutakuruhusu upitie utoaji uliodokezwa kabla ya kwenda mlangoni. Unapohubiri eneo ambalo yaelekea utakutana na watu wanaosema lugha ya kigeni, ingekuwa vizuri kuwa na kijitabu Good News for All Nations na pia nakala chache za magazeti na vichapo vyetu katika lugha mbalimbali zinazotumiwa katika eneo lenu. Kuwa na nakala ya kimojapo vichapo vyetu vilivyobuniwa kwa ajili ya vijana kutakusaidia uwe tayari kusema na matineja.

³ Kila kitu kinachotumiwa chapaswa kuwa kimepangwa kwa unadhifu mkobani mwako na kuwa katika hali nzuri. Mkoba wenyewe hauhitaji kuwa mpya, lakini wapaswa kuwa safi na katika hali nzuri. Mkoba wako wa kutolea ushahidi ni sehemu ya vifaa vyako vya kutumiwa katika kutangaza habari njema. Uweke katika utaratibu mzuri.