Tumia Trakti Kueneza Habari Njema
1. Trakti zimetumiwaje na watu wa Mungu?
1 Trakti za Biblia zimetumiwa kwa muda mrefu na watu wa Yehova kueneza habari njema. Mnamo 1880, C. T. Russell na washirika wake walianza kutokeza Bible Students’ Tracts (Trakti za Wanafunzi wa Biblia) ambazo wasomaji wa Mnara wa Mlinzi walipewa ili wazigawanye kwa umma. Trakti zilionwa kuwa muhimu sana hivi kwamba mwaka 1884 wakati C. T. Russell aliposajili shirika la kisheria lisilo na kusudi la kujipatia faida ili kuendeleza masilahi ya Ufalme, neno “trakti” likatiwa ndani kwenye jina Zion’s Watch Tower Tract Society, ambayo sasa inaitwa Watch Tower Bible and Tract Society of Pennsylvania. Kufikia mwaka wa 1918, zaidi ya trakti milioni 300 zilikuwa zimegawanywa na Wanafunzi wa Biblia. Bado trakti ni zenye matokeo katika kazi ya kutoa ushahidi.
2. Kwa nini trakti ni zenye matokeo?
2 Kwa Nini Ni Zenye Matokeo: Trakti zina rangi nzuri na zinavutia. Ujumbe mfupi uliomo ndani ya trakti huvuta uangalifu na unaelimisha. Trakti huwavutia wenye nyumba ambao huenda wakashindwa kusoma gazeti au kitabu. Hata ni rahisi kwa wahubiri wapya na watoto kutoa trakti. Isitoshe, trakti ni ndogo na rahisi kubeba.
3. Simulia jambo ulilojionea mwenyewe au kutoka katika machapisho yetu linaloonyesha thamani ya trakti.
3 Wengi husikia kweli kwa mara ya kwanza kupitia trakti. Kwa mfano, mwanamke mmoja kutoka Haiti aliona moja ya trakti zetu barabarani. Aliiokota, akaisoma, na kusema kwa mshangao, “Nimepata kweli!” Hatimaye, alienda kwenye Jumba la Ufalme, akaanza kujifunza Biblia, na kisha akabatizwa—hayo yote kwa sababu ya nguvu za Neno la Mungu zinazopatikana katika trakti.
4. Lengo letu ni nini trakti zinapokuwa toleo la mwezi?
4 Nyumba kwa Nyumba: Kwa kuwa trakti ni zenye matokeo sana katika kazi ya kutoa ushahidi, mara kwa mara kuanzia Novemba, zitakuwa toleo la mwezi. Lengo letu si kutoa tu trakti, bali kutumia trakti hizo kuanzisha mazungumzo. Ikiwa mwenye nyumba amependezwa katika ziara ya kwanza au katika ziara ya kurudia, tunaweza kumwonyesha jinsi funzo la Biblia linavyofanywa kwa kutumia kitabu Biblia Inafundisha au chapisho lingine la funzo. Tunawezaje kutoa trakti nyumba kwa nyumba? Kila trakti ni tofauti, hivyo tunahitaji kuzifahamu vizuri trakti tunazotoa.
5. Tunawezaje kutoa trakti nyumba kwa nyumba?
5 Utoaji wetu unapaswa kufaa hali ya eneo na trakti tunayotumia. Tunaweza kuanza mazungumzo kwa kumpa mwenye nyumba trakti. Sehemu ya nje yenye kuvutia ya trakti hiyo huenda ikaamsha upendezi wake. Au tunaweza kumwonyesha mwenye nyumba trakti kadhaa na kumruhusu achague ile inayompendeza. Tunapohubiri katika eneo ambalo watu husita kufungua milango yao, tunaweza kushika trakti katika njia itakayomwezesha mwenye nyumba aone sehemu ya nje, au tunaweza kumwomba tupitishe kitu fulani chini ya mlango wake ambacho tungependa tupate maoni yake kukihusu. Ikiwa kichwa cha trakti hiyo ni swali, basi tunaweza kumwomba atoe maoni yake kuhusu swali hilo. Au tunaweza kubuni swali letu wenyewe ambalo litaamsha upendezi na kuchochea mazungumzo. Kisha tunaweza kusoma sehemu fulani ya trakti hiyo pamoja na mwenye nyumba, na baada ya kumwuliza maswali yaliyo katika sehemu hiyo, tutue ili kumruhusu mwenye nyumba ajieleze. Maandiko ya msingi yanaweza kusomwa kutoka katika Biblia. Baada ya kuzungumzia sehemu fulani ya trakti hiyo, tunaweza kumaliza mazungumzo yetu na kufanya mipango hususa ya kurudi. Ikiwa kwa kawaida kutaniko lenu huacha machapisho kwa wale ambao hawapatikani nyumbani, tunaweza kuacha trakti mahali ambapo wengine hawataweza kuiona.
6. Trakti zinaweza kutumiwaje kutoa ushahidi barabarani?
6 Kutoa Ushahidi Barabarani: Je, umetumia trakti kutoa ushahidi barabarani? Baadhi ya wapita-njia wana haraka na hawasimami ili kusikiliza ujumbe wetu. Huenda ikawa vigumu kutambua ikiwa wanapendezwa. Badala ya kuwapa magazeti ya karibuni zaidi bila kujua kama watayasoma, ingekuwa vyema kuwapa trakti. Kwa kuwa sehemu ya nje ya trakti huvutia na ujumbe wake ni mfupi, huenda wakachochewa kusoma trakti wakipata dakika chache. Bila shaka, ikiwa hawana haraka, tunaweza kuzungumzia sehemu fulani ya trakti pamoja nao.
7. Simulia mambo yaliyoonwa yanayoonyesha jinsi ya kutumia trakti kutoa ushahidi kwa njia isiyo rasmi.
7 Kutoa Ushahidi kwa Njia Isiyo Rasmi: Ni rahisi kutoa ushahidi kwa njia isiyo rasmi kwa kutumia trakti. Ndugu mmoja huweka trakti chache mfukoni wakati wowote anapoondoka nyumbani. Anapokutana na mtu yeyote, kama vile karani wa duka, humwuliza ikiwa angependa kusoma kitu fulani na kisha humpa trakti. Wenzi fulani wa ndoa waliposafiri kwenda jiji la New York ili kujionea jiji hilo, walijua kwamba wangekutana na watu kutoka nchi mbalimbali. Hivyo walibeba kijitabu Nations na trakti kadhaa za lugha mbalimbali. Kisha, walipomsikia mtu akizungumza lugha ya kigeni ambaye alikuwa akiuza vitu kando ya barabara au aliyeketi karibu nao kwenye bustani au katika mkahawa, wangempa trakti ya lugha yake ya asili.
8. Ni katika njia gani trakti ni kama mbegu?
8 “Panda Mbegu Zako”: Trakti zinaweza kulinganishwa na mbegu. Mkulima hutawanya mbegu zake kwa wingi kwa sababu hajui ni zipi zitakazoota na kukua. Mhubiri 11:6 husema: “Asubuhi panda mbegu zako na mpaka jioni usiache mkono wako upumzike; kwa maana hujui ni wapi hii itafanikiwa, hapa au pale, au ikiwa zote mbili zitakuwa njema.” Hivyo basi, na ‘tutawanye ujuzi sikuzote’ kwa kutumia kifaa hiki chenye matokeo sana katika kazi ya kutoa ushahidi.—Met. 15:7.
[Picha katika ukurasa wa 3]
Kwa kuwa trakti ni zenye matokeo sana katika kazi ya kutoa ushahidi, mara kwa mara kuanzia Novemba, zitakuwa toleo la mwezi