Tangaza Habari Njema za Ufalme Ukitumia Broshua
1 Ni shangwe kama nini kujua kweli na kuwa miongoni mwa wale wanaotangaza kwa bidii habari njema! Watu walio nje ya tengenezo la Mungu wanahitaji kabisa kusikia habari njema za Ufalme. Kweli kuhusu Ufalme yaelezewa kwa urahisi katika broshua Furahia Milele Maisha Duniani!, “Tazama! Mimi Ninafanya Vitu Vyote Kuwa Vipya,” na Serikali Itakayoleta Paradiso. Hizo huonyesha waziwazi maisha duniani chini ya Ufalme wa Mungu, nazo huelekeza msomaji kwenye mambo halisi ya Ufalme yasimuliwayo katika Neno la Mungu. Bila shaka, kumwangushia broshua mtu anayependezwa ndiko mwanzo tu wa kazi yetu. (1 Kor. 9:23) Na tufuatie mara moja maangusho yote, tukiwa na lengo la kutoa funzo katika kitabu Ujuzi Uongozao Kwenye Uhai Udumuo Milele. Twaweza kutimizaje hili wakati wa Agosti?
2 Broshua “Furahia Milele Maisha Duniani!” yaweza kutolewa kwa utoaji mfupi sana. Unapoonyesha jalada layo, unaweza kusema hivi:
◼ “Ningependa kukuonyesha jambo lenye ujumbe wa kupendeza.” Fungua broshua Maisha Duniani, na usome fungu la kwanza la utangulizi. Kisha endelea: “Hii pia hujibu swali hili [fungua kichwa kilicho juu ya picha nambari 8]: ‘Kwa sababu gani wanadamu wanakufa?’ Utaona ikiwa yenye kupendeza kuchunguza picha na kusoma maandiko yaliyo katika broshua hii. Ikiwa ungependa kufanya hivyo, unaweza kubaki na nakala hii kwa mchango wa ——.”
3 Utasema nini unapofanya ziara ya kurudia kwa angusho la broshua “Maisha Duniani”? Unaweza kujaribu mfikio huu:
◼ Onyesha picha nambari 49 katika broshua Maisha Duniani na uulize, “Je, hii si picha yenye kupendeza? [Ruhusu itikio.] Iko kwenye broshua ile niliyokuachia nilipokutembelea wakati uliopita. Ningependa kukuuliza swali lililo kwenye ukurasa ufuatao.” Fungua kwenye picha nambari 50 na usome lile swali “‘Je! wewe unataka kuishi milele katika hiyo paradiso nzuri?’ [Ruhusu itikio.] Ikiwa ungetaka, ona kile inachosema unapaswa kufanya: ‘Basi jifunze habari zaidi ambazo Mungu anasema.’ [Soma Yohana 17:3.] Nitafurahi kujifunza Biblia pamoja nawe bila malipo. Ungependa jambo hilo?” Fanya mpango hakika wa kurudi.
4 Unapotoa broshua “Tazama! Mimi Ninafanya Vitu Vyote Kuwa Vipya,” unaweza kuanza kwa kuonyesha picha yote iliyo kwenye jalada na kuuliza:
◼ “Unafikiri ni nini kingehitajiwa ili kufanya dunia yote iwe hivi?” Ruhusu itikio. Fafanua sehemu kadhaa za picha hiyo, zinazosimuliwa kwenye ukurasa wa 3. Kisha useme: “Watu walio wengi huhisi kwamba haiwezekani kufanyiza ulimwengu kama huu. Lakini si vigumu kwa Mungu kutimiza hilo. [Eleza mambo yaliyo kwenye fungu la 43; kisha soma Isaya 9:6, 7.] Mungu ameahidi kuleta ulimwengu mpya ambao katika huo watu kutoka mataifa yote watafurahia paradiso nzuri ajabu. Ningependa uisome broshua hii. Itakuonyesha jinsi wewe na familia yako mwezavyo kufurahia wakati ujao mzuri sana uliofanyizwa na Mungu.”
5 Kwenye ziara ya kurudia, unaweza kutumia broshua “Tazama!” kueleza kwa nini kuna uhitaji wa kujifunza zaidi kuhusu Biblia. Labda onyesha jalada tena na useme:
◼ “Nilipokuonyesha picha hii mara ya kwanza, tulikubaliana kwamba tungefurahia kuishi katika ulimwengu mzuri ajabu kama huo. Ili kufanya hilo liwezekane, kuna jambo ambalo sisi sote twahitaji kufanya.” Fungua broshua “Tazama!” kwenye fungu 52; soma fungu hilo na andiko kwenye Yohana 17:3. Unganisha habari hiyo na picha katika fungu 53 kuhusu elimu ifaayo ya Biblia, kisha ueleze kwamba Mashahidi wa Yehova huandaa mafundisho kama hayo bila malipo nyumbani. Onyesha njia yetu ya kufanya funzo, ukitumia kitabu Ujuzi.
6 Unapotoa broshua “Serikali Itakayoleta Paradiso,” unaweza kujaribu kusema hivi:
◼ “Nimesikia watu wengi wakisema wangependa kupata utatuzi wa matatizo makubwa tunayokabiliana nayo leo. [Taja matatizo ya kwenu kama vile kutoajiriwa, ongezeko la uhalifu, au matumizi mabaya ya madawa.] Mambo haya hutufanya tuhisi hatuna uhakika sana kuhusu wakati wetu ujao na wa wapendwa wetu. Je, wafikiri binadamu watatatua matatizo haya wakati wowote? [Ruhusu itikio.] Labda umesali ile Sala ya Bwana. Ikiwa ndivyo, je, ulijua kwamba kwa kweli unasali kuhusu serikali yenye uadilifu?” Fungua ukurasa 3 katika broshua Serikali, na usome mafungu mawili ya kwanza. Toa broshua hiyo.
7 Ikiwa broshua “Serikali Itakayoleta Paradiso” iliangushwa, unaweza kuanza mazungumzo kwenye ziara ya kurudia kwa kusema:
◼ “Wakati uliopita tulizungumzia uhitaji wa serikali ya uadilifu itakayotatua matatizo ya wanadamu. Broshua niliyokuachia yaonyesha Ufalme wa Mungu kuwa tumaini letu pekee. Watu fulani hujiuliza kile ambacho serikali inaweza kufanya ili kutengeneza hali yetu. Biblia huonyesha kwamba Kristo tayari amethibitisha atafanikiwa mahali ambapo viongozi wa kibinadamu wameshindwa.” Fungua broshua Serikali ukurasa 29, na usome mafungu manne ya mwisho. Kisha useme: “Je, huo si wakati ujao mzuri ajabu? Ungependa kuuona?” Ruhusu itikio. Soma Yohana 17:3. Tia moyo kujifunza zaidi kupitia funzo la Biblia nyumbani.
8 Ikiwa unatumia broshua nyingine, unaweza kutayarisha toaji zako mwenyewe, ukitumia vigezo vilivyodokezwa juu. Jaribu kuanzisha mafunzo ya Biblia katika kitabu Ujuzi. Tayarisha vizuri na utafute baraka za Yehova unapotangaza habari njema za Ufalme.