Wafundishe Wengine Lugha Safi
1 Wajapotoka katika ‘mataifa mengi, kabila, watu na ndimi,’ Mashahidi wa Yehova ni watu wenye umoja, na udugu wa kweli wa kimataifa. (Ufu. 7:9) Umoja huo ni jambo la pekee sana katika ulimwengu wa leo uliogawanyika. Kwa nini tuna umoja? Kwa sababu tumepewa ‘lugha iliyo safi.’—Sef. 3:9.
2 Matokeo Mazuri Ajabu: Lugha hii safi ni lugha gani? Ni uelewevu kamili wa kweli inayopatikana katika Neno la Mungu kumhusu Yehova na makusudi yake, hasa kweli kuhusu Ufalme wa Mungu. Kama ilivyotabiriwa na Yesu, kweli hii imeenezwa hapa duniani na “mtumwa mwaminifu na mwenye busara,” matokeo yakiwa kwamba watu wa “lugha zote za mataifa” wanaikubali ibada ya kweli.—Mt. 24:45; Zek. 8:23.
3 Watu wanapojifunza lugha safi, wanachochewa kubadili maisha yao yapatane na viwango vya Yehova. Wanajifunza “kuunganishwa kwa kufaa katika akili ileile na katika mstari uleule wa fikira.” (1 Kor. 1:10) Mafundisho ya Mungu pia huwachochea kuwa na mwenendo mzuri na usemi safi, wa kweli, hasa wanapowaambia wengine habari njema. (Tito 2:7, 8; Ebr. 13:15) Mabadiliko hayo makubwa humletea Yehova heshima.
4 Kwa mfano, mwanamume mmoja ambaye alihubiriwa habari njema alikuwa na maswali mengi na yote yakajibiwa kupitia Biblia. Kwa kuchochewa na yale aliyosikia, alianza kujifunza mara mbili kwa juma na kuhudhuria mikutano. Alishangazwa na jinsi alivyokaribishwa kwa uchangamfu sana kwenye Jumba la Ufalme, kwa kuwa wengi waliohudhuria walikuwa watu kutoka jamii mbalimbali. Baada ya muda mfupi, yeye na mke wake walifanya mabadiliko katika maisha yao na wakabatizwa. Tangu wakati huo, amesaidia watu 40 wamtumikie Yehova, kutia ndani washiriki wengi wa familia. Ajapokuwa mgonjwa, alianza kutumikia akiwa painia hivi karibuni.
5 Kuwafundisha Wengine: Matukio ya ulimwengu yanawafanya watu wengi wanyofu wachunguze tena maoni yao na maisha yao. Kama Yesu, twapaswa kuwa na tamaa ya kuwasaidia. Ziara za kurudia na mafunzo ya Biblia yenye matokeo ndiyo msingi wa kuwasaidia watu wanyofu wajifunze lugha safi.
6 Njia ambayo imethibitika kuwa yenye matokeo katika kuwasaidia watu wenye shughuli nyingi ni kuongoza funzo la Biblia kwa ufupi tukiwa mlangoni pa wenye nyumba. (km 5/02 uku. 1) Je, umewahi kujaribu njia hiyo? Unapojitayarisha kwenda kwenye ziara ya kurudia, chagua utangulizi utakaomfaa mwenye nyumba katika nyongeza ya Huduma Yetu ya Ufalme ya Januari 2002. Njia nyingi za kuwahubiria watu ambazo zimetajwa katika nyongeza hii zimekusudiwa kuongoza moja kwa moja kwenye mazungumzo ya broshua Anataka au kitabu Ujuzi. Jizoeze njia hiyo ili utumie utangulizi ambao utakuongoza moja kwa moja kwenye mazungumzo ya mojawapo ya mafungu utakayotumia. Chagua andiko moja au mawili kutoka katika fungu na ulisome na kulizungumzia, kisha malizia kwa kuuliza swali. Hiyo itaongoza kwenye fungu utakalozungumzia wakati ujao.
7 Watu wa Yehova wanapata baraka tele kwa sababu ya kujifunza lugha safi. Na tuwe na bidii ya kuwasaidia wengine wajiunge nasi katika ‘kuliitia jina la BWANA,’ na ‘kumtumikia kwa nia moja.’—Sef. 3:9.