Ushahidi Mkubwa Utatolewa

1. Zaidi ya hotuba, ni mambo gani mengine yanayoweza kuwavutia watu wanaohudhuria Ukumbusho? Eleza.

¹ Lini? Katika jioni ya Ukumbusho. Tumejitahidi sana kuwaalika watu wahudhurie pamoja nasi. Si mambo ambayo wageni watasikia tu yatakayowavutia. Baada ya kuhudhuria Ukumbusho, mwanamke mmoja alitaja kwamba alivutiwa hasa na mambo aliyojionea, yaani, urafiki wa wote waliohudhuria, usafi, na uzuri wa jumba lililojengwa na linalotunzwa na watu wa kujitolea. Kwa hiyo, si msemaji tu, bali sisi sote tutachangia kutoa ushahidi kwenye tukio hili lililo muhimu kuliko matukio mengine yote katika mwaka.—Efe. 4:16.

2. Kila mmoja wetu anaweza kuwatolea wageni ushahidi jinsi gani?

² Wasalimu Wageni kwa Urafiki: Wageni watatolewa ushahidi kwa tabasamu zetu na salamu zetu za uchangamfu. (Yoh. 13:35) Hata kama hutaweza kuzungumza na kila mtu, unaweza kujitambulisha kwa urafiki kwa watu wanaokaa karibu nawe. (Ebr. 13:1, 2) Uwe macho kuona kama kuna wageni wanaoonekana hawafahamu mtu yeyote. Yamkini walipata mwaliko tuliposambaza mialiko. Unaweza kuuliza, “Ni mara yenu ya kwanza kufika?” Waombe wakae karibu nawe, na uwe tayari kujibu maswali yoyote ambayo huenda wako nayo. Iwapo kutaniko lenu linahitaji kuondoka haraka ili kutaniko lingine liingie, huenda ukasema hivi: “Ningependa kusikia maoni yenu kuhusu hotuba. Ninaweza kuwasiliana nanyi kwa njia gani?”

3. Tunaweza kusema nini tunapowasalimu wahubiri wasiotenda?

³ Wasalimu Wasiotenda kwa Uchangamfu: Bila shaka wahubiri kadhaa wasiotenda watakuwapo, na pia watu ambao hawahudhurii mikutano mingine ila Ukumbusho. Wasalimu kwa uchangamfu, na uwaambie kwamba umefurahi sana kuwaona. (Rom. 15:7) Wazee wanaweza kuwatembelea muda mfupi baadaye ili kuwatia moyo wahudhurie mikutano. Ni matumaini yetu kwamba watu wengi watakaohudhuria watasukumwa kumsifu Mungu, si kwa sababu tu ya mambo ambayo watasikia, bali pia kwa sababu ya ‘matendo yetu mazuri ambayo wameshuhudia kwa macho.’—1 Pet. 2:12.