Jitayarishe kwa Ajili ya Ukumbusho Ukiwa na Moyo Wenye Shangwe
1. Majira ya Ukumbusho ni wakati wa pekee wa kufanya nini?
1 Ukumbusho utakaoadhimishwa Jumanne, Machi 26, utaandaa nafasi nzuri sana ya kufurahia njia ya Mungu ya kutuokoa. (Isa. 61:10) Hata kabla ya mwadhimisho huo, tukiwa na moyo wenye shangwe, tutajitayarisha vizuri. Jinsi gani?
2. Ni nini ambacho hutuchochea kufanya matayarisho kwa ajili ya mwadhimisho wa Ukumbusho?
2 Kujitayarisha kwa Ajili ya Ukumbusho: Mlo wa Jioni wa Bwana ni mwadhimisho muhimu sana usio na mambo mengi. Hata hivyo, ni vizuri kufanya mipango mapema ili mambo muhimu yasisahaulike. (Met. 21:5) Wakati na mahali panapofaa panapaswa kuchaguliwa. Mifano inayofaa ya Ukumbusho inapaswa kuandaliwa. Mahali pa kufanyia mwadhimisho huo panapaswa kusafishwa na kutayarishwa. Aliyepewa mgawo wa kuwa msemaji anapaswa kujitayarisha vizuri, na wakaribishaji na wale watakaopitisha mifano wanapaswa kupewa maagizo yanayoeleweka waziwazi. Hakuna shaka kwamba mipango mingi ya Ukumbusho tayari imefanywa. Kuthamini fidia hutuchochea tujitayarishe vizuri kwa ajili ya tukio hilo takatifu.—1 Pet. 1:8, 9.
3. Tunaweza kutayarishaje moyo wetu kwa ajili ya Mlo wa Jioni wa Bwana?
3 Kutayarisha Moyo: Ni muhimu pia kutayarisha moyo wetu ili tuelewe kabisa umuhimu wa Ukumbusho. (Ezra 7:10) Kwa hiyo, tunapaswa kutumia wakati kuchunguza usomaji wa Biblia wa pekee wa majira ya Ukumbusho na kisha kutafakari kwa undani siku za mwisho-mwisho za maisha ya Yesu akiwa duniani. Kutafakari kuhusu roho ya kujidhabihu ya Yesu kutatuchochea kumwiga.—Gal. 2:20.
4. Ni faida gani ya fidia inayokuletea shangwe kubwa zaidi?
4 Kifo cha Kristo hutetea enzi kuu ya Yehova. Hutuweka huru kutokana na dhambi na kifo. (1 Yoh. 2:2) Kifo hicho hufungua njia ya kuwa na uhusiano wenye amani pamoja na Mungu na njia ya kupata uzima wa milele. (Kol. 1:21, 22) Pia, hutusaidia kuimarisha azimio letu la kuishi kupatana na wakfu wetu kwa Yehova na kubaki imara tukiwa wanafunzi wa Kristo. (Mt. 16:24) Shangwe yako na iendelee kuongezeka unapofanya matayarisho na unapohudhuria Ukumbusho unaokaribia!