Kuboresha Ustadi Wetu Katika Huduma—Kuwazoeza Wanafunzi wa Biblia Wawe na Mazoea Mazuri ya Kujifunza

Kwa Nini Ni Muhimu: Wanafunzi wa Biblia wanahitaji mafundisho ya msingi ya Neno la Mungu, lakini ili wafanye maendeleo kufikia ukomavu wa kiroho ni lazima walishe akili na moyo wao mengi zaidi ya mambo hayo. (Ebr. 5:12–6:1) Kujifunza kunahitaji jitihada. Kunatia ndani kuhusianisha mambo mapya tunayojifunza na yale ambayo tayari tunajua, na kutambua thamani ya mambo hayo. (Met. 2:1-6) Kujifunza kufanya utafiti kutamsaidia mwanafunzi kujibu maswali ya Biblia kwa kutumia machapisho yetu ya Kikristo. Kujitahidi kutumia mambo wanayojifunza kutawasaidia kuvumilia majaribu watakayokabili katika maisha yao ya Kikristo.—Luka 6:47, 48.

Jinsi ya Kufanya Hivyo:

Kazia umuhimu wa kutafuta msaada wa Yehova katika sala kabla ya kuanza funzo.—Yoh. 14:26; 1 Kor. 2:10.
Tangu mwanzoni, mtie moyo mwanafunzi wako ajitayarishe mapema kwa ajili ya funzo la Biblia. Mwonyeshe nakala yako ya chapisho la funzo, na umfundishe jinsi ya kupiga mstari chini ya maneno au mafungu ya maneno muhimu tu.
Mruhusu ajibu kwa maneno yake mwenyewe. Epuka kugeuza kipindi cha funzo kuwa cha maswali na majibu ambapo mwanafunzi atasoma tu majibu moja kwa moja kutoka kwenye kitabu.
Mtie moyo mwanafunzi wako asome Neno la Mungu kila siku. Mwonyeshe ratiba ya usomaji wa Biblia iliyo katika Tovuti ya jw.org/sw, ambayo imepangwa kwa njia nzuri itakayomsaidia. Kusitawisha mazoea ya kusoma Biblia kila siku kunahitaji jitihada, lakini jitihada hizo hazitakuwa za bure.—Zab. 1:2, 3.
Mwonyeshe mwanafunzi wako jinsi ya kupata majibu ya maswali ya Biblia kwa kutumia Watchtower Library au Watchtower MAKTABA KWENYE MTANDAO. Msaidie aelewe alama za ufupisho za machapisho ambayo mara nyingi hutumiwa katika mikutano ya Kikristo.

Jaribu Kutumia Dokezo Hili kwa Mwezi Mzima:

Mnapomaliza kuzungumzia kichwa kidogo au sura, mwombe mwanafunzi wako wa Biblia aeleze kwa maneno machache mambo aliyojifunza. Ikiwa huna mwanafunzi wa Biblia, jizoeze kueleza kwa ufupi fungu fulani la maneno katika Biblia au katika gazeti la Mnara wa Mlinzi ili kuboresha uwezo wako wa kusoma na kuelewa.